လူင်ပွင်ၸိုင်ႈထႆး ၸတ်းပၢင်ပွႆးၶုၵ်းထူပ်းယုၵ်ႉယွင်ႈၸၢဝ်း ၶိူဝ်းတႆး 4 ၸၢဝ်းၶိူဝ်းၼႂ်းမိူင်းထႆးပွတ်းႁွင်ႇ လႄႈတၢင်ႇ ၸၢဝ်းၶိူဝ်း တီႈဝၢင်းသၢမ်ႁေႃၶမ်း ၼႂ်းၵဵင်းမႆႇ၊ မီးၵူၼ်း ၶဝ်ႈႁူမ်ႈၼမ်လိူဝ်လၢႆ။

ဝၼ်းထိ 08-09/09/12 ပူၼ်ႉမႃးၼႆႉ ယူႇတီႈလူင်ပွင်ၸိုင်ႈထႆး ၾၢႆႇၾိင်ႈထုင်းႁိတ်ႈႁွႆး ၸႄႈတွၼ်ႈၵဵင်း မႆႇ/လမ်းပုၼ်း/ လမ်းပၢင်း/မႄႈႁွင်ႈသွၼ် ၸတ်းပၢင်ပွႆးၶုၵ်းထူပ်း/ သိုပ်ႇသၢၼ်ၾိင်ႈထုင်းႁိတ်ႈႁွႆး လွင်ႈယူႇသဝ်း ၵိၼ်သၢင်ႈၸၢဝ်းတႆး 4 ၶိူဝ်း ၼႂ်းမိူင်းထႆး ၸိူဝ်းယူႇသဝ်းၼႂ်းၸိုင်ႈထႆးပွတ်းႁွင်ႇ၊ မိူၼ်ၼင်ႇ တႆးလိုဝ်ႉ၊ တႆးၶိုၼ်၊ တႆးယွင်း၊ တႆးလူင် လႄႈၸၢဝ်းၶိူဝ်းယၢင်း တီႈဝၢင်းႁေႃၶမ်းသၢမ်တူၼ် (သၢမ်ၵသတ်ႇ) ၼႂ်းဝဵင်းၵဵင်းမႆႇ။

လွင်ႈတူင်ႉၼိုင်ၵဵဝ်ႇၵပ်းပၢင်ပွႆးၼၼ်ႉ ဝၼ်းထိ 09/09/12 ယၢမ်း 15:00 မူင်း ၸၢဝ်းတႆး 4 ၸၢဝ်းၶိူဝ်း ၵႂႃႇၶွၼ်ႈတုမ်ၵၼ်တီႈ ဝတ်ႉၽရႃႉသိင်ဝေႃရဝိႁၢရ်သေ ယၢမ်း 16:00 မူင်း ၼုင်ႈသိူဝ်ႈၶူဝ်းတႆးပႆလဵပ်ႈလုၵ်ႉ တီႈ ဝတ်ႉၽရႃႉသိင်မႃးၸူးတီႈဝၢင်းႁေႃၶမ်း သၢမ်တူၼ်။ ယၢမ်း 17:00 မူင်း ပိုတ်ႇပၢင်ပွႆး။ ၼၢႆးၽႆးထုၼ်း လတ်းလိူတ်ႉလူပ်ႉ (ၾၢႆႇၾိင်ႈထုင်ႈႁိတ်ႈႁွႆးၸႄႈတွၼ်ႈၵဵင်းမႆႇ) မွၵ်ႇလၢတ်ႈၵႂၢမ်းလွင်ႈလႆႈၸတ်းပၢင်ပွႆး။ သိုပ်ႇၼၼ်ႉ ၽူႈၵွၼ်းၸႄႈတွၼ်ႈၵဵင်းမႆႇ ၼၢႆးရိတ်ႉထိ တေၸၽၼ်းမွၵ်ႇလၢတ်ႈ ၵႂၢမ်းပိုတ်ႇပၢင်ပွႆး၊ လၢတ်ႈတိုၵ်းသူၼ်းပႃးဝႃႈ ႁႂ်ႈႁၵ်ႉသႃမႅတ်ႇပႅင်းလွင်ႈၾိင်ႈထုင်းႁိတ်ႈႁွႆးၵၢၼ်ယူႇသဝ်းၵိၼ်သၢင်ႈၸၢဝ်း တႆးၵႂႃႇ၊ တူဝ်ၵဝ်ႇၵေႃႈမီးၸိူဝ်ႉသၢႆ ၸၢဝ်းၶိူဝ်းယူႇၽွင်ႈ- ဝႃႈၼႆ။

