ၸွမ်းၼင်ႇလႆႈတွင်ႈထၢမ်ၽူႈၶၢၼ်ပၢၵ်ႇ RCSS/SSA ၸဝ်ႈႁၢၼ်လၢဝ်သႅင် ၵဵဝ်ႇၵပ်းလွင်ႈသိုၵ်းဝႃႉၵုမ်းတူဝ် တိၺွပ်းသိုၵ်းတႆးဝႆႉၼၼ်ႉ မၼ်းၸဝ်ႈတွပ်ႇလၢတ်ႈငဝ်း လၢႆးဢၼ်ပဵၼ်ယူႇမိူဝ်ႈလဵဝ်ၵႂႃႇၼင်ႇၼႆ။

ထၢမ်-ဢၼ်သိုၵ်းဝႃႉတိၺွပ်းသိုၵ်းတႆးဝႆႉၼၼ်ႉ ပွႆႇပၼ်ၶိုၼ်းယဝ်ႉၶႃႈႁႃႉ?။

တွပ်ႇ-ပႆႇပွႆႇပၼ်၊ ပိူဝ်ႈတႃႇႁဝ်းၶႃႈၵႂႃႇဢုပ်ႇၵၼ်ၼၼ်ႉ သိုၵ်းဝႃႉၶဝ်ပွႆႇၵူၼ်းမႃး 2 ပွၵ်ႈ၊ ၽိူဝ်ႇႁဝ်းၶႃႈသူင်ႇ တူဝ်တႅၼ်းၵႂႃႇဢုပ်ႇ တီႈမိူင်းသၢတ်ႇ ၵူၼ်းၼင်ႈလုမ်းတီႈမိူင်းသၢတ်ႇၶဝ်သမ်ႉဢမ်ႇႁပ်ႉဢုပ်ႇ၊ ႁဝ်းၶႃႈလႆႈ ပွႆႇၵူၼ်း ၵႂႃႇဢုပ်ႇ 2 ပွၵ်ႈယဝ်ႉ-ဝႃႈၼႆ။

ထၢမ်-ဢၼ်ဢုပ်ႇၵၼ်ၼႆႉ တေလႆႈဝႆႉၸၼ်ႉလႂ်သေဢုပ်ႇ။

တွပ်ႇ-ၾၢႆႇသိုၵ်းဝႃႉၶဝ်ဢမ်ႇတတ်းမၵ်းၸၼ်ႉသင်မႃးတီႈႁဝ်း၊ ၵွပ်ႈၼၼ် တေဢဝ်ၸၼ်ႉသင်ၵႂႃႇဢုပ်ႇၶဝ် ၵေႃႈ ဢမ်ႇႁူႉ။

ထၢမ်-လႆႈငိၼ်းဝႃႈၶုၼ်သိုၵ်းၸၢႆးၶႅင်ႇၼၼ်ႉ ပွႆႇပၼ်ယဝ်ႉၼႆၸွင်ႇၸႂ်ႈၶႃႈႁႃႉ?။

တွပ်ႇ-လွင်ႈၼႆႉႁဝ်းၶႃႈပႆႇၸၢင်ႈယိုၼ်ယၼ်ၸွမ်းသင်။

ထၢမ်-ယူႇတီႈၶွင်ႊသီႊဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA တင်းသိုၵ်းမၢၼ်ႈလႆႈပဵၼ် ပၢင်တိုၵ်းၵၼ်၊ ၾၢႆႇၼိုင်ႈ တင်းသိုၵ်းဝႃႉၵေႃႈငဝ်းလၢႆးဢမ်ႇပေႃးလီၸိူင်ႉၼႆ ပၼ်ႁႃၼႆႉတေႁဵတ်းႁိုဝ်ၵႄႈ လိတ်ႈ၊ မီးပေႃႇလသီႇၸိူင်ႉႁိုဝ်ၶႃႈ?။

တွပ်ႇ-ၵဵဝ်ႇၵပ်းလွင်ႈလူင်ပွင်ၸိုင်ႈၵေႃႈလီ၊ ၵဵဝ်ႇၵပ်းလွင်ႈၸုမ်းယိပ်းၵွင်ႈၵၢင်ႇၼႂ်းမိူင်းတႆးႁဝ်းၵေႃႈလီ၊ ပိူင်လူင်မၼ်း ႁဝ်းၶႃႈ ထုၵ်ႇလီႁႃတၢင်းၶဝ်ႈႁႃၵၼ်၊ ဢဝ်လၢႆးဢုပ်ႇဢူဝ်းၵၼ်ၵႄႈလိတ်ႈ၊ ဢမ်ႇၸႂ်ႈဢဝ်လၢႆး ၵွင်ႈၵၢင်ႇၵႄႈလိတ်ႈ။ ၵၢၼ်ဢၼ်ႁဝ်းၶႃႈ ထုၵ်ႇလီလႆႈႁဵတ်းသၢင်ႈၼႆႉ မၼ်းပဵၼ်ၵၢၼ်ဢၼ်ႁပ်ႉၵႄႈ လိတ်ႈၵၼ်။ ႁဝ်းၶႃႈတႄႉၶႂ်ႈဢဝ်လၢႆးၵတ်းယဵၼ်သေၵႄႈလိတ်ႈၵႂႃႇၵူၺ်း၊ တႃႇၵႂႃႇၶၢဝ်းၼႃႈၵေႃႈတေ ဢဝ်လၢႆးၵတ်းယဵၼ် ၵႄႈလိတ်ႈၵႂႃႇ၊ တႃႇတေဢဝ်လၢႆးသိုၵ်းသိူဝ်ၵႄႈလိတ်ႈပၼ်ႁႃၸိူဝ်းၼႆႉ ႁဝ်းၶႃႈတေ ဢမ်ႇႁဵတ်း။

