ၸဝ်ႈၼႃႈတီႈထႆး တိၺွပ်းၸၢဝ်းတႆးလႄႈမူႇၸုမ်းၵေႃႉဢၼ် ႁူမ်ႈၵၼ်တင်းပလိၵ်ႈထႆးသေ ၽၢမ်းႁဵတ်း ပလိၵ်ႈပွမ်ယဝ်ႉ ႁူမ်ႈၵၼ်ႁႃလွၵ်ႇငိုတ်ႈၸူၼ်ႁိမ်ဢဝ်ၶူဝ်းၶွင်ငိုၼ်းၶမ်း ၵူၼ်းတႆးၼႂ်းမိူင်းၵွၵ်ႇ လူၺ်ႈၸိ ၼႄးဝႃႈ ၵဵဝ်ႇၶွင်ႈယႃႈ မဝ်းၵမ်။ မီးၵူၼ်းတူၵ်းပဵၼ်ယိူဝ်ႇမွၵ်ႈ 50 ၊ သုမ်းငိုၼ်း ၼပ်ႉႁူဝ်လၢၼ်ႉဝၢတ်ႇ။

မိူဝ်ႈဝၼ်းထိ 01/09/12 ၸဝ်ႈၼႃႈတီႈထႆး ႁူမ်ႈၵၼ်ၵႂႃႇတိၺွပ်းၵူၼ်းတႆး ၵေႃႉႁူမ်ႈၵၼ်တင်းပလိၵ်ႈထႆး ၵေႃႉၼိုင်ႈသေ ပွမ်ႁဵတ်းပလိၵ်ႈထႆး လူၺ်ႈၼုင်ႈသိူဝ်ႈၶူဝ်းသႂ်ႇၶိူင်ႈဝႅပ်ႇပလိၵ်ႈထႆးတဵမ်ထူၼ်ႈသေ ႁႃလွၵ်ႇ လႅၼ် ၸူမ်းႁိမ်ဢဝ်ၶူဝ်းၶွင်ငိုၼ်း တွင်း ၵူၼ်းမိူင်းတႆးၸိူဝ်းၶဝ်ႈႁဵတ်းၵၢၼ်မိူင်းထႆး တီႈၼိုင်ႈယဝ်ႉတီႈၼိုင်ႈ ၼႂ်းမိူင်းၵွၵ်ႇ (ၵုင်းထဵပ်ႈ)။ ၸုမ်းၸိူဝ်းၶဝ်ၼႆႉ ၵူၼ်း တႆးၸိုဝ်ႈၸၢႆးလႃႈ သီဝိၶျႆး ဢႃႇယု 37 ပီ၊ ပလိၵ်ႈထႆး ၸိုဝ်ႈ ဝီးရၽူင်း သႅမ်းသီမူင်ႉ ဢႃႇယု 46 (ႁၢပ်ႇၵၢၼ်ဝႆႉတီႈႁွင်ႈၵၢၼ် ၾၢႆႇပလိၵ်ႈ သၢမ်သႅၼ် မိူင်းၵွၵ်ႇ) ဢိၵ်ႇ ၵူၼ်းထႆးထႅင်ႈ ၵေႃႉၼိုင်ႈ။ တိလႆႈပႃးလူတ်ႉၵႃး 4 လေႃႉ သႅၼ်းတူဝ်ႊယူဝ်ႊလမ်း ၼိုင်ႈသီၶမ်းၶၢဝ်၊ ဢမ်ႇတိတ်းပၢႆႉမၢႆၾၢင်။ တီႈၺွပ်းလႆႈၸိူဝ်းၶဝ်ပွတ်းၸႄႈဝဵင်းၿၢင်းယႆႇ၊ ၸႄႈတွၼ်းၼူၼ်းထၿူးရီး- ၼႆယဝ်ႉ။

