ၵႃးတၢင်ႇႁႄႈႁိၼ်ၵႅဝ်ႈ (Quartz) ဢၼ်ၶွမ်ႊပၼီႊၶႄႇတင်း မၢၼ်ႈႁူမ်ႈၵၼ်ၶုတ်းႁႄႈ သူင်ႇၶဝ်ႈမိူင်း ၶႄႇ၊ ၽႃႇၼၢင်းယိင်း ၵႂႃႇၸၢႆႇၵၢတ်ႇ ၼမ်ႉၶမ်း တၢႆထင်တီႈ 2 ၵေႃႉ၊ ၾၢႆႇၶွမ်ႊပၼီႊ ဢမ်ႇႁပ်ႉပုၼ်ႈ ၽွၼ်း။

ပူၼ်ႉမႃးမိူဝ်ႈဝၼ်းထိ 14/10/12 ယၢမ်းၵၢင်ၼႂ် 07:00 မူင်း၊ လူတ်ႉလမ်းၼိုင်ႈ ဢၼ်တေႃႉတၢင်ႇႁႄႈ ႁိၼ်ၵႅဝ်ႈ၊ လုၵ်ႉတီႈလွႆမူင်ႇယွႆး ၼႂ်းၸႄႈဝဵင်းၼမ်ႉၶမ်း လတ်းၽၢၼ်ႇဝဵင်းၼမ်ႉၶမ်း ၵႂႃႇၵွင်ဝႆႉတီႈလွႆ ၵိဝ်ႇလွၵ်ႇ ၼႂ်းၸႄႈဝဵင်း မူႇၸႄႈ၊ ပိူဝ်ႈတႃႇသိုပ်ႇတေႃႉၶဝ်ႈမိူင်းၶႄႇ ၽႃႇၺႃးၼၢင်းယိင်းဢွၼ်ႇ 2 ၵေႃႉ ၽွင်းၵႂႃႇၸၢႆႇၵၢတ်ႇ ဝဵင်းၼမ်ႉၶမ်း။ ၵေႃႉၼိုင်ႈပဵၼ်ၵူၼ်းဝၢၼ်ႈၼမ်ႉၸၢင်ႉ၊ ထႅင်ႈၵေႃႉၼိုင်ႈပဵၼ် ၵူၼ်း ဝၢၼ်ႈႁွင်းလွႆ၊ ၵေႃႉၼိုင်ႈ ဢႃႇယု 16 ၊ ၵေႃႉၼိုင်ႈဢႃႇယု 17 ၊ တၢႆထင်တီႈတင်း 2 ၵေႃႉ- ၼႆယဝ်ႉ။

ၵူၼ်းႁေႃႈလူတ်ႉတၢင်ႇႁႄႈႁိၼ်ၵႅဝ်ႈ ၸိုဝ်ႈၸၢႆးယီႈ ပူႇလွႆ။ မၼ်းၸၢႆးၼႆႉ တိုၵ်ႉၶၢႆၼႃးမၼ်းမိူဝ်ႈပီၵၢႆ သေ မႃးသိုဝ်ႉလူတ်ႉတၢင်ႇႁိၼ် (ၵႃးသႅၼ်းလီၾၼ်)သေ ၵိၼ်ၸၢင်ႈတေႃႉတၢင်ႇမၢၵ်ႇႁိၼ် ၵႂႃႇတၢင်း မိူင်းၶႄႇ။

ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈဝႃႈ- ယွၼ်ႉသဵၼ်ႈတၢင်းၵႅပ်ႈ၊ လူတ်ႉၵႃးသႅၼ်းၼႆႉ  ဢမ်ႇၸႂ်ႈ သႅၼ်းယႂ်ႇ၊ ၵွပ်ႈႁေႃႈဝႆးပူၼ်ႉတီႈ လႄႈ  လေႃႇတမ်ၽႃႇၺႃးၼၢင်းယိင်းဢွၼ်ႇ 2 ၵေႃႉ ဢၼ်တိုၵ်ႉၵႂႃႇ ၵၢတ်ႇဝဵင်းၼမ်ႉၶမ်း၊ ၶၢပ်ႈတူဝ်တၢႆယိင်းဢွၼ်ႇ 2 ၵေႃႉၼၼ်ႉၵေႃႈ ၼိမၼ်တၼ ဢဝ်ၸဝ်ႈတူၼ်ၶူး ဢၼ်ၼင်ႈဝတ်ႉမၢၼ်ႈၵၢင် ႁိမ်းၼၼ်ႉ မႃးသူတ်ႇဢသုၽပၼ်သေ ပူၼ်ႉတူဝ်ၼႂ်းဝၼ်းၼၼ်ႉ ၵမ်းလဵဝ်၊ တူဝ်တၢႆၶႃသွင်ၵေႃႉၵေႃႈ ၾင်ႁိမ်းၼၼ်ႉ ၵူၺ်း- ဝႃႈၼႆ။

