ၸၢဝ်းမၢၼ်ႈၵေႃႉၼိုင်ႈ ၵႂႃႇၶဝ်ႈသူၼ်ၶဝ်ႈၵၢပ်ႇၵူၼ်းဝၢၼ်ႈ၊ ၵူၼ်းဝၢၼ်ႈဢွၼ်ၵၼ်လိုပ်ႈလမ်းထုပ်ႉႁႅမ် ၽူႈလၵ်ႉ၊ ဝၢႆးမႃးၸဝ်ႈၶွင်သူၼ် ၺႃးၵၢဝ်ႇႁႃဢဝ်လိူင်ႈ/ၸွႆႈတြႃး။

မိူဝ်ႈဝၼ်းထိ 02/09/12 မီးၸၢဝ်းမၢၼ်ႈၵေႃႉၼိုင်ႈ ဢႃႇယုၼႂ်းၵႄႈ 36-38 ၵႂႃႇလၵ်ႉၶဝ်ႈသူၼ်ၶဝ်ႈၵၢပ်ႇ လုင်းၸေႃးမွင်ႇ မိူင်းဝီး (ၸႄႈဝဵင်းၼမ်ႉၶမ်း)။ ၵူၼ်းဝၢၼ်ႈသမ်ႉႁၼ်လႄႈဢွၼ်ၵၼ်လမ်းႁႅမ် လမ်းပေႃႉ ၸၢဝ်းမၢၼ်ႈၶီႈလၵ်ႉၵေႃႉၼၼ်ႉ ထိုင်တီႈ ႁူဝ်တႅၵ်ႇ၊ မၼ်းၸၢႆးဝၢတ်ႇၸဵပ်းသေလႅၼ်ႈပၢႆႈ၊ သမ်ႉၵႂႃႇၽႃႇၺႃး ပလိၵ်ႈ မၢၼ်ႈ၊ ပလိၵ်ႈမၢၼ်ႈၵေႃႈႁႄႉသေထၢမ်မၼ်းဝႃႈ ပဵၼ်ၽႂ်ႁဵတ်း၊ မၼ်းၸၢႆးလၢတ်ႈဝႃႈ- ၸဝ်ႈသူၼ် လုင်းၸေႃးမွင်ႇ ႁႅမ်မၼ်း- ဝႃႈၼႆ။

“ဢၼ်ပေႃႉထုပ်ႉဢၢႆႈမၢၼ်ႈၶီႈလၵ်ႉၼၼ်ႉ ပဵၼ်ၵူၼ်းဝၢၼ်ႈၸိူဝ်းႁူပ်ႉႁၼ်၊ ဢမ်ႇပႃးလုင်းၸေႃးမွင်ႇ၊ လွင်ႈၶီႈလၵ်ႉၺႃးပေႃႉ ႁႅမ်ၼၼ်ႉၵေႃႈ လုင်းၸေႃးမွင်ႇယင်းပႆႇတၼ်းႁူႉၸွမ်း ပလိၵ်ႈပေႃးမႃးႁႃလိူင်ႈ မၼ်းယဝ်ႉ” ၵူၼ်းဝၢၼ်ႈၵေႃႉၼိုင်ႈလၢတ်ႈ ၼင်ႇၼႆ။

ၵဵဝ်ႇၵပ်းလွင်ႈၼႆႉ ပလိၵ်ႈမၢၼ်ႈၶဝ်ၵေႃႈၵႂႃႇတိၺွပ်းဢဝ်လုင်းၸေႃးမွင်ႇသေၵၢဝ်ႇႁႃတၢင်းၽိတ်းမၢပ်ႇမႂ်ငိုၼ်း၊ ၸွႆးတြႃး။ လွၵ်ႇငိုတ်ႈတီႈလုင်းၸေႃးမွင်ႇဝႃႈ ပေႃးလႅၼ်ႈပၢႆႈ၊ ဢမ်ႇၼၼ် ပေႃးဝႃႈႁၢႆၵႂႃႇၼႆတေမၢပ်ႇမႂ်ငိုၼ်း 150,000 ပျႃး (15 သႅၼ်)-ၼႆယဝ်ႉ။

ၵူၼ်းပွတ်းမိူင်းဝီးၵေႃႉၼိုင်ႈလၢတ်ႈဝႃႈ- ၼႂ်းဢိူင်ႇမိူင်းဝီးၼႆႉ ပဵၵ်ႉသမ်ႉမီးပလိၵ်ႈမၢၼ်ႈ၊ မီးသိုၵ်းမၢၼ်ႈ၊ မီးၾၢႆႇၽဵဝ်ႈမူၺ်ႉယႃႈ မဝ်းၵမ်သေတႃႉ ယႃႈၽိူၵ်ႇယႃႈမႃႉယင်းတိုၵ်ႉလိူင်ႇၼမ်လိူဝ်ႁႅင်း။ ၵူၼ်းၼႂ်းပိုၼ်ႉ တီႈၵေႃႈ ယွၼ်ႉပိူဝ်ႈသိုဝ်ႉငၢႆႈၵိၼ်ငၢႆႈလႄႈ ဢွၼ်ၵၼ်တိတ်းယႃႈမဝ်းၵမ်ၵၼ်ၼမ်၊ ၽူႈလၵ်ႉလိူင်ႇၼမ်မႃး ၼႆႉ မီးဢမ်ႇၵွမ်ႉမၢၼ်ႈၵူၺ်း ၼႂ်းတႆးၵေႃႈမီး။ ၸၢဝ်းမၢၼ်ႈၼႆႉ ၵွပ်ႈၶဝ်လုၵ်ႉတၢင်းမိူင်းမၢၼ်ႈမႃးယူႇသေ ဢမ်ႇၸႂ်ႈ ဝၢၼ်ႈၶဝ်မိူင်းၶဝ်လႄႈ ၵမ်ႈၼမ်ဢမ်ႇမီးသူၼ်မီးႁိူၵ်ႈမီးတူင်ႈမီးၼႃး၊ ဢမ်ႇမီးတီႈၸႂ်ယႂ်ႇ၊ ပေႃးၶဝ်ဢမ်ႇလႆႈ ႁဵတ်းၵၢၼ်ၵေႃႈဢမ်ႇမီးငိုၼ်း၊ တႃႇတေလႆႈၵိၼ်ယႃႈၼၼ်ႉ ၸင်ႇၵႂႃႇႁႃလၵ်ႉၶူဝ်းၶွင် ပိူၼ်ႈ- ဝႃႈၼႆ။

ၵူၼ်းၼႂ်းပိုၼ်ႉတီႈၵမ်ႈၽွင်ႈဝႃႈ- သင်ဝႃႈၶီႈလၵ်ႉၼၼ်ႉပဵၼ်တႆးၼႆ ပလိၵ်ႈမၢၼ်ႈၶဝ်တေႁႅမ်တၢႆပႅတ်ႈ ၵွၼ်ႇ၊ ၵွပ်ႈပဵၼ်မၢၼ်ႈ ၶဝ်ၼင်ႇၵၼ်လႄႈၸင်ႇၵၢဝ်ႇႁႃတၢင်းၽိတ်း/ၸွႆႈတြႃးၸဝ်ႈသူၼ်ၶိုၼ်း- ဝႃႈၼႆ။