ပႃႇတီႇၵၢၼ်မိူင်းမိူင်းမၢၼ်ႈလၢႆပႃႇတီႇ ၸိူဝ်းၵႂႃႇလဵပ်ႈႁဵၼ်း ၵၢၼ်မိူင်းၵၢၼ်ၽွင်းငမ်းမိူင်းပူဝ်ႊလႅၼ်ႊ ၸွမ်းၼင်ႇ လူင်ပွင်ၸိုင်ႈပူဝ်ႊလႅၼ်ႊ ႁပ်ႉပဵၼ်ၸဝ်ႈတႃႇၼႁွင်ႉ မွၵ်ႇမႃး ပွၵ်ႈၶိုၼ်းထိုင်မိူင်းမၢၼ်ႈ။

ပူၼ်ႉမႃးမိူဝ်ႈဝၼ်းထိ 31/08/12 ပႃႇတီႇၵၢၼ်မိူင်းမိူင်းမၢၼ်ႈ လၢႆလၢႆပႃႇတီႇ လႆႈၵႂႃႇလဵပ်ႈႁဵၼ်း/ၶဝ်ႈပၢင် သွၼ် ၵဵဝ်ႇၵပ်းၵၢၼ် မိူင်း ၵၢၼ်ၽွင်းငမ်း တီႈမိူင်းပူဝ်ႊလႅၼ်ႊ ၼႂ်းၵုၼ်ယူႊရွပ်ႊ။ ပႃႇတီႇၵၢၼ်မိူင်းၸိူဝ်းၵႂႃႇ ၼၼ်ႉ ပႃႇတီႇၼူၵ်ႉယုင်း NLD ဢၼ်ဢွင်ႇသၢၼ်းၸုၵျီႇဢွၼ်ႁူဝ်၊ ပႃႇတီႇသၢင်ႇသီႈ USDP လႄႈပႃႇတီႇ ၸၢဝ်းၶိူဝ်း မိူၼ်ၼင်ႇပႃႇတီႇႁူဝ်သိူဝ် SNLD ၊ ပႃႇတီႇ သိူဝ်ၽိူၵ်ႇ SNDP လႄႈပႃႇတီႇၸၢဝ်းၶိူဝ်းတၢင်ႇပႃႇတီႇ၊ ၵူႈပႃႇတီႇ ႁူမ်ႈၵၼ်တင်းမူတ်း 41 ၵေႃႉ။ ဢွၵ်ႇမိူင်းမၢၼ်ႈၵႂႃႇမိူဝ်ႈ ဝၼ်းထိ 31/08/12 သေပွၵ်ႈၶိုၼ်းထိုင် မိူင်းမၢၼ်ႈ ဝၼ်းထိ 09/09/12 ။ ပၢင်သွၼ်ၼႆႉ ႁွင်ႈၵၢၼ်လူင်ၾၢႆႇၼွၵ်ႈမိူင်း မိူင်းပူဝ်ႊလႅၼ်ႊ ႁပ်ႉပဵၼ် ၸဝ်ႈတႃႇၼသေ ႁွင်ႉမွၵ်ႇပႃႇတီႇၵၢၼ်မိူင်းမိူင်းမၢၼ်ႈၵႂႃႇ- ၼႆယဝ်ႉ။

ၵူၼ်းၼုမ်ႇတႆးၵေႃႉၼိုင်ႈလၢတ်ႈဝႃႈ- ဢၼ်ၵႂႃႇလဵပ်ႈႁဵၼ်း 41 ၵေႃႉၼၼ်ႉ ပႃႇတီႇ NLD 25 ၵေႃႉ၊ ပႃႇတီႇ ၸၢဝ်းၶိူဝ်း ႁူမ်ႈ 9 ၵေႃႉ၊ ၼႂ်းၸၢဝ်းၶိူဝ်း 9 ၵေႃႉၼႆႉပႃးတႆး 3 ၵေႃႉ၊ ပဵၼ်ႁူဝ်သိူဝ် 2 ၵေႃႉ၊ သိူဝ်ၽိူၵ်ႇ 1 ၵေႃႉ။ တၢင်ႇၸၢဝ်းၶိူဝ်းထႅင်ႈ 1 ၼိုင်ႈၵေႃႉ။ ၼွၵ်ႈသေၼၼ်ႉ ၼႂ်းပႃႇတီႇ NLD တင်း USDP ၵေႃႈ ပႃးၸၢဝ်းၶိူဝ်း မွၵ်ႈ 3 ၵေႃႉ၊ ၸၢဝ်းၶိူဝ်းတင်းမူတ်းမီးမွၵ်ႈ 13 ၵေႃႉ။ NLD တင်း USDP တႄႉ ႁွင်ႈၵၢၼ်လူင် ၾၢႆႇၼွၵ်ႈမိူင်း မိူင်းပူဝ်ႊလႅၼ်ႊတိတ်းတေႃႇၵမ်းသိုဝ်ႈ၊ ပႃႇတီႇၸၢဝ်းၶိူဝ်းတႄႉ ပဵၼ်ၸုမ်း NGO မိၼ်ႇၵလႃႇ မျၢၼ်ႇမႃႇ ႁွင်ႉ။ ၵမ်ႈၼမ် ပဵၼ်ပႃႇတီႇဢၼ်ပေႉၵၢၼ်လိူၵ်ႈတင်ႈမိူဝ်ႈပီ 1990 - ဝႃႈၼႆ။

