ၸၢႆးၵျေႃႇဢေး ဝၢၼ်ႈပဵင်းထွၼ်ႇ ဢၼ်ထုၵ်ႇသိုၵ်းမၢၼ်ႈ တိၺွပ်းပေႃႉထုပ်ႉ ၺႃးမၢႆမီႈမတ်ႉတႃ 17 (1) ဢဝ်လိူင်ႈ။ ၼွၵ်ႈသေၼၼ်ႉ ပူႇၵႄႇဝၢၼ်ႈတင်းၵူၼ်းဝၢၼ်ႈလၢႆၵေႃႉ ၵေႃႈ တိုၵ်ႉထုၵ်ႇၵုမ်းတူဝ်ဝႆႉတီႈ တပ်ႉမၢၼ်ႈ/ႁူင်းပလိၵ်ႈ မၢၼ်ႈ။

မိူဝ်ႈလဵဝ် ၸၢႆးၵျေႃႇဢေး ၵေႃႉဢၼ်သိုၵ်းမၢၼ်ႈၸိၼႄးဝႃႈ ၵဵဝ်ႇၶွင်ႈသိုၵ်းတႆးသေ ထဵတ်ႈထၢမ်ပေႃႉထုပ်ႉ ဢဝ်ႁဵတ်းတူဝ်ယိူဝ်ႇ ပိူဝ်ႈတႃႇတိၺွပ်းပေႃႉထုပ်ႉၵူၼ်းဝၢၼ်ႈၵေႃႉၼိုင်ႈယဝ်ႉၵေႃႈၼိုင်ႈၼၼ်ႉ ၺႃးသူင်ႇ ၵႂႃႇၶင်ဝႆႉ ၼႂ်းတပ်ႉၶလယ 41 လႃႈသဵဝ်ႈ၊ မၼ်းၸၢႆး ၺႃးၸွႆးတြႃးဝႆႉတီႈႁူင်းပလိၵ်ႈမၢႆ 1 ၊ လူၺ်ႈမၢႆမီႈ မတ်ႉတႃ 17 (1) ဢၼ်ဝႃႈလူၺ်ႈလွင်ႈတိတ်းတေႃႇၵပ်းသိုပ်ႇ ၸုမ်းၼွၵ်ႈမၢႆမီႈ- ၼႆယဝ်ႉ။

ၵူၼ်းဝၢၼ်ႈတင်းမူတ်း 4 ၵေႃႉ ၸိူဝ်းထုၵ်ႇသိုၵ်းမၢၼ်ႈတိၺွပ်း ပေႃႉထုပ်ႉ မိူၼ်ၼင်ႇ 1.ၸၢႆးၵျေႃႇဢေး ဝၢၼ်ႈပဵင်းထွၼ်ႇ၊ 2.ၸၢႆးတဵင်း ဝၢၼ်ႈၼႃးၵေး၊ 3.ၸၢႆးလႃႉ ဝၢၼ်ႈပဵင်းလူင်၊ 4.ၸၢႆးၵမ်ႇ ဝၢၼ်ႈၼွင်ဢေႃႈ။ ၶဝ်ၸိူဝ်းၼႆႉ မၢင်ၵေႃႉၵႂႃႇမီးၼႂ်းတပ်ႉ ပၢင်သဝ်းပလိၵ်ႈ တီႈဝၢၼ်ႈၸၢမ် (မိူင်းမု)၊ မၢင်ၵေႃႉသမ်ႉၵႂႃႇမီးၼႂ်း တပ်ႉၶမယ 324 ၊ ၵူၺ်းၵႃႈ မၢင်ၵေႃႉဝႃႈဢမ်ႇၸႂ်ႈ၊ ၸၢႆးတဵင်း တင်းၸၢႆးလႃႉၼၼ်ႉ သိုၵ်းမၢၼ်ႈႁႅမ်တၢႆ ယဝ်ႉ။ ၵူၺ်းၵႃႈ ဢၼ်ၼႄႉၼွၼ်းၼၼ်ႉ ၸၢႆးၵျေႃႇဢေး ၵႂႃႇမီးတီႈတပ်ႉမၢၼ်ႈၶလယ 41 (လႃႈသဵဝ်ႈ)၊ ၵွပ်ႈဝႃႈ ၵူၼ်းႁိူၼ်းၵူၼ်းယေးမၼ်း လႆႈၵႂႃႇဢႅဝ်ႇၸႂ်းမၼ်းၸၢႆးတီႈၼၼ်ႈမႃး- ၼႆယဝ်ႉ။