ၸွမ်းၼင်ႇပလိၵ်ႈထႆးလႆႈၸွပ်ႇထၢမ်ၵူၼ်းတႆး ၼႂ်းၵူၼ်းတူၵ်းပဵၼ်ယိူဝ်ႇၵေႃႉၼိုင်ႈ ၸိုဝ်ႈၸၢႆးသူမ်မၢႆ လုင်းယီႈ ဢႃႇယု 35 ပီၼၼ်ႉ မၼ်းၸၢႆးတွပ်ႇလၢတ်ႈဝႃႈ- တူဝ်ၵဝ်ႇႁဵတ်းၵိၼ်ၵၢၼ်ႁပ်ႉမဝ်တႃးသီႁိူၼ်း ပိူၼ်ႈ။ မိူဝ်ႈၽွင်းႁၢင်လိူၼ် ဢေႊပရိူဝ်ႊလ် (2012)ပူၼ်ႉမႃးၼၼ်ႉ တူဝ်ၵဝ်ႇလႆႈႁပ်ႉၾူၼ်ႊ/မိုဝ်းထိုဝ် ဢၼ်ၸုမ်း ၸိူဝ်းၶဝ်(ၵူၼ်းၸိူဝ်းႁဵတ်းႁၢႆႉၺႃးတိ-ၽူႈတွင်ႈႁႃ)သိုပ်ႇထူဝ်းမႃး လၢတ်ႈဝႃႈ- ၸၢင်ႈႁႂ်ႈမႃးတႃး သီတီႈႁိူၼ်း လင်ၼိုင်ႈ ၼႂ်းမူႇဝၢၼ်ႈသီႊမႅၼ်ႊထႆး၊ ၵိဝ်ႇ 10 ၊ ၶဵတ်ႇပၢင်းသိုဝ်ႉ။ ထိုင်မႃးဝၼ်းထိ 01/05/12 တူဝ်ၵဝ်ႇၵေႃႈ ၵႂႃႇတူၺ်းၵၢၼ်တီႈႁိူၼ်းၼႂ်းၵိဝ်ႇၼၼ်ႉ၊ ၽွင်းတူဝ်ၵဝ်ႇႁွတ်ႈထိုင်သူပ်းၵိဝ်ႇ(ပၢၵ်ႇသွႆး) ၵေႃႈလႆႈ သိုပ်ႇၾူၼ်ႊႁႃ ၸုမ်းၸိူဝ်းၶဝ်၊ ၸုမ်းၶဝ်ဝႃႈ ႁႂ်ႈပႆမႃးတီႈၵိဝ်ႇ 22 ၊ မိူဝ်ႈတူဝ်ၵဝ်ႇၵႂႃႇထိုင်ၵေႃႈၵပ်း ၾူၼ်ႊ လၢတ်ႈၵႂႃႇဝႃႈ တူဝ်ၵဝ်ႇမႃးထိုင်ယဝ်ႉ၊ ဝၢႆးၼၼ်ႉလႆႈႁၼ်လူတ်ႉၵႃး 4 လေႃႉလမ်းၼိုင်ႈၽုတ်း မႃးသေ ႁေႃႈပၼ်ႇၵႂႃႇပၼ်မႃး ယူႇလၢႆၵမ်း၊ ဝၢႆးၼၼ်ႉၵေႃႈၵပ်းၾူၼ်ႊမႃးတီႈတူဝ်ၵဝ်ႇလႄႈ လူတ်ႉၵႃးလမ်း ၼၼ်ႉၵေႃႈမႃးၵိုတ်းၸွတ်ႇတီႈ ပႃႈၼႃႈတူဝ်ၵဝ်ႇ။

ၸၢႆးသူမ်မၢႆသိုပ်ႇလၢတ်ႈဝႃႈ- ၵူၼ်းႁေႃႈလူတ်ႉပဵၼ်ပလိၵ်ႈ၊ ၼုင်ႈၶူဝ်းႁၢင်ႈၶိူင်ႈပလိၵ်ႈတဵမ်ထူၼ်ႈ။ ပိုတ်ႇ ၽၵ်းတူလူတ်ႉဢွၵ်ႇ မႃးယဝ်ႉ လၢတ်ႈဝႃႈတူဝ်ၵဝ်ႇမီးၾၢင်ႁၢင်ႈၼႃႈတႃလီထၢင်ႇထိူမ်၊ ငၢႆးမိူၼ်ၵူၼ်းၵေႃႉ ဢၼ်တၢင်းသၢႆလပ်ႉပလိၵ်ႈၸႅင်ႈလၢတ်ႈ မႃးဝႃႈ တေမႃးသူင်ႇမွပ်ႈယႃႈမဝ်းၵမ်ၵၼ်ႁိမ်းႁွမ်းၼႆႉ။ မိူဝ်ႈတူဝ်ၵဝ်ႇလႆႈငိၼ်း ၸိူင်ႉၼၼ်ၵေႃႈၼႅတ်ႈတွပ်ႇထဵင်ဝႃႈ တူဝ်ၵဝ်ႇ ဢမ်ႇၵဵဝ်ႇၶွင်ႈ၊ ၸဝ်ႈၵဝ်ႇပဵၼ်ၵူၼ်း ႁႃၸဝ်ႉၵိၼ်ၶမ်ႈၵူၺ်း၊ ဢၼ်မႃးတီႈၼႆႈၵေႃႈ ပိူဝ်ႈတႃႇမႃးတူၺ်းႁိူၼ်းလင်ဢၼ်ၶႂ်ႈတႃးသီမႂ်ႇ ၼၼ်ႉၵူၺ်း- ဝႃႈၼႆ။