ထၢမ်-ပိူဝ်ႈတႃႇၵူၼ်းသိုၵ်းၸိူဝ်းၺႃးၵုမ်းတူဝ်တိၺွပ်းဝႆႉ လႆႈလွတ်ႈပူၼ်ႉဢွၵ်ႇမႃးၼၼ်ႉ ၾၢႆႇတပ်ႉသိုၵ်း ၸိုင်ႈတႆးႁၢင်ႈႁႅၼ်းဝႆႉ ၸိူင်ႉႁိုဝ်ၶႃႈ?။

တွပ်ႇ-ပိူင်လူင်မၼ်း ႁဝ်းၶႃႈၶႂ်ႈဢဝ်လၢႆးၵတ်းယဵၼ်သေ ဢုပ်ႇဢူဝ်းၵၼ်ၵႂႃႇ၊ ၵႄႈလိတ်ႈၵၼ်ၵႂႃႇမိူၼ်ၼင်ႇ လၢတ်ႈမိူဝ်ႈၵႆႈ။ ၵွပ်ႈၼၼ်လႄႈ ၾၢႆႇဝႃႉၶဝ်တေလၢတ်ႈမႃးၸိူင်ႉႁိုဝ် ႁဝ်းၶႃႈၵေႃႈပႂ်ႉတူၺ်းယူႇ၊ ၶဝ်ၶႂ်ႈ ဢဝ်လၢႆးၸိူင်ႉႁိုဝ်ၵႄႈလိတ်ႈၸိူဝ်းၼႆႉႁဝ်း ၶႂ်ႈႁူႉၵၢင်ၸႂ်ၶဝ်၊ ပေႃးဝႃႈႁဝ်းလႆႈႁူႉၵၢင်ၸႂ်ၶဝ်ၵေႃႈ ပိူဝ်ႈတႃႇ တေႁဵတ်း ၸွမ်းၼၼ်ႉ ႁဝ်းၶႃႈတေႁႃတၢင်းမၼ်းယူႇ။

ထၢမ်-ၵူၼ်းမိူင်း ဢွၼ်ၵၼ်မႆႈၸႂ်သေတိတ်းတေႃႇတွင်ႈထၢမ်မႃးတီႈၸုမ်းၶၢဝ်ႇၽူႈတွႆႇႁွၵ်ႈ၊ မႆႈၸႂ်ဝႃႈၾၢႆႇ တပ်ႉသိုၵ်းၸိုင်ႈတႆး ဢမ်ႇသႂ်ႇၸႂ်ၼိူဝ်ၵူၼ်းသိုၵ်း၊ ဢမ်ႇပေႃးတူင်ႉတိုၼ်ႇၵႃႈႁိုဝ်။ ၵွပ်ႈၼၼ် ဢၼ်ၵူၼ်းမိူင်း ဝႃႈ မႃးၸိူင်ႉၼႆၼႆႉ သူၸဝ်ႈၶႂ်ႈတုမ်ႉ တွပ်ႇၸိူင်ႉႁိုဝ်ၶႃႈ?။

တွပ်ႇ-ဢၼ်ၵူၼ်းမိူင်းမႆႈၸႂ်သေတွင်ႈထၢမ်မႃးၼႆႉ ႁဝ်းၶႃႈယိၼ်းၸူမ်းၸွမ်း၊ ပိူဝ်ႈတႃႇဢဝ်လွင်ႈငမ်းယဵၼ် ၵႄႈလိတ်ႈပၼ်ႁႃ ၸိူဝ်းၼႆႉ ႁဝ်းၶႃႈၶႂ်ႈႁဵတ်းပိူင်လဵဝ်ၵူၺ်းဢမ်ႇပဵၼ်လႆႈ။ ထႅင်ႈၾၢႆႇၼိုင်ႈၵေႃႈ ထုၵ်ႇလႆႈမီး ၵၢင်ၸႂ်ၶႂ်ႈႁဵတ်းလွင်ႈၽွမ်ႉႁူမ်ႈၵွၼ်ႇ။ ၵွပ်ႈၼၼ် ၾၢႆႇၼိုင်ႈၶႂ်ႈပဵၼ်ၶႂ်ႈႁဵတ်းၸိူင်ႉႁိုဝ်၊ ၾၢႆႇႁဝ်းသမ်ႉၶႂ်ႈပဵၼ် ၶႂ်ႈႁဵတ်းၸိူင်ႉႁိုဝ်ၸိူဝ်းၼႆႉ ႁဝ်းမႃးငူပ်ႉငိၵၼ်သေ ႁဵတ်းၵႂႃႇ ၸင်ႇတေပဵၼ်ၵၢၼ်။ မိူၼ်ၵူၼ်းသိုဝ်ႉၶၢႆၵၼ်၊ ၵေႃႉၼိုင်ႈၶႂ်ႈၶၢႆၵႃႈႁိုဝ် ၵေႃႉၼိုင်ႈသမ်ႉၶႂ်ႈသိုဝ်ႉၵႃႈႁိုဝ်ၸိူဝ်းၼႆႉ ပေႃးမႅၼ်ႈၵၼ်ၸင်ႇ သိုဝ်ႉၶၢႆၵၼ်ပဵၼ်ၵၢၼ်။