ၵူၼ်းဝၢၼ်ႈၼႂ်းပိုၼ်ႉတီႈၵေႃႉၼိုင်ႈလၢတ်ႈဝႃႈ- ၸၢႆးၵျေႃႇဢေးၼႆႉ ပဵၼ်လုၵ်ႈၸၢႆးၵေႃႉလဵဝ်ၼႂ်းၼႃႈႁိူၼ်း၊ လိူဝ်သေၼၼ်ႉ မီးၼွင်ႉယိင်း 3 ၵေႃႉ။ ၵေႃႉပဵၼ်ပေႃႈမၼ်းဢမ်ႇႁဵတ်းၵၢၼ်သင်လႆႈ၊ မၼ်းၸၢႆးပဵၼ်ၵူၼ်း ႁဵတ်းၵၢၼ်လၵ်းၼႂ်းၼႃႈႁိူၼ်း၊ ပိူင်လူင်မၼ်း ႁဵတ်းႁႆႈႁဵတ်းသူၼ်၊ ၼွင်ႉယိင်းမၼ်းၵေႃႈတိုၵ်ႉၶဝ်ႈႁူင်း ႁဵၼ်း၊ ဢၼ်ၵိူတ်ႇလိူင်ႈၼႆႉသမ်ႉပဵၼ်ၶၢဝ်းႁိုဝ်ႉၶၢဝ်းၾူၼ်၊ ၶၢဝ်းႁဵတ်းၵၢၼ်လႄႈ တုမ်ႉတိူဝ်ႉၼႃႈႁိူၼ်းၶဝ် တႄႉတႄႉ။ ၸၢႆးၵမ်ႇ ဝၢၼ်ႈၼွင်ဢေႃႈၼၼ်ႉ ၺႃးတိ 2 ၵမ်းပႃးၵမ်းၼႆႉ၊ တိၵမ်း ၼိုင်ႈယဝ်ႉပွႆႇသေမႃးတိ ထႅင်ႈၵမ်ႈၼိုင်ႈ၊ ၵမ်းၼႆႉတႄႉပႆႇပူၼ်ႉလွတ်ႈၶိုၼ်း- ဝႃႈၼႆ။

ၼွၵ်ႈသေၼၼ်ႉ ပူႇၵႄႇဝၢၼ်ႈၼႃးႁူၵ်းၵေႃႈ ၺႃးသိုၵ်းမၢၼ်ႈထဵတ်ႈထၢမ်ပေႃႉထုပ်ႉ။ ၵပ်းၵၢႆႇလွင်ႈၼႆႉ ပူၼ်ႈမႃးမိူဝ်ႈဝၼ်းထိ 03/09/12 မီးၵူၼ်းဝၢၼ်ႈၵႂႃႇဢဝ်ၵႆႇတၢႆတီႈႁူင်းလဵင်ႉၵႆႇ (ၾၢမ်ႊၵႆႇ) ၶွင်ၵူၼ်းဝၢၼ်ႈ၊ လုၵ်ႈဢွၼ်ႇတင်းၵူၼ်းလူင်ၵႂႃႇဢဝ်ၵႆႇမႃး ၵိၼ်ၼိုင်ႈၵေႃႉလႂ် 2-3 တူဝ်။ ၽွင်းၼၼ်ႉသိုၵ်းမၢၼ်ႈတပ်ႉၶမယ 324 ဢၼ်ၵႂႃႇတူင်ႉၼိုင်သွၵ်ႈတဝ်ပွတ်းၼၼ်ႉသမ်ႉႁၼ် မႅၼ်ႈသေ ၸိၼႄးဝႃႈၵူၼ်းဝၢၼ်ႈဢဝ်ၵႆႇတၢႆ ၵႂႃႇပၼ် သိုၵ်းတႆး။ ႁွင်ႉပူႇၵၢင်ႉဝၢၼ်ႈၼႃးႁူၵ်းမႃးသေထၢမ်ဝႃႈ-ဝၢၼ်ႈသူၼႆႉ ၵမ်ႉၸွႆႈသိုၵ်းတႆးႁႃႉ၊ ပူႇၵႄႇတွပ်ႇဝႃႈ ဢမ်ႇၸႂ်ႈၼႆၵေႃႈ ဢမ်ႇလွတ်ႈတၢင်းပေႃႉထုပ်ႉ။ (ဝၢၼ်ႈၼႃးႁူၵ်း မီးၾၢႆႇႁွင်ႇဝဵင်းၼမ်ႉတူႈ 5 လၵ်း)။

