ၵႅမ်ၸွမ်ၸိုင်ႈၵေႃႉထီႉ 2 ၸၢႆးမွၵ်ႇၶမ်းတင်းၸဝ်ႈဢွင်ႇ မျၢတ်ႈၸွမ်ၽွင်းလူင်မိူင်းတႆး ယဵမ်ႈၸႂ်းပီႈၼွင်ႉၵဵင်း တုင်၊ ၸွႆႈၼမ်ႉထူမ်ႈ၊ ႁွမ်းတၢၼ်းငိုၼ်းတီႈတိူၵ်ႈသွၼ်လိၵ်ႈ ထမ်မေႃးတယလႄႈ ၵူၼ်းၵဵင်းတုင် တုၵ်း ယွၼ်းၾႆးၾႃႉ 24 ၸူဝ်ႈမူင်း၊ ႁႂ်ႈလႆႈသွၼ်ႁဵၼ်းလိၵ်ႈတႆးၼႂ်းႁူင်းႁဵၼ်း လႄႈ ႁႂ်ႈလူတ်းထွၼ်ၵဵတ်ႉ (လၢၼ်ႇ) ၸွမ်းတႃႈၸွမ်းတၢင်း တႃႈၶီႈလဵၵ်း ထိုင် တူၼ်ႈတီး။

ၸၢႆးမွၵ်ႇၶမ်း ၵႅမ်ၸွမ်ၸိုင်ႈၵေႃႉထီႉ 2 တင်းၸွမ်ၽွင်းလူင်မိူင်းတႆး ၸဝ်ႈဢွင်ႇမျၢတ်ႈ

ဝၢႆးသေၵႅမ်ၸွမ်ၸိုင်ႈၵေႃႉထီႉ 2 ၸၢႆးမွၵ်ႇၶမ်းလႄႈမေးၼၢင်း တင်းလုၵ်ႈယိင်း လုၵ်ႈၸၢႆး ႁူမ်ႈတင်း ၸွမ်ၽွင်းလူင်မိူင်းတႆး ၵႂႃႇဢႅဝ်ႇယဵမ်ႈၸႂ်း ပီႈၼွင်ႉၵူၼ်းမိူင်းပွတ်းႁွင်ႇ လႃႈသဵဝ်ႈ မိူင်းယႆ သႅၼ်ဝီယဝ်ႉ ထိုင်မႃး ဝၼ်းထိ 16/09/2012 ၸုမ်းၵႅမ်ၸွမ် ၸိုင်ႈၸၢႆးမွၵ်ႇၶမ်း တင်း ၸွမ်ၽွင်းလူင်မိူင်းတႆး သိုပ်ႇၶီႇ ႁိူဝ်းဝိၼ် မႅင်းဝီႈ (ႁေႊလိၶွပ်ႊတိူဝ်ႊ) မႃးၵဵင်းတုင် မိူင်းတႆးပွတ်း ဢွၵ်ႇၶူင်းသေ လႆႈႁူပ်ႉထူပ်းၵူၼ်းၵဵင်း တုင် ၸိူင်ႉၼင်ႇ 1. လုင်းႁွင်ၶမ်း၊ 2. ၸၢႆးလႃႈ၊ 3. ၸၢႆးယီႈ၊ 4. လုင်းသႅင်လင်း၊ 5. ၸၢႆးသၢမ်တၢၼ်းလွႆ၊ 6. သၢင်ႇယီႈလွႆ၊ 7. ၸၢႆး လူင်ယီး၊ 8. လုင်းၸၢႆးယွတ်ႈ၊ 9. ၸဝ်ႈသိလ်တႆး ၸိူဝ်းၼႆႉ တီႈလုမ်းတိူင်းသိုၵ်း သၢမ်ၸဵင်ႇ (ၵဵင်းတုင်) မိူဝ်ႈၽွင်းယၢမ်းမွၵ်ႈ 12.00 မူင်း တေႃႇထိုင် မွၵ်ႈ 13.00 မူင်း။

