လူတ်ႉၵႃးတၢင်ႇၶူဝ်းၵုၼ်ႇသိၼ်ၵႃႉတင်းၼမ်ၵိုတ်းၶၢင်ႉ ၶမ်ၸွမ်းတၢင်း၊ ဢမ်ႇၸၢင်ႈၵႂႃႇမႃးတင်ႈတႄႇ ပွတ်းၼႂ် ထိုင်ဝၢႆးဝၼ်းႁူဝ်ၶမ်ႈ၊ ၵွပ်ႈၶူဝ်ၼမ်ႉပေႃႈလုၵွႆ။ ၵူၼ်းတင်း လူတ်ႉၶိူင်ႈ လႆႈၸၢင်ႈႁိူဝ်းၶၢမ်ႈ။

ဝၼ်းထိ 21/10/12 (မိူဝ်ႈဝႃး) ဢိင်ၼိူဝ်ၶူဝ်ၼမ်ႉပေႃႈ ၼိူဝ်သဵၼ်ႈတၢင်းၸိုင်ႈမိူင်းႁူမ်ႈတုမ်၊ ဝူင်ႈၵၢင် မူႇၸႄႈ-ၼမ်ႉၶမ်း လုၵွႆတင်ႈတႄႇယၢမ်း 08:30 မူင်း တေႃႇထိုင်ယၢမ်းဝၢႆးဝၼ်း/ႁူဝ်ႈၶမ်ႈ 15:30 မူင်းသေ ႁဵတ်းႁႂ်ႈ လူတ်ႉၵႃးတၢင်ႇၶူဝ်းၶွင်၊ ၵုၼ်ႇသိၼ်ၵႃႉ၊ လူတ်ႉၵႃးဢွၵ်ႇတၢင်းၵႂႃႇမႃးၼိူဝ်သဵၼ်ႈ တၢင်းၼႆႉ လႆႈၵိုတ်းၶၢင်ႉ ၸွမ်းတၢင်း ဢမ်ႇၸၢင်ႈၵႂႃႇမႃးတင်းၼမ်။

ၽွင်းၶူဝ်ၵွႆၼႆႉ ၵူၼ်းၵႂႃႇတၢင်းၶဝ် လႆႈၸၢင်ႈႁိူဝ်းၶၢမ်ႈၼမ်ႉ။ ၸိူဝ်းပဵၼ်ၵူၼ်းၵႂႃႇမႃး/ၵူၼ်းၶီႇလူတ်ႉၶိူင်ႈ 1 ၵေႃႉ ၵႃႈၸၢင်ႈ ႁိူဝ်းၶၢမ်ႈ 500 ပျႃး၊ ပေႃးပဵၼ်ၸဝ်ႈၶွင်လူတ်ႉၶိူင်ႈ တင်းလူတ်ႉၶိူင်ႈ 1 လမ်း လႆႈၸၢႆႇ 1,000 ပျႃး။ သဵၼ်ႈတၢင်းၼႆႉ ပဵၼ် သဵၼ်ႈတၢင်းဢၼ်မီးၵၢၼ်လၵ်ႉတေႃႉၶူဝ်းၶွင် (ၵၢတ်ႇမိုတ်း) လုၵ်ႉတၢင်းမိူင်းၶႄႇ ၸႄႈၵဝ်ႇ ၶဝ်ႈမႃးမိူင်းတႆးတၢင်းပၢင်ႇၶမ်း။ ပေႃးၼမ်းၶဝ်ႈၶူဝ်းၶွင်ပွတ်းသဵၼ်ႈ တၢင်းၼႆႉ လႆႈၸၢႆႇငိုၼ်းပၼ်ပလိၵ်ႈမၢၼ်ႈ ဢၼ်ပႂ်ႉတီႈၼႃႈပမ်ႊ/ႁၢၼ်ႉၼမ်ႉမၼ်း တီႈႁူဝ်ၶူဝ်ၼမ်ႉ ပေႃႈၼၼ်ႉ။

