ၵူၼ်းဝၢၼ်ႈၵူၼ်းမိူင်း ထုင်ႉဢိူင်ႇဝၢၼ်ႈၸၢမ်(မိူင်းမု) တုၵ်း ယွၼ်းလူင်ပွင်ၸိုင်ႈတင်း တပ်ႉသိုၵ်းၸိုင်ႈ တႆးႁႂ်ႈၵႄႈ လိတ်ႈပၼ်ႁႃလွင်ႈၵူၼ်းမိူင်းထူပ်းၽေးတူတ်ႈတၢမ်ႇ သိုၵ်းသိူဝ်။

ၵဵဝ်ႇၵပ်းလွင်ႈၼႆႉ ၽူႈယႂ်ႇၵူၼ်းလူင်ဝၢၼ်ႈၵေႃႉၼိုင်ႈၼႂ်းထုင်ႉဝၢၼ်ႈၸၢမ် (မိူင်းမု)လၢတ်ႈဝႃႈ- ယွၼ်ႉပိူဝ်ႈ သိုၵ်းမၢၼ်ႈတင်း သိုၵ်းတႆး ပဵၼ်ပၢင်တိုၵ်းသိုၵ်းသိူဝ်ၵၼ်သေ ႁဝ်းၶႃႈၵူၼ်းမိူင်းလႆႈထူပ်းတၢင်းယၢပ်ႇၽိုတ်ႇ တုၵ်ႉၶၵိၼ်းၸႂ်လိူဝ်ႁႅင်း၊ ဢမ်ႇ ၸၢင်ႈလူင်းႁႆႈလူင်းၼႃးႁဵတ်းသူၼ်ႁဵတ်းႁိူၵ်ႈ။ ၵွပ်ႈၼၼ်လႄႈ တုၵ်းယွၼ်းႁႂ်ႈ သိုၵ်းမၢၼ်ႈတင်းသိုၵ်းတႆးႁူပ်ႉထူပ်းဢုပ်ႇဢူဝ်း ၵႄႈလိတ်ႈ ပၼ်ႁႃလွင်ႈၼႆႉဝႆးဝႆး၊ မိူဝ်ႈလဵဝ် ၵူၼ်းဝၢၼ်ႈၸိူဝ်းၺႃး တိၺွပ်းပေႃႉထုပ်ႉၶႃႈႁႅမ်ႁၢႆတူဝ်ဝႆႉၵေႃႈယင်းတိုၵ်ႉမီးပဵၼ် လၢႆလၢႆၵေႃႉ- ဝႃႈၼႆ။

ၵူၼ်းဝၢၼ်ႈၵေႃႉၼိုင်ႈလၢတ်ႈဝႃႈ- တီႈတႄႉမၼ်း တပ်ႉသိုၵ်းၸိုင်ႈတႆးတင်း 2 ၸုမ်းၼႆႉ ၸိုင်ဝႃႈၵိုတ်း ယိုဝ်းၵၼ်တင်းသိုၵ်း မၢၼ်ႈယဝ်ႉ၊ ၵွပ်ႈသင်ယင်းတိုၵ်ႉယိုဝ်းၵၼ်ယူႇ။ ၾၢႆႇၼိုင်ႈသိုၵ်းမၢၼ်ႈၵေႃႈ သုတ်းတီႈသိုၵ်းတႆး ပေႃးၵိုတ်းယိုဝ်းယဝ်ႉ ၵွပ်ႈသင် ယင်းတိုၵ်ႉမႃးၼႄးၵူၼ်းဝၢၼ်ႈဝႃႈတိတ်းတေႃႇ သိုၵ်းတႆး ၼႆသေတိၺွပ်း ပေႃႉထုပ်ႉတိၵ်းတိၵ်း၊ ႁဝ်းၶႃႈၵူၼ်းဝၢၼ်ႈၼႆႉ ၽႂ်ၸိသင်ႇသင်ၵေႃႈၵႃႈလႆႈႁဵတ်း၊ ၽႂ်ပႃးၵွင်ႈမႃးၵေႃႈ လႆႈၵူဝ်ၵူႈၸုမ်း၊ ဢမ်ႇၵွမ်ႉၵႃႈသိုၵ်းမၢၼ်ႈၵူၺ်း သိုၵ်းတႆးၵေႃႈလႆႈၵူဝ် မိူၼ်ၵၼ်။ ၵွပ်ႈၼၼ်လႄႈ တုၵ်းယွၼ်းႁႂ်ႈ ၸုမ်းယိပ်းၵွင်ႈၸိူဝ်းၼႆႉ ႁႂ်ႈၸဵပ်းဢုပ်ႇဢူဝ်းတူၵ်းလူင်းၵၼ်ၽႂ်ၽႂ်း၊ ၼင်ႇႁိုဝ် ႁဝ်းၵူၼ်းဝၢၼ်ႈၵူၼ်းမိူင်းတေ ၶႅၼ်းၸႂ်လူမ်ၸႂ် - ဝႃႈၼႆ။

