ယီႈလၢႆႈ ၵေႃႉဢၼ်ထုၵ်ႇမၢပ်ႇၽၢမ်းဝႃႈ ၵဵဝ်ႇၶွင်ႈၵၢၼ်ၶႃႈ ႁႅမ်ၵူၼ်းၸွမ်းႁိူဝ်းၶႄႇ 13 ၵေႃႉ ၼႂ်းမႄႈၼမ်ႉၶွင်၊ လႆႈထုၵ်ႇ တိၺွပ်းသူင်ႇပၼ်ၶႄႇမိူၼ်ၼင်ႇၸၢႆးၼေႃႇၶမ်းလႄႈ တၢင်ႇၵေႃႉ တေလႆႈၶိုၼ်ႈလုမ်းတြႃးတတ်းသိၼ်။

ၼႂ်းလိူၼ်သႅပ်ႊထႅမ်ႊၿိူဝ်ႊ (2012)ၼႆႉ ယီႈလၢႆႈ ၵူၼ်းၸုမ်းၸၢႆးၼေႃႇၶမ်း ၵေႃႉဢၼ်ထုၵ်ႇတိၺွပ်း သူင်ႇပၼ်ၶႄႇ ၵေႃႉၼိုင်ႈၼႂ်း သၢမ်ၵေႃႉ (1.ယီႈလၢႆႈ၊ 2.ၼေႃႇၶမ်း၊ 3.သၢင်ႇၶမ်း) ယွၼ်ႉထၢင်ႇထိူမ်ဝႃႈ ၵဵဝ်ႇၶွင်ႈၵၢၼ်ၶႃႈႁႅမ် ၵူၼ်းၸွမ်းႁိူဝ်းၶႄႇ 13 ၵေႃႉမိူဝ်ႈ ဝၼ်းထိ 05/10/11 ပူၼ်ႉမႃး တေလႆႈၶိုၼ်ႈလုမ်းတြႃးၶႄႇ ပိူဝ်ႈတႃႇတတ်းသိၼ်။

ၵူၼ်းၵဝ်ႇၼႂ်းတပ်ႉသိုၵ်းမိူင်းတႆး (MTA) လၢတ်ႈဝႃႈ- မိူဝ်ႈလဵဝ် ယီႈလၢႆႈ ဢႃႇယုမွၵ်ႈ 56-60 ပီ၊ ဢွၼ်တၢင်းပဵၼ်ႁူဝ် ၼႃႈပီႇတု ၸိတ်ႉ ၼႃးႁႆးလူင် ဢိူင်ႇမိူင်းလဵၼ်း ၵိင်ႇၸႄႈဝဵင်းတႃႈလိူဝ်ႇ ၸႄႈတွၼ်ႈတႃႈၶီႈလဵၵ်း။ ဝၢႆးမႃးလုၵ်ႉတီႈ ပီႇတုၸိတ်ႉၶဝ်ႈႁူမ်ႈႁွမ်း MTA ဢၼ်ၸဝ်ႈၶုၼ်သႃႇဢွၼ်ႁူဝ်၊ ပေႃးဝႃႈ MTA ဝၢင်းၶိူင်ႈၵွင်ႈၵၢင်ႇ ယဝ်ႉၵေႃႈ သိုပ်ႇၶဝ်ႈပႃးတူင်ႉၼိုင်ၼႂ်း တပ်ႉသိုၵ်းၸိုင်ႈတႆး SSA ပွတ်းၸၢၼ်း ဢၼ်ၸဝ်ႈယွတ်ႈသိုၵ်းဢွၼ်ႁူဝ်- ဝႃႈၼႆ။

ၽွင်းၼၼ်ႉ ၸၢႆးၼေႃႇၶမ်းၵေႃႉဝၢင်းၶိူင်ႈၸွမ်းၸဝ်ႈၶုၼ်သႃႇ လႆႈဢၼုၺၢတ်ႈၶိုၼ်းယိပ်းၵွင်ႈၵၢင်ႇသေပဵၼ်မႃး ႁူဝ်တႃႈပီႇတုၸိတ်ႉ တူင်ႉၼိုင်ႈၼႂ်းၸႄႈတွၼ်ႈတႃႈၶီႈလဵၵ်း။ ဢိင်ၼိူဝ်မၢၵ်ႈမီးၽိတ်းႁူၽိတ်းတႃသေ ဝၼ်းထိ 09/01/2006 သိုၵ်းမၢၼ်ႈတင်းၾၢႆႇ ၽဵဝ်ႈယႃႈမဝ်းၵမ်မၢၼ်ႈ ၵႂႃႇၵူတ်ႇသွၵ်ႈ တီႈႁိူၼ်းၸၢႆးၼေႃႇၶမ်းတင်း 2 တီႈ တီႈဝၢၼ်ႈပႃႇသၵ်းလႄႈတီႈႁွင်ႈလိုၵ်ႉ၊ တိလႆႈယႃႈ မႃႉၼပ်ႉႁူဝ်လၢၼ်ႉမဵတ်ႉ တင်းၶိူင်ႈၵွင်ႈၵၢင်ႇၽွင်ႈ၊ ၵူၺ်းၵႃႈ တူဝ်ၸၢႆးၼေႃႇၶမ်းငိူင်ႉဝႄႈပၢႆႈလွတ်ႈပႅတ်ႈ။

