ၽွင်းႁၢင်လိူၼ်ပူၼ်ႉမႃး သိုၵ်းမၢၼ်ႈၶၢၼ်းထူဝ်ႈၵူၼ်းဝၢၼ်ႈ ဢွၵ်ႇတၢင်း ၸွမ်းၼင်ႇၽႅၼ်ၵၢၼ်ၵႂၢတ်ႇလၢင်ႉ ပိုၼ်ႉတီႈ၊ ၺႃးၸုမ်းယိပ်းၵွင်ႈၸုမ်းၼိုင်ႈပႂ်ႉငွႆးယိုဝ်းၸွမ်းတၢင်း၊ ၽူႈမီးၸၼ်ႉတင်းၵူၼ်းဝၢၼ်ႈတၢႆထင်တီႈ 2 ၵေႃႉ။

ပူၼ်ႉမႃးမိူဝ်ႈဝၼ်းထိ 30/08/12 သိုၵ်းမၢၼ်ႈမွၵ်ႈ 20 ၵေႃႉ ၶၢၼ်းထူဝ်ႈၵူၼ်းဝၢၼ်ႈ 2 လမ်း လုၵ်ႉဝဵင်းသီႇ ပေႃႉ ဢွၵ်ႇတၢင်း ၵႂႃႇၼႃႈဝၼ်းတူၵ်း။ ယၢမ်း 13:00 မူင်း ၽွင်းႁွတ်ႈၽႅဝ်ဝူင်ႈၵၢင်ဝၢၼ်ႈပၢင်ႇၵီႈ တင်း ဝၢၼ်ႈမူးလေး၊ ယၢၼ်ၾၢႆႇတူၵ်းသီႇပေႃႉ 6 လၵ်းၼၼ်ႉ ထူဝ်ႈလမ်းၼိုင်ႈၺႃးၸုမ်းယိပ်းၵွင်ႈဢမ်ႇႁူႉၸၵ်း ၸုမ်းပႂ်ႉမူၵ်းယိုဝ်း၊ ၽူႈၵွၼ်းတပ်ႉၽႄသိုၵ်းမၢၼ်ႈတၢႆၵေႃႉ ၼိုင်ႈ၊ ၵူၼ်းႁေႃႈထူဝ်ႈၵေႃႈတၢႆၸွမ်း၊ ၸိူဝ်းၺႃး တိူဝ်ႉဝၢတ်ႇၸဵပ်းၵေႃႈ မီးၼမ်-ၼႆယဝ်ႉ။

“မိူဝ်ႈသိုၵ်းမၢၼ်ႈပူၼ်ႉဝၢၼ်ႈပၢင်ႇၵီႈၵႂႃႇၼၼ်ႉ ထူဝ်ႈသိုၵ်းမၢၼ်ႈလမ်းၼိုင်ႈသမ်ႉၶမ်၊ ၵူၼ်းသိုၵ်းၸွႆႈၵၼ် လူင်းဢီး။ ၽွင်းၼၼ်ႉ လမ်းဢၼ်ၸွမ်းမႃးၾၢႆႇလင် ဢၼ်ၽူႈမီးၸၼ်ႉၶဝ်ၶီႇမႃးၸွမ်းသမ်ႉပူၼ်ႉၵႂႃႇသေ ၺႃးယိုဝ်းၵမ်းလဵဝ်၊ ပၢင်တိုၵ်း ႁိုင်မွၵ်ႈ 15 မိၼိတ်ႉၵူၺ်း၊ ၽူႈမီးၸၼ်ႉၵေႃႉၼၼ်ႉတၢႆထင်တီႈ၊ ၸဝ်ႈထူဝ်ႈ ၵေႃႈ တၢႆထင်တီႈၸွမ်းၵၼ်တီႈၼၼ်ႈ”- ၵူၼ်း ဝၢၼ်ႈပွတ်းမေႃႇၵိူဝ် (ပေႃႇၵျူဝ်ႇ)ၵေႃႉၼိုင်ႈလၢတ်ႈ ၼင်ႇၼႆ။

ၵူၼ်းႁေႃႈထူဝ်ႈၵေႃႉတၢႆၼၼ်ႉ ပဵၼ်ၸၢႆးၵူဝ်ႇ ဢႃႇယုမွၵ်ႈ 20 ပီ၊ ၵူၼ်းဝၢၼ်ႈပၢင်ႇၵီႈ၊ ပေႃႈၸိုဝ်ႈၸၢႆးၸိင်ႇ၊ မႄႈၸိုဝ်ႈၼၢင်း ငူၺ်ႇၸႃႇ၊ မိူဝ်ႈလဵဝ်မေးမၼ်းၸၢႆးပႃးတွင်ႉတူဝ်ၼၵ်းဝႆႉ။ ၵူၼ်းၼႂ်းပိုၼ်ႉတီႈလၢတ်ႈဝႃႈ သိုၵ်းမၢၼ်ႈတေသၢႆႈတႅၼ်းပၼ်တီႈ မေးၼၢင်းၸၢႆးၵူဝ်ႇ 2,300,000 ပျႃး (23 သႅၼ်)။ လိူဝ်သေၼၼ်ႉ တေၸွႆႈပၼ်လုၵ်ႈၼႂ်းတွင်ႉမၼ်းၼၢင်း တႃႇၶဝ်ႈႁူင်းႁဵၼ်း တေႃႇဢႃႇယုပေႃးလႆႈ 22 ပီ- ဝႃႈၼႆ။

ပွတ်းတွၼ်ႈဢၼ်ပဵၼ်ပၢင်တိုၵ်း ၼႂ်းၸႄႈဝဵင်းသီႇပေႃႉၼႆႉ ပဵၼ်တွၼ်ႈၼိူဝ်တၢင်းၵႃးဝဵင်းလိူဝ်ႇ-သီႇပေႃႉ-လႃႈသဵဝ်ႈ။ မီးတပ်ႉသိုၵ်းၸိုင်ႈတႆး SSPP/SSA တင်းတပ်ႉသိုၵ်းၸိုင်ႈတႆး RCSS/SSA ၊ တပ်ႉသိုၵ်းပူတ်းပွႆႇ မိူင်းပလွင်ႈ TNLA ၊ တပ်ႉသိုၵ်းလွတ်ႈလႅဝ်းၶၢင် KIA လႄႈ ပီႇတုၸိတ်ႉလၢႆလၢႆၸုမ်းတူင်ႉၼိုင်ဝႆႉ။

ၽူႈမီးၸၼ်ႉၼႂ်း RCSS/SSA ၵေႃႉၼိုင်ႈၵေႃႈလၢတ်ႈဝႃႈ- ပဵၵ်ႉသမ်ႉဝႃႈပႃႇတီႇၵၢၼ်မိူင်းပႆႇပဵၼ်ဢၼ်ၼိုင်ႈ ဢၼ်လဵဝ်ၵၼ် ၵေႃႈ တပ်ႉသိုၵ်းတႄႉမီးလွင်ႈပိၼ်ႇပႆႇၵမ်ႉယၼ်ၸွႆႈထႅမ်ၵၼ်ယူႇ။ တၢင်းၾၢႆႇၼိူဝ်တၢင်းၵႃး ဝဵင်းလိူဝ်ႇ သီႇပေႃႉ လႃႈသဵဝ်ႈၼႆႉ တပ်ႉတႆးတင်းသွင်ၸုမ်းႁူမ်ႈၵၼ်တူင်ႉၼိုင်ဝႆႉ- ဝႃႈၼႆ။