တပ်ႉသိုၵ်းမိူင်းဝႃႉၽွမ်ႉႁူမ်ႈ UWSA ၶိုၼ်းပွႆႇပၼ် ၵူၼ်းသိုၵ်း တပ်ႉသိုၵ်းၸိုင်ႈတႆး RCSS/SSA ၸိူဝ်းၵုမ်းတူဝ် တိၺွပ်းဝႆႉ။

ၵဵဝ်ႇၵပ်းလွင်ႈၼႆႉ လႆႈႁူႉဝႃႈပူၼ်ႉမႃးမိူဝ်ႈဝၼ်းထိ 24/08/12 ၸုမ်းသိုၵ်းဝႃႉ ၼႃႈလိၼ်သိုၵ်း 171 ဢဝ်ၵူၼ်းသိုၵ်းတႆးၸိူဝ်း ၵုမ်းတူဝ်တိၺွပ်းဝႆႉမိူဝ်ႈ (31/07/12) ၶိုၼ်ႈၵႂႃႇတီႈငဝ်ႈငုၼ်းပၢင်သၢင်းၶွင် UWSP/UWSA တႃႇၵူၼ်း 4 ၵေႃႉ။ ၼႂ်းသီႇၵေႃႉ ၼၼ်ႉ လႆႈငိၼ်းဝႃႈပဵၼ် ၶုၼ်သိုၵ်းလူင်ၸၢႆးပိူဝ်ႇ၊ ၶုၼ်သိုၵ်းၸၢႆးၶႅင်ႇ၊ ၵေႃႉသိုၵ်းၸၢႆးမိူင်းလႄႈၸၢႆးလွႆ။

ပူၼ်ႉမႃးဢမ်ႇႁိုင်ၼႆႉ လႆႈငိၼ်းဝႃႈၶုၼ်သိုၵ်းၸၢႆးၶႅင်ႇၼၼ်ႉ သိုၵ်းဝႃႉပွႆႇပၼ်တီႈပၢင်သၢင်း၊ ၵေႃႉသိုၵ်း ၸၢႆးမိူင်း တင်းၸၢႆးလွႆ ဢဝ်လူင်းမႃးပွႆႇပၼ်ပွတ်းတႃႈၶီႈလဵၵ်း၊ ႁၢၼ်ႉတေႃႇမိူဝ်ႈဝႃးၼႆႉ လႆႈငိၼ်းဝႃႈ ပႆႇႁွတ်ႈၽႅဝ်ၶိုၼ်း ၼႂ်းတပ်ႉ RCSS/SSA ။ ၵူၺ်းၵႃႈ ၶုၼ်သိုၵ်းလူင်ၸၢႆးပိူဝ်ႇတႄႉပႆႇပွႆႇပၼ်၊ တိုၵ်ႉထုၵ်ႇ ၵုမ်းတူဝ်ဝႆႉယူႇတီႈ ငဝ်ႈငုၼ်းပၢင်သၢင်း- လႆႈႁူႉၼင်ႇၼႆ။

ၵဵဝ်ႇၵပ်းလွင်ႈၵူၼ်းသိုၵ်းလၢႆလၢႆၵေႃႉ ၸိူဝ်းၺႃးၵုမ်းတူဝ်တိၺွပ်းဝႆႉ ၼႂ်းၼႃႈလိၼ်သိုၵ်း 171 (ဢမ်ႇလႆႈ ဢဝ်မိူဝ်း ပၢင်သၢင်း) ၼၼ်ႉ လႆႈငိၼ်းဝႃႈ ဢိင်ၼိူဝ်တၢင်းတပ်ႉသိုၵ်းဝႃႉတိတ်းတေႃႇမႃးသေ ဝၼ်းထိ 13/09/12 (မိူဝ်ႈဝႃး) ၸဝ်ႈႁၢၼ်တိုၼ်းၶိူဝ်း၊ ၽူႈၵွၼ်းတပ်ႉၸုမ်း 727 (လွႆသၢမ်သိပ်း) ႁပ်ႉလိၵ်ႈတီႈငဝ်ႈ ၸိုင်ႈလွႆတႆးလႅင်း သေ ဢွၵ်ႇၶၢဝ်းတၢင်းၵႂႃႇၸူးသိုၵ်းဝႃႉ၊ ပိူဝ်ႈတႃႇ ၵႂႃႇႁပ်ႉဢဝ်ၵူၼ်းသိုၵ်းၸိူဝ်းၼၼ်ႉ-ၼႆယူႇ။

ၵူၺ်းၵႃႈ ငဝ်းလၢႆးလိုၼ်းသုတ်း တေႃႇထိုင်ၶမ်ႈဝႃးၼႆႉ ပွႆႇပၼ်ယဝ်ႉႁိုဝ်ပႆႇပွႆႇပၼ်ၼၼ်ႉ ၸွမ်းၼင်ႇၸုမ်း ၶၢဝ်ႇ ၽူႈတွႆႇႁွၵ်ႈ တိတ်းတေႃႇတွင်ႈထၢမ်ၽူႈၶၢၼ်ပၢၵ်ႇ RCSS/SSA ၸဝ်ႈႁၢၼ်လၢဝ်သႅင်ၼၼ်ႉ မၼ်းၸဝ်ႈယင်းပႆႇယိုၼ်ယၼ်။

ပူၼ်ႉမႃးမိူဝ်ႈဝၼ်းထိ 30/07/12 သိုၵ်းဝႃႉၵႂႃႇတိၺွပ်းသိုၵ်းတႆး တီႈလွႆပုင်ႇၽႃပုင်ႇတွင်း ၽွင်းတိုၵ်ႉႁဵတ်း တပ်ႉမႂ်ႇ ၼႂ်းၸႄႈ ဝဵင်းမိူင်းတူၼ်၊ ဢၼ်တေႃႇၼႃႈၵၼ်တင်းလွႆသၼ်ၸု ငဝ်ႈငုၼ်းတပ်ႉၸုမ်း 727 ႁိမ်းလႅၼ်လိၼ်ထႆး၊ တေႃႇၼႃႈၸႄႈ ဝဵင်းမိူင်းၾၢင်။ ၵဵဝ်ႇလူၺ်ႈလွင်ႈၼႆႉ သိုၵ်းဝႃႉၸိၼႄးဝႃႈ သိုၵ်းတႆး ပူၼ်ႉပႅၼ်ၶႂၢၵ်ႈၼႃႈလိၼ်ၶွင်ဝႃႉ။ ၵူၺ်းၵႃႈၾၢႆႇသိုၵ်းတႆး တွပ်ႇလၢတ်ႈၼႄလွင်ႈတၢင်းဝႃႈ ပိူဝ်ႈတႃႇဢဝ်ႁူမ်ႇ လူမ်ႈ ၵူၼ်းပၢႆႈၽေးၵႂႃႇႁဵတ်းၵၢၼ် ၽုၵ်ႇသွမ်ႈ၊ ၵွပ်ႈဝႃႈဝၢႆး RCSS/SSA ၵိုတ်းယိုဝ်းၵၼ်တင်းလူင်ပွင်ၸိုင်ႈ မၢၼ်ႈ မႃးၼႆႉ တၢင်းၸဝ်ႈတႃႇၼ ၸုမ်း NGO ၸိူဝ်းၸွႆႈထႅမ်ငိုၼ်းတွင်းၵူၼ်းပၢႆႈၽေး လူတ်းယွမ်းလူင်း ၼမ်၊ ႁဵတ်းႁႂ်ႈပဵၼ်ႁၢပ်ႇလူင်တေႃႇတပ်ႉသိုၵ်း- ၼႆယဝ်ႉ။