ယီႈလၢႆႈၼႆႉ ထိုင်မႃးၼႂ်းပီ 2006 ပေႃးဝႃႈၸၢႆးၼေႃႇၶမ်း လုၵ်ႉတီႈပီႇတုၸိတ်ႉ ဢွၵ်ႇပၢႆႈၵႂႃႇတင်ႈၸုမ်းၵဵပ်းၶွၼ်ႇ၊ တူင်ႉၼိုင်ယူႇ သဝ်းပွတ်းတွၼ်ႈၼႃႈလိၼ်သၢမ်ၸဵင်ႇၶမ်း၊ ထုၵ်ႇသူၼ်းတုမ်ႁူၺ်းပၢႆးၶဝ်ႈပႃးၼႂ်းၸုမ်းၼေႃႇၶမ်း။ ထိုင်မႃး 2011 ထုၵ်ႇၸိၼႄးဝႃႈ ၵဵဝ်ႇၶွင်ႈပႃးလွင်ႈၵူၼ်းၸွမ်းႁိူဝ်းၶႄႇ တၢႆ 13 ၵေႃႉ ၼႂ်းမႄႈၼမ်ႉၶွင် မိူဝ်ႈဝၼ်းထိ 05/10/11 သေ ထုၵ်ႇတိဢွၼ်ၼႃႈၸၢႆးသၢင်ႇၶမ်း ၵေႃႈထုၵ်ႇတၢင်းထႆးတိၺွပ်း လႄႈ ၸၢႆးၼေႃႇၶမ်းထုၵ်ႇလၢဝ်းတိၺွပ်း။

ပူၼ်ႉမႃးမိူဝ်ႈဝၼ်းထိ 26/09/11 ၸဝ်ႈၼႃႈတီႈၶႄႇ-လၢဝ်း ႁူမ်ႈၵၼ်ၵႂႃႇဝုၵ်းၶဝ်ႈၵူတ်ႇထတ်းႁူင်းႁႅမ်း ၶိင်ႊရူဝ်ႊမႅၼ်ႊ (Kings Romans Casino) ဢၼ်ပိုတ်ႇပၢင်လွင်း/ၶႃႊသီႊၼူဝ်ႊသေ ၸဝ်ႈၶွင်ပဵၼ်ၸၢဝ်ႇဝူၺ်း၊ တီႈတူၼ်ႈၽိုင်ႈ (ၾင်ႇမိူင်းလၢဝ်း) ၶႂႅင်/ၸႄႈ တွၼ်ႈၿေႃႇၵႅဝ်ႈ။ ၵပ်းၵၢႆႇလွင်ႈၼႆႉ ထိုင်မႃးဝၼ်းထိ 27/09/11 ၵႅမ်ၸွမ်ၽွင်းလူင်မိူင်းထႆး ၶျလိူမ် ယူႇၿမ်းရုင်း ပိုၼ်ၽၢဝ်ႇဝႃႈ- တင်းမူတ်း တိလႆႈယႃႈၵူႈလွင်ႈလွင်ႈ 2 ထူင်ၸၢၼ်ႈ၊ ငိုၼ်းထႆး 50 လၢၼ်ႉ။ ၸုမ်းသိုဝ်ႇလၢႆၾၢႆႇလၢတ်ႈပႃးဝႃႈ ယႃႈလႄႈငိုၼ်းၸိူဝ်း ၼၼ်ႉ ဢမ်ႇၸႂ်ႈ တိလႆႈၼႂ်းတီႈပၢင် လွင်း၊ တိလႆႈတၢင်းၼွၵ်ႈမၼ်းတီႈၶွၵ်ႈမႃႉ- ဝႃႈၼႆ။

ၵမ်ႈၽွင်ႈဝႃႈ- ပိူဝ်ႈတႃႇႁဵတ်းႁႂ်ႈပိူၼ်ႈထၢင်ႇထိူမ်ဝႃႈ ၸၢဝ်ႇဝူၺ်း ၵဵဝ်ႇၶွင်ႈၸွမ်းၵၢၼ်ၵႃႉယႃႈသေ လႆႈဢိုတ်းပိၵ်ႉ ပႅတ်ႈၶႃႊသီႊၼူဝ်ႊ တီႈတူၼ်ႈၽိုင်ႈ မိူင်းလၢဝ်းဢမ်ႇပဵၼ်မႃးလႄႈ ၸင်ႇမႃးၶိုင်ၽႅၼ်ၵၢၼ် ယိုဝ်းၵူၼ်းၸွမ်း