ဝၢႆးၼၼ်ႉ ပလိၵ်ႈၵေႃႈၸႂ်ႉၶိုၼ်ႈလူတ်ႉ ပိူဝ်ႈတႃႇဢဝ်ၵႂႃႇၸွပ်ႇထၢမ်တီႈႁူင်းပလိၵ်ႈ၊ ၵူၺ်းၵႃႈ ဢမ်ႇလၢတ်ႈ ဝႃႈ ပဵၼ်ႁူင်းပလိၵ်ႈ တီႈလႂ်။ မိူဝ်ႈၶိုၼ်ႈလူတ်ႉၼၼ်ႉ ၺႃးထႅင်ႈၵူၼ်း 2 ၵေႃႉၼင်ႈယူႇၼႂ်းလူတ်ႉ၊ ပေႃးလူတ်ႉဢွၵ်ႇ ၵိဝ်ႇၵႂႃႇယဝ်ႉ ၵႂႃႇတၢင်းလႂ် ၵေႃႈဢမ်ႇႁူႉ။ ၸွမ်းတၢင်းၼၼ်ႉ ၸုမ်းၸိူဝ်းၶဝ်ထၢမ်တူဝ်ၵဝ်ႇ ဝႃႈမီးငိုၼ်းယူႇ ၼႂ်းသၢႆမၢႆ(ၿၼ်းၶျီး)ယေးငိုၼ်းၵႃႈႁိုဝ်၊ ဢိင်ဢၢင်ႈ ဝႃႈပဵၼ်ပလိၵ်ႈၾၢႆႇၽဵဝ်ႈယႃႈမဝ်းၵမ်၊ တေၵူတ်ႇထတ်းတူၺ်း ဝႃႈၸွင်ႇၵဵဝ်ႇၶွင်ႈယႃႈမဝ်းၵမ် ႁိုဝ် ဢမ်ႇၵဵဝ်ႇ၊ တူဝ်ၵဝ်ႇၸင်ႇ လၢတ်ႈၵႂႃႇဝႃႈငိုၼ်း ၼႂ်းသၢႆမၢႆ(ယေးငိုၼ်း) မီးတင်းမူတ်း 87,000 ဝၢတ်ႇ။

ၸၢႆးသူမ်မၢႆသိုပ်ႇလၢတ်ႈဝႃႈ- ပေႃးတူဝ်ၵဝ်ႇလၢတ်ႈၼႄလွင်ႈငိုၼ်းတွင်းယဝ်ႉၵေႃႈ ၸုမ်းၶဝ်ထၢမ်မၢႆ ATM ၊ တူဝ်ၵဝ်ႇဝူၼ်ႉဝႃႈ ဢမ်ႇၸႂ်ႈလၢႆးမၼ်းၼႆသေဢမ်ႇလၢတ်ႈ၊ ၵူၺ်းၵႃႈ ၺႃးလွၵ်ႇငိုတ်ႈၵူႈလွၵ်းၵူႈလၢႆးလႄႈ ႁဵတ်းႁႂ်ႈတူဝ်ၵဝ်ႇၵူဝ်သေ လႆႈလၢတ်ႈမၢႆ ATM ၊ မိူဝ်ႈလႆႈမၢႆ ATM ယဝ်ႉ ၸုမ်းၶဝ်ၵူၼ်းႁၢႆႉၵေႃႈ ယိပ်း ဢဝ်ၶိူင်ႈ ၾူၼ်ႊတူဝ်ၵဝ်ႇသေဢူၼ်းငိုၼ်းၽၢၼ်ႇတၢင်း ၶိူင်ႈၾူၼ်ႊ။ ၽွင်းယူႇၸွမ်းတၢင်းၼၼ်ႉ တူဝ်ၵဝ်ႇဝူၼ်ႉဝႃႈ တေဢမ်ႇလွတ်ႈတၢင်းတၢႆ၊ ၵူၺ်းၵႃႈ ယင်းၵၢမ်ႇလီဢိတ်းၼိုင်ႈ၊ ၸုမ်းၶဝ်ဢဝ် ၵႂႃႇပွႆႇပႅတ်ႈပွတ်း ယၢၼ်ႉပုတ်ႉထ မူၼ်းထူၼ်း သၢႆ 3 ၊ ဝၢႆးၼၼ်ႉ ၽိူဝ်ႇတူဝ်ၵဝ်ႇၵႂႃႇတဵၵ်းတူၺ်းငိုၼ်းၵေႃႈ လႆႈႁၼ်ဝႃႈငိုၼ်းဢၼ်မီးၼႂ်း သၢႆမၢႆၼၼ်ႉမူတ်းၵဵင်ႈယဝ်ႉ- ဝႃႈၼႆ။

