ဝၼ်းလပ်းလိုဝ်ႈလုၶွႆႈ သႅင်ၸိုၼ်ႈ သၶႁ ၶွပ်ႈ 1 ပီ၊ ၺႃတိ ၵဢိၵ်ႇၸုမ်းၸိူဝ်းမိတ်ႉသႁၢႆႁူမ်ႈ ၸတ်းပၢင်လူႇ တၢၼ်းတီႈ လႅၼ်လိၼ်တႆး-ထႆး၊ ၾၢႆႇၼိုင်ႈၵေႃၶၢဝ်ႇၽူႈတွႆႇႁွၵ်ႈ (ၵွၼ်းၶေႃ) ဢိတ်ႇပိုၼ်ပပ်ႉပိုၼ်းၶၢဝ်း တၢင်းၵၢၼ်ၸိူဝ်ႉ ၸၢတ်ႈ သႅင်ၸိုၼ်ႈ သၶႁ ပဵၼ်တီႈမၢႆတွင်းတႃႇၸိူဝ်းၸုပ်ႈ သႅၼ်းလင်လဵပ်ႈႁဵၼ်း။

ၼႃႈသိူဝ်ပပ်ႉ သၶႁ

ဝၼ်းထိ 15/09/2012 ၼႆႉ မႅၼ်ႈဝၼ်းၸဝ်ႈသႅင်ၸိုၼ်ႈ (သၶႁ) ၽူႈၵေႃႉယၢမ်ႈႁၢပ်ႇၵၢၼ်ၸိူဝ်ႉၸၢတ်ႈတႆး လၢႆပိူင်လၢႆပၢၼ် လုၶွႆႈ ၶွပ်ႈ 1 ပီ၊ ၺႃတိၵပီႈၼွင်ႉဢိၵ်ႇမိတ်ႉသႁၢႆ တေၸတ်းႁဵတ်းပၢင်ႁႅၼ်းတၢၼ်းတီႈ ဝတ်ႉၾႃႉဝဵင်းဢိၼ်း၊ ဢိူင်ႇပဵင်းလူင်၊ တူင်ႇဝဵင်း ဝဵင်းႁႅင်၊ ၸႄႈတွၼ်ႈၵဵင်းမႆႇ၊ လူႇတၢၼ်းသတ်ႉထၸႃၵပႃး ပေႃႈသိၼ်မႄႈသိၼ်ၼႂ်းဝၼ်းလိူၼ်ၵဝ်ႈလပ်းလႄႈ တေမီးပႃးပၢင်ၶုၵ်း ထူပ်းလူႇတၢၼ်းတီႈၶုမ်ၵုတ်း (ႁိမ်းၶုမ်ၸၢႆးမူး-ၸၢႆးသၼ်လွႆ)။

ၾၢႆႇၼိုင်ႈတၢင်းၼိုင်ႈ တႃႇႁႂ်ႈပဵၼ်တီႈမၢႆတွင်းဝၼ်းၶွပ်ႈၶူပ်ႇ သၶႁ လုၶွႆၶွပ်ႈ 1 ပီၼၼ်ႉ ယူႇတီႈၸုမ်းၸိူဝ်း ၽူႈႁၢပ်ႇၵၢၼ်ၼႂ်း ၵေႃၶၢဝ်ႇၽူႈတွႆႇႁွၵ်ႈ (ၵွၼ်းၶေႃ) ဢိၵ်ႇၽူႈၸိူဝ်းမိုတ်ႈၵိုဝ်းၸမ်ၸႂ်ၵမ်ႈၽွင်ႈၵမ်ႉထႅမ်ႁႅင်း ငိုၼ်းသေ လႆႈႁူမ်ႈၵၼ်ၶပ်းၶိုင်ႁဵတ်း ဢွၵ်ႇပပ်ႉပိုၼ်းၶၢဝ်းတၢင်းၸူဝ်ႈပၢၼ်ၽဝႃႉ သၶႁ၊ ပဵၼ်ပပ်ႉပိုၼ်း တႄႇၵၢၼ်ပၢႆးမွၼ်းႁူမ်ႈၸၢႆးသၢႆမၢဝ်းဢတ်းၵႂၢမ်း "လိၵ်ႈ ႁူမ်ႈမၢႆ ပၢင်လူင်"၊ ႁၢပ်ႇၵၢၼ်ၸိူဝ်ႉၸၢတ်ႈပဵၼ် သိုၵ်း၊ ႁူမ်ႈဢွၼ်ၵေႃႇတင်ႈဝူင်းႁႆႇတိုင်ႈ "ၸိူင်းလႅဝ်း"၊ ႁၢပ်ႇၵၢၼ်ပိုၼ်ၽၢဝ်ႇ၊ ၸွႆႈၵၢၼ် ၸိူဝ်ႉၸၢတ်ႈလၢႆ တွၼ်ႈလၢႆပၢၼ်တေႃႇထိုင်ၶုၼ်သႃႇ ဢွၼ်တပ်ႉသိုၵ်းမိူင်းတႆး MTA ဝၢင်းၶိူင်ႈၸူးမၢၼ်ႈသေ ၶဝ်ႈမိူင်းထႆး တင်ႈၸုမ်းၶၢဝ်ႇသိုပ်ႇတိုၵ်းလူၺ်ႈလၢႆးၵတ်းယဵၼ်တေႃႇပေႃးသဵင်ႈၵၢမ်ႇလုၶွႆႈ။