ႁိူဝ်းၶႄႇတၢႆထႅင်ႈသေ ဢဝ်ယႃႈမႃႉယဵတ်ႈ သႂ်ႇပၼ်။ ၵမ်ႈၽွင်ႈဝႃႈ ယီႈလၢႆႈတင်းၵူၼ်းမိူင်းထႆးၵေႃႉၼိုင်ႈ ၸိုဝ်ႈဝႃႈ ပူႇၼူတ်ႇ ႁူမ်ႈၵၼ် 2 ၵေႃႉ ပဵၼ်ၵူၼ်းႁူမ်ႈၵၼ်ဝၢင်းၽႅၼ်ၶႃႈ ႁႅမ်ၶႄႇ 13 ၵေႃႉသေ ဢဝ်ယႃႈ 920,000 မဵတ်ႉယဵတ်ႈသႂ်ႇၼႂ်းႁိူဝ်း၊ ၵူၺ်းၵႃႈၵမ်ႈၽွင်ႈဝႃႈ ဢၼ်လူင်းမိုဝ်းၶႃႈႁႅမ်တႄႉတႄႉ ပဵၼ်ၸၢႆးဢွင်ႇမျၢတ်ႈ။

မိူဝ်ႈလဵဝ်ဢၼ်တိုၵ်ႉပဵၼ်လွင်ႈလိုၵ်ႉလပ်ႉယူႇၼၼ်ႉ ၽႂ်ယူႇၾၢႆႇလင်ပူင်ၵၢၼ်ၶႃႈႁႅမ်ၵူၼ်း 13 ၵေႃႉၼၼ်ႉ ၽႂ်ပႆႇ ၸၢင်ႈလၢတ်ႈ။ ၵမ်ႈၽွင်ႈထတ်းသၢင်ဝႃႈ ၵွမ်ႉၵႃႈၼေႃႇၶမ်း၊ သၢင်ႇၶမ်း၊ ယီႈလၢႆႈ၊ ၶိင်းထႆးပူႇၼူတ်ႇ ၶဝ်ၸိူဝ်းၼႆႉ

တိုၼ်းဝႃႈဢမ်ႇလႅပ်ႈပဵၼ်ၵူၼ်းပူင် ၵၢၼ်၊ ၶဝ်ဢမ်ႇမီးလွင်ႈတၢင်းၼႅၼ်ႈၼႃ ပိူဝ်ႈတႃႇယႃႉၸိုဝ်ႈသဵင် ႁဵတ်းႁႂ်ႈၸၢဝ်ႇ ဝူၺ်ႉတူၵ်းၵိၼ်းတုၵ်ႉၶ ၶဝ်တိုၼ်းမီးၵူၼ်းယူႇၾၢႆႇ လင်ပူင်ၵၢၼ်-ဝႃႈၼႆ။

ယီႈလၢႆႈၼႆႉ မီးႁိူၼ်းယူႇတီႈပႃႇမိူတ်ႇ မႄႈသၢႆ၊ ၺႃးတိၼႂ်းမိူင်းလၢဝ်း ဢွၼ်တၢင်းၼေႃႇၶမ်းတင်းသၢင်ႇၶမ်း။ သၢင်ႇၶမ်းထုၵ်ႇၸဝ်ႈ ၼႃႈတီႈထႆးတိမိူဝ်ႈဝၼ်းထိ 20/04/12 ၽွင်းဢွၵ်ႇၶၢဝ်းတၢင်းလုၵ်ႉတီႈႁိၼ်တႅၵ်ႇၵႂႃႇ တၢင်းၵဵင်းမႆႇ။ ၸၢႆးၼေႃႇၶမ်းၺႃးၸဝ်ႈ ၼႃႈတီႈလၢဝ်းတိမိူဝ်ႈဝၼ်းထိ 25/04/12 ၼႂ်းမိူင်းလၢဝ်း၊ ဝၢႆးမႃးထုၵ်ႇ သူင်ႇပၼ်ၶႄႇ။ ၵူၼ်းၸုမ်းၼေႃႇၶမ်း ၸိူဝ်းထုၵ်ႇသူင်ႇပၼ် ၶႄႇမိူဝ်ႈလဵဝ်မီး 4 ၵေႃႉ၊ ၼႂ်းၼၼ်ႉပႃး 1.ၸၢႆးၼေႃႇၶမ်း၊ 2.ၸၢႆးဢွင်ႇမျၢတ်ႈ၊ 3.သၢင်ႇၶမ်း၊ 4.ယီႈလၢႆႈ။ (ၸၢႆးဢွင်ႇမျၢတ်ႈၼၼ်ႉ ဢွၼ်တၢင်းလႆႈငိၼ်း ဝႃႈ တေဢဝ်ၵႂႃႇ 5 ဝၼ်း ပိူဝ်ႈတႃႇပဵၼ်လၵ်းထၢၼ် / ၽူႈႁူႉႁၼ်တၢင်တူဝ်လူင်ပွင်ၸိုင်ႈမိူင်းမၢၼ်ႈ)။