ဝၢႆးၸွႆႈထႅမ်ၵူၼ်းထူပ်းၽေးၼမ်ႉထူမ်ႈ တီႈလႃႈသဵဝ်ႈယဝ်ႉ၊ ၻွၵ်းတိူဝ်ႊၸၢႆးမွၵ်ႇၶမ်း ၵႂႃႇယဵမ်ႈၵဵင်းတုင်၊ ၸွႆႈထႅမ်ပၼ် ၵူၼ်းထူပ်းၽေးၼမ်ႉထူမ်ႈတီႈၵဵင်းတုင် လႄႈမိူင်းလႃး။

ပူၼ်ႉမႃးမိူဝ်ႈဝၼ်းထိ 16/09/12 ၻွၵ်ႊတိူဝ်ႊၸၢႆးမွၵ်ႇၶမ်း ဢွၼ်ဢဝ်တင်းလုၵ်ႈမေး မႃးတီႈၵဵင်းတုင်၊ မွၵ်ႈယၢမ်း 18:00 မူင်း ၸဝ်ႈၼႃႈတီႈၸၼ်ႉသုင်ၼႂ်းၸုမ်းမိူင်းလႃး (NDAA-ESS) ၶုၼ်သၢင်ႇလူႇ၊ ၸဝ်ႈသၢၼ်းပိူဝ်ႇ၊ ၸဝ်ႈၶမ်းမွင်ႇ၊ ၽူႈၵွၼ်းသိုၵ်း သုင်သုတ်း ၸဝ်ႈထဵင်ႇဝိၼ်း (လုၵ်ႈၸဝ်ႈၸၢႆးလိုၼ်း) လႆႈႁူပ်ႉထူပ်းမၼ်းၸဝ်ႈတီႈ ၼႂ်းလုမ်းတိူင်းသိုၵ်းသၢမ်ၸဵင်ႇ (ၵဵင်းတုင်)၊ ယူႇတီႈၸုမ်းၸိူဝ်းၵႅမ်ၸွမ်ၸိုင်ႈမၢႆ 2 ၻွၵ်းတိူဝ်ႊၸၢႆးမွၵ်ႇၶမ်း၊ လႆႈၸွႆႈပၼ်ၵူၼ်းထူပ်းၽေးၼမ်ႉထူမ်ႈ တီႈၼႂ်းၼႃႈလိၼ်မိူင်း လႃး သၢင်ႉငိုၼ်း 200 သႅၼ် (20 လၢၼ်ႉပျႃး)၊ ဝၢႆးၼၼ်ႉ မီးပၢင်ၵိၼ်ၶဝ်ႈၶမ်ႈႁူမ်ႈမူႇၵၼ်- ၼႆယဝ်ႉ။

ၸဝ်ႈၼႃႈတီႈၸုမ်းမိူင်းလႃးၸဝ်ႈၼိုင်ႈလၢတ်ႈဝႃႈ- ဢၼ်ႁူပ်ႉၵၼ်ပွၵ်ႈၼႆႉ လႆႈတူင်ႉတၵ်ႉၵၼ်လႄႈသၢင်ႈလွင်ႈ မိုတ်ႈၵိုဝ်း ၸမ်ၸႂ်ၵၼ်၊ ၵႃႈပူၼ်ႉမႃး ဢၼ်ႁဝ်းလႆႈႁူပ်ႉထူပ်းၵၼ် ပဵၼ်သုၼ်ႇတူဝ် တင်းၻွၵ်းတိူဝ်ႊၸၢႆးမွၵ်ႇၶမ်း ၵေႃႈ ပႆႇမီးမႃးသေပွၵ်ႈ။ ၻွၵ်းတိူဝ်ႊၸၢႆးမွၵ်ႇၶမ်းလၢတ်ႈဝႃႈ ယိၼ်းမွင်ၸႂ်ၸွမ်းလႄႈ ၸႂ်ဢမ်ႇလီၸွမ်း လွင်ႈၼမ်ႉထူမ်ႈၼႂ်းမိူင်းလႃး၊ ႁဝ်းတေၸွႆႈပၼ် ငိုၼ်း 200 သႅၼ်။ ၵူၺ်းၵႃႈ လွင်ႈတူဝ်ငိုၼ်းၼႆႉ ပႆႇလႆႈ ၼင်ႇၵဝ်ႇ- ဝႃႈၼႆ။

