ၸၢႆးၵျေႃႇဢေး ဝၢၼ်ႈပဵင်းထွၼ်ႇ ၵေႃႉလႆႈထုၵ်ႇသိုၵ်း မၢၼ်ႈတိၺွပ်းပေႃႉထုပ်ႉၵုမ်းၶင် လႆႈလွတ်ႈ ဢွၵ်ႇမႃး ယဝ်ႉၵေႃႈ လူတ်ႉၶိူင်ႈ တင်းၼႃႇလီႇမၼ်းၸၢႆး ဢၼ်သိုၵ်း မၢၼ်ႈႁုပ်ႈယိုတ်းဝႆႉ ယင်းပႆႇလႆႈၶိုၼ်း။

ဝၢႆးသိုၵ်းမၢၼ်ႈပွႆႇၸၢႆးၵျေႃႇဢေး တီႈလႃႈသဵဝ်ႈ ပူၼ်ႉမႃးမိူဝ်ႈဝၼ်းထိ 17/09/12 သေ မၼ်းၸၢႆးပွၵ်ႈ မႃးၶိုၼ်း တီႈဝၢၼ်ႈပဵင်း ထွၼ်ႇ ၸႄႈဝဵင်းၼမ်ႉတူႈၼႆႉ မၼ်းၸၢႆးၵႂႃႇယွၼ်းၶိုၼ်းၶူဝ်းၶွင်လူတ်ႉၶိူင်ႈ 1 လမ်း တင်းၼႃႇလီႇ (ယၢမ်းမူင်း) ဢၼ်သိုၵ်း မၢၼ်ႈႁုပ်ႈယိုတ်းဝႆႉ မိူဝ်ႈတိၺွပ်းမၼ်းၸၢႆး။ ၵူၺ်းၵႃႈ ၾၢႆႇသိုၵ်းမၢၼ်ႈတီႈတပ်ႉၼမ်ႉတူႈ ၶဝ်လၢတ်ႈဝႃႈ- ၵႂၢမ်းသင်ႇပိဝ်ႇႁႃႇ မူးဢမ်ႇလူင်းမႃးလႄႈဢမ်ႇ ၸၢင်ႈပၼ်။

ၵူၼ်းၼႂ်းပိုၼ်ႉတီႈၵေႃႉၼိုင်ႈလၢတ်ႈဝႃႈ- “လူတ်ႉၶိူင်ႈၸၢႆးၵျေႃႇဢေးၼၼ်ႉ ၵႃႈၶၼ်မွၵ်ႈ 5 သႅၼ်၊ ၼႃႇလီႇမၼ်းၸၢႆးသမ်ႉၵႃႈ ၶၼ်မွၵ်ႈ 1 သႅၼ်။ မိူဝ်ႈၵႂႃႇယွၼ်းၼၼ်ႉ ၾၢႆႇသိုၵ်းမၢၼ်ႈလၢတ်ႈဝႃႈ ၵႂၢမ်းသင်ႇပိဝ်ႇႁႃႇမူး ဢမ်ႇလူင်းမႃး၊ ဢမ်ႇၸၢင်ႈပၼ်၊ ၵွပ်ႈၼႆ ႁၢၼ်ႉတေႃႇမိူဝ်ႈလဵဝ်ၵေႃႈပႆႇလႆႈၶိုၼ်း-ဝႃႈၼႆ။

