ၸၢႆးၼေႃႇၶမ်း တင်းၸုမ်းၸိူဝ်းလုၵ်ႈၼွင်ႉ 5 ၵေႃႉ ၸိူဝ်းၺႃးၶိုၼ်ႈလုမ်းတြႃး တီႈၶုၼ်းမိင် ၸႄႈမိူင်း ယုၼ် ၼၼ် မိူင်းၶႄႇ၊ ၵဵဝ်ႇၵပ်းလွင်ႈၶႃႈႁႅမ်လုၵ်ႈႁိူဝ်းၶႄႇ 13 ၵေႃႉ၊ ၼႂ်းၸိူဝ်းၶဝ် 5 ၵေႃႉ ပႃးၸၢဝ်း လႃးႁူႇ 3 ၵေႃႉ။

ၵဵဝ်ႇၵပ်းလွင်ႈၼႆႉ ၵူၼ်းတႃႈၶီႈလဵၵ်းၵေႃႉၼိုင်ႈ ဢၼ်လႆႈတူၺ်းႁူင်းပွႆႇႁၢင်ႈသဵင် ထီႊဝီႊ(TV) ၶႄႇလၢတ်ႈဝႃႈ- တၢင်းထီႊဝီႊ ၶႄႇပိုၼ်ၽၢဝ်ႇၵႂႃႇဝႃႈ လုၵ်ႈၼွင်ႉၸၢႆးၼေႃႇၶမ်းၼၼ်ႉ ပႃးၸိုဝ်ႈၸၢဝ်း လႃးႁူႇဝႆႉ 3 ၵေႃႉ- ဝႃႈၼႆ။

ပူၼ်ႉမႃးမိူဝ်ႈဝၼ်းထိ 20-22/09/12 (ၶၢဝ်းတၢင်း 3 ဝၼ်း) လုမ်းတြႃးၶႄႇ ဝဵင်းလူင်းၶုၼ်းမိင် ဢဝ်ၸၢႆး ၼေႃႇၶမ်းတင်းမူႇ ၸုမ်း ၶဝ်ႈတတ်းသိၼ်တြႃး၊ ၼႂ်းၼၼ်ႉ ပႃးၸၢႆးသၢင်ႇၶမ်း (ၶိူဝ်းႁိူၼ်းၵျသႃ)၊ ယီႈလၢႆႈ၊ ၵျပူဝ်း၊ ၵျထူးပူဝ်း၊ ၵျသိုဝ်းၵႃး ၸိူဝ်းၼႆႉ။

ၵဵဝ်ႇၵပ်းလွင်ႈၼႆႉ ႁူဝ်ၼႃႈၾၢႆႇပၵ်းတႃယႃႈမဝ်းၵမ်ၸိုင်ႈတႆး၊ ၸဝ်ႈၶိုၼ်းသႂ်လၢတ်ႈဝႃႈ- ၸၢႆးသၢင်ႇၶမ်း ၼၼ်ႉ ပဵၼ်တႆး၊ ၵူၺ်းၵႃႈ ၸႂ်ႉၸိုဝ်ႈၶိူဝ်းႁိူၼ်းလႃးႁူႇဝႆႉ၊ ပဵၼ်ၵူၼ်းမိူင်းထႆးတင်းလၢဝ်း (တင်းသွင် မိူင်း)။ ၵျပူဝ်း တင်း ၵျထူးပူဝ်း ပဵၼ်ၵူၼ်းမိူင်းမၢၼ်ႈ (ၵူၼ်းမိူင်းတႆး)။ ၵျသိုဝ်းၵႃး ၸွမ်းၼင်ႇတႅမ်ႈဝႆႉ ၼႂ်းသၼ်ၸၢတ်ႈ (ၵူၼ်းၵိုၵ်းမိူင်း) ပဵၼ်ၵူၼ်းမိူင်းထႆးတင်းလၢဝ်း။ ယီႈလၢႆႈတႄႉ ဢမ်ႇမီးဝၢၼ်ႈမီး မိူင်း- ဝႃႈၼႆ။

ဢိင်ၼိူဝ်လုမ်းတြႃးၶုၼ်းမိင် ၸႄႈမိူင်းယုၼ်ၼၼ် ထတ်းထၢမ်သေ ၸၢႆးၼေႃႇၶမ်းလၢတ်ႈဝႃႈ- မၼ်းၸၢႆး ဢမ်ႇၸႂ်ႈၵူၼ်း ၸိသင်ႇယိုဝ်းႁိူဝ်းၶႄႇ၊ ပဵၼ်ၵူၼ်းၸၼ်ႉပႃႈတႂ်ႈဢမ်ႇပွင်ႇၶၢဝ်ႇထိုင် ၸၼ်ႉပႃႈၼိူဝ်သေႁဵတ်းၵႂႃႇ လႄႈလႆႈပဵၼ်ၵႂႃႇၵူၺ်း- ဝႃႈၼႆ။

ၶၢဝ်ႇထီႊဝီႊၶႄႇဢၼ်ဢွၵ်ႇမိူဝ်ႈဝၼ်းသဝ်ထိ 22/09/12 လၢတ်ႈဝႃႈ- ၸၢႆးၼေႃႇၶမ်း ပိုတ်ႇလၢတ်ႈၵႂၢမ်း သိုဝ်ႈဝႃႈ ၶႂ်ႈယွၼ်းသၢႆႈ တႅၼ်းၶိုၼ်းၵႃႈႁူဝ်ၵူၼ်းတၢႆ 13 ၵေႃႉ ပိူဝ်ႈတႃႇပၼ်လုၵ်ႈလၢင်းမေးၼၢင်း ၵူၼ်းၵိုတ်း တၢင်းလင် တႃႇငိုၼ်းထႆး 30 လၢၼ်ႉ- ဝႃႈၼႆ။