ၼႂ်းဢိူင်ႇဝၢၼ်ႈၸၢမ်(မိူင်းမု)ၸႄႈဝဵင်းၼမ်ႉတူႈၼႆႉ တင်ႈတႄႇၽွင်းႁၢင်လိူၼ်ဢေႃႊၵတ်ႊသ်မႃး ၺႃးသိုၵ်း မၢၼ်ႈတိၺွပ်း ၸိၼႄးဝႃႈပဵၼ်သၢႆလပ်ႉသိုၵ်းတႆး၊ ပဵၼ်လွၼ်ႉၵႅၼ်သိုၵ်းတႆးၼႆသေ ပေႃႉထုပ်ႉဢမ်ႇ ယွမ်းၵူၼ်း 10 ၵေႃႉ။ မိူဝ်ႈဝၼ်းထိ 23/08/12 ပူၼ်ႉမႃး။

ပူၼ်ႉမႃးမိူဝ်ႈဝၼ်းထိ 23/09/12 သိုၵ်းမၢၼ်ႈတႄႇတိၺွပ်း ၸၢႆးၵျေႃႇဢေး (ၵူၼ်းဝၢၼ်ႈ)၊ ဢဝ်ၸၢႆးၵျေႃႇ ဢေးႁဵတ်းတူဝ်ယိူဝ်ႇ သေၵႂႃႇထၢမ်ၵေႃႉၼိုင်ႈယဝ်ႉၵေႃႉၼိုင်ႈ။ ပေႃးၸၢႆးၵျေႃႇဢေးလၢတ်ႈဝႃႈ ၵေႃႉၼႆႉ ၵဵဝ်ႇၶွင်ႈသိုၵ်းတႆး/ပဵၼ်သိုၵ်းတႆးၼႆၵေႃႈ မတ်ႉပေႃႉထုပ်ႉတိၵ်းတိၵ်း မႃးတေႃႇထိုင်ယၢမ်းလဵဝ်။ ဢိင်ၼိူဝ် ဢဝ်ၸၢႆးၵျေႃႇဢေးပဵၼ်တူဝ်ယိူဝ်ႇသေ ဝၼ်းၼၼ်ႉသိုပ်ႇတိ ၺွပ်းၸၢႆးၵမ်ႇ ဝၢၼ်ႈၼွင်ဢေႃႈ၊ ၵူၺ်းၵႃႈ ၸၢႆးၵမ်ႇတႄႉပွႆႇပၼ်ၼႂ်းဝၼ်းဢၼ်တိၼၼ်ႉၵမ်းလဵဝ်။ ထႅင်ႈဝၼ်းၼိုင်ႈသိုပ်ႇတိ ထႅင်ႈၸၢႆးဢွင်ႇၺုၼ်ႉ ၽူႈၵွၼ်းဝၢၼ်ႈပဵင်းထွၼ်ႇ၊ ၸၢႆးထူၺ်းၺုၼ်ႉ ၽူႈၵွၼ်းဝၢၼ်ႈၼမ်ႉပၢႆႇၸိူဝ်းၼႆႉ သိုပ်ႇတိထႅင်ႈၶိူဝ်းယႂ်း၊ မိူၼ်ၼင်ႇထိထႅင်ႈ ၸၢႆးလႃႉ ဝၢၼ်ႈပဵင်းလူင်၊ ၸၢႆးဢၢႆႈတဵင်း လုင်းၼုမ်ႇ ၸၢႆးသေႃး ဝၢၼ်ႈၼႃးၵေး၊ ၸၢႆးၸၢမ်ႇမိူင်းတင်းၸၢႆးမျႃႉ ဝၢၼ်ႈၵုၼ်ၵျွင်းၸိူဝ်းၼႆႉသေ ပေႃႉထုပ်ႉၶႃတူဝ်ၶႃၸႂ် ၸဵပ်းလိူဝ်ႁႅင်း။