ၼႂ်းပၢင်ပွႆး မီးၵၢၼ်ၼႄသိူဝ်ႈၶူဝ်းတႆးလၢႆလၢႆၸိူဝ်းၶိူဝ်းတင်းၼမ်လႄႈ ၶူဝ်းၶွင်သိၼ်ၵႃႉ (OTOP) ဢၼ်ႁဵတ်းဢွၵ်ႇလူၺ်ႈ ၼမ်ႉတိၼ်ၼမ်ႉမိုဝ်းၵူၼ်းဝၢၼ်ႈၼႂ်းပိုၼ်ႉတီႈလႂ်ပိုၼ်ႉတီႈၼၼ်ႉ၊ လွင်ႈယူႇသဝ်း ၵိၼ်သၢင်ႈ ၸၢဝ်းၶိူဝ်း၊ လွင်ႈၾိင်ႈငႄႈ ၾိင်ႈထုင်းႁိတ်ႈႁွႆးၸၢဝ်းၶိူဝ်း။ ၼွၵ်ႈၼိူဝ်သေတႆးယဝ်ႉ မီးၸဵမ်ပီႈ ၼွင်ႉထႆး/ယူၼ်း/ ၸၢဝ်းၼွၵ်ႈမိူင်းၸိူဝ်းၼႆႉၶဝ်ႈႁူမ်ႈပၢင် ပွႆးတင်းၼမ်။
ၸၢဝ်းၶိူဝ်းတႆး 4 ၸၢဝ်းၶိူဝ်း ဢၼ်ၸတ်းပၢင်ပွႆးၶုၵ်းထူပ်းပွၵ်ႈၼႆႉ ၸၢဝ်းတႆးလိုဝ်ႉ ယူႇသဝ်းၼႂ်းမိူင်းထႆး ဝၢၼ်ႈမိူင်းလူင်းၼိူဝ် ဢိူင်ႇလူင်းၼိူဝ် ၸႄႈဝဵင်းလွႆသၵဵတ်း ၸႄႈတွၼ်ႈၵဵင်းမႆႇ၊ ၸႃႇတိတီႈယူႇသဝ်းၵိၼ် သၢင်ႈ မိူဝ်ႈၵွၼ်ႇ ပဵၼ်မိူင်းသိပ်းသွင်ပၼ်း ၼႃး (ၼႂ်းမိူင်းၶႄႇယၢမ်းလဵဝ်)။ တႆးၶိုၼ် ယူႇသဝ်းၼႂ်းမိူင်းထႆး ဝၢၼ်ႈတူၼ်ႈႁႅၼ်ၼွႆႉ မူႇတီႈ 7 ၊ ဢိူင်ႇတႃႈဝင်းၽရၢဝ်ႉ ၸႄႈဝဵင်းသၼ်ပႃႇတွင်း ၸႄႈတွၼ်ႈၵဵင်းမႆႇ။ တႆးယွင်း ပဵၼ်ၸိူဝ်ႉသၢႆတႆးလိုဝ်ႉၼင်ႇၵဝ်ႇ၊ ယူႇသဝ်းၼႂ်းမိူင်းထႆး ၼႂ်းဢိူင်ႇ ပူၵ်ႇၶၢင်ႉ ၸႄႈဝဵင်းသၼ်ၵမ်ႇ ပႅင်း ၸႄႈတွၼ်ႈၵဵင်းမႆႇ။ ၸႃႇတိၵူႈပွၵ်ႈ ယူႇမိူင်းယွင်း ၸႄႈတွၼ်ႈၵဵင်းတုင်။ တႆးလူင်ယူႇ သဝ်းၼႂ်းၵဵင်းမႆႇ ႁိမ်းႁွမ်းဝတ်ႉပႃႇပဝ်ႈ ဢိူင်ႇသီၽုမ်း မိူင်းၵဵင်းမႆႇ၊ လုၵ်ႉမိူင်းတႆးၶဝ်ႈမႃးမိူင်းထႆး ယွၼ်ႉၽေးသိုၵ်းသိူဝ်။ ၼႂ်းၸၢဝ်းၶိူဝ်းတႆး 4 ၸၢဝ်းၶိူဝ်းၼႆႉ တိုၵ်ႉႁၵ်ႉသႃမႅတ်ႇပႅင်းဝႆႉၾိင်ႈထုင်းႁိတ်ႈႁွႆး၊ ၶူဝ်းၼုင်ႈတၢင်းဝႆ၊ ၽႃသႃၵႂၢမ်းလၢတ်ႈ ၽႂ်မၼ်း- ၼႆယဝ်ႉ။

လွင်ႈတၢင်းဢၼ်ၸတ်းပၢင်ပွႆးၶုၵ်းထူပ်းၼႆႉ ၵွပ်ႈလူင်ပွင်ၸိုင်ႈထႆး ႁွင်ႈၵၢၼ်ၾၢႆႇၾိင်ႈငႄႈၾိင်ႈထုင်း မီးငိုၼ်း ၵွင်ၵၢင် (Budget) ၸွမ်းၵူႈပီပီ ပိူဝ်ႈတႃႇၶုၵ်းထူပ်းယုၵ်ႉယွင်ႈၸၢဝ်းၶိူဝ်း၊ ၼင်ႇႁိုဝ်ၸၢဝ်းၶိူဝ်းၼႂ်း မိူင်းထႆး တေဢမ်ႇႁၢႆလၢႆ။ ဢမ်ႇၵွမ်ႉၵႃႈ တႆးၵူၺ်း တၢင်ႇၸၢဝ်းၶိူဝ်းၸိူဝ်းယူႇသဝ်းၼႂ်းမိူင်းထႆး မိူၼ်ၼင်ႇ ၸၢဝ်းမွၼ်း၊ ၸၢဝ်းယၢင်းလႄႈတၢင်ႇၸၢဝ်းၶိူဝ်းၵေႃႈ မီးၵၢၼ် ၸတ်းပၢင်ပွႆးၶုၵ်းထူပ်းၼင်ႇၵဝ်ႇ။