သိုၵ်းဝႃႉဢဝ်ႁႅင်းသိုၵ်းပႂ်ႉၼႂ်းပုင်ႇပႃႇၶႅမ်၊ ၵူတ်ႇထတ်းၵူၼ်း လတ်းၽၢၼ်ႇၵႂႃႇမႃးႁၢဝ်ႈႁႅင်း၊ ႁဵတ်းႁႂ်ႈၵူၼ်းမိူင်း ဢမ်ႇႁတ်း ၵႂႃႇႁဵတ်းၵၢၼ်။ တိၺွပ်းၵူၼ်းၸၢႆးပုင်ႇပႃႇၶႅမ်ၵေႃႉၼိုင်ႈ ၽွင်းၵႂႃႇၵဵပ်းဝွၼ်ၼႂ်းၼမ်ႉႁၢင်။

တင်ႈတႄႇဝၼ်းထိ 27/08/12 မႃးႁၢၼ်ႉတေႃႇမိူဝ်ႈလဵဝ် သိုၵ်းဝႃႉပႂ်ႉၸွမ်းတၢင်း လုၵ်ႉမိူင်းတူၼ်လူင်းမႃးပုင်ႇပႃႇၶႅမ် ၸွမ်းတၢင်းတၢင်ႇ တီႈ ၵေႃႈၸၢင်ႈပႂ်ႉယူႇ။ မိူၼ်ၼင်ႇတီႈမိူင်းႁၢင်ၼႆႉ ပႂ်ႉ 3 တီႈ၊ ၵၢင်ဝၢၼ်ႈတီႈၼိုင်ႈ၊ ၼႃႈဝတ်ႉၵျွင်း မိူင်းႁၢင်တီႈၼိုင်ႈ၊ သမ်ႉတၢင်း ၶိုၼ်ႈၵႂႃႇထမ်ႈတီႈၼိုင်ႈ။ ပေႃးၵၢင်ၼႂ်မိူင်းလႅင်းမႃးၵေႃႈ ဢဝ်ၵႃးၾူဝ်ႊဝီႊလ်တၢင်ႇ သိုၵ်းမႃး 1 လမ်းသေၼိုင်ႈတီႈလႂ်ပၵ်းဢဵၼ်ႁႅင်း သိုၵ်းမွၵ်ႈ 10 ပၢႆ၊ ပေႃးႁူဝ်ၶမ်ႈ လပ်းသိင်ႇၵေႃႈပွၵ်ႈမိူဝ်းၶိုၼ်း-ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈၼႄၼင်ႇၼႆ။

သိုၵ်းဝႃႉၶဝ်သႂ်ႇၶူဝ်းသိုၵ်းတဵမ်ထူၼ်ႈ ပႃးၵွင်ႈၸေးမိုဝ်း၊ မၢၵ်ႇပွမ်းႁွႆႈၸွမ်းဢႅဝ်၊ ၵွင်ႈၵေႃႈပဵၼ်ၵွင်ႈၶႅမ်ႉၵူၺ်းၵူၺ်း၊ ပႃးၸိူၵ်ႈမတ်ႉၸွမ်း ဢႅဝ်သေတင်ႈလၢၼ်ႇပႂ်ႉထဵတ်ႈထၢမ်ၵူၼ်းလတ်းၽၢၼ်ႇၵႂႃႇမႃးႁၢဝ်ႈႁႅင်း၊ ၵူၼ်းဝၢၼ်ႈၵႂႃႇႁႆႈ ၵႂႃႇၼႃးၵေႃႈပေႃးလတ်းၽၢၼ်ႇတီႈ ဢၼ်ၶဝ်ပႂ်ႉ ထဵတ်ႈထၢမ်တိၵ်းတိၵ်း၊ ပေႃးဝႃႈပဵၼ်ၵူၼ်းၸိူဝ်းၶဝ်ဢမ်ႇႁူႉၸၵ်း ၶဝ်ထၢင်ႇထိူမ်ႁၼ်ၽိတ်းၵေႃႈၶဝ်တေတိ၊ လွင်ႈၼႆႉ ႁဵတ်းႁႂ်ႈၵူၼ်းၵႂႃႇႁဵတ်းၵၢၼ်၊ ၵႂႃႇတႃႈပႆတၢင်းၶဝ် ၽႂ်ၽႂ်ၵေႃႈ ဢွၼ်ၵၼ်ၵူဝ်သိုၵ်းဝႃႉ။

သိုပ်ႇလၢတ်ႈဝႃႈ- ပိူင်လူင်မၼ်း သိုၵ်းဝႃႉၶဝ်ထၢမ်ၵူၼ်းၵႂႃႇမႃးဝႃႈၸွင်ႇၸႂ်ႈၵူၼ်းဝၢၼ်ႈတႄႉ၊ ၵူၺ်းၵႃႈပဵၼ်ၵူၼ်း ဝၢၼ်ႈၵေႃႈယဝ်ႉ ပေႃးပဵၼ်ၵူၼ်းၵေႃႉဢၼ်ၶဝ်ထၢင်ႇထိူမ်တႄႉၶဝ်တိုၼ်းတိ၊ ယင်းတိပႃးၶႄႇမိူင်းႁၢင်ၵေႃႉၼိုင်ႈ လူးၵွၼ်ႇ-ၼႆယဝ်ႉ။