ၵဵဝ်ႇၵပ်းလွင်ႈၼႆႉ ၵူၼ်းႁေႃႈၵႃး မူႇၸႄႈၵေႃႉၼိုင်ႈလၢတ်ႈဝႃႈ- သဵၼ်ႈတၢင်းသဵၼ်ႈၼႆႉ ၶူဝ်ၵႆႉၵႆႉၵွႆ၊ ၼိုင်ႈဝူင်ႈၵွႆဢမ်ႇယွမ်းမွၵ်ႈ 2 ပွၵ်ႈ၊ ပေႃးဝႃႈမႄးယဝ်ႉၼိုင်ႈပွၵ်ႈ ၵႂႃႇမႃးလႆႈၸူဝ်ႈၵႅပ်ႉၸူဝ်ႈၵမ်းၵူၺ်း ၵေႃႈ ၶိုၼ်းၵွႆထႅင်ႈ။ ၸဝ်ႈၼႃႈတီႈၾၢႆႇမႄးၶူဝ်ၶဝ်ၵေႃႈ ဢမ်ႇမႃးမႄးပၼ်ပဵၼ်တၢင်းၵၢၼ် ႁႂ်ႈၶူဝ်ၶိုၼ်း ၸႂ်ႉလႆႈလီလီ။ ၵွပ်ႈၼၼ်လႄႈ ပလိၵ်ႈဢၼ်ပႂ်ႉၵဵပ်းငိုၼ်းၼၼ်ႉၵေႃႈ ပဵၼ်ငိုၼ်းတႃႇသႂ်ႇထွင်းၵူၺ်း၊ ဢမ်ႇဢဝ်ငိုၼ်းၸိူဝ်းၼၼ်ႉ မႃးၵေႃႇၵုမ်းၶူဝ်ႁႂ်ႈၶိုၼ်းလီ၊ ၵွပ်ႈၼၼ် ႁဵတ်းႁႂ်ႈၵူၼ်းမိူင်းၵႂႃႇမႃး ယၢပ်ႇၽိုတ်ႇ- ဝႃႈၼႆ။

ၶူဝ်ၼမ်ႉပေႃႈၼႆႉ မီးဝႆႉၽႅၼ်ၵၢၼ်ပိူဝ်ႈတႃႇၶိုၼ်းမႄးၵေႃႇသၢင်ႈလင်မႂ်ႇ ၸဵမ်မိူဝ်ႈႁူဝ်ပီ 2012 ၊ ၵူၺ်းၵႃႈ တေႃႇထိုင်မိူဝ်ႈလဵဝ် တိုၵ်ႉပၵ်းလၵ်းသဝ်ၵၢင်ၼမ်ႉဝႆႉ 2 သဝ်ၵူၺ်း၊ ဢမ်ႇသိုပ်ႇၵေႃႇသၢင်ႈ ထႅင်ႈ။  ၶူဝ်ၼမ်ႉပေႃႈ လင်ဢၼ်ၸႂ်ႉယူႇမိူဝ်ႈလဵဝ်ၼႆႉ ႁဵတ်းဝႆႉၸဵမ်မိူဝ်ႈပၢၼ်ဢိင်းၵလဵတ်ႈ၊ ၵမ်ႈၼမ် ၸႂ်ႉမႆႉ ႁဵတ်းဝႆႉသေၵဝ်ႇၵႄႇႁႅင်းဝႆႉ၊ ပေႃးၵႃးတၢင်ႇၵုၼ်ႇသိၼ်ၵႃႉလတ်းၶၢမ်ႈၵႂႃႇ မႃးၼိုင်ႈၵမ်း ၶူဝ်ပေႃး သၼ်ႇလူင်ၵႂႃႇ မိူၼ်မၼ်းတေၵူၼ်ႇပင်း၊ ဝႆၵႂႃႇဝႆမႃး၊ ပေႃးသႄႈၼွတ်ႊမၼ်းလူမ်ၵေႃႈ ၸဝ်ႈၼႃႈတီႈၶဝ် ၶိုၼ်းမႄးႁတ်ႉပၼ်ႇႁႂ်ႈၵႅၼ်ႇ။

ၼႂ်းၵႄႈၵၢင်မူႇၸႄႈ-ၼမ်ႉၶမ်း တင်းမူတ်းမီးၶူဝ် 3 လင်၊ 1.ၶူဝ်ၼမ်ႉၶမ်း-မိူင်းမၢဝ်း၊ ၶူဝ်ၸိူၵ်ႈလဵၵ်း လူင်။ 2.ၶူဝ်ၼမ်ႉၶမ်း-ၼမ်ႉပုင်ႇ ဢၼ်ႁွင်ႉ ဝႃႈၶူဝ်ၼမ်ႉမႃႉ။ 3.ၶူဝ်ၼမ်ႉပေႃႈ။ ၶူဝ်ၼမ်ႉပေႃႈၼႆႉ ယၢၼ်ၼမ်ႉၶမ်းမွၵ်ႈ 16 လၵ်း။