ၼႂ်းပၢင်ႁူပ်ႉထူပ်းၵၼ်ၼၼ်ႉ လုင်းႁွင်ၶမ်း ဢၼ်ယၢမ်ႈပဵၼ်ႁူဝ်ပဝ်ႈၵွင်ႊသီႊၵဵင်းတုင်မိူဝ်ႈပၢၼ် မသလ ၼေႇဝိၼ်းလႆႈ တၢင်ႇယွၼ်းတီႈၵႅမ်ၸွမ်ၸိုင်ႈ ၸၢႆးမွၵ်ႇၶမ်းလႄႈ ၸဝ်ႈဢွင်ႇမျၢတ်ႈ ၸွမ်ၽွင်းလူင်မိူင်း တႆးဝႃႈ-ၼင်ႇႁိုဝ်တေလႆႈမီးၾႆးၾႃႉၸႂ်ႉ 24 ၸူဝ်ႈမူင်း ၼႂ်းဝဵင်းၵဵင်းတုင်တူဝ်ႈပတ်းပိုၼ်ႉၼၼ်ႉ ယွၼ်းႁႂ်ႈ လူင်ပွင်ၸိုင်ႈ ၸွႆႈၸတ်းၶိုင်ႁဵတ်းပၼ်။ လိူဝ်ၼၼ်ႉ လုင်းသႅင်လင်း ႁူဝ်ပဝ်ႈၵေႃလိၵ်ႈလၢႆးလႄႈၾိင်ႈ ငႄႈတႆးတင်းသဵင်ႈ (တႆးၶိုၼ် တႆးလိုဝ်ႉ တႆးၼိူဝ် တႆးလူင်-ၼႂ်းၵဵင်းတုင်) တၢင်ႇယွၼ်းႁႂ်ႈလႆႈသွၼ်ႁဵၼ်း လိၵ်ႈတူဝ်ၵဝ်ႇၽႂ်မၼ်း ၼႂ်းႁူင်းႁဵၼ်းၼႆလႄႈ ၵႅမ်ၸွမ်ၸိုင်ႈ တင်းၸွမ်ၽွင်းလူင်မိူင်းတႆးၵေႃႈ တွပ်ႇႁပ်ႉ လႆႈၵမ်းလဵဝ်ဝႃႈ- တၵ်းပဵၼ် ၼွၵ်ႈၶၢဝ်းယၢမ်းႁဵၼ်းႁူင်းႁဵၼ်း-ၼႆယဝ်ႉ။

ၼွၵ်ႈသေၼၼ်ႉၵေႃႈ လုင်းၸၢႆးယွတ်ႈ လႆႈတၢင်ႇလဝ်ႈတုၵ်းယွၼ်း ႁႂ်ႈလူင်ပွင်ၸိုင်ႈၸွႆႈၵႄႈလိတ်ႈပၼ် ၵဵတ်ႉ (လၢၼ်ႇ) ၸွမ်းတႃႈၸွမ်းတၢင်း တင်ႈတႄႇတႃႈၶီႈလဵၵ်းတေႃႇၵဵင်းတုင် ထိုင်တူၼ်ႈတီးၼၼ်ႉ မီးၵႂႃႇၵူႈတီႈ ၼပ်ႉပေႃးဢမ်ႇလႆႈ ၵူၼ်းဝၢၼ်ႈၵူၼ်းမိူင်းၵႂႃႇမႃးၺႃးတၢင်းယၢပ်ႇၽိုတ်ႇ ၵွပ်ႈလႆႈၸၢႆႇလႆႈသဵင်ႈ ငိုၼ်းၼမ် လူင်လၢင်ပူၼ်ႉတီႈၸိူဝ်းၼႆႉ ၶႂ်ႈယွၼ်း ႁႂ်ႈလူင်ပွင်ၸိုင်ႈၸွႆႈပူတ်းထွၼ်ဢွၵ်ႇၽွင်ႈၼႆယဝ်ႉ။

