ၶူးသွၼ် မေႃသွၼ်တီႈလၢႆးၶႃႈ ဢွၼ်ၵၼ်ပွင်ႉၶၢင်းလွင်ႈ ၽူႈၵွၼ်းပၢႆးပၺ်ႇၺႃႇတီႈလၢႆးၶႃႈ တတ်းၵိၼ် ငိုၼ်းလိူၼ် မႃးလၢႆလိူၼ်။ ၾၢႆႇၼိုင်ႈၵေႃႈ မေးၼၢင်းမၼ်းၵႆႉယွၼ်း ငိုၼ်းၵႃႈၼမ်ႉမၼ်းလူတ်ႉ တီႈၵူၼ်း မိူင်း ၼပ်ႉႁူဝ်ႁဵင်။

ၶၢဝ်းတၢင်း 3 လိူၼ်မႃးၼႆႉ ဢိင်ၼိူဝ်ၽူႈၵွၼ်းပၢႆးပၺ်ႇၺႃႇ တီႈလၢႆးၶႃႈတတ်းၵိၼ်ငိုၼ်းလိူၼ်မေႃသွၼ်/ ၶူးသွၼ်ၼႂ်းႁူင်း ႁဵၼ်းၶဝ် ၼိုင်ႈၵေႃႉ 2,000 ပျႃး။ မိူဝ်ႈၵဵပ်းငိုၼ်းၼၼ်ႉ ႁႂ်ႈၶူးသွၼ်ႁူင်းႁဵၼ်းၶဝ် လူင်းလၢႆး မိုဝ်းပၼ်ဝႃႈ ႁဝ်းၶႃႈမီးၼမ်ႉၸႂ် ၸေႇတၼႃႇသေၵမ်ႉထႅမ်သြႃႇႁဝ်း။ ၵပ်းၵၢႆႇလွင်ႈၼႆႉ မိူဝ်ႈလဵဝ် ၶူးသွၼ် ယိင်း/ၸၢႆး ဢိၵ်ႇၽူႈၵွၼ်းႁူင်းႁဵၼ်းၶဝ်ဢွၼ်ၵၼ် ၶၢင်းၼႅၼ်ႇ၊ ၵွပ်ႈဝႃႈပေႃးလႆႈသႂ်ႇၵႂႃႇၵူႈလိူၼ် ၵွပ်ႈငိုၼ်း လိူၼ် ဢမ်ႇၵုမ်ႇထူၼ်ႈလႄႈၸၢင်ႈတူၵ်းၵိၼ်း- ၼႆယဝ်ႉ။

မေႃသွၼ်ၶဝ်လၢတ်ႈဝႃႈ- မၼ်းၵဵပ်းၵိၼ်ငိုၼ်းႁဝ်း ပိူဝ်ႈတႃႇၼႃႈႁိူၼ်းပေႃႈမႄႈပီႈၼွင်ႉမၼ်း လႄႈတူဝ် မၼ်းယူႇလွတ်ႈၵႂႃႇ ၶၢဝ်းယၢဝ်း။ ၵူၺ်းၵႃႈ ပေႃးမၼ်းၶႂ်ႈႁဵတ်းႁိူၼ်းသေယူႇတႄႉ၊ မၼ်းထုၵ်ႇလီတႅမ်ႈလိၵ်ႈ တၢင်ႇထိုင် ၽွင်းလူင်ၾၢႆႇပၺ်ႇၺႃႇသေ ယွၼ်းငိုၼ်းတီႈၽွင်းလူင်ၾၢႆႇပၺ်ႇၺႃႇၸႄႈမိူင်းတႆး၊ ဢမ်ႇတၢပ်ႈ မႃးတတ်း ၵိၼ်ငိုၼ်းလိူၼ်ႁဝ်း။ ၵူၺ်းၵႃႈ ဢမ်ႇၸၢင်ႈႁဵတ်း ႁိုဝ်၊ ၵွပ်ႈဝႃႈမၼ်းယႂ်ႇလိူဝ်ပိူၼ်ႈလႄႈ မၼ်းယွၼ်းမႃးၵေႃႈ ၵႃႈလႆႈပၼ်- ဝႃႈၼႆ။

ထႅင်ႈၾၢႆႇၼိုင်ႈ မေးၼၢင်းမၼ်းၵေႃႈ ပေႃးဝႃႈလူင်းၼႂ်းဝၢၼ်ႈၼႂ်းသူၼ် ၵႆႉၵႂႃႇႁႃယွၼ်းငိုၼ်းၵူၼ်းဝၢၼ်ႈ ၼိုင်ႈပွၵ်ႈ 4-5 ႁဵင်၊ ဢိင်ဢၢင်ႈဝႃႈၵႃႈၼမ်ႉမၼ်းလူတ်ႉၶိူင်ႈ။

ၵဵဝ်ႇၵပ်းလွင်ႈၼႆႉ ယူႇတီႈၶူးသွၼ်တီႈလၢႆးၶႃႈလႄႈသင်၊ ယူႇတီႈၵူၼ်းမိူင်းလၢႆးၶႃႈလႄႈသင်၊ တုၵ်းယွၼ်း ဝႃႈ- ပေႃးပဵၼ်လႆႈ ၶႂ်ႈႁႂ်ႈၽွင်းလူင်ၾၢႆႇပၺ်ႇၺႃႇၸႄႈမိူင်းတႆး တူၺ်းထိုင်ပၼ်လွင်ႈၼႆႉ-ၼႆယဝ်ႉ။