ၶမ်ႈဝၼ်းထိ 3 ၼၼ်ႉ သိုၵ်းမၢၼ်ႈဢဝ်ၵႂႃႇထုပ်ႉပေႃႉတီႈဝတ်ႉ/ၵျွင်းမုၼ်ၸဝ်ႈ ၼႃးႁူၵ်း၊ မီးသိုၵ်းမၢၼ်ႈ 3 ၵေႃႉ၊ ၵေႃႉၼိုင်ႈ ၸၼ်ႉၶုၼ်ႁၢၼ် (2 တုမ်ႇ)၊ ၵေႃႉၼိုင်ႈၸၼ်ႉၶုၼ်သိုၵ်း (3 တုမ်ႇ) တင်း သိုၵ်းမၢၼ်ႈၵေႃႉ ၼိုင်ႈ ဢွၼ်ၵၼ်ပေႃႉထုပ်ႉပူႇၵႄႇ ၼႂ်းသႃလႃး(ၸလွပ်ႈ)တီႈဝတ်ႉတင်းၶိုၼ်း၊ သမ်ႉဢဝ်တၢၵ်ႇၾူၼ်ဝႆႉသေ ႁဵတ်းႁႂ်ႈ ပူႇၵႄႇလိုမ်းတူဝ်ၵႂႃႇ။ ထိုင်ၵၢင်ၼႂ်မိူင်းလႅင်းမႃး သူင်ႇမေႃယႃၼႂ်းသိုၵ်း (သေးမူး) မႃးယူတ်းယႃ သမ်းပၼ်ၶဵမ် မၢၵ်ႈၼိုင်ႈ၊ ပၼ်ပႃးငိုၼ်း 12,000 ပျႃး၊ သမ်ႉလွၵ်ႇငိုတ်ႈဝႆႉဝႃႈ တေဢမ်ႇလႆႈၵႂႃႇလၢတ်ႈပႃႇတီႇ ၵၢၼ်မိူင်းၶဝ်၊ တေဢမ်ႇလႆႈၵႂႃႇယူတ်းယႃတီႈႁူင်းယႃတီႈလႂ်၊ ပေႃးပူၼ်ႉပႅၼ်ၶေႃႈၵႂၢမ်းဢၼ် ၼႆႉတေမႃး ဢဝ်တၢႆ- ဝႃႈၼႆ။

ၽူႈလူင်ႉလႅၼ်ႇမၢႆမီႈၵေႃႉၼိုင်ႈလၢတ်ႈဝႃႈ- မၢႆမီႈမတ်ႉတႃ 17 (1)ၼႆႉ ဝႃႈလူၺ်ႈလွင်ႈတိတ်းတေႃႇၵပ်းသိုပ်ႇ ၸုမ်းၼွၵ်ႈမၢႆမီႈ။ ဢၼ်သိုၵ်းမၢၼ်ႈၸိၼႄးဝႃႈ ၸၢႆးၵျေႃႇဢေး ပဵၼ်ၵူၼ်းတိတ်းတေႃႇသိုၵ်းတႆးၼႆၼၼ်ႉ ပွင်ႇဝႃႈသိုၵ်းတႆး SSPP/SSA ပဵၼ်ၸုမ်းၼွၵ်ႈမၢႆမီႈ၊ ဢမ်ႇၸႂ်ႈၸုမ်းၵိုတ်းသိုၵ်း။ လွင်ႈၼႆႉ ၽူႈမီးၸၼ်ႉ ၾၢႆႇၵႅတ်ႇၶႄၵေႃႉၼိုင်ႈလၢတ်ႈၼႄဝႃႈ ၾၢႆႇလူင် ပွင်ၸိုင်ႈ တင်းၸုမ်းၵိုတ်းယိုဝ်းၵၼ် ဢဝ်လွင်ႈငမ်းယဵၼ် ၵၼ်ၵူၺ်း၊ ပေႃးဝႃႈၼႂ်းမၢႆမီႈတပ်ႉသိုၵ်းပႆႇမွတ်ႇၸိုဝ်ႈၶဝ်ဢွၵ်ႇ၊ ယင်းတိုၵ်ႉမီးဝႃႈၸုမ်းၶဝ်ပဵၼ်ၸုမ်းၼွၵ်ႈ မၢႆမီႈယူႇၸိုင် တပ်ႉသိုၵ်းမၢၼ်ႈၶႂ်ႈယိုဝ်းၶဝ်မိူဝ်ႈလႂ်ၵေႃႈလႆႈၵူႈၶၢဝ်းယၢမ်း- ဝႃႈၼႆ။

