ၸုမ်းပီႇတုၸိတ်ႉမိူင်းၶိူဝ်းၵဵပ်းၵူၼ်းၼႂ်းပိုၼ်ႉတီႈၵုမ်းၵမ်၊ မီးလုၵ်ႈၸၢႆး 2 ဢဝ် 1 ။ ပေႃးဢမ်ႇၵႂႃႇ ဢမ်ႇၼၼ် တိုၵ်ႉၶဝ်ႈႁဵတ်းၵၢၼ်မိူင်းထႆး ဢမ်ႇယွမ်းပွၵ်ႈမိူဝ်းႁဵတ်း လႆႈၸၢင်ႈပိူၼ်ႈ၊ လႆႈသဵင်ႈငိုၼ်းၼပ်ႉႁူဝ်သိပ်း သႅၼ်။

တင်ႈတႄႇဝၼ်းထိ 07/09/12 မႃးတေႃႇထိုင်မိူဝ်ႈလဵဝ်၊ ၸုမ်းပီႇတုၸိတ်ႉမိူင်းၶိူဝ်း ဢၼ်ၸဝ်ႈလႃႉမိၼ်ႉ ဢွၼ်ႁူဝ် (ၵူၼ်းၵဝ်ႇ ၼႂ်းတပ်ႉၸုမ်း 3 ၶွင်တပ်ႉသိုၵ်းၸိုင်ႈတႆး SSPP/SSA) ၸိသင်ႇလူင်းတီႈပီႇတုၸိတ်ႉ ၸိူဝ်းၵုမ်းၵမ်ပိုၼ်ႉတီႈပွတ်းတွၼ်ႈၼႃႈ လိၼ်ၼမ်ႉလၼ်ႈ၊ ၼႂ်းထုင်ႉမိူင်းၶိူဝ်း၊ ၼႂ်းၸႄႈဝဵင်းသီႇပေႃႉ တေႃႇထိုင်ပွတ်းဝၢၼ်ႈၸိင်း ႁႂ်ႈၵဵပ်းပီႇတုၸိတ်ႉ/သိုၵ်း။ ပေႃးပဵၼ်ဝၢၼ်ႈလဵၵ်ႉ 4 ၵေႃႉ၊ ဝၢၼ်ႈယႂ်ႇပၢၼ်ၵၢင် 8 ၵေႃႉ၊ ဝၢၼ်ႈယႂ်ႇဝၢၼ်ႈလူင် 10 ၵေႃႉ။ ပေႃးမီးလုၵ်ႈၸၢႆး 2 ၵေႃႉ ဢဝ် 1 ၵေႃႉ- ၼႆယဝ်ႉ။

ၵူၼ်းၸိူဝ်းမီးလုၵ်ႈၸၢႆးၼႆႉ ပေႃးပႃးၸိုဝ်ႈယဝ်ႉ လုၵ်ႈၸၢႆးၶဝ်မီးႁိူၼ်းဢမ်ႇမီးႁိူၼ်းဢမ်ႇႁူႉ၊ လုၵ်ႈၸၢႆးၶဝ် ၵႂႃႇႁဵတ်းၵၢၼ်မိူင်း ထႆးၵေႃႈ တိုၼ်းတေလႆႈပွၵ်ႈမႃး။ ပေႃးဢမ်ႇယွမ်းမႃးသေၸၢင်ႈပိူၼ်ႈၵႂႃႇႁဵတ်းသိုၵ်း 1 ၵေႃႉ 25 သႅၼ်။ လုၵ်ႈလၢင်းၽႂ်လႆႈၵႂႃႇ ႁဵတ်းပီႇတုၸိတ်ႉၵေႃႈယဝ်ႉ ၵူၼ်းဝၢၼ်ႈၼၼ်ႉ လႆႈၵဵပ်းငိုၼ်းၵၼ် ပၼ်ၵေႃႉ ဢၼ်ၵႂႃႇၼၼ်ႉထႅင်ႈသႅၼ်ႁႃႈ (150,000 ပျႃး)။ တူဝ်ယၢင်ႇမၼ်း ပေႃးလုၵ်ႈႁဝ်းလႆႈၵႂႃႇၵေႃႈ ၸိူဝ်းဢမ်ႇလႆႈ ၵႂႃႇၼၼ်ႉလႆႈၵဵပ်းငိုၼ်းၵၼ်ပၼ်လုၵ်ႈႁဝ်း။ သွၼ်ႇဝႃႈၵႂႃႇတႅၼ်း ၼႃႈႁိူၼ်းၵေႃႈၸႂ်ႈ၊ ၵႂႃႇတႅၼ်းၼႃႈဝၢၼ်ႈ ၵေႃႈၸႂ်ႈ-ဝႃႈၼႆ။