ထၢမ်-ၵူၼ်းၸိူဝ်းၺႃးတိၺွပ်းဝႆႉၼၼ်ႉ တင်းမူတ်းမီးလၢႆၵေႃႉတႄႉတႄႉၶႃႈ။

တွပ်ႇ-ၸွမ်းၼင်ႇသုၼ်ႇတူဝ်လႆႈႁူႉၼၼ်ႉမီး 14 ၵေႃႉ။

ထၢမ်-ဢိင်ၼိူဝ်ၸုမ်းသိုၵ်းဝႃႉတိၺွပ်းၵုမ်းတူဝ်သိုၵ်းတႆးၼႆႉသေ ၵမ်းလိုၼ်းသုတ်းၶႂ်ႈၾၢၵ်ႇၵႂၢမ်းသင်ႇ လၢတ်ႈထိုင်ၵူၼ်းမိူင်း ၸိူင်ႉႁိုဝ်ၶႃႈ?။

တွပ်ႇ-ဢိင်ၼိူဝ်ၵူၼ်းမိူင်းတွင်ႈထၢမ်မႃး၊ မႆႈၸႂ်ၼိူဝ်ၵူၼ်းသိုၵ်းႁဝ်းၶႃႈၼၼ်ႉၵေႃႈ ႁဝ်းၶႃႈယိၼ်းၸူမ်း ၶွပ်ႈၸႂ်၊ ပိူဝ်ႈတႃႇႁႂ်ႈလီတီႈ သုတ်းၼၼ်ႉ ႁဝ်းၶႃႈတေၶတ်းၸႂ်ႁဵတ်းသၢင်ႈၵႂႃႇယူႇ- ဝႃႈၼႆ။

ပူၼ်ႉမႃးမိူဝ်ႈဝၼ်းထိ 30/07/12 သိုၵ်းဝႃႉၵႂႃႇတိၺွပ်းသိုၵ်းတႆး တီႈလွႆပုင်ႇၽႃပုင်ႇတွင်း ၽွင်းတိုၵ်ႉႁဵတ်း တပ်ႉမႂ်ႇ ၼႂ်းၸႄႈဝဵင်း မိူင်းတူၼ်၊ ဢၼ်တေႃႇၼႃႈၵၼ်တင်းလွႆသၼ်ၸု ငဝ်ႈငုၼ်းတပ်ႉၸုမ်း 727 ႁိမ်းလႅၼ်လိၼ်ထႆး၊ တေႃႇၼႃႈၸႄႈဝဵင်းမိူင်း ၾၢင်။ ၵဵဝ်ႇလူၺ်ႈလွင်ႈၼႆႉ သိုၵ်းဝႃႉၸိၼႄးဝႃႈ သိုၵ်းတႆး ပူၼ်ႉပႅၼ်ၶႂၢၵ်ႈၼႃႈလိၼ်ၶွင်ဝႃႉ။ ၵူၺ်းၵႃႈၾၢႆႇသိုၵ်းတႆး တွပ်ႇလၢတ်ႈ ၼႄလွင်ႈတၢင်းဝႃႈ ပိူဝ်ႈတႃႇဢဝ် ႁူမ်ႇလူမ်ႈ ၵူၼ်းပၢႆႈၽေးၵႂႃႇႁဵတ်းၵၢၼ် ၽုၵ်ႇသွမ်ႈ၊ ၵွပ်ႈဝႃႈဝၢႆး RCSS/SSA ၵိုတ်းယိုဝ်းၵၼ် တင်းလူင်ပွင် ၸိုင်ႈမၢၼ်ႈမႃးၼႆႉ တၢင်းၸဝ်ႈတႃႇၼ ၸုမ်း NGO ၸိူဝ်းၸွႆႈထႅမ်ငိုၼ်းတွင်းၵူၼ်းပၢႆႈၽေးလူတ်း ယွမ်းလူင်းၼမ်၊ ႁဵတ်းႁႂ်ႈပဵၼ်ႁၢပ်ႇလူင်တေႃႇတပ်ႉသိုၵ်း- ၼႆယဝ်ႉ။