သိုၵ်းဝႃႉ UWSA ပွႆႇပၼ်သိုၵ်းတႆး RCSS/SSA ဢၼ် ၵုမ်းတူဝ်တိၺွပ်းဝႆႉ ဢမ်ႇယွမ်းလိူၼ်ပၢႆၽၢၵ်ႇ တင်းမူတ်း 20 ၵေႃႉ လႄႈၶိူင်ႈၵွင်ႈၵၢင်ႇ၊ ဝၢႆးသွင်ၸုမ်းႁူပ်ႉဢုပ်ႇဢူဝ်း တူၵ်းလူင်းၵၼ်။

ပူၼ်ႉမႃးမိူဝ်ႈဝၼ်းထိ 16/09/12 တပ်ႉသိုၵ်းၸိုင်ႈတႆး RCSS/SSA တင်း တင်း တပ်ႉသိုၵ်းမိူင်းဝႃႉၽွမ်ႉႁူမ်ႈ UWSA လႆႈ ၸတ်းပၢင်ၵုမ် ဢုပ်ႇဢူဝ်းတူၵ်းလူင်းၵၼ်တီႈႁူၺ်ႈဢေႃႈ ၸႄႈဝဵင်းမိူင်းတူၼ် ၸႄႈတွၼ်ႈ မိူင်းသၢတ်ႇ။ ပၢင်ၵုမ်ၼႆႉ ၾၢႆႇတပ်ႉတႆးမီး ၸဝ်ႈသိုၵ်းလူင်ဝၼ်းလီ တင်း ၸဝ်ႈသိုၵ်းလူင်တိုၼ်းၶိူဝ်း ၽူႈၵွၼ်း တပ်ႉၸုမ်း 727 ဢွၼ်ႁူဝ်ၸုမ်းၸိူဝ်း တင်းမူတ်း 5 ၵေႃႉ။ ၾၢႆႇတပ်ႉဝႃႉ ၼႃႈလိၼ်သိုၵ်း 171 မီး ယၢင်ၵေႃႇၸူင်း ၽူႈၵွၼ်းတပ်ႉၸုမ်း 775 ဢွၼ်ႁူဝ်လႄႈ ၽူႈမီးၸၼ်ႉၼႂ်းတပ်ႉဝႃႉ 3 ၵေႃႉ မိူၼ်ၼင်ႇ တႃႉၼိူင်း၊ တႃႉသၢမ်သွႆး၊ တႃႉလုၺ်း ၸိူဝ်းၼႆႉ။

ထိုင်မႃးဝၼ်းထိ 17/09/12 (မိူဝ်ႈသိုၼ်း) ၵၢင်ၼႂ်ယၢမ်း 10:00 မူင်း၊ တပ်ႉသိုၵ်းဝႃႉ (UWSA) ပွႆႇပၼ်သိုၵ်း တႆး RCSS/SSA ၸိူဝ်းတိၺွပ်းဝႆႉ တင်းမူတ်း 20 ၵေႃႉ၊ ၶိူင်ႈၵွင်ႈၵၢင်ႇဢၼ်တိၺွပ်းၸွမ်းၵၼ် (တင်းၵူၼ်း တင်းၵွင်ႈၸိူဝ်းၼၼ်ႉၵေႃႈ ပၼ်ၶိုၼ်းတင်းမူတ်းသေ မႃးသူင်ႇပၼ်တီႈၵဝ်ႇ ဢွင်ႈတီႈဢၼ် ၵုမ်းတူဝ်တိ ၺွပ်းၵႂႃႇ။ ဝၢႆးတပ်ႉသိုၵ်းဝႃႉပွႆႇပၼ်ယဝ်ႉ ယၢမ်းဝၢႆးဝၼ်း 2 မူင်း ၵူၼ်းသိုၵ်း SSA ၸင်ႇလုၵ်ႉဢွင်ႈတီႈ ဢၼ် ပွႆႇပၼ် (လွႆပုင်ႇၽႃ-ပုင်ႇတွင်း) ဢွၵ်ႇၶၢဝ်းတၢင်းမုင်ႈၼႃႈ ပွၵ်ႈၶိုၼ်းၸူး (လွႆသၢမ်သိပ်း) ဢၼ်ပဵၼ်ငဝ်ႈ ငုၼ်း တပ်ႉၸုမ်း 727 ၸဝ်ႈသိုၵ်းလူင်တိုၼ်းၶိူဝ်းဢွၼ်ႁူဝ် (တေႃႇၼႃႈၸႄႈဝဵင်း မိူင်းၾၢင်၊ ၸႄႈတွၼ်ႈ ၵဵင်းမႆႇ)။ ၵူၺ်းၵႃႈ ၵွပ်ႈၶၢဝ်းတၢင်းၵႆဢမ်ႇႁွတ်ႈၽႅဝ်လႆႈလႄႈ လႆႈၼွၼ်းႁႅမ်းၸွမ်းတၢင်း ၶိုၼ်းၼိုင်ႈ၊ ထိုင်မႃးဝၼ်းထိ 18/09/12 (မိူဝ်ႈဝႃး)ပွတ်းၼႂ် ၸင်ႇပွၵ်ႈထိုင်ၶိုၼ်းငဝ်ႈငုၼ်း လွႆသၢမ်သိပ်း- လႆႈႁူႉၼင်ႇ ၼႆ။

