ဢိင်ၼိူဝ်မီးၵၢၼ်တူၵ်းလူင်းၵၼ်သွင်ၾၢႆႇသေ သိုၵ်းမၢၼ်ႈ ပွႆႇပၼ်ၵူၼ်းဝၢၼ်ႈၸိူဝ်းတိၺွပ်းၵႂႃႇ၊ ၸိၼႄး ဝႃႈ ၵဵဝ်ႇၶွင်ႈသိုၵ်းတႆးယဝ်ႉပေႃႉထုပ်ႉၵုမ်းၶင်၊ ဝၢႆးသိုၵ်းတႆး ပွႆႇပၼ်သိုၵ်း မၢၼ်ႈဢၼ်တိၺွပ်းၵႂႃႇ ပိူဝ်ႈတႃႇ သဵတ်ႈၵႃႈ သဵတ်ႈႁူဝ် လွင်ႈၼႆႉ။

ၸၢႆးၵျေႃႇဢေး ၵူၼ်းဝၢၼ်ႈပဵင်းထွၼ်ႇ ၸႄႈဝဵင်းၼမ်ႉတူႈ၊ ၵေႃႉလႆႈထုၵ်ႇသိုၵ်းမၢၼ်ႈတိၺွပ်း ပူၼ်ႉမႃးမိူဝ်ႈ ဝၼ်းထိ 23/09/12 သေၸိၼႄးဝႃႈ ၵဵဝ်ႇၶွင်ႈသိုၵ်းတႆးၼႆသေ တွင်ႈထၢမ်ပေႃႉထုပ်ႉ၊ ဢဝ်ႁဵတ်းတူဝ်ယိူဝ်ႇ တိၺွပ်းၵူၼ်းဝၢၼ်ႈၵေႃႉ ၼိုင်ႈယဝ်ႉၵေႃႉၼိုင်ႈၼၼ်ႉ လႆႈငိၼ်းဝႃးသိုၵ်းမၢၼ်ႈပွႆႇပၼ်တီႈလႃႈသဵဝ်ႈ မိူဝ်ႈဝႃး ဝၼ်းထိ 17/09/12 ၊ မိူဝ်ႈၼႆႉမၼ်းၸၢႆး တေလုၵ်ႉလႃႈသဵဝ်ႈသေပွၵ်ႈၶိုၼ်းႁိူၼ်းပွတ်းၼမ်ႉတူႈ။ ၼွၵ်ႈသေ ၼၼ်ႉ ၵူၼ်းဝၢၼ်ႈၸိူဝ်းထုၵ်ႇသိုၵ်းမၢၼ်ႈတိၺွပ်းပေႃႉ ထုပ်ႉၵုမ်းၶင် မိူၼ်ၼင်ႇၸၢႆးတဵင်း ဝၢၼ်ႈၼႃးၵေး၊ ၸၢႆးလႃႉ ဝၢၼ်ႈပဵင်းလူင်၊ ၸၢႆးၵမ်ႇ ဝၢၼ်ႈၼွင်ဢေႃႈၸိူဝ်းၼႆႉၵေႃႈ ပွႆႇပၼ်ယဝ်ႉၼင်ႇၵဝ်ႇ။

ၽူႈၶၢၼ်ပၢၵ်ႇ SSPP/SSA ၸဝ်ႈႁၢၼ်ၸၢႆးလႃႉလၢတ်ႈဝႃႈ- ၼႂ်းၵူၼ်း 4 ၵေႃႉ ဢၼ်ၵမ်ႈၽွင်ႈဝႃႈ ၸၢႆးတဵင်း တင်းၸၢႆးလႃႉ ၶႃသွင်ၵေႃႉၺႃးသိုၵ်းမၢၼ်ႈပေႃႉထုပ်ႉတၢႆယဝ်ႉၼႆၼၼ်ႉ ဢမ်ႇမႅၼ်ႈ၊ ၸိူဝ်းၶဝ်ဢမ်ႇတၢႆ သေၵေႃႉ၊ ၶဝ်ၸိူဝ်းၼႆႉၺႃးတိၺွပ်း ၵုမ်းတူဝ်ဝႆႉတီႈႁူင်းပလိၵ်ႈမၢႆ 1 တင်း 4 ၵေႃႉ။

ၵဵဝ်ႇၵပ်းလွင်ႈၼႆႉ ပူၼ်ႉမႃးမိူဝ်ႈဝၼ်းထိ 09/09/12 ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး SSPP/SSA ၸဝ်ႈၶုၼ်သႅင် တင်းဢူးတဵင်းၸေႃႇ (ၽူႈတႅၼ်းသၽႃး) မီးၵၢၼ်တိတ်းတေႃႇဢုပ်ႇဢူဝ်းၵၼ် တၢင်းၾူၼ်ႊ။ သွင်ၾၢႆႇဢုပ်ႇၵၼ်လွင်ႈႁႂ်ႈပွႆႇ ပၼ်ၵူၼ်းဝၢၼ်ႈ ဢၼ်သိုၵ်းမၢၼ်ႈတိၺွပ်းပေႃႉထုပ်ႉလႄႈ သိုၵ်းမၢၼ်ႈ 2 ၵေႃႉ ဢၼ်ၺႃးသိုၵ်းတႆး SSPP/SSA တိၺွပ်း ၵုမ်းတူဝ်ဝႆႉ ပိူဝ်ႈတႃႇႁဵတ်းတူဝ်ယိူဝ်ႇသဵတ်ႈ ၵႃႈသဵတ်ႈႁူဝ် ႁႂ်ႈပွႆႇပၼ်။