ၵဵဝ်ႇၵပ်းလွင်ႈၼႆႉ တၢင်ႇၸၢဝ်းၶိူဝ်းလၢတ်ႈဝႃႈ- ၽွၼ်းလီဢၼ်ႁဝ်းလႆႈၵႂႃႇလဵပ်ႈႁဵၼ်းမိူင်းပူဝ်ႊလႅၼ်ႊ ၼႆႉမီးၼမ်၊ လႆႈတၢင်းႁူႉ ၼမ်၊ မိူင်းပူဝ်ႊလႅၼ်ႊၼႆႉၵေႃႈမီးၸၢဝ်းၶိူဝ်းၼမ်မိူၼ်ၼင်ႇဝၢၼ်ႈမိူင်းႁဝ်း။ ၵူၺ်းၵႃႈ ဢၼ်ႁဝ်းမႃးၼႆႉ ၵွပ်ႈပဵၼ်တွၼ်ႈမႃး လဵပ်ႈႁဵၼ်းၵူၺ်းလႄႈ ဢမ်ႇလႆႈတၢင်ႇလၢတ်ႈပိူင်ပဵၼ် ဢၼ်ပဵၼ်ယူႇမီးယူႇၼႂ်းဝၢၼ်ႈ ႁဝ်းမိူင်းႁဝ်း။ ၵူၺ်းၵႃႈ လႆႈတၢင်းႁူႉ ၼမ်ၵေႃႈ ပေႃးလွင်ႈၸၢဝ်းၶိူဝ်းၼႆႉ ဢမ်ႇပေႃးလႆႈႁပ်ႉလွင်ႈသူၼ်ၸႂ်ၵႃႈႁိုဝ်၊ ၶဝ်ၵူၺ်းႁူႉဝႃႈ မိူင်းမၢၼ်ႈၼႆႉမီးပႃႇတီႇ NLD ပဵၼ်ယႂ်ႇၵူၺ်း-ၼႆယဝ်ႉ။

ၶၢဝ်းတၢင်းဢၼ်လႆႈၵႂႃႇလဵပ်ႈႁဵၼ်း/ၶဝ်ႈပၢင်သွၼ်ၼႆႉ မီးၽွၼ်းလီပိူဝ်ႈတႃႇသုၼ်ႇတူဝ် မိူၼ်ၼင်ႇလႆႈႁူႉ ၵၢၼ် ၽွင်းငမ်း၊ ၼႂ်းၸၢဝ်းၶိူဝ်းၼႆႉ ၵွပ်ႈၶတ်းလိူၵ်ႈသေၵႂႃႇလႄႈ လႆႈဝႃႈၵႂႃႇလဵပ်ႈႁဵၼ်းၵေႃႈၶိုတ်းတၼ်း ၶဝ်ႈၸႂ်လီ။ ၶၢဝ်းတၢင်းပွၵ်ႈၼႆႉ ၵမ်ႈၽွင်ႈ ယွၵ်ႇလဵၼ်ႈၵၼ်ဝႃႈ ပႃႇတီႇ NLD ပွႆႇၵူၼ်းၵႂႃႇၼမ်ပူၼ်ႉတီႈ၊ ၸၢဝ်းၶိူဝ်းသမ်ႉပွႆႇၵႂႃႇ ဢိတ်းဢွတ်းၵူၺ်း၊ ယွၼ်ႉပိူဝ်ႈဢမ်ႇသူၼ် ၸႂ်လွင်ႈၸၢဝ်းၶိူဝ်းႁိုဝ်- ၵူၼ်းၼုမ်ႇတႆး သိုပ်ႇလၢတ်ႈၼင်ႇၼႆ။