ၵဵဝ်ႇၵပ်းလွင်ႈၼႆႉ ဝၼ်းထိ 19/09/12 မိူဝ်ႈၼႆႉ ၸဝ်ႈတိုၼ်းၶိူဝ်း တင်းၸဝ်ႈဝၼ်းလီ တေဢွၵ်ႇၶၢဝ်းတၢင်း ပိူဝ်ႈတႃႇရၢႆးငၢၼ်း တီႈ ႁူဝ်ပဝ်ႈလူင် ၶွင်ႊသီႊဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ၸဝ်ႈယွတ်ႈသိုၵ်း။ ၾၢႆႇၼိုင်ႈ ဝၼ်းထိ 18/09/12 (မိူဝ်ႈဝႃး) လႅင်ႇၶၢဝ်ႇပွတ်းမိူင်းၾၢင်ၵေႃႈ ပွင်ႇလၢတ်ႈမႃး ဝႃႈ- တီႈလွႆသၢမ်သိပ်းၼၼ်ႉ မိူဝ်ႈၼႆႉ (18/09/12) မီးၵၢၼ်ၸတ်းပၢင်ပွႆးပႂ်ႉႁပ်ႉတွၼ်ႈၵၼ်ယူႇ- ဝႃႈၼႆ။

မိူဝ်ႈလဵဝ် ဢၼ်ဢမ်ႇပႃးမႃးၼႂ်းၵူၼ်းၸိူဝ်းပွႆႇပၼ်ၼၼ်ႉ မီးၶုၼ်သိုၵ်းၸၢႆးၶႅင်ႇ၊ ၵွပ်ႈတိုၵ်ႉမီးယူႇပွတ်း တၢင်ႉယၢၼ်း ၸိုင်ႈတႆး ပွတ်းႁွင်ႇ၊ ၶုၼ်သိုၵ်းလူင် ၸၢႆးပိူဝ်ႇ ၵေႃႈတိုၵ်ႉမီးယူႇတီႈပၢင်သၢင်း၊ ပွႆႇပၼ်ယဝ်ႉ ၼင်ႇၵဝ်ႇ ၵူၺ်းၵႃႈပႆႇပွၵ်ႈမႃး။ သိုၵ်းတႆး 2 ၵေႃႉ ဢၼ်သိုၵ်းဝႃႉႁွင်ႉၵႂႃႇၼၼ်ႉၵေႃႈ လႆႈငိၼ်းဝႃႈမႃးသူင်ႇ ပၼ်ႁွတ်ႈ ၶိုၼ်းတပ်ႉတႆးယဝ်ႉ (ဢွၼ်ၼႃႈၼႆႉ လႆႈငိၼ်းဝႃႈပွႆႇ ပၼ်တၢင်းတႃႈၶီႈလဵၵ်း)- ၼႆယဝ်ႉ။