ၾၢႆႇၼိုင်ႈတၢင်းၼိုင်ႈ မိူဝ်ႈဝၼ်းထိ 09/09/12 ၸဝ်ႈၼႃႈတီႈ SSPP/SSA ၸဝ်ႈႁၢၼ်ၸၢႆးလႃႉ၊ ၸဝ်ႈၼေႃႇ လဵၵ်း၊ ၸဝ်ႈၶမ်းၶွင်ႇ ႁူမ်ႈ 3 ၵေႃႉ ၵႂႃႇတီႈၼမ်ႉတူႈသေ ၵႂႃႇႁူပ်ႉဢုပ်ႇဢူဝ်းၸဝ်ႈၼႃႈတီႈ ၽူႈၵွၼ်းၾၢႆႇပူၵ်း ပွင် ၸၢဝ်းၶိူဝ်းၸိူဝ်းယူႇသဝ်းၸွမ်းလႅၼ် လိၼ် (ၼတလ) ၸဝ်ႈႁၢၼ်တိၼ်ႇဝိၼ်း။ ထႅင်ႈၾၢႆႇၼိုင်ႈ ဢူးတဵင်းၸေႃႇ ၵေႃႈလၢတ်ႈမႃးတီႈ ၸဝ်ႈႁၢၼ်တိၼ်ႇဝိၼ်းႁႂ်ႈသွင် ၾၢႆႇဢုပ်ႇဢူဝ်းငူပ်ႉငိၵၼ်။ သွင်ၾၢႆႇ ဢုပ်ႇဢူဝ်းလႆႈၸႂ်ၵၼ် ဝႃႈ- ၾၢႆႇသိုၵ်းမၢၼ်ႈတေပွႆႇပၼ်ၵူၼ်းဝၢၼ်ႈ 4 ၵေႃႉၸိူဝ်းတိၺွပ်းဝႆႉ၊ ၾၢႆႇသိုၵ်းတႆး ၵေႃႈ တေပွႆႇပၼ်သိုၵ်း မၢၼ်ႈဢၼ်တိၺွပ်းဝႆႉ 2 ၵေႃႉ။

ထိုင်မႃးဝၼ်းထိ 10/09/12 ၽူႈမီးၸၼ်ႉ 3 ၸဝ်ႈၼႂ်းတပ်ႉ SSPP/SSA (ၸဝ်ႈႁၢၼ်ၸၢႆးလႃႉ၊ ၸဝ်ႈၼေႃႇ လဵၵ်း၊ ၸဝ်ႈၶမ်းၶွင်ႇ) ၶိုၼ်းၵႂႃႇႁူပ်ႉထူပ်းတပ်ႉ SSPP/SSA သေ ဢဝ်ၵူၼ်းသိုၵ်းမၢၼ်ႈ ၶုၼ်သိုၵ်းလူင် တႅတ်ႉၸူဝ်း တင်းလုၵ်ႈၼွင်ႉမၼ်းၵေႃႉၼိုင်ႈ မႃးတီႈၼမ်ႉတူႈ၊ ၵႂႃႇႁွင်ႉဢဝ်ပႃးၽူႈၵွၼ်းတပ်ႉ ၶမယ 324 တီႈၼမ်ႉတူႈသေ ႁူမ်ႈၵၼ်ၵႂႃႇမွပ်ႈပၼ်တီႈၽူႈၵွၼ်း (ၼတလ) ၸဝ်ႈႁၢၼ်တိၼ်ႇဝိၼ်း။

ၸဝ်ႈႁၢၼ်ၸၢႆးလႃႉ သိုပ်ႇလၢတ်ႈဝႃႈ- မိူဝ်ႈႁူပ်ႉၵၼ်တီႈၼမ်ႉတူႈၼၼ်ႉ ႁူပ်ႉၵၼ်တီႈႁူင်းႁႅမ်းလင်ၼိုင်ႈ၊ ဢုပ်ႇဢူဝ်းၵၼ်ပႃး ဝႃႈ- ႁဝ်းပေႃးၵိုတ်းယိုဝ်းၵၼ်ယဝ်ႉ၊ ဢၼ်ၾၢႆႇသိုၵ်းမၢၼ်ႈ ယင်းတိုၵ်ႉဝႃႈၸုမ်းႁဝ်း ပဵၼ်ၸုမ်း ၼွၵ်ႈမၢႆမီႈၼၼ်ႉ ဢမ်ႇသၢင်ႇ ထုၵ်ႇ။ လွင်ႈဝႃႈယႃႇႁႂ်ႈလႆႈပဵၼ်ထႅင်ႈမိူဝ်းၼႃႈၼၼ်ႉ ဢၼ်တူၵ်း လူင်းၵၼ်ဝႆႉတႄႉ ဢမ်ႇမီး၊ ၵူၺ်းၵႃႈ တၢင်းလိၵ်ႈလၢႆးပၢႆပေႇ တႄႉ လႆႈတႅမ်ႈပၼ် ၸဝ်ႈၼႃႈတီႈၽူႈမီးပုၼ်ႈ ၽွၼ်းမၢၼ်ႈယူႇ။ လွင်ႈၼႆႉၵေႃႈ ဢမ်ႇၸႂ်ႈလႅၵ်ႈလၢႆႈၵူၼ်းၵၼ်- ဝႃႈၼႆ။