ပူၼ်ႉမႃးမိူဝ်ႈ ဝၼ်းထိ 27/08/12 ဝၼ်းဢၼ်ၽူႈၵွၼ်းတိူင်းသိုၵ်းသၢမ်ၸဵင်ႇ (ၵဵင်းတုင်) မႃးတီႈပုင်ႇပႃႇၶႅမ်ၼၼ်ႉ မွၵ်ႈယၢမ်း 11:00 မူင်း၊ သိုၵ်းဝႃႉၵႂႃႇတိၵူၼ်းမိူင်းႁၢင်ၵေႃႉၼိုင်ႈ ၸိုဝ်ႈၸၢႆးဢူ ဢႃႇယု 34 ပီ၊ ၽွင်းမၼ်းၸၢႆးတိုၵ်ႉ လူင်းၵႂႃႇႁႃၵဵပ်းဝွၼ်ၸွမ်းၼမ်ႉႁၢင်၊ သိုၵ်းဝႃႉၶဝ်ဢဝ်ၵွင်ႈငႃသေလၢတ်ႈၵႂၢမ်းတႆးဝႃႈ- “ဢမ်ႇလိူဝ်လႆႈႁေႉပီႈဢၢႆႈႁေႉ၊ ပဵၼ်ၵႂၢမ်းသင်ႇပႃႈၼိူဝ်ၸႂ်ႉမႃး”။ ၸၢႆးဢူတွပ်ႇဝႃႈ-ပေႃးသူၸဝ်ႈဢမ်ႇလိူဝ်လႆႈ ၵေႃႈ ၵဝ်ၶႃႈတေႁဵတ်းႁိုဝ်လိူဝ်လႆႈ။ ၼွၵ်ႈသေၼၼ်ႉ မၼ်းၸၢႆးဝွၼ်းၼွမ်း(တွင်းပၢၼ်ႇ) ၸိူင်ႉႁိုဝ် ၵေႃႈဢမ်ႇလႆႈ၊ သိုၵ်းဝႃႉၶဝ်ဢဝ်ထူင်ၸၢၼ်ႈသုပ်းႁူဝ်၊ ဢဝ်သေႃးမိုဝ်းၶတ်းမိုဝ်းမၼ်းၸၢႆးယဝ်ႉ ဢဝ်တၢင်ႇလူတ်ႉၵႂႃႇ။ ၵူၺ်းၵႃႈ ၵၢင်ၶမ်ႈၶိုၼ်းၼၼ်ႉ ၸဝ်ႈၼႃႈတီႈမၢၼ်ႈ ၾၢႆႇႁူမ်ႇလူမ်ႈသိုၵ်း (ၸယၽ) တင်းၵူၼ်းလူင်ၼႂ်းဝၢၼ်ႈ ၵႂႃႇယွၼ်းၶိုၼ်းလႄႈလႆႈပွၵ်ႈ ၶိုၼ်းႁိူၼ်း- လႆႈႁူႉၼင်ႇ ၼႆ။

ၾၢႆႇၼိုင်ႈတၢင်းၼိုင်ႈ ၵူၼ်းပုင်ႇပႃႇၶႅမ်ၵေႃႉၼိုင်ႈလၢတ်ႈဝႃႈ- တီႈတႄႉမၼ်း ဝႃႉတင်းတႆးဢမ်ႇမီးပၼ်ႁႃၵၼ်၊ ဢၼ်မီးပၼ်ႁႃၼၼ်ႉ ပဵၼ်ၵူၼ်းၵမ်ႈၽွင်ႈၵူၺ်း။ ပီႈၼွင်ႉဝႃႉတင်းတႆးၼႆႉၶဝ်ႈဢွၵ်ႇၵၼ်လီယူႇ၊ မိူၼ်ၼင်ႇပေႃး ထိုင်ၶၢဝ်းႁဵတ်းၽၵ်းမီႇႁေႃၸွမ်းတူင်ႈ ၸွမ်းၼႃးၸိူဝ်းၼႆႉ ပီႈၼွင်ႉဝႃႉၶဝ်မႃးႁႃၵိၼ်ၸၢင်ႈတႆးယူႇ ၵႃႈႁႅင်းဝၼ်း 150 ဝၢတ်ႇ။ ဢၼ်သၢဝ်တႆးၵႂႃႇဢဝ်မၢဝ်ႇဝႃႉၵေႃႈမီး၊ ဢၼ်မၢဝ်ႇတႆးၵႂႃႇဢဝ်သၢဝ်ဝႃႉၵေႃႈမီး။ ၵူၺ်းၵႃႈ ၸွမ်းၼင်ႇၾိင်ႈ ထုင်းမီးၼၼ်ႉ ပေႃးသၢဝ်တႆးဢဝ်မၢဝ်ႇဝႃႉၵေႃႈၵႂႃႇယူႇၸွမ်းဝႃႉ၊ ပေႃးမၢဝ်ႇတႆးဢဝ်သၢဝ်ဝႃႉၵေႃႈ မႃးယူႇၸွမ်းတႆး- ဝႃႈၼႆ။