တပ်ႉသိုၵ်းၸိုင်ႈတႆး (SSPP/SSA) ႁူပ်ႉဢုပ်ႇၸုမ်းၶပ်း ၶိုင်လွင်ႈငမ်းယဵၼ် လူင်ပွင်ၸိုင်ႈတဵင်းၸဵင်ႇ/ ၽူႈၵွၼ်း တိူင်းသိုၵ်းမၢၼ်ႈ တီႈလႃႈသဵဝ်ႈ၊ ဢုပ်ႇလွင်ႈတေတင်ႈ ဝၢၼ်ႈမႂ်ႇ ပိူဝ်ႈတႃႇၼႃႈႁိူၼ်း ၵူၼ်းသိုၵ်း ဢိၵ်ႇၵူၼ်းပၢႆႈ ၽေး၊ ၶူင်းၵၢၼ်ၽုၵ်ႇသွမ်ႈ။

ဝၼ်းထိ 10/10/12 တင်ႈတႄႇယၢမ်း 13:00-16:00 မူင်း၊ ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈ တႆး (SSPP/SSA) ႁူပ်ႉဢုပ်ႇၸုမ်းၶိုင်ပွင်လွင်ႈငမ်းယဵၼ် ၶွင်လူင်ပွင်ၸိုင်ႈတဵင်းၸဵင်ႇ လွင်ႈငမ်းယဵၼ် ၸၼ်ႉၸိုင်ႈ မိူင်းႁူမ်ႈတုမ် ပွၵ်ႈၵမ်း 2  တီႈလႃႈသဵဝ်ႈ။ ၾၢႆႇတႆးမီး  ၶွမ်ႊမတီႊငဝ်ႈငုၼ်းဢုပ်ႇလွင်ႈငမ်း ယဵၼ် ၶွင် (SSPP/ SSA) ဢၼ်ၸဝ်ႈၶုၼ်သႅင် (ႁွင်ႈၵၢၼ် ၾၢႆႇၵၢၼ်မိူင်း)ဢွၼ်ႁူဝ်၊ ၾၢႆႇမၢၼ်ႈမီးဢူး ဢွင်ႇမိၼ်း (ၵႅမ်ႁူဝ်ပဝ်ႈ ၸုမ်းၶိုင်ပွင်လွင်ႈငမ်းယဵၼ် ထိ 2) လႄႈ ဢူးတဵင်းၸေႃႇ ၵႅမ်ႁူဝ်ပဝ်ႈထိ 3) ဢွၼ်ႁူဝ်။ သွင်ၾၢႆႇလႆႈၸႂ်ၵၼ် ၵဵဝ်ႇၵပ်းလွင်ႈတႄႇဝၢၼ်ႈၵူၼ်းမႂ်ႇလႄႈ ၶူင်းၵၢၼ်ၽုၵ်ႇသွမ်ႈၶၢဝ်း ပွတ်း- ၼႆယဝ်ႉ။