ၶေႃႈတုၵ်းယွၼ်း ၸိူဝ်းဢၼ်ၵူၼ်းၵဵင်းတုင်ၶဝ်တုၵ်းယွၼ်းဝႆႉၼၼ်ႉ ၸၢႆးမွၵ်ႇၶမ်း ၵႅမ်ၸွမ်ၸိုင်ႈႁပ်ႉဢဝ် ပဵၼ်ၶေႃႈဝူၼ်ႉၵႂႃႇ ထတ်းသၢင်တူၺ်းသေ တေႁႃတၢင်းၸွႆႈလႄႈၵႄႈလိတ်ႈပၼ်-ဝႃႈၼႆ။

ၸိူင်ႉႁိုဝ်ၵေႃႈလီ ဢၼ်ၸုမ်းၸၢႆးမွၵ်ႇၶမ်း ၵႅမ်ၸွမ်ၸိုင်ႈ တင်းမေးၼၢင်း ၼၢင်းၶမ်းမုင်ႇ လႄႈလုၵ်ႈယိင်း လုၵ်ႈၸၢႆး ႁူမ်ႈတင်း ၸဝ်ႈဢွင်ႇမျၢတ်ႈ ၸွမ်ၽွင်းလူင်မိူင်းတႆး ႁူမ်ႈပႃးၸုမ်းၽွင်းလူင်ၶဝ်တင်းမူတ်း သၢဝ်းပၢႆ မႃးႁွတ်ႈထိုင်ၵဵင်းတုင်ၵမ်းၼႆႉ ပဵၼ်ပိူဝ်ႈတႃႇယဵမ်ႈၸႂ်း တူၺ်းလွမ်လွင်ႈၼမ်ႉထူမ်ႈသူၼ်/ၼႃး ၼႂ်းၵဵင်းတုင် ၸွမ်းဢိူင်ႇၵဵင်းၽွင်း ဢိူင်ႇၵၢတ်ႇထၢႆႈ ဢိူင်ႇၵၢတ်ႇ တဝ်ႇ ဢိူင်ႇၵၢတ်ႇၾႃႉ ဢိူင်ႇယၢင်းၵဵင် ၼွင်လိူဝ်ႇ ၼွင်ၵုမ် ႁူမ်ႈတင်း ပွၵ်ႉဝဵင်းမႂ်ႇၵမ်ႈၽွင်ႈၸိူဝ်းၼၼ်ႉ ၵႅမ်ၸွမ်ၸိုင်ႈလႄႈ ၸုမ်းၽွင်းလူင်မိူင်း တႆးၶဝ် ႁပ်ႉပၢၵ်ႇတေၸွႆႈ ၸဝ်ႈၼႃးတင်းမူတ်း မွၵ်ႈ 300 ၸဝ်ႈ၊ 1 ၸဝ်ႈ 30,000 ပျႃး -ဝႃႈၼႆ။

ထိုင်မႃးဝၼ်းထီႉ 17/09/2012 ၸုမ်းၵႅမ်ၸွမ်ၸိုင်ႈလႄႈ ၸုမ်းၸွမ်ၽွင်းလူင်မိူင်းတႆးၶဝ်ၵႂႃႇဢႅဝ်ႇ ယဵမ်ႈတူၺ်းတီႈတိူၵ်ႈသွၼ် လိၵ်ႈၵျွင်းမိူင်းၼၢႆး ႁိုဝ် ၵျွင်းထမ်မေႃးတယ၊ ၵႅမ်ၸွမ်ၽွင်းလူင် ၸၢႆးမွၵ်ႇၶမ်း ႁွမ်းၸွႆႈတၢၼ်းငိုၼ်းပၼ်တီႈၸဝ်ႈတူၼ်ၶူး လူင်ၸဝ်ႈၵွၼ်းဝတ်ႉ ၸဝ်ႈဢႃႇတေႇယ 100 သႅၼ်လႄႈ ၸွမ်ၽွင်းလူင် မိူင်းတႆး ၸဝ်ႈဢွင်ႇမျၢတ်ႈ ႁွမ်းတၢၼ်းၸွႆႈ 50 သႅၼ်-ၼႆယဝ်ႉ။