ၸၢဝ်းၶိူဝ်းတင်းလၢႆၼႂ်းၸိုင်ႈမိူင်းႁူမ်ႈတုမ်ၸတ်းပၢင်ၵုမ် လူင် တီႈလႅၼ်လိၼ်ထႆးတီႈၼိုင်ႈ ၶၢဝ်းတၢင်း 3 ဝၼ်း၊ မီးၸုမ်းၼွၵ်ႈမိူင်း/ၼႂ်းမိူင်း ဢိၵ်ႇၸုမ်းယိပ်းၵွင်ႈၵၢင်ႇၸၢဝ်း ၶိူဝ်းလၢႆလၢႆၸုမ်းၶဝ်ႈႁူမ်ႈ။

ပၢင်ၵုမ်လူင်ၼႆႉ ၸတ်းတင်ႈတႄႇဝၼ်းထိ 14-16/09/12 ၊ မီးၸုမ်းၸိူဝ်းပိုင်ႈဢိင်ယူႇသဝ်းပွတ်း လႅၼ်လိၼ်ထႆး ပႃးၸဵမ် ၸုမ်းၼွၵ်ႈမိူင်းၼႂ်းမိူင်း 7 ၸႄႈမိူင်းၶဝ်ႈႁူမ်ႈ။ ၽူႈတၢင်တူဝ်ၸႄႈမိူင်းၶၢင် 4 ၵေႃႉ၊ ၽူႈတၢင်တူဝ်ၸႄႈမိူင်းယၢင်းၽိူၵ်ႇ 7 ၵေႃႉ၊ ၽူႈတၢင်တူဝ်ၸႄႈမိူင်းယၢင်းလႅင် 4 ၵေႃႉ၊ ၽူႈတၢင်တူဝ် ၸႄႈမိူင်း ၶျၢင်း 4 ၵေႃႉ၊ ၽူႈတၢင်တူဝ်ၸႄႈမိူင်းမွၼ်း 4 ၵေႃႉ၊ ၽူႈတၢင်တူဝ်ၸႄႈမိူင်းရၶႅင်ႇ 4 ၵေႃႉ၊ ၽူႈတၢင်တူဝ် ၸႄႈမိူင်းတႆး 9 ၵေႃႉ- ၸိူဝ်းၼႆႉ။ ဢၢၼ်းဝႆႉ115 ၵေႃႉ၊ မႃးၶဝ်ႈႁူမ်ႈ 143 ၵေႃႉ။

ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၸိူဝ်းၶဝ်ႈႁူမ်ႈ လႆႈႁူႉဝႃႈတေပႃး တပ်ႉသိုၵ်းၸိုင်ႈတႆးတင်း 2 ၸုမ်း RCSS/SSA တင်း SSPP/SSA ၼင်ႇၵၼ်။ ပႃႇတီႇမႂ်ႇသုင်ၸိူဝ်ႉၸၢတ်ႈယၢင်းလႅင် KNPP ၊ ႁူမ်ႈတုမ်ၸိူဝ်ႉ ၸၢတ်ႈယၢင်းၽိူၵ်ႇ KNU ၊ တပ်ႉသိုၵ်း ၶၢင်လွတ်ႈလႅဝ်း KIA/KIO ၊ တႅဝ်းႁူမ်ႈၸိူဝ်ႉၸၢတ်ႈၶျၢင်း CNF ၊ ၸုမ်းရၶႅင်ႇ ALP ၸိူဝ်းၼႆႉ။ ၼွၵ်ႈသေၼၼ်ႉ တေပႃးၸုမ်း ယိပ်းၵွင်ႈၵၢင်ႇၸၢဝ်းၶိူဝ်းၼႂ်းၸိုင်ႈတႆးထႅင်ႈ မိူၼ်ၼင်ႇ တပ်ႉသိုၵ်းပူတ်းပွႆႇ မိူင်းပလွင်ႈ TNLA/PNLO ၊ PNLA ၊ ၸၢင်ႈပႃး ထႅင်ႈ တပ်ႉသိုၵ်းၸိူဝ်ႉ ၸၢတ်ႈဝႃႉ WNA ၊ ၼႂ်းမိူင်းယၢင်းၽိူၵ်ႇၵေႃႈ ၵွပ်ႈမီးၸုမ်းယိပ်းၵွင်ႈၵၢင်ႇလၢႆၸုမ်းလႄႈ တပ်ႉသိုၵ်း ယၢင်းပုတ်ႉထ DKBA ၸိူဝ်းၼႆႉၵေႃႈၸၢင်ႈမႃးၶဝ်ႈႁူမ်ႈ- လႆႈႁူႉၼင်ႇၼႆ။