ၶွမ်ႊမတီႊငဝ်ႈငုၼ်းဢုပ်ႇလွင်ႈငမ်းယဵၼ် ၶွင် (SSPP/SSA) ဢၼ်ၵႂႃႇဢုပ်ႇမၢၼ်ႈၵမ်းၼႆႉ ပဵၼ်ၸိူဝ်း လႆႈၶွတ်ႇၽွတ်ႈဝႆႉ သေၵႂႃႇႁူပ်ႉဢုပ်ႇမၢၼ်ႈ လွင်ႈငမ်းယဵၼ်ၸၼ်ႉၸိုင်ႈမိူင်းႁူမ်ႈတုမ် တီႈတူၼ်ႈတီး ပူၼ်ႉမႃးမိူဝ်ႈ ဝၼ်းထိ 28/01/12 ၊ မီး 1.ၸဝ်ႈၶုၼ်သႅင် (ႁွင်ႈၵၢၼ်ၾၢႆႇၵၢၼ်မိူင်း)၊ 2.ၸဝ်ႈႁၢၼ်ၶိူဝ်း မၢဝ်း (ၵႅမ်ၽူႈၼမ်းၼႂ်း မၢႆ 1)၊ 3.ၸဝ်ႈၵျေႃႇလႃႉ (ၽူႈၼမ်း ၼႂ်းႁွင်ႈၵၢၼ်ၵူႈလွင်ႈလွင်ႈ)၊ 4.ၸဝ်ႈ ထိူၼ်ႇမိူင်း (ၽူႈၶဝ်ႈပႃးၼႂ်းငဝ်ႈငုၼ်း ၵၢၼ်မၢၵ်ႈမီး)။ 5.ၸဝ်ႈသိူဝ်ပိူင်ႇၾႃႉ (ၵႅမ်ၽူႈ ၵွၼ်းတပ်ႉၸုမ်း 72)- ၸိူဝ်းၼႆႉ။ ၾၢႆႇမၢၼ်ႈမီးၸွမ်ၽွင်းလူင် မိူင်းတႆး ၸဝ်ႈဢွင်ႇမျၢတ်ႈ လႄႈၸုမ်းၽွင်းလူင်ၶဝ် ၵမ်ႈၽွင်ႈ (ၾၢႆႇပႃႇမႆႉ၊ ၾၢႆႇမိူင်ၼမ်ႉ)၊ ၸဝ်ႈသိုၵ်းလူင် ဢွင်ႇတူႇ (ၽွင်းလူင်ၾၢႆႇႁူမ်ႇလူမ်ႈလႄႈ လႅၼ်လိၼ် လူင်ပွင်ၸိုင်ႈၸႄႈမိူင်းတႆး)၊ ၽူႈၵွၼ်းတိူင်းသိုၵ်း ၸဵင်ႇႁွင်ႇ ဝၼ်းဢွၵ်ႇ (လႃႈသဵဝ်ႈ) ထုၼ်းထုၼ်းၼွင်ႇ၊ ၽူႈၵွၼ်းတိူင်းသိုၵ်းဝၼ်းဢွၵ်ႇၵၢင် (ၶူဝ်လမ်) မိၼ်းၼွင်ႇ ၵေႃႉယၢမ်ႈပဵၼ်ၽူႈ ၵွၼ်းႁူင်းႁဵၼ်းသိုၵ်းတီႈပႃႉထူး- ၸိူဝ်းၼႆႉ။

ၽူႈၶၢၼ်ပၢၵ်ႇ (SSPP/SSA) ၸဝ်ႈႁၢၼ်ၸၢႆးလႃႉလၢတ်ႈဝႃႈ- ပၢင်ဢုပ်ႇဢူဝ်းၵမ်းၼႆႉ လူင်ပွင်ၸိုင်ႈ ၸွႆႈပၼ်ၶဝ်ႈသၢၼ် 1,000 ထူင်၊ ၸၢၵ်ႈထႆၼႃး 2 လမ်း။ ဢုပ်ႇလွင်ႈၶူင်းၵၢၼ်ပၢႆးၽုၵ်ႇသွမ်ႈ၊ လွင်ႈတေတႄႇဝၢၼ်ႈမႂ်ႇ ပိူဝ်ႈတႃႇၼႃႈႁိူၼ်းၵူၼ်းသိုၵ်း လႄႈ ၵူၼ်းပၢႆႈၽေးၵႄႈၵၢင်မိူင်းသူႈ တင်းတၢင်ႉယၢၼ်း ပွတ်းၼမ်ႉလဝ်း။ ဢွင်ႈတီႈလိၼ် ဢၼ်တေဢမ်ႇတုမ်ႉတိူဝ်ႉၵူၼ်းဝၢၼ်ႈ ၼၼ်ႉ တေဢဝ်ႁဵတ်းသူၼ် ၽုၵ်ႇမၢၵ်ႇၶဝ်ႈတဝ်ႈၼမ်ႉ မိူၼ်ၼင်ႇၽုၵ်ႇၶဝ်ႈၵၢပ်ႇ၊  မၼ်း။ လွင်ႈၸိူဝ်းၼႆႉ တေဝၢင်းၽႅၼ်သေ ႁဵတ်းၵႂႃႇ။