ၵဵဝ်ႇၵပ်းလွင်ႈၼႆႉ ၵူၼ်းၼုမ်ႇၶဝ်ႈႁဵတ်းၵၢၼ်မိူင်းထႆးၵေႃႉၼိုင်ႈ ဢၼ်ပီႈၼွင်ႉမၼ်းလႆႈၵႂႃႇႁဵတ်းပီႇ တုၸိတ်ႉလၢတ်ႈဝႃႈ- မႆႈၸႂ်ၸွမ်း၊ ၵူဝ်မၼ်းမိူၼ်ၸုမ်းပီႇတုၸိတ်ႉ မိူင်းႁႃႉ၊ ၸုမ်းပူဝ်ႇမူၼ်းဝၢၼ်ႈပၢင်ႇၶဝ် ၵဵပ်းသိုၵ်းၵူႈပွၵ်ႈ။ ၵဵပ်းသိုၵ်းယဝ်ႉဢမ်ႇဢဝ် ၸႂ်ႉၼႂ်းတပ်ႉၶဝ်၊ သမ်ႉဢဝ်သူင်ႇၵႂႃႇပၼ်သိုၵ်းမၢၼ်ႈ၊ ပေႃးၵဵပ်းလႆႈၵူၼ်းၼိုင်ႈႁဵင် သူင်ႇပၼ်မၢၼ်ႈႁႃႈပၢၵ်ႇ၊ ပေႃးမေႃၵၢၼ် သိုၵ်းယဝ်ႉသိုၵ်းမၢၼ်ႈႁႂ်ႈၵႂႃႇယိုဝ်း ယၢင်း ယိုဝ်းၶၢင်ၸိူဝ်းၼႆႉ၊ ဢဝ်ၸၢဝ်းၶိူဝ်းႁဝ်းလေႃႇႁူဝ်ၵၼ်၊ မိူၼ်ၵၼ်တင်းၵႂႃႇတၢႆတၢင် မၢၼ်ႈၵူၺ်း၊ လွင်ႈၸိူဝ်းၼႆႉ ႁဵတ်းႁႂ်ႈၵူၼ်းမိူင်း ၵူဝ်လႆႈႁဵတ်းသိုၵ်း။ ပေႃးလႆႈႁဵတ်းသိုၵ်းၶွင်ၵူၼ်းမိူင်းတႆးႁဝ်းတႄႉတႄႉ ယင်းၶႅၼ်း- ဝႃႈၼႆ။

ပီႇတုၸိတ်ႉမိူင်းၶိူဝ်းၼႆႉ ၸဝ်ႈလႃႉမိၼ်ႉဢွၼ်ႁူဝ်၊ မီးႁႅင်းၵူၼ်းမွၵ်ႈ 50-60 ၊ မိူဝ်ႈပႆႇလႅၵ်ႈလၢႆႈႁဵတ်းပီႇ တုၸိတ်ႉ (တပ်ႉၵုမ်း ၵမ်ပိုၼ်ႉတီႈ) ၼႂ်းပီ 2009 ၸွမ်းၽႅၼ်ၵၢၼ်ၸုမ်းသိုၵ်းမၢၼ်ႈၼၼ်ႉ ပဵၼ်ၼႂ်းတပ်ႉ သိုၵ်းၸိုင်ႈတႆး SSPP/SSA တပ်ႉၸုမ်း 3 ။