ဢၼ်တေၶဝ်ႈႁူမ်ႈဢမ်ႇၶဝ်ႈႁူမ်ႈ ယင်းပႆႇႁူႉတႅတ်ႈတေႃး မီးတပ်ႉသိုၵ်းမိူင်းဝႃႉၽွမ်ႉႁူမ်ႈ UWSA (ၸုမ်းပၢင်သၢင်း) တင်း တပ်ႉသိုၵ်းဢူၺ်းလီၻီႊမွၵ်းၶရႅတ်ႊတိၵ်ႊၸိူဝ်ႉၸၢတ်ႈ-ၸိုင်ႈတႆးပွတ်းဢွၵ်ႇ NDAA-ESS (ၸုမ်းမိူင်းလႃး)။ မိူဝ်ႈၼႆႉ (14/09/12)ပွတ်းဝၼ်း လႆႈငိၼ်းဝႃႈ RCSS/SSA သူင်ႇတူဝ်တႅၼ်း 3 ၵေႃႉ မႃးပဵၼ်ၽူႈလဵပ်ႈႁဵၼ်းပၢင်ၵုမ်ၼႆႉ- ဝႃႈၼႆ။

ပိူဝ်ႈတႃႇႁၢင်ႈႁႅၼ်းၶဝ်ႈႁူမ်ႈပၢင်ၵုမ်လူင်ပွၵ်ႈၼႆႉ ပူၼ်ႉမႃးမိူဝ်ႈဝၼ်းထိ 28-29/08/12 (ၶၢဝ်းတၢင်း 2 ဝၼ်း) မူႇၸုမ်းၵူၼ်း မိူင်းတႆး (Shan CBO) ၸတ်းပၢင်ၵုမ်တီႈလႅၼ်လိၼ်တီႈၼိုင်ႈ။ ဢုပ်ႇဢူဝ်းတႅပ်းတတ်း ႁပ်ႉႁွင်းၵမ်ႉထႅမ်လၵ်းၵၢၼ်/ ၽႅၼ်ငမ်းယဵၼ်ၶွင်ၸုမ်းႁဵတ်းၵၢၼ်ၵပ်းသၢၼ်ၸၢဝ်းၶိူဝ်းၸိုင်ႈတႆး 7 ၶေႃႈ။ ၵူၺ်းၵႃႈ ဢမ်ႇယွမ်းႁပ်ႉလၵ်းၵၢၼ်လွင်ႈ ငမ်းယဵၼ် 8 ၶေႃႈ ဢၼ်လူင်ပွင်ၸိုင်ႈတဵင်းၸဵင်ႇ ၶဵၼ်ႇတႅမ်ႈ ဢွၵ်ႇ မႃးသေပိုၼ်ၽၢဝ်ႇပဵၼ်တၢင်းၵၢၼ်မိူဝ်ႈဝၼ်းထိ 19/05/12 ။