တီႈၼမ်ႉတူႈၼႆႉ ၵူၼ်းမိူင်းယင်းတိုၵ်ႉလႆႈပၢႆႈယူႇ၊ ၵွပ်ႈဝႃႈသိုၵ်းမၢၼ်ႈယင်းတိုၵ်ႉၵႂႃႇႁႃထၢမ်ၸိုဝ်ႈသဵင် သၢႆမၢႆၵူၼ်းဝၢၼ်ႈလၢႆ လၢႆဝၢၼ်ႈ ထုင်ႉဝၢၼ်ႈၸၢမ်(မိူင်းမု)၊ ၼႂ်းဢိူင်ႇၼမ်ႉတွင်ႇၵူင်း မိူၼ်ၼင်ႇ ဝၢၼ်ႈၼႃးၵေး၊ ဝၢၼ်ႈၼမ်ႉလွတ်ႇ၊ ဝၢၼ်ႈၼွင်ဢေႃႈ၊ ဝၢၼ်ႈပဵင်းလူင် လႄႈထႅင်ႈလၢႆလၢႆဝၢၼ်ႈ။ မိူဝ်ႈလဵဝ် ဢၼ်သိုၵ်းမၢၼ်ႈ ဢဝ်ၸိုဝ်ႈသဵင်သၢႆမၢႆၵူၼ်းဝၢၼ်ႈဝႆႉ ဢမ်ႇပဵၼ်တၢင်းၵၢၼ် မီးမွၵ်ႈ 10 ပၢႆ။ ၾၢႆႇၼိုင်ႈၵေႃႈ လွၵ်ႇငိုတ်ႈဝႆႉဝႃႈ ၶဝ်ၸိူဝ်းၼႆႉၵဵဝ်ႇၶွင်ႈသိုၵ်းတႆး၊ ႁႂ်ႈမႃးႁၢႆးငၢၼ်းတူဝ်၊ ပေႃးဢမ်ႇမႃးႁၢႆး ငၢၼ်း တူဝ် လႄႈႁူႉၵမ်းလိုၼ်း တေၺႃးလိူဝ်ႁႅင်း- ၵူၼ်းၼႂ်းပိုၼ်ႉတီႈသိုပ်ႇလၢတ်ႈၼင်ႇၼႆ။

ၵဵဝ်ႇၵပ်းလွင်ႈပူၼ်ႉပႅၼ်သုၼ်ႇလႆႈၵူၼ်း ၼႂ်းၸႄႈဝဵင်းၼမ်ႉတူႈၼႆႉ ၽွင်းတႅၼ်းၵူၼ်းမိူင်းၸဝ်ႈၼိုင်ႈ လၢတ်ႈဝႃႈ- ဝၼ်းထိ 24/09/12 (မိူဝ်ႈၼႆႉ) မီးၵၢၼ်တႄႇၶိုၼ်းပၢင်ၵုမ်သၽႃးၸႄႈမိူင်း (ပွၵ်ႈၵမ်း 4)၊ ပေႃးလႆႈတိုဝ်ႉတၢင်းၸိုင် ဢၢၼ်းတၢင်ႇလိၵ်ႈ ၼႂ်းသၽႃးၵမ်းၼႆႉ။ ပိူင်လူင်မၼ်း ႁဝ်းမီးတွၼ်ႈသွၼ်ဝႆႉ ၼႂ်းၸႄႈဝဵင်းၼမ်ႉတူႈၼႆႉယဝ်ႉ၊ ႁဝ်းဢဝ်ၼမ်ႉတူႈႁဵတ်းတူဝ်ယၢင်ႇ မၼ်းသေ ယႃႇႁႂ်ႈလႆႈပဵၼ်ထႅင်ႈ တၢင်ႇတီႈ။ ပေႃးဝႃႈတီႈတပ်ႉ ၼမ်ႉတူႈ ယင်းတိုၵ်ႉပေႉၵိၼ်ၵူၼ်းမိူင်းယူႇတၢင်ႇတီႈၵေႃႈ တေၸၢင်ႈ ပေႉၵိၼ်ၵႂႃႇတိၵ်းတိၵ်း။ ၵွပ်ႈၼၼ် ဢၼ်ႁဝ်းပဵၼ်ၵူၼ်းတၢင်းၵၢၼ်ၵေႃႈ ထုၵ်ႇလႆႈတၢင်ႇလၢတ်ႈ/ ယွၼ်းၼႂ်းသၽႃး၊ ၼင်ႇႁိုဝ်ၶဝ်တေဢမ်ႇသိုပ်ႇၵႂႃႇ ပေႉၵိၼ်ထႅင်ႈတၢင်ႇတီႈ၊ ဢၼ်ပဵၼ်ပၼ်ႁႃ ယူႇတီႈၼမ်ႉတူႈၼႆႉၵေႃႈ ႁႂ်ႈလႆႈၵႄႈလိတ်ႈထိုင် တီႈထိုင်လႅၼ်- ဝႃႈၼႆ။