လိူဝ်သေၸၢႆးၵျေႃႇဢေး၊ ၸၢႆးၵမ်ႇ၊ ၸၢႆးလႃႉ သမ်ႉၸၢႆးဢၢႆႈတဵင်းၶဝ် 4 ၵေႃႉၼႆႉ တၢင်ႇၵေႃႉတႄႉ သိုၵ်းမၢၼ်ႈ ပွႆႇပၼ်ၶိုၼ်းယဝ်ႉ။ မိူၼ်ၼင်ႇၶဝ် 4 ၵေႃႉၼႆႉ တၢႆႁိုဝ်လိပ်းႁိုဝ်ယင်းဢမ်ႇႁူႉ။ ၸၢႆးတဵင်း တင်းၸၢႆးလႃႉၼႆႉ သိုၵ်းမၢၼ်ႈပေႃႉႁႅမ်ၼႃႈၶႅင်ႈႁၵ်း၊ တႃပေႃးမႅၼ်း၊ လိုမ်းတူဝ်လိုမ်းၶိင်း၊ မိူဝ်ႈဢဝ်ဝိုတ်ႉ တၢင်ႇၵႃးၵေႃႈ ဢမ်ႇတူင်ႉဢမ်ႇၼိုင်၊ သိုၵ်းမၢၼ်ႈဢဝ်ၵႂႃႇပႅတ်ႈတီႈလႂ်ၵေႃႈ ဢမ်ႇႁူႉ၊ တေႃႇထိုင်မိူဝ်ႈလဵဝ် ၸွပ်ႇထၢမ်ၽႂ်ၵေႃႈ ဢမ်ႇႁူႉ၊ ၼႂ်းၶွၵ်ႈၵေႃႈဢမ်ႇမီး၊ လွင်ႈၼႆႉလီမႆႈၸႂ်တႄႉတႄႉ-ဝႃႈၼႆ။

ၾၢႆႇတပ်ႉသိုၵ်းၸိုင်ႈတႆး SSPP/SSA လၢတ်ႈဝႃႈ- ဢိင်ၼိူဝ်ၵူၼ်းဝၢၼ်ႈၵူၼ်းမိူင်းတူၵ်းတၢင်းယၢပ်ႇၽိုတ်ႇ ၼႆႉသေ ၼင်ႇႁိုဝ် တေမီးတီႈသဵတ်ႈၵႃႈသဵတ်ႈႁူဝ် ပွႆႇပၼ်ၶိုၼ်းၵူၼ်းဝၢၼ်ႈၼၼ်ႉ မိူဝ်ႈဝၼ်းထိ 31/08/12 ယၢမ်းဝၢႆးဝၼ်း 2 မူင်း လႆႈၵႂႃႇတိ ၽူႈမီးၸၼ်ႉသိုၵ်းမၢၼ်ႈၵေႃႉၼိုင်ႈ တင်းၵူၼ်းၵႅမ်တူဝ်မၼ်းၵေႃႉၼိုင်ႈ။ ဢိင်ၼိူဝ်သွင်ၾၢႆႇလႆႈဢုပ်ႇဢူဝ်းတူၵ်းလူင်းၵၼ်ဝႃႈ သိုၵ်းမၢၼ်ႈတေပွႆႇပၼ်ၵူၼ်းမိူင်းၶိုၼ်း၊ ၾၢႆႇတပ်ႉသိုၵ်း ၸိုင်ႈတႆးၵေႃႈတေပွႆႇပၼ်ၵူၼ်းသိုၵ်းမၢၼ်ႈၼႆလႄႈ ၾၢႆႇတပ်ႉသိုၵ်း ၸိုင်ႈတႆးၵေႃႈလႆႈပူင် ပူၼ်ႉမႃးမိူဝ်ႈ ဝၼ်း ဢင်းၵၢၼ်းထိ 04/09/12 ၼၼ်ႉ ၾၢႆႇတပ်ႉတႆးလႆႈပွႆႇပၼ်သိုၵ်းမၢၼ်ႈၶိုၼ်းယဝ်ႉ- ဝႃႈၼႆ။