လၵ်းၵၢၼ်ငမ်းယဵၼ် 7 ၶေႃႈ ဢၼ်မူႇၸုမ်းၵူၼ်းမိူင်းတႆးႁပ်ႉၼၼ်ႉ 1.ဢွင်ႈတီႈဢၼ်ၸုမ်းလူင်ပွင်ၸိုင်ႈ တင်းၸုမ်းၸၢဝ်း ၶိူဝ်းတေဢုပ်ႇဢူဝ်းၵၼ် ႁႂ်ႈပဵၼ်ဢွင်ႈတီႈဢၼ်ပဵၼ်ၵၢင်၊ ၾၢႆႇလႂ်ဢမ်ႇမီးဢေႃးၸႃႇႁူမ်ႇ ငမ်း။ 2.မိူဝ်ႈဢုပ်ႇဢူဝ်းၵၼ်လွင်ႈ ငမ်းယဵၼ်လႄႈသင်၊ မိူဝ်ႈဢဝ်ၶေႃႈလႆႈၸႂ်ၵၼ်မႃးႁဵတ်းသၢင်ႈႁႂ်ႈဢွၵ်ႇ ၼမ်ႉ ဢွၵ်ႇတူဝ်လႄႈသင် ထုၵ်ႇလႆႈမီးၸုမ်းၵူႈၸိုင်ႈ မိူင်းပၵ်းတႃတူၺ်းၸွမ်း။ 3.ႁႂ်ႈၽူႈတႅၼ်းလူင်ပွင် ၸိုင်ႈ မိူင်းႁူမ်ႈတုမ် တင်းၽူႈတႅၼ်းၸုမ်းၸၢဝ်းၶိူဝ်းယိပ်းၵွင်ႈၵၢင်ႇတင်း သဵင်ႈ လႆႈႁူပ်ႉဢုပ်ႇဢူဝ်းၵၼ်။ 4.ႁႂ်ႈႁွင်ႉပၢင်ၵုမ်လူင် ဢၼ်တူဝ်တႅၼ်းၸုမ်းယိပ်းၵွင်ႈၵၢင်ႇၸၢဝ်းၶိူဝ်း၊ တူဝ်တႅၼ်းပႃႇတီႇ ၵၢၼ်မိူင်း၊ မူႇၸုမ်းၵူၼ်းမိူင်းၸိူဝ်းတူင်ႉၼိုင်ၵၢၼ်တူင်ႇဝူင်းၵူၼ်း ဢိၵ်ႇၽူႈမီးပိုၼ်ႉႁူႉၼႂ်းၸၢဝ်းၶိူဝ်းၸိူဝ်းၼႆႉ ၶဝ်ႈႁူမ်ႈပႃး။ သင်ဝႃႈမူႇၸုမ်းၸိူဝ်းၼႆႉၶႂ်ႈႁွင်ႉပၢင်ၵုမ်ၵူၺ်းႁင်းၶေႃၵေႃႈ ႁႂ်ႈပၼ်ဢၼုၺၢတ်ႈႁဵတ်း။ 5.ႁႂ်ႈၸတ်းပၢင်ၵုမ်လူင် ၼင်ႇပၢင်လူင် ဢၼ်မီးၽူႈတႅၼ်းၸၢဝ်းၶိူဝ်း၊ ၽူႈတႅၼ်းၾၢႆႇၻီႊမွၵ်းၶရေႊသီႊ လႄႈၽူႈတႅၼ်းလူင်ပွင်ၸိုင်ႈ ၶဝ်ႈႁူမ်ႈၽဵင်ႇပဵင်းၵၼ်။ 6.ၶေႃႈတူၵ်းလူင်းဢၼ်လႆႈမႃးတီႈပၢင်ၵုမ်လူင် ၼၼ်ႉ ႁႂ်ႈပဵၼ်ၶေႃႈတူၵ်းလူင်းၸိုင်ႈမိူင်း ႁူမ်ႈတုမ်ၸၢဝ်းၶိူဝ်းသေ ႁႂ်ႈၸုမ်း ၸၢဝ်းၶိူဝ်းၸိူဝ်းၵဵဝ်ႇၶွင်ႈတုင်း ႁပ်ႉယိပ်းတိုဝ်းႁဵတ်းသၢင်ႈၵႂႃႇႁႂ်ႈဢွၵ်ႇၼမ်ႉ ဢွၵ်ႇတူဝ်။ 7.ၼႃႈၵၢၼ်ၸိူဝ်းၼႆႉတင်းမူတ်း ႁႂ်ႈႁဵတ်းယဝ်ႉ တူဝ်ႈၼႃႈပႆႇထိုင်ၵၢၼ်လိူၵ်ႈတင်ႈ 2015 ၸိူဝ်းၼႆႉ။