ပပ်ႉပိုၼ်းၼႆႉ ၽူႈတႅမ်ႈလိၵ်ႈၼၢင်းယိင်းထႆး (သုတ်ႉထိၻႃႊ မလိၵႅဝ်ႊ) ယၢမ်ႈတွင်ႈထၢမ်ၶၢဝ်းတၢင်းၸူဝ်ႈ ပၢၼ်ၵၢၼ်ၸိူဝ်ႉ ၸၢတ်ႈ သၶႁ ဝႆႉၸဵမ်မိူဝ်ႈဢွၼ်ၼႃႈတေလုၶွႆႈမွၵ်ႈၸမ်ႁိမ်းပီ၊ ဝၢႆး သၶႁ လုၶွႆႈယဝ်ႉလႆႈ ႁုပ်ႈတႅမ်ႈပဵၼ်ပိုၼ်းၾၢႆႇထႆး၊ ဢိင်ဢဝ် ၼႆႉသေ (ဢၢၼ်းတႆး ၶႆးၶၢၼ်ႇၾႃႉ) ၶိုၼ်းပိၼ်ႇတႅမ်ႈလႄႈမႄး ထတ်းထွၼ်ထႅမ်ပဵၼ်ပိုၼ်းၾၢႆႇတႆး သႂ်ႇပႃးၶေႃႈႁၼ်ထိုင် သႁၶ ဢၼ်ယၢမ်ႈတႅမ်ႈထတ်းသၢင်ၵဵဝ်ႇ လူၺ်ႈငဝ်းလၢႆၵၢၼ်မိူင်း၊ ငဝ်းလၢႆးၶုၼ်သႃႇ MTA လုၵွႆ၊ ဢိၵ်ႇလွင်ႈၽဵင်းၵႂၢမ်းပၢႆးမွၼ်းၸိူဝ်း ၼႆႉ။

ပပ်ႉပိုၼ်းၼႆႉႁဵၵ်ႈၸိုဝ်ႈ "သႅင်ၸိုၼ်ႈ သၶႁ" ၼိုင်ႈၽဝႃႉလၢႆပၢၼ် ၽူႈႁၢပ်ႇၵၢၼ်ၸိူဝ်ႉၸၢတ်ႈ (ၶုၼ်သႃႇ MTA တွၼ်ႈသွၼ် ၵၢၼ်လုၵ်ႉၽိုၼ်ႉ) ပဵၼ်ပပ်ႉပိုၼ်းသွင်ၽႃႇသႃႇ (တႆး - ထႆး) တင်းၼႃပပ်ႉ 152 ၼႃႈ၊ ၵႃႈၶၼ်ၼိုင်ႈပပ်ႉ 99 ဝၢတ်ႇ၊ ၽူႈလႂ်ၶႂ်ႈ မီးဝႆႉလဵပ်ႈႁဵၼ်းၸိုင်ၵပ်းသိုပ်ႇလႆႈတီႈ ၵေႃၶၢဝ်ႇၽူႈတွႆႇႁွၵ်ႈ (ၵွၼ်းၶေႃ) မၢႆၾူၼ်း 089-2644127 / 080-1257474 ဢမ်ႇ ၼၼ် သိုဝ်ႉလႆႈတီႈလၢၼ်ႉသႅၼ်ႁွမ် (ၼႃႈဝတ်ႉၵူႇတဝ်ႈ ဝဵင်းၵဵင်းမႆႇ) မၢႆၾူၼ်း 053-231089 တႄႇဝၼ်းထိ 16/09/2012 ၵႂႃႇ။

မၢႆတွင်း ….ၽူႈယူႇၵႆတၢင်ႇၸႄႈဝဵင်းသင်ႇသိုဝ်ႉတေသူင်ႇပၼ်ၸွမ်းႁဵင်းလိၵ်ႈ သွၼ်ႇပႃးၵႃႈသူင်ႇလူင်း သဵၼ်ႈ မၢႆ 50 ဝၢတ်ႇ။