မိူဝ်ႈၼႆႉ တၢင်းၵၢၼ်ၶႄႇဢဝ်ၸၢႆးၼေႃႇၶမ်းၶိုၼ်ႈလုမ်းတြႃး၊ ပႃးၸဵမ်မူႇၸုမ်းလုၵ်ႈၼွင်ႉၸိူဝ်းၺႃးတိ ၺွပ်းသူင်ႇ ပၼ်ၶႄႇ၊ ၵဵဝ်ႇလူၺ်ႈလွင်ႈၵူၼ်းတၢႆ 13 ၵေႃႉ ၼႂ်းမႄႈ ၼမ်ႉၶွင်။

ဝၼ်းထိ 20/09/12 (မိူဝ်ႈၼႆႉ) ၸၢႆးၼေႃႇၶမ်း လႄႈ လုၵ်ႈၼွင်ႉပွင်ႈပၢႆၸုမ်းမၼ်းၸၢႆး တင်းမူတ်း 6 ၵေႃႉ ၸိူဝ်းၺႃးတိၺွပ်း လူၺ်ႈတၢင်းၽိတ်းမၢပ်ႇၽၢမ်းဝႃႈ- ၵဵဝ်ႇၶွင်ႈၵၢၼ်ယိုဝ်းၵူၼ်းၸွမ်းႁိူဝ်းၶႄႇ တၢႆ 13 ၵေႃႉ ၼႂ်းၼမ်ႉမႄႈၶွင် မိူဝ်ႈဝၼ်းထိ 05/10/11 ပူၼ်ႉမႃး လႆႈၶိုၼ်ႈလုမ်းတြႃးၸိုင်ႈမိူင်းၶႄႇမိူဝ်ႈၼႆႉ။ ၼႂ်းၵူၼ်း တင်းမူတ်းမီး 6 ၵေႃႉၼၼ်ႉ လိူဝ်သေၸၢႆးၼေႃႇ ၶမ်းပႃးၸၢႆးသၢင်ႇၶမ်း၊ ၸၢႆးယီႈလၢႆႈ၊ ၸၢႆးဢွင်ႇမျၢတ်ႈ၊ ၸၢႆးထုၼ်းၵလႃး ၸိူဝ်းၼႆႉ- ၼႆယဝ်ႉ။

ၸၢႆးၼေႃႇၶမ်းၼႆႉ ၺႃးၸဝ်ႈၼႃႈတီႈလၢဝ်း တိၺွပ်းၼႂ်းမိူင်းလၢဝ်း ပူၼ်ႉမႃးမိူဝ်ႈလိူၼ်ဢေႊပရိူဝ်ႊလ် (2012) သေသူင်ႇမွပ်ႈ ပၼ်တၢင်းၵၢၼ်ၶႄႇမိူဝ်ႈလိူၼ်မေႊ။ သၢင်ႇၶမ်း ထုၵ်ႇတိဢွၼ်ၼႃႈၸၢႆး ၼေႃႇၶမ်း 5 ဝၼ်း ၼႂ်းမိူင်းထႆး၊ ယီႈလၢႆႈၵေႃႈၺႃး တိၺွပ်းဢွၼ်ၼႃႈၸၢႆးၼေႃႇၶမ်းသေသူင်ႇ ပၼ်ၶႄႇ။ ၸၢႆးဢွင်ႇမျၢတ်ႈတႄႉ ဝၢႆးႁူဝ်ၼႃႈလူင်ၸၢႆးၼေႃႇၶမ်းထုၵ်ႇတိၺွပ်းယဝ်ႉ ၵေႃႈဢွၼ်ႁူဝ် ၵူၼ်း 15 ၵေႃႉ ၶဝ်ႈဝၢင်းၶိူင်ႈၵွင်ႈၵၢင်ႇ ပၼ်မၢၼ်ႈတီႈတႃႈၶီႈလဵၵ်း။ ဝၢႆးမႃး ယွၼ်ႉၶႄႇမႃးယွၼ်းတူဝ် မိူဝ်းမိူင်း ၶႄႇတိၵ်းတိၵ်းလႄႈ ၸဝ်ႈၼႃႈတီႈမၢၼ်ႈ ဝႃႈမၼ်းပဵၼ်ၵူၼ်းၶဝ်ႈဝၢင်းၶိူင်ႈ၊ ဢမ်ႇၸႂ်ႈတိၺွပ်း လႆႈၼႆသေတႃႉ ၵႃႈဢမ်ႇလႆႈၶႄႇ ဢမ်ႇယွမ်းမိူဝ်းလႄႈ မၢၼ်ႈၵႃႈလႆႈမွပ်ႈပၼ်ၶႄႇ။

