တႆးလႅင်ၼႂ်းၸႄႈမိူင်းၶၢင် တင်ႈပႃႇတီႇပိုတ်ႇလုမ်းတီႈ ဝဵင်းလိူဝ်ႇ၊ ယိူင်းဢၢၼ်းပိူင်လူင်ပိူဝ်ႈတႃႇတုၵ်းယွၼ်း သုၼ်ႇလႆႈတူဝ်ႇၵဝ်ႇ၊ မီးတၢင်ႇပႃႇတီႇၶဝ်ႈႁူမ်ႈႁူမ်ၸူမ်း ၸွမ်းၼမ်။

ဢိင်ၼိူဝ်ပီႈၼွင်ႉတႆးလႅင် ယိူင်းဢၢၼ်းပိူဝ်ႈတႃႇတုၵ်းယွၼ်းသုၼ်ႇလႆႈတူဝ်ၵဝ်ႇသေ ၵေႃႇတင်ႈပႃႇတီႇ ၵၢၼ်မိူင်းမႃးၼၼ်ႉ ဝၼ်းထိ 05/09/12 (မိူဝ်ႈဝႃး) လႆႈပိုတ်ႇလုမ်းတီႈဝဵင်းလိူဝ်ႇ (မၼ်းတလေး) ၼႂ်းၵႄႈ သဵၼ်ႈတၢင်း 66-39 ၊ မီးပႃႇတီႇၵၢၼ်မိူင်း ၸိူဝ်းမီးၼႂ်းဝဵင်းလိူဝ်ႇ မိူၼ်ၼင်ႇပႃႇတီႇ NDF ၊ ပႃႇတီႇသၢင်ႇသီႈ USDP (ပျီႇၶၢႆႇၽျူဝ်း)၊ ပႃႇတီႇႁူဝ်သိူဝ် SNLD ၊ ပႃႇတီႇသိူဝ် ၽိူၵ်ႇ SNDP လႄႈတၢင်ႇပႃႇတီႇ ၵႂႃႇၶဝ်ႈႁူမ်ႈ တင်းၼမ်။ တႄႇပိုတ်ႇလုမ်းယၢမ်းၵၢင်ၼႂ် 06:00 မူင်းသေ ၼိမၼ်တၼသင်ၶၸဝ်ႈမႃးၵၢပ်ႈသွမ်းတီႈ လုမ်း- ၼႆယဝ်ႉ။

ၼႂ်းပၢင်ပိုတ်ႇလုမ်းၼႆႉ ပုၵ်ႉၵလ ၸိူဝ်းၶဝ်ႈႁူမ်ႈဢၢၼ်ႇလိၵ်ႈႁူမ်ၸူမ်းၸွမ်းၾၢၵ်ႇထိုင်ပႃႇတီႇတႆးလႅင် ပႃႇတီႇႁူဝ်သိူဝ် ပဵၼ်လုင်း တၢၼ်းထုတ်ႉ၊ ပႃႇတီႇသိူဝ်ၽိူၵ်ႇ သမ်ႉပဵၼ် လုင်းၸေႃးတၢၼ်းမျိၼ်ႉ-ၼႆယဝ်ႉ။

ႁူဝ်ပဝ်ႈပႃႇတီႇတႆးလႅင် TNDP ၸၢႆးထေးဢွင်ႇ မွၵ်ႇလၢတ်ႈပူင်ၵႂၢမ်းမီးႁူဝ်ႁုပ်ႈဝႃႈ- တႆးလႅင်ႁဝ်းလႆႈမႃး တင်ႈ ပႃႇတီႇပိုတ်ႇလုမ်း ၼႆႉ ပိူင်လူင်မၼ်း ပိူဝ်ႈတႃႇတုၵ်းယွၼ်းသုၼ်ႇလႆႈသုၼ်ႇပဵၼ်တူဝ်ၵဝ်ႇ၊ ယွၼ်ႉဝႃႈ ၸၢဝ်း တႆးလႅင်ႁဝ်းၼႆႉ ၸမ်တေႁၢႆယဝ်ႉ။ ၵဵဝ်ႇၵပ်းလွင်ႈၼႆႉ ၵွပ်ႈဝႃႈပိူင်ၼိုင်ႈလႆႈယူႇၸွမ်ႇၸိမ်ၼႂ်း ၵႄႈပိူၼ်ႈ၊ ထႅင်ႈပိူင်ၼိုင်ႈသမ်ႉ ၸိုဝ်ႈသဵင်ၵေႃႈထုၵ်ႇမၵ်းမၢႆပဵၼ်တၢင်ႇ ၸၢဝ်းၶိူဝ်း။ ၼွၵ်ႈသေၼၼ်ႉ ပိုၼ်ႉတီႈၼႃႈလိၼ် ဢၼ်ၸၢဝ်းတႆးလႅင်ယူႇသဝ်းၵမ်ႈၼမ်ၵေႃႈ ပဵၼ်ၼႃႈလိၼ်သိုၵ်းသိူဝ်။

ၼႃႈလိၼ်ဢၼ်ပဵၼ်ပၢင်တိုၵ်းၼႂ်းမိူင်းၶၢင်ၼႆႉ ပေႃးၼပ်ႉဢဝ်ၸႄႈဝဵင်းမၼ်းဝႃႈ ၼႃႈလိၼ်ဢၼ်ၸၢဝ်း တႆးလႅင် ယူႇသဝ်း ပဵၼ်ပၢင်တိုၵ်းၼမ်လိူဝ်ၼႃႈလိၼ်ဢၼ်ၸၢဝ်းၶၢင် ယူႇသဝ်းလူးၵွၼ်ႇ၊ ၵွပ်ႈဝႃႈပိုၼ်ႉ တီႈၼႃႈလိၼ် ဢၼ်တႆးလႅင်ယူႇသဝ်းၼႂ်း 11 ၸႄႈဝဵင်းၼႆႉ ပဵၼ်ၼႃႈလိၼ်ဢၼ်မီးပၢင်တိုၵ်း။ ၵွပ်ႈၼၼ် ၵၢၼ်ၵေႃႇသၢင်ႈ လွင်ႈငမ်းယဵၼ်ၼႆႉ လီၸွႆႈၵၼ်ၶိုင်ပွင် ႁဵတ်းသၢင်ႈၵႂႃႇ။ ၼင်ႇႁိုဝ်တေတုၵ်းယွၼ်းလႆႈ သုၼ်ႇလႆႈသုၼ်ႇပဵၼ်ပီႈၼွင်ႉတႆးလႅင်လႄႈသင်၊ ပိူဝ်ႈတႃႇပူၵ်းပွင်ယုၵ်ႉယွင်ႈ ၾိင်ႈငႄႈလိၵ်ႈလၢႆးလႄႈ သင်၊ ႁဝ်းၶႃႈၸင်ႇလႆႈမႃး ၶွတ်ႇၽွတ်ႈပႃႇတီႇၸိူဝ်ႉၸၢတ်ႈတႆးလႅင်ၼႆႉ- ဝႃႈၼႆ။