ၸွမ်းၼင်ႇၸဝ်ႈၼႃႈတီႈတွင်ႈထၢမ် ၸိူဝ်းၶဝ်ၽူႈၸူၼ်ႁိမ်ၶူဝ်းၶွင်ငိုၼ်းတွင်းပိူၼ်ႈၼၼ်ႉ တင်းမူတ်းယွမ်း ႁပ်ႉဝႃႈ- ၸိူဝ်းၶဝ် ႁူမ်ႈၵၼ်ႁဵတ်းမႃးလႆႈ 2 ပီ၊ ပေႃးလႆႈၶူဝ်းၶွင်ငိုၼ်းၶမ်းမႃးၵေႃႈဢဝ်မႃးၸႅၵ်ႇမႅင်ႇၵၼ်၊ ငိုၼ်းၵမ်ႈၽွင်ႈၵေႃႈဢဝ်ၸႂ်ႉၸၢႆႇၼႂ်းၵၢၼ် ဢႅဝ်ႇလၢဝ်း ၸွမ်းလွင်ႈမူၼ်ႈတၢင်းၵျေႃႇ လႄႈၼႂ်းၵၢၼ်တေႃႇ လွင်း ပၢင်ပွႆးမၢၵ်ႇၼင်မူၼ်းဢွၼ်ႊလၢႆႊ၊ လွင်ႈတၢင်းဢၼ် လႆႈၼုင်ႈသိူဝ်ႈၶူဝ်းပလိၵ်ႈၼၼ်ႉ ၵွပ်ႈလွၵ်ႇ ငိုတ်ႈၵူၼ်းၸိူဝ်း တူၵ်းပဵၼ်ယိူဝ်ႇလႆႈငၢႆႈ- ဝႃႈၼႆ။

ၽူႈသိုဝ်ႇၶၢဝ်ႇထႆးရၢႆးငၢၼ်းဝႃႈ- ၸုမ်းၸိူဝ်း(ၽူႈတွင်ႈႁႃ)ၼႆႉ လႆႈလွၵ်ႇငိုတ်ႈၸူၼ်ႁိမ်ဢဝ်ငိုၼ်းတွင်းပိူၼ်ႈ မႃး ၼႂ်းလၢႆတူင်ႇ တၢင်ႇပိုၼ်ႉတီႈ၊ မီးၵူၼ်းၸိူဝ်းသုမ်းၶူဝ်းၶွင်ငိုၼ်းတွင်းၶဝ်မႃးၸႅင်ႈၵႂၢမ်းဝႆႉတီႈႁူင်း ပလိၵ်ႈၼႂ်း မိူင်းၵွၵ်ႇ(ၵုင်းထဵပ်ႈ လႄႈတၢင်ႇ ၸႄႈတွၼ်ႈလၢႆလၢႆတီႈ၊ ၽွင်းႁဵတ်းပၢင်သပ်းလႅင်းၸႅင်ႈ ၶၢဝ်ႇၼၼ်ႉ မီးၵူၼ်းၸိူဝ်း တူၵ်းပဵၼ်ယိူဝ်ႇငၢႆးလၢႆးလဵဝ်ၵၼ်ၼႆႉ မႃးၸိတူဝ်မွၵ်ႈ 40 ၵေႃႉ၊ ၵႃႈၶၼ်ၶူဝ်းၶွင် တင်းငိုၼ်းတွင်းဢၼ်လႆႈ လုသုမ်းၵႂႃႇတင်းမူတ်း မွၵ်ႈငိုၼ်း 2,000,000 ဝၢတ်ႇ- ၼႆယဝ်ႉ။

ဢွၼ်တၢင်းသုတ်း ၸဝ်ႈၼႃႈတီႈထႆးၸႅင်ႈၶေႃႈႁႃ/တၢင်းၽိတ်းဝႃႈ ႁူမ်ႈၵၼ်ၸူၼ်ႁိမ် ၸၵ်ႉၶုတ်ႈဢဝ်ၶူဝ်း ၶွင် ငိုၼ်းၶမ်းပိူၼ်ႈ၊ ႁူမ်ႈၵၼ်တိၺွပ်းၵၵ်းၶင်ပိူၼ်ႈၸိူဝ်းၼႆသေ ဢဝ်ၵႂႃႇပၼ်တူတ်ႈတၢမ်ႇၸွမ်းၼင်ႇမၢႆမီႈ ၸိုင်ႈမိူင်း- ၼႆယဝ်ႉ။