ၸွမ်းၼင်ႇသိုဝ်ႇ ၶၢဝ်ႇၶႄႇ၊ ၶၢဝ်ႇထႆး၊ ၶၢဝ်ႇၽႃသႃဢိင်းၵလဵတ်ႈဢွၵ်ႇၵႂႃႇၵမ်ႈၼမ်ၵႃႈပူၼ်ႉမႃး  လၢတ်ႈ ဝႃႈ- ၸၢႆးၼေႃႇၶမ်း ယွမ်းႁပ်ႉလွင်ႈၶႃႈၵူၼ်း 13 ၵေႃႉတင်းမူတ်း။  ၵူၺ်းၵႃႈ ဢၼ်မၼ်းၸၢႆးလၢတ်ႈ ဢွၵ်ႇ သဵင်ၵႂၢမ်းတႆး ၼႂ်းႁူင်းပွႆႇႁၢင်ႈသဵင် (CCTV) ၼၼ်ႉ ပိၼ်ႈၽိူၼ်ဢဝ်ၼႃႈမိုဝ်းပဵၼ်လင်မိူဝ်း။ မၼ်းၸၢႆးလၢတ်ႈဝႃႈ “ၵဵဝ်ႇၵပ်းလိူင်ႈၵၢၼ် ဝၼ်းထိ 5 သိပ်းလိူၼ် ဢၼ်ႁိူဝ်းၵျိၼ်း(ၶႄႇ) 2 ၵၼ်း ပိူၼ်ႈၶႃႈၵူၼ်းႁႅမ်ၵူၼ်း ႁဵတ်းၼၼ်လႄႈ ပိူၼ်ႈထၢင်ႇၽိတ်းလႄႈပိူၼ်ႈၺွပ်းမႃး”။ ၵူၺ်းၵႃႈ လႆႈႁၼ် ဝႃႈၽႃသႃဢိင်းၵလဵတ်ႈၼၼ်ႉ လၢတ်ႈဝႃႈ- ၵွပ်ႈပိူဝ်ႈၵဝ်ၶႃႈဝၢင်းၽႅၼ်လႄႈ ၶႃႈႁႅမ်ၵူၼ်း 13 ၵေႃႉ ၼႂ်းမႄႈၼမ်ႉၶွင်- ဝႃႈၼႆ။

ထႅင်ႈၾၢႆႇၼိုင်ႈ ၸၢႆးဢွင်ႇမျၢတ်ႈၵေႃႈ မိူဝ်ႈထုၵ်ႇၵုမ်းၶင်ထဵတ်ႈထၢမ်ပေႃႉထုပ်ႉတီႈၵဵင်းတုင်ၼၼ်ႉ မၼ်းၸၢႆးတွပ်ႇထဵင်မႃး တႃႇသေႇဝႃႈ ဢမ်ႇလႆႈၵဵဝ်ႇၶွင်ႈ၊ ဢမ်ႇလႆႈႁူႉၸွမ်းလွင်ႈၶႃႈၵူၼ်းၸွမ်းႁိူဝ်းၶႄႇ 13 ၵေႃႉသင်။