ၽူႈၶၢၼ်ပၢၵ်ႇ RCSS/SSA တွပ်ႇၵႄႈလွင်ႈလႆႈယိုဝ်းၵၼ် တင်းပဢူဝ်းသေဢွၵ်ႇၼႂ်းၽိုၼ်ၶၢဝ်ႇမၢၼ်ႈ၊ ၵွပ်ႈပဵၼ်ၼႃႈ လိၼ်ယုင်ႈယၢင်ႈ မီးသိုၵ်းလၢႆၸုမ်းတူင်ႉၼိုင်လႄႈ ယိုဝ်း ၽိတ်းၵၼ်။

ၶၢဝ်ႇတွင်ႇၵျီးထၢႆႊမ် ပူၼ်ႉမႃးမိူဝ်ႈဝၼ်းထိ 13/09/12 ဢွၵ်ႇၶၢဝ်ႇဝႃႈ- ဝၼ်းထိ 13/09/12 ယၢမ်း 11:15 မူင်း တပ်ႉသိုၵ်းၸိုင်ႈ တႆး RCSS/SSA ၵႂႃႇပႂ်ႉမူၵ်းယိုဝ်းသိုၵ်းပဢူဝ်းၸွမ်းတၢင်း၊ သွင်ၾၢႆႇလႆႈ ပဵၼ်ပၢင်တိုၵ်းၵၼ် ပွတ်းဝၢၼ်ႈၼႃးႁီး ဢိူင်ႇၵၢၼ်ႇ တူးလူင် ၸႄႈဝဵင်းမွၵ်ႇမႆႇ ႁိုင်မွၵ်ႈ 30 မိၼိတ်ႉ (ဢမ်ႇလၢတ်ႈပႃးလွင်ႈ ၾၢႆႇလႂ်လုသုမ်းတၢႆဝၢတ်ႇၵႃႈႁိုဝ်)။

ၽူႈၵွၼ်းသိုၵ်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈပဢူဝ်း (PNLO) ၵေႃႉၼိုင်ႈလၢတ်ႈဝႃႈ-  RCSS/SSA ၼႆႉ ပဵၼ်ၸုမ်းသင်ၵေႃႈ ဢမ်ႇႁူႉ၊ တင်ႈတႄႇၵိုတ်းယိုဝ်းဢဝ်လွင်ႈငမ်းယဵၼ်မႃးၼႆႉ တိုၵ်းယိုဝ်းၵၼ် တင်းမၢၼ်ႈ၊ ပဵၼ်ပၼ်ႁႃၵၼ်တင်းဝႃႉ/ၸုမ်းပီႇ တုၸိတ်ႉ SSS ႁူဝ်မိူင်း/ ၸုမ်းပီႇတုၸိတ်ႉလႃးႁူႇ ၸိူဝ်းၼႆႉ၊ ၵမ်းၼႆႉၵေႃႈ မႃးႁႃသၢင်ႈပၼ်ႁႃၵၼ်တင်းႁဝ်း၊ ၶဝ်ၼႆႉ ပဵၼ်တပ်ႉ သိုၵ်းသင်ၵေႃႈဢမ်ႇၶဝ်ႈ ၸႂ်- ဝႃႈၼႆ။

ၵဵဝ်ႇၵပ်းလွင်ႈၼႆႉ ၸဝ်ႈႁၢၼ်လၢဝ်သႅင် ၽူႈၶၢၼ်ပၢၵ်ႇၶွင်ႊသီႊဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) လၢတ်ႈဝႃႈ- ငဝ်းလၢႆး မိူဝ်ႈလဵဝ်  ယွၼ်ႉသိုၵ်းမၢၼ်ႈဢမ်ႇတၵ်းသဵင်တၵ်းပၢၵ်ႇသင်သေ ယူႇယူႇၵႆႉမႃးယိုဝ်းႁဝ်း။ ၼႃႈလိၼ် ပွတ်းတွၼ်ႈ ၼၼ်ႉ သိုၵ်းမၢၼ်ႈၵေႃႈတူင်ႉၼိုင်၊ သိုၵ်းပဢူဝ်းၵေႃႈတူင်ႉၼိုင်၊ သိုၵ်းတႆး RCSS/SSA ၵေႃႈတူင်