ၵပ်းၵၢႆႇလွင်ႈဢၼ်လူင်ပွင်ၸိုင်ႈတဵင်းၸဵင်ႇ ပိုၼ်ၽၢဝ်ႇလူတ်းယွၼ်ႇပူတ်းဝၢင်းပွႆႇၽႃႈပၼ် ၵူၼ်းၸိူဝ်းမီး ၼႂ်းသၢႆမၢႆလမ်၊ ႁၢမ်ႈၶဝ်ႈမိူင်းမၢၼ်ႈတင်းမူတ်း 2,083 ၵေႃႉ ပႃးၸဵမ်ၵူၼ်းၼွၵ်ႈမိူင်းၼႂ်းမိူင်းၼၼ်ႉၵေႃႈ တီႈၼႂ်းၸုမ်းလူင်ပွင်ၸိုင်ႈဢမ်ႇမီး ၸိုဝ်ႈၶဝ်ယဝ်ႉသေတႃႉ တီႈႁွင်ႈၵၢၼ်လူင်ၾၢႆႇၼႂ်းမိူင်းလႄႈသင်၊ ၾၢႆႇတပ်ႉ သိုၵ်းလႄႈသင် ၸိူဝ်းၼႆႉတိုၵ်ႉမီးသၢႆမၢႆလမ်ယူႇ၊ ယင်းပႆႇမွတ်ႇၸိုဝ်ႈၶဝ်။ ၵွပ်ႈၼၼ် ၾၢႆႇလူင် ပွင်ၸိုင်ႈ လၢတ်ႈဝႃႈၶဝ်ႈဢွၵ်ႇမိူင်းမၢၼ်ႈလႆႈယဝ်ႉၼႆၵေႃႈ ႁွင်ႈၵၢၼ်လူင်ၾၢႆႇၼႂ်းမိူင်း ဢမ်ႇဢွၵ်ႇပၼ်ဝႂ် ၵပ်းတူဝ်ၵူၼ်း မိူင်းလႆႈ၊ လိၵ်ႈၵမ်ႉထႅမ်ၵေႃႈဢမ်ႇပၼ်လႆႈ၊ ပေႃးပၼ်လိၵ်ႈၵမ်ႉထႅမ်ၵေႃႈတေပဵၼ် ၸၼ်ႉပႃႈၼိူဝ်ၵူၺ်း။ ၾၢႆႇသိုၵ်းၵေႃႈဢမ်ႇမွတ်ႇၸိုဝ်ႈၶဝ်လႄႈ ပွင်ႇဝႃႈၾၢႆႇသိုၵ်းတိလႆႈၵူႈၶၢဝ်းယၢမ်း။

ပေႃးထတ်းသၢင်တူၺ်းၸိုင် ၾၢႆႇလူင်ပွင်ၸိုင်ႈၵေႃႈမႅၼ်ႈယူႇ၊ ၾၢႆႇတပ်ႉသိုၵ်းၵေႃႈမႅၼ်ႈယူႇႁင်းမၼ်း၊ ၵူၺ်းၵႃႈ ဢၼ်ၺႃးၸၢၵ်ႇ ၶၢမ်ႇၶီႈသူမ်ႈမၼ်းပဵၼ်ၵူၼ်းဝၢၼ်ႈၵူၼ်းမိူင်း- ၽူႈလူင်ႉလႅၼ်ႇမၢႆမီႈသိုပ်ႇ လၢတ်ႈၼင်ႇၼႆ။