သိုပ်ႇလၢတ်ႈဝႃႈ- ဢၼ်ဝႃႈတေတႄႇဝၢၼ်ႈမႂ်ႇ (ပိူဝ်ႈတႃႇၼႃႈႁိူၼ်းၵူၼ်းသိုၵ်းလႄႈၵူၼ်းပၢႆႈၽေး) ၼႂ်းၵႄႈၵၢင် မိူင်းသူႈတင်း တၢင်ႉယၢၼ်း တင်ႈတႄႇပွတ်းႁူဝ်ၼမ်ႉ၊ တွင်ႁဵဝ်းတေႃႇထိုင်ၼမ်ႉ လဝ်း/လွႆၶဵဝ် ၸိူဝ်းၼၼ်ႉ တေမီးၵၢၼ်လူင်းထတ်းတူၺ်း ပိုၼ်ႉတီႈၵွၼ်ႇ၊ ပၼ်ပိုၼ်ႉတီႈၼၼ်ႈတီႈ ၼႆႈၼႆၵေႃႈ ပႆႇမီးလွင်ႈလူင်းလၢႆးမိုဝ်း ၵၼ်၊ တပ်ႉမၢၼ်ႈၶဝ်ၵေႃႈယင်းပႆႇထွၼ်၊ တူၵ်းလူင်းၵၼ်ဝႆႉပဵၼ် သူပ်းပဵၼ်ၵႂၢမ်းၵူၺ်း။ ၵဵဝ်ႇၵပ်းလွင်ႈၵၢၼ်သိုၵ်း ၼႆႉ ဢမ်ႇဝႃႈလွင်ႈတႃႈသၢမ်ပူး၊ လွင်ႈတူင်ႉၼိုင်ၵၢၼ် သိုၵ်း ၾၢႆႇၼိူဝ်တၢင်းၵႃးသီႇပေႃႉၸိူဝ်းၼႆႉ ဢမ်ႇဢုပ်ႇသင် သေပိူင်၊ တီႈတႃႈသၢမ်ပူးၼႆႉတႃႇတေ ငိူင်ႉထွၼ်ပၼ်ၵေႃႈ ဢမ်ႇမီး- ဝႃႈၼႆ။ (တင်ႈတႄႇၵိုတ်းယိုဝ်းၵၼ်မႃး SSPP/SSA လႆႈပဵၼ်ပၢင်တိုၵ်း ၵၼ်တင်း သိုၵ်းမၢၼ်ႈဢမ်ႇယွမ်း 40 ပွၵ်ႈ)။

ၼွၵ်ႈသေၼၼ်ႉ ၶၢဝ်ႇမိၸ်ႉၸိမ ၵေႃႈလၢတ်ႈဝႃႈ- ၶေႃႈလႆႈၸႂ်ၵၼ်လွင်ႈတေတႄႇဝၢၼ်ႈမႂ်ႇၼၼ်ႉ ဢၢၼ်းဝႆႉလင်ႁိူၼ်း 350 လင်၊ တေပဵၼ်ႁိူၼ်းပႅၼ်ႈမုင်းလဵၵ်း။ ၼင်ႇႁိုဝ်ပေႃးတေလႆႈၼမ်ႉ၊ မီးသဵၼ်ႈတၢင်းၵႂႃႇငၢႆႈမႃးလူမ်ၸိူဝ်းၼႆႉ တေတင်ႈၶွမ်ႊ မတီႊသေလူင်းၵူတ်ႇထတ်းလဵပ်ႈႁဵၼ်းပိုၼ်ႉ တီႈ- ဝႃႈၼႆ။