ၼၢင်းယိင်းၸိူဝ်ႉသၢႆတႆး ၵူၼ်းတူၼ်ႈတီး၊ ပဵၼ်တူဝ်တႅၼ်း ၸိုင်ႈမိူင်းႁူမ်ႈတုမ် ၶဝ်ႈၶႄႉၶႅင်ႇ ၼၢင်းငၢမ်းလုမ်ႈၾႃႉ (2012) ဢၼ်ၸတ်းတီႈမိူင်းၵျပၼ်ႊ ၼႂ်းလိူၼ်ၼႆႉ။

ဢိင်ၼိူဝ်ၸိုင်ႈမိူင်းၵျပၼ်ႊပဵၼ်ၸဝ်ႈတႃႇၼ ၸတ်းပၢင်ပွႆးၶႄႉၶႅင်ႇ ၼၢင်းငၢမ်းလုမ်ႈၾႃႉ (Miss International 2012)  တီႈၵုၼ်ဢူဝ်ႇၵျီႇၼႃႇဝႃႇ တီႈမိူင်းၵျပၼ်ႊ။ ၸိုင်ႈမိူင်းႁူမ်ႈတုမ် သူင်ႇၼၢင်း ယိင်း ၵႂႃႇၶဝ်ႈၶႄႉၶႅင်ႇ ပွၵ်ႈဢွၼ်တၢင်းသုတ်း။ ၼၢင်းယိင်းၵေႃႉဢၼ် ထုၵ်ႇလိူၵ်ႈသၢင်သူင်ႇၵႂႃႇ ၸိုဝ်ႈႁွင်ႉဝႃႈ- ၼၢင်းၶိၼ်ႇၸေႇယႃႇ၊ ၸိူဝ်ႉသၢႆတႆး၊ ယူႇဝဵင်းတူၼ်ႈတီး- ၼႆယဝ်ႉ။

ပၢင်ၶႄႉၶႅင်ႇ ၼၢင်းငၢမ်းလုမ်ႈၾႃႉၼႆႉတေတႅပ်းတတ်း/ၶတ်းလိူၵ်ႈ ၼၢင်းယိင်းၵေႃႉႁၢင်ႈလီသုတ်း/ လဝ်းသုတ်း ၼႂ်းဝၼ်းထိ 21/10/2012 ၼႆႉ။ ၼႂ်းပီ 2012 ၼႆႉ မီးၼၢင်းယိင်းၶဝ်ႈၶႄႉၶႅင်ႇ တင်းမူတ်း 75 ၸိုင်ႈမိူင်း (75 ၵေႃႉ)။ ပၢင်ၶႄႉၶႅင်ႇၼၢင်း ငၢမ်း (ၼၢင်းလဝ်း) ၼႂ်းၸိုင်ႈမိူင်းႁူမ်ႈတုမ်ၼႆႉ ၵႃႈပူၼ်ႉ မႃးဢမ်ႇသူႈလႆႈႁၼ်။ လိူဝ်သေၼၼ်ႉ ဢိင်ၼိူဝ်ၾိင်ႈငႄႈသေ ပိူဝ်ႈတႃႇလႆႈႁၼ်ၼၢင်းယိင်း သႂ်ႇၼုင်ႈ ၶူဝ်းပိတ်းပွတ်း မိူၼ်ၼင်ႇ ၶူဝ်းလုၺ်းၼမ်ႉ ဢမ်ႇငၢႆႈငၢႆႈ။ ၵူၺ်းၵႃႈ ၼႂ်းဢမ်ႇလၢႆ ပီပူၼ်ႉမႃးၼႆႉ ၼႂ်းမိူင်းႁူမ်ႈတုမ်ၵေႃႈ မီးၵၢၼ်ၶႄႉၶႅင်ႇ ၼၢင်းလဝ်းမႃးလၢႆမိူဝ်ႈလၢႆပွၵ်ႈ၊ တေႃႇပေႃးမီးမႃး ၼၢင်းငၢမ်း မိူင်းႁူမ်ႈတုမ် (Miss Myanmar) ။

ၼၢင်းၶိၼ်ႇၸေႇယႃႇၼႆႉ ပဵၼ်ၼၢင်းယိင်းၼႂ်းၸိုင်ႈမိူင်းႁူမ်ႈတုမ်ၵေႃႉဢွၼ်တၢင်းသုတ်း ဢၼ်ဢွၵ်ႇ ၶႄႉၶႅင်ႇၼၢင်းငၢမ်း ၼွၵ်ႈမိူင်း လႄႈ ပဵၼ်ၵေႃႉဢၼ်တေၶတ်းတႃႉၾိင်ႈပၢၼ်ၵဝ်ႇသေ ၼုင်ႈၶျုတ်ႉ ႁွင်းၼႂ်း (သိူဝ်ႈပိတ်း ၵူၼ်ပိတ်း) ၸွမ်းမၢႆမီႈ ၵေႃၵမ်ၵၢၼ်လိူၵ်ႈသၢင်မၵ်းတမ်းဝႆႉ။

မိူဝ်ႈၼႂ်းဝၼ်းဢၼ်ၶႄႉၶႅင်ႇ ၼုင်ႈၶူဝ်းၸၢဝ်းၶိူဝ်းၽႂ်မၼ်းၼၼ်ႉ ၼၢင်းၶိၼ်ႇၸေႇယႃႇ လႆႈၼုင်ႈၶူဝ်း တႆးၼႄလွင်ႈမၼ်းၼၢင်း ပဵၼ်ၸိူဝ်ႉသၢႆတႆး။ ၼွၵ်ႈသေၼၼ်ႉ တီႈသၢႆပႃးဝၢႆႈၼႃႈဢူၵ်းဢၼ်မီး ၸိုဝ်ႈမိူင်းမၢၼ်ႈ (Myanmar)ၼၼ်ႉ မၼ်းၼၢင်းယင်း ဢဝ်တုင်းၸၢတ်ႈတႆးၼဵပ်းသႂ်ႇဝႆႉပႃးၵွၼ်ႇ။ (ဢိင်ဢၢင်ႈၶၢဝ်ႇထႆး Manager, Komchadluek)