တပ်ႉသိုၵ်းၸိုင်ႈတႆး SSPP/SSA ၼႆႉ တႄႇၵိုတ်းယိုဝ်းၵၼ်တင်းလူင်ပွင်ၸိုင်ႈတဵင်းၸဵင်ႇ မိူဝ်ႈဝၼ်းထိ 28/01/12 ၊ မီးၶေႃႈ တူၵ်းလူင်းလႆႈၸႂ်ၵၼ်လၢႆၶေႃႈ။ မိူဝ်ႈတူၵ်းလူင်းၵိုတ်းယိုဝ်းၵၼ်ၼၼ်ႉ ဢူးတဵင်းၸေႃႇ (ၸုမ်းၶိုင်ပွင်လွင်ႈငမ်းယဵၼ်မိူင်းတႆး ၽွင်းၼၼ်ႉ)လၢတ်ႈဝႃႈ- ပေႃးၵိုတ်းယိုဝ်းၵၼ်ယဝ်ႉ ၶၢဝ်းတၢင်း 5 ဝၼ်း တေထွၼ်ပၼ်သိုၵ်းၼႂ်းပိုၼ်ႉတီႈဢၼ်ၽိုတ်ႉပၵ်း ၼႂ်းၼႃႈလိၼ် SSPP/SSA ႁိမ်းႁွမ်းႁွပ်ႈႁွပ်ႈ ငဝ်ႈငုၼ်း ဝၢၼ်ႈႁႆးသေတႃႉ ႁၢၼ်ႉတေႃႇမိူဝ်ႈလဵဝ်ၵေႃႈဢမ်ႇထွၼ်ပၼ်။

ယွၼ်ႉၾၢႆႇသိုၵ်းမၢၼ်ႈၵေႃႈလၢမ်းၶႂၢၵ်ႈၼႃႈလိၼ်၊ ႁဵတ်းႁႂ်ႈၾၢႆႇတပ်ႉတႆး SSPP/SSA ဢမ်ႇမီးတီႈယူႇလႄႈ ၸင်ႇလႆႈၶႂၢၵ်ႈ ၼႃႈလိၼ်ၶိုၼ်ႈၵႂႃႇတၢင်းၾၢႆႇၼိူဝ်တၢင်းၵႃးဝဵင်းလိူဝ်ႇ (မၼ်းတလေး)-လႃႈသဵဝ်ႈ ဢၼ်ပဵၼ် တီႈယူႇ ၵဝ်ႇၶွင် SSPP/SSA ယၢမ်ႈတူင်ႉၼိုင်မႃးၵူႈပွၵ်ႈ။ ပေႃးဢမ်ႇၶႂ်ႈႁႂ်ႈသိုၵ်းတႆးၵႂႃႇတူင်ႉၼိုင် ၾၢႆႇႁွင်ႇ တၢင်းၵႃး ၼႆႉသေ ႁႂ်ႈသိုၵ်းတႆးထွၼ်ဢွၵ်ႇပၼ် ၵေႃႈ သိုၵ်းမၢၼ်ႈၵေႃႈထုၵ်ႇလႆႈထွၼ်ဢွၵ်ႇ ၼႂ်းပိုၼ်ႉတီႈၶွင် SSPP/SSA မိူၼ်ၼင်ႇၼႂ်းထုင်ႉမိူင်းယႆ-ၵေးသီး-မိူင်းသူႈ ၸိူဝ်းၼႆႉ- ၽူႈဢမ်ႇၶႂ်ႈဢွၵ်ႇၸိုဝ်ႈတီႈငဝ်ႈငုၼ်း ဝၢၼ်ႈႁႆးၵေႃႉၼိုင်ႈ လၢတ်ႈၼင်ႇၼႆ။

လူင်ပွင်ၸိုင်ႈတဵင်းၸဵင်ႇ ပိုၼ်ၽၢဝ်ႇလွင်ႈငမ်းယဵၼ်မႃးၶွပ်ႈတဵမ်ပီ၊ တပ်ႉသိုၵ်းၸိုင်ႈတႆး 2 ၸုမ်း ဢုပ်ႇဢူဝ်း တူၵ်းလူင်းဢဝ် လွင်ႈငမ်းယဵၼ် မႃးၸမ်ၶွပ်ႈတဵမ်ပီသေတႃႉ ၼႂ်းၸိုင်ႈတႆးပွတ်းႁွင်ႇၼၼ်ႉ တပ်ႉသိုၵ်း မၢၼ်ႈ တင်းတပ်ႉသိုၵ်းၸိုင်ႈတႆး တိုၵ်ႉပဵၼ်ပၢင်တိုၵ်းယူႇ ၶိူဝ်းယႂ်းဢမ်ႇထၢတ်ႇဢမ်ႇဝၢႆး၊ ႁဵတ်းႁႂ်ႈၵူၼ်း ဝၢၼ်ႈ ၵူၼ်းသူၼ်တင်းၼမ်တင်းလၢႆထူပ်းၽေးသိုၵ်း သိူဝ်လိူဝ်ႁႅင်းသေ ထိုင်တီႈလႆႈတုၵ်းယွၼ်းတီႈ သိုၵ်းမၢၼ်ႈ တင်းသိုၵ်းတႆးၼင်ႇၼႆ။