ၵဵဝ်ႇၵပ်းလွင်ႈၼႆႉ ၽူႈမီးပုၼ်ႈၽွၼ်းၾၢႆႇၶွမ်ႊပၼီႊ (GSM) ဢူးသူၺ်ႇတဵင်း လၢတ်ႈဝႃႈ- ၶွမ်ႊပၼီႊ ႁဝ်းၶႃႈၼႆႉ မႃးႁဵတ်းၵၢၼ်ပိူဝ်ႈ တႃႇ ၵူၼ်းၼႂ်းပိုၼ်ႉတီႈတေမီးၵၢၼ်မီးငၢၼ်းၵူၺ်း၊ ၵွပ်ႈၼၼ် ႁဝ်းၶႃႈ ၸင်ႇၶၢတ်ႈဢဝ် လူတ်ႉၵႃးၵူၼ်းၼႂ်းပိုၼ်ႉတီႈသေ တေႃႉတၢင်ႇ ႁႄႈၸိူဝ်းၼႆႉ။ လွင်ႈဢၼ်ၵႃးၽႃႇ ၵူၼ်းတၢႆၼႆႉႁဝ်းၶႃႈ ဢမ်ႇလႆႈႁူႉ၊ ၵေႃႉလႂ်ၽိတ်းၵေႃႈ ၵဵဝ်ႇၶွင်ႈၵေႃႉၼၼ်ႉၵူၺ်း။ ၵူၺ်းၵႃႈ ၼင်ႇႁိုဝ် တေသၢင်ႇထုၵ်ႇပိူဝ်ႈတႃႇတၢင်း 2 ၾၢႆႇၼၼ်ႉ တေၶဝ်ႈၵၢင်မၼ်းသေၸွႆႈထႅမ်ပၼ်ၵႂႃႇယူႇ- ဝႃႈၼႆ။

ႁႄႈႁိၼ်ၵႅဝ်ႈၼႆႉ ၵႃး 1 လမ်းတၢင်ႇလႆႈ 3 တၼ်ႊ၊ ၵႃႈတၢင်ႇ 1 တၼ်ႊ 48 ယႂၼ် (ငိုၼ်းၶႄႇ)၊ တူၵ်းငိုၼ်းမၢၼ်ႈ 6,850 ပျႃး။ ၸွမ်းၼင်ႇၶွမ်ႊပၼီႊတတ်းမၵ်းဝႆႉၼၼ်ႉ  ၼိုင်ႈဝၼ်းတေႃႉတၢင်ႇလႆႈ 2 ပွၵ်ႈ၊ ၵူၺ်းၵႃႈ ၸဝ်ႈၵႃး ၶဝ်သမ်ႉၵိူဝ်းႁၼ်တႃလႆႈငိုၼ်းၼမ် သေ တေႃႉၼိုင်ႈဝၼ်း 4-5 ၵမ်းလႄႈ ႁေႃႈၵႃးဝႆး၊ ဢမ်ႇမီးပၵ်းမီးပိူင်- ၼႆယဝ်ႉ။

ၶွမ်ႊပၼီႊၶႄႇ (GSM) ၼႆႉ မႃးသၢၼ်မိုဝ်းၵၼ်တင်းၸဝ်ႈၼႃႈတီႈမၢၼ်ႈၶဝ်သေ ၶုတ်းႁႄႈ ႁိၼ်ၵႅဝ်ႈ (Quartz) ၊ တင်ႈတႄႇႁူဝ်ပီ 2012 ၼႆႉမႃး လူတ်ႉၵႃးတေႃႉတၢင်ႇ ႁႄႈႁိၼ်ၵႅဝ်ႈၼႆႉ ၽႃႇၺႃးၵူၼ်းတၢႆ ဢမ်ႇယွမ်း 5 ၵေႃႉ။ ၼွၵ်ႈသေၼၼ်ႉ သဵၼ်ႈတၢင်းလူင် မူႇၸႄႈ-ၼမ်ႉၶမ်းၵေႃႈ လုၵွႆၼမ်- ၵူၼ်းၼမ်ႉ ၶမ်း ၸၢႆးၶမ်း လၢတ်ႈၼႄ ၼင်ႇၼႆ။

ဢွင်ႈတီႈဢွၵ်ႇႁႄႈႁိၼ်ၵႅဝ်ႈၼႆႉပဵၼ်တီႈလွႆမူင်ႇယွႆး၊ ၼႂ်းၸႄႈဝဵင်းၼမ်ႉၶမ်း တၢင်းၵႂႃႇမိူင်းဝီး၊ မီးႁိမ်းပွၵ်ႉၵၢတ်ႇ ဝဵင်းၼမ်ႉၶမ်း။ ၵိဝ်ႇလွၵ်ႇ တီႈဢၼ်ဢဝ်ႁႄႈႁိၼ်ၵႅဝ်ႈ ၵႂႃႇၵွင်ဝႆႉၼၼ်ႉ ပဵၼ်ၼႂ်းၸႄႈဝဵင်းမူႇၸႄႈ၊ ယၢၼ်ၼမ်ႉ ၶမ်း 24 ၵီႊလူဝ်ႊ (မွၵ်ႈ 15 လၵ်း)- ၼႆယဝ်ႉ။