ၼွၵ်ႈသေၼၼ်ႉ လွင်ႈၼမ်ႉထူမ်ႈတီႈၵဵင်းတုင်ၵေႃႈ ၶဝ်ၸဝ်ႈၸွႆႈပၼ်ၼင်ႇၵဝ်ႇ၊ ၵူၺ်းၵႃႈ ၵွပ်ႈႁဝ်းဢမ်ႇ လႆႈၶဝ်ႈထူပ်းမိူဝ်ႈ လဵဝ်ၵၼ်လႄႈ ဢမ်ႇလႆႈႁူႉၸွမ်း- ၸဝ်ႈၼႃႈတီႈမိူင်းလႃးသိုပ်ႇလၢတ်ႈထႅင်ႈၼင်ႇၼႆ။

ဢွၼ်ၼႃႈၼႆႉ မိူဝ်ႈဝၼ်းထိ 14/09/12 ၻွၵ်ႊတိူဝ်ႊၸၢႆးမွၵ်ႇၶမ်း လုၵ်ႉၼေႇပျီႇတေႃႇမႃးတီႈလႃႈသဵဝ်ႈသေ မႃးၸတ်းပၢင်ၵႅဝ်ႈ မွပ်ႈငိုၼ်းပၼ်ၵူၼ်းထူပ်းၽေးၼမ်ႉထူမ်ႈ တီႈႁူင်း/ငဝ်ႈငုၼ်းၵေႃလိၵ်ႈလၢႆးပတ်းပိုၼ်ႉ ၸႄႈတွၼ်ႈလႃႈသဵဝ်ႈ တီႈၶူဝ်လွင်း။ ၵူၼ်းထူပ်းၽေးၼမ်ႉထူမ်ႈပွၵ်ႈၼႆႉ မီးမွၵ်ႈ 600 လင်ႁိူၼ်း၊ မီးပၢင် သဝ်း ၵူၼ်းပၢႆႈၽေး 2 တီႈ၊ ဝၢႆးႁွင်ႉၶွၼ်ႈတုမ်ၵၼ်သေ ၸွႆႈပၼ်တီႈ (ၶူဝ်လွင်း)ယဝ်ႉ ၵႂႃႇၸွႆႈပၼ်ထႅင်ႈတီႈ ပွၵ်ႉ 9 (ၶၢႆးႁဵဝ်း)ၼိုင်ႈၼႃႈႁိူၼ်းလႂ် 30,000 ပျႃး။ ၸွႆႈပၼ်ၶဝ်ႈသၢၼ် 500 ထူင်။

ၵၢၼ်ၸွႆႈထႅမ်ငိုၼ်းတွင်းလႄႈသင်၊ ၶဝ်ႈသၢၼ်လႄႈသင်၊ ဢမ်ႇၸႂ်ႈသုၼ်ႇတူဝ်ၸၢႆးမွၵ်ႇၶမ်း၊ ဢမ်ႇၸႂ်ႈ လူင်ပွင်ၸိုင်ႈတဵင်းၸဵင်ႇ ၸွႆႈထႅမ်၊ ပဵၼ်ၵူၼ်းၶွမ်ႊပၼီႊၸိူဝ်းမႃးၸွမ်းမၼ်းၸဝ်ႈ၊ ဢဝ်ၼႃႈဢဝ်တႃၸွမ်း မၼ်းၸဝ်ႈၸိူဝ်းၼၼ်ႉ ဢဝ်ငိုၼ်းၶွမ်ႊပၼီႊ ၶဝ်ၸွႆႈပၼ်။ ၼွၵ်ႈသေၼၼ်ႉ ၸွႆႈပႃးၸဵမ်ၶူဝ်းၼုင်ႈတၢင်းဝႆ လႄႈ ၶိူင်ႈၵိၼ်တၢင်းယႅမ်ႉၸိူဝ်းၼႆႉ- ၵူၼ်းလႃႈသဵဝ်ႈသိုပ်ႇလၢတ်ႈ ၼင်ႇၼႆ။