ဢိင်ၼိူဝ် “သၶႁ” ၽူႈႁၢပ်ႇၵၢၼ်ၸိူဝ်ႉၸၢတ်ႈတႆးလုသဵင်ႈ သုတ်းမုၼ် ၶွပ်ႈတဵမ် 1 ပီသေ ၼႃႈႁိူၼ်းၸိူဝ်ႉ ၶိူဝ်း ပီႈၼွင်ႉ ဢိၵ်ႇ ၽူႈႁၵ်ႉၸၢတ်ႈႁႅၼ်းတၢၼ်းပၼ် တီႈဝတ်ႉၾႃႉဝဵင်းဢိၼ်း ဝၢၼ်ႈလၵ်းတႅင်ႇ ပဵင်းလူင်။ တီႈလွႆၵေႃႇဝၼ်းၵေႃႈ ၸတ်းပၢင်ႁႅၼ်းတၢၼ်းၶိုၵ်ႉယႂ်ႇ။

ပၢင်ႁႅၼ်းတၢၼ်းၼႆႉ ၵၢင်ၶမ်ႈဝၼ်းထိ 14/09/12 မီးပၢင်ထွမ်ႇလိၵ်ႈၾင်းထမ်း၊ လဵင်ႉလူပီႈၼွင်ႉၶႅၵ်ႇ။ ၵၢင်ၼႂ်ၸဝ်ႉ ဝၼ်းထိ 15/09/12 တၢင်ႇသွမ်းတေႃႇလူင်၊ ၵၢပ်ႈသွမ်းသင်ၶ။ ဝၢႆးဝၼ်းယၢမ်း 2 မူင်း ၵႂႃႇႁႅၼ်း တၢၼ်းပၼ်တီႈၶုမ်ၵုတ်းမၼ်းၸဝ်ႈ တီႈၼိူဝ်ၵွင်းလွႆ ၾၢႆႇဢွၵ်ႇဝၢၼ်ႈလၵ်းတႅင်ႇ(ဢၼ်မီးတီႈလဵဝ်ၵၼ် တင်းၸၢႆးမူး၊ ၸၢႆးသၼ်လွႆ)ဢိူင်ႇပဵင်းလူင် ၸႄႈဝဵင်းဝဵင်း ႁႅင်။ သႂ်ႇႁုၼ်ႇႁၢင်ႈၸၢႆးသႅင်ၸိုၼ်ႈ “သၶႁ” ဢၼ်ၸၢႆးႁၢၼ်လဵတ်းပၼ်ႈႁဵတ်းဝႆႉ တီႈၶုမ်ၵုတ်းမၼ်းၸဝ်ႈသေ ႁႅၼ်းတၢၼ်း ၸွမ်းၼင်ႇၾိင်ႈထုင်းပုတ်ႉ ထ သႃသၼႃ၊ ယၢတ်ႇၼမ်ႉၶႂမ်ႈတဝ်ႈ ယဝ်ႉတူဝ်ႈၵႂႃႇလီငၢမ်း။

ပၢင်ႁႅၼ်းတၢၼ်းတီႈၶုမ်ၵုတ်းၼၼ်ႉ မီးၽူႈႁၵ်ႉၸၢတ်ႈ ၸိူဝ်းယၢမ်ႈႁူမ်ႈၽၢၵ်ႈႁၢပ်ႇၵိုတ်ႉၵၢၼ်ၸိူဝ်ႉၸၢတ်ႈ ၸွမ်း “သၶႁ” မႃးပီ ယၢဝ်းၶၢဝ်းႁိုင်ၶဝ်ႈႁူမ်ႈတင်းၼမ်။ မီးၵၢၼ်ၸႅၵ်ႇပပ်ႉပိုၼ်းၶုၵ်းထူပ်း သၶႁ သဵင်ႈမုၼ် ၶွပ်ႈတဵမ်ပီ ဢၼ်ၸုမ်းၶၢဝ်ႇၽူႈတွႆႇႁွၵ်ႈ ၶပ်းၶိုင်ႁဵတ်းဢွၵ်ႇ ပၼ်ၽူႈၶဝ်ႈႁူမ်ႈ။

ၸၢႆးလႅင်း ႁူဝ်ၼႃႈၵူၼ်းပၢႆႈၽေးၵုင်းၵျေႃႇ၊ ၽူႈယၢမ်ႈႁၢပ်ႇၵိုတ်ႉၵၢၼ်ၸိူဝ်ႉၸၢတ်ႈမႃးၸွမ်းၵၼ်လၢႆ ပၢၼ်လႄႈ ပဵၼ်ၽူႈယၢမ်ႈ ၵိၼ်သုၵ်းၵိၼ်လိပ်းၵၼ်မႃး မွၵ်ႇလၢတ်ႈၵႂၢမ်းဝႃႈ- “ၸၢႆးသႅင်ၸိုၼ်ႈတင်းၵဝ် ၶႃႈၼႆႉ ၸႃႉၵေႃႈႁူမ်ႈၶီ -လီၵေႃႈႁူမ်ႈၸၢမ်ႇမႃး ၸွမ်းၵၼ်၊ ႁဵတ်းၵေႃႉၵၼ်မႃးတႃႇသေႇ၊ ယိၼ်းသေ လၢႆမွင်ၸႂ်လူင်လၢင် ဢၼ်မၼ်းၸၢႆးၽၢတ်ႇႁဝ်းၵႂႃႇၸဝ်ႉၼႅၼ်ႇၼၼ်ႉ ၵူၺ်း”- ဝႃႈၼႆ။
ၼၢင်းသႅင်ၼွင်ႉ မွၵ်ႇလၢတ်ႈဝႃႈ- “ၶႃႈၼၢင်းလႆႈႁၢပ်ႇၵိုတ်ႉၵၢၼ်ၸွမ်း ၸၢႆးသႅင်ၸိုၼ်ႈမႃး မိူၼ်ၼင်ႇၵၢၼ် သိုဝ်ႇၶၢဝ်ႇ၊ ၵၢၼ်လိၵ်ႈ လၢႆး၊ ၵၢၼ်သုၼ်ႇလႆႈၵူၼ်း၊ ၵၢၼ်တူင်ႇဝူင်းၵူၼ်းၸိူဝ်းၼႆႉ။ ႁဵတ်းၵၢၼ်ၸွမ်း သႅင်ၸိုၼ်ႈၼႆႉ လႆႈတၢင်းသိူဝ်းမူၼ်ႈၵူၺ်းပႆႇပေႃး လႆႈတၢင်းႁူႉၼမ်-တၢင်းႁၼ်ၵႂၢင်ႈတႄႉတႄႉ။ မၼ်းၸၢႆး ၵေႃႉလဵဝ်ၵူၺ်း ႁဵတ်းၵၢၼ်လၢႆလၢႆလွင်ႈ။ ဢၼ်ၶႃႈယၢမ်ႈႁူႉၸၵ်း မၼ်းမႃးၼႆႉ မၼ်းပဵၼ်ၽူႈတႅမ်ႈလိၵ်ႈ၊ ၽူႈတႅမ်ႈၵႂၢမ်း၊ ၽူႈႁွင်ႉၽဵင်းၵႂၢမ်း၊ ၽူႈတႅမ်ႈပိုၼ်း၊ ၽူႈၶူၼ်ႉၶႂႃႉပိုၼ်း။ မၼ်းၸၢႆးၼႆႉ ပဵၼ်တူဝ်ယၢင်ႇလီ ပိူဝ်ႈတႃႇၵူၼ်းၼုမ်ႇၶဝ်၊ ၶႃႈၼၢင်းၵေႃႈ ၶုၵ်းၶူၼ်ႉဝူၼ်ႉထိုင်မၼ်းၸၢႆးတႃႇသေႇ”- ဝႃႈၼႆ။

ၼွၵ်ႈသေၼၼ်ႉ ဝၼ်းထိ 15/09/12 ဢိင်ၼိူဝ်ပဵၼ်ဝၼ်းလိူၼ် 9 လပ်းၵၢင်ဝႃႇ၊ ၸၢဝ်းပုတ်ႉထၶိုၼ်ႈဝတ်ႉ ၵျွင်း၊ ပူႇသိလ်ၼၢႆး သိလ်ၶဝ်ၵမ်သိလ်ၼွၼ်းဝတ်ႉ၊ ဝၼ်းထိ 16 သမ်ႉပဵၼ်လိူၼ် 10 မႂ်ႇ 1 ၶမ်ႈ ဢၼ်ၶိင်း သိလ် ၼၢႆးသိလ်ၶဝ်ပူတ်းသိလ်ၵေႃႈ ပိူင်ၼိုင်ႈ။ ၼႂ်းတိုဝ်ႉတၢင်း ၸၢႆးသႅင်ၸိုၼ်ႈ သဵင်ႈမုၼ်ၶွပ်ႈတဵမ် 1 ပီၵေႃႈပိူင်ၼိုင်ႈ သေ တၢင်းႁိူၼ်းလုၵ်ႈလၢင်းၼၢင်းမေး ဢိၵ်ႇပီႈၼွင်ႉၸိူဝ်ႉၶိူဝ်းႁူမ်ႈၵၼ်ၸတ်းပၢင်ပွႆးၸႃၵ ႁႅၼ်းတၢၼ်း ယၢတ်ႇၼမ်ႉၶႂမ်ႈတဝ်ႈ ယိူင်းၸူးထိုင် သၶႁ ထႅင်ႈ။

ၾၢႆႇၼိုင်ႈတၢင်းၼိုင်ႈ တီႈလွႆၵေႃႇဝၼ်း ငဝ်ႈငုၼ်းၼႃႈလိၼ်သိုၵ်းမၢႆ 1 (ၵဵင်းတုင်) ၶွင်တပ်ႉသိုၵ်းၸိုင်ႈတႆး (RCSS/SSA) ၵေႃႈ ၸဝ်ႈသိုၵ်းၵွၼ်းၸိုၼ်ႈဢွၼ်ႁူဝ် ၸတ်းပၢင်ႁႅၼ်းတၢၼ်းပၼ် ၸၢႆးသႅင်ၸိုၼ်ႈ ႁိုဝ် သၶႁ ၸွမ်းၼင်ႇၾိင်ႈထုင်းသႃသ ၼႃ။ ၼႂ်းဝၼ်းထိ 14-15/09/12 ပွတ်းၶမ်ႈ မီးပၢင်လဝ်ႇမူၼ်ႈတူၼ်ႈၸႂ် ႁွင်ႉၽဵင်းၵႂၢမ်းၸိူဝ်း “သၶႁ” တႅင်ႇတႅမ်ႈႁွင်ႉမႃး။