ဢိင်ၼိူဝ်ၵူၼ်းဝၢၼ်ႈပွတ်းဝၢၼ်ႈၼမ်ႉတွင်ႇၵူင်း ၼႂ်းၸႄႈ ဝဵင်းၼမ်ႉတူႈလၢႆၵေႃႉ ၺႃးသိုၵ်းမၢၼ်ႈတိၺွပ်း ပေႃႉထုပ်ႉ သေ သိုၵ်းတႆးၵေႃႈၶိုၼ်းတိသိုၵ်းမၢၼ်ႈ 2 ၵေႃႉ ပိူဝ်ႈတႃႇ ဢဝ်ႁဵတ်းတူဝ်သဵတ်ႈၵႃႈသဵတ်ႈႁူဝ်ပွႆႇ ပၼ် ၵူၼ်းဝၢၼ်ႈ။ တႆးပွႆႇပၼ်မၢၼ်ႈယဝ်ႉၵေႃႈပႆႇႁၼ်ၵူၼ်းဝၢၼ်ႈပွၵ်ႈႁိူၼ်း။

ပူၼ်ႉမႃးမိူဝ်ႈဝၼ်းထိ 23/08/12 သိုၵ်းမၢၼ်ႈတိၺွပ်း ၸၢႆးၵျေႃႇဢေး ၵူၼ်းဝၢၼ်ႈပဵင်းထွၼ်ႇ ဢိူင်ႇၼမ်ႉ တွင်ႇၵူင်း၊ ထဵတ်ႈ ထၢမ်ၽႂ်ၵဵဝ်ႇၶွင်ႈသိုၵ်းတႆးၽွင်ႈ။ ဝၢႆးမႃးသိုပ်ႇတိၸၢႆးထူၺ်းၺုၼ်ႉ ဝၢၼ်ႈၼမ်ႉပၢႆႇ၊ ၸၢႆးလႃႉတင်းၸၢႆးတဵင်း ဝၢၼ်ႈပဵင်းလူင် ထႅင်ႈ။ သိုၵ်းမၢၼ်ႈၸိၼႄးဝႃႈ ၸိူဝ်းၶဝ်ၵဵဝ်ႇၶွင်ႈသိုၵ်းတႆးၼႆသေ ထုၵ်ႇၶႃတူဝ်ၶႃၸႂ်။ ၸၢႆးလႃႉတင်းၸၢႆးတဵင်းၺႃးပေႃႉထုပ်ႉ ၸွမ်းၶႃ ၼႃႈၶႅင်ႈႁၵ်း မၢၵ်ႇတႃပေႃးမႅၼ်း- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ထိုင်မႃးဝၼ်းထိ 31/08/12 ယၢမ်းဝၢႆးဝၼ်း 2 မူင်း၊ တပ်ႉသိုၵ်းၸိုင်ႈတႆး SSPP/SSA လႆႈၵႂႃႇတိဢဝ်ၶုၼ် သိုၵ်းလူင်တႅတ်ႉၸူဝ်း တင်းလုၵ်ႈၼွင်ႉမၼ်းၵေႃႉၼိုင်ႈ ဢၼ်ၼုင်ႈၶူဝ်းၵူၼ်းႁိူၼ်း တီႈဝူင်ႈၵၢင်ဝၢၼ်ႈၸၢမ်(မိူင်းမု)တင်းလႃႈသဵဝ်ႈ၊ ပိူဝ်ႈတႃႇတုမ်ႉတွပ်ႇၶိုၼ်းႁိုဝ် ပိူဝ်ႈတႃႇမီးတီႈသဵတ်ႈၵႃႈ သဵတ်ႈႁူဝ် ႁႂ်ႈပွႆႇပၼ်ၶိုၼ်းၵူၼ်းဝၢၼ်ႈၸိူဝ်းၼၼ်ႉ။

ၵဵဝ်ႇၵပ်းလွင်ႈၼႆႉ ၽူႈၵွၼ်းတိူင်းသိုၵ်းၸဵင်ႇႁွင်ႇဝၼ်းဢွၵ်ႇ(လႃႈသဵဝ်ႈ) ၵႂႃႇတီႈလုမ်းၵပ်းသၢၼ် SSPP/SSA တီႈလႃႈသဵဝ်ႈ သေလၢတ်ႈတီႈၽူႈၵွၼ်းလုမ်းၵပ်းသၢၼ်ဝႃႈ- ပေႃးၶဵင်ႇလမ်းတိၵူၼ်းသႂ်ႇသိူဝ်ႈၶူဝ်းၵူၼ်း ႁိူၼ်းတႄႉ ႁဝ်းၶႅၼ်းႁဵတ်းလႆႈလိူဝ်ၼႆႉ၊ ပေႃးသူဢမ်ႇပွႆႇပၼ်ၵူၼ်းႁဝ်းတႄႉယႃႇဝႃႈႁဝ်းႁဵတ်းလႆႈ- ဝႃႈၼႆ။

ၵပ်းၵၢႆႇလွင်ႈၼႆႉ ၽူႈမီးပုၼ်ႈၽွၼ်း SSPP/SSA တီႈငဝ်ႈငုၼ်းဝၢၼ်ႈႁႆးၸဝ်ႈၼိုင်ႈလၢတ်ႈဝႃႈ- ယူႇတီႈ SSPP/SSA တင်းၽူႈ မီးၸၼ်ႉသိုၵ်းမၢၼ်ႈလႆႈဢုပ်ႇၵၼ်သေတူၵ်းလူင်းလႆႈၸႂ်ဝႃႈ ၾၢႆႇသိုၵ်းတႆး တေပွႆႇ ပၼ်သိုၵ်းမၢၼ်ႈဢၼ်တိၺွပ်းဝႆႉ၊ ၾၢႆႇသိုၵ်း မၢၼ်ႈၵေႃႈတေပွႆႇပၼ်ၵူၼ်းဝၢၼ်ႈ။ ၵွပ်ႈလႆႈတူၵ်းလူင်းၵၼ် ယဝ်ႉလႄႈ ၾၢႆႇသိုၵ်းတႆးတႄႉ ပွႆႇပၼ်သိုၵ်းမၢၼ်ႈၸဵမ်မိူဝ်ႈသိုၼ်း ၼၼ်ႉယဝ်ႉ၊ ၵူၺ်းၵႃႈ ၵူၼ်းဝၢၼ်ႈ တင်းမူတ်း 4 ၵေႃႉၼၼ်ႉ တေႃႇထိုင်မိူဝ်ႈဝႃးယင်းပႆႇပွၵ်ႈၶိုၼ်းႁိူၼ်းသေၵေႃႉ။ ၵူၼ်းယူႇ ၼႂ်းပိုၼ်ႉတီႈမၢင် ၵေႃႉဝႃႈ ၸၢႆးလႃႉတင်းၸၢႆးတဵင်းၶႃသွင်ၵေႃႉၼႆႉ ႁႃတီႈလႂ်ၵေႃႈဢမ်ႇႁၼ်ယဝ်ႉ၊ ၵွပ်ႈၺႃးပေႃႉထုပ်ႉလိူဝ် ႁႅင်း လႄႈ မၢင်ၽဝ်ႇၶေးတၢႆယဝ်ႉႁိုဝ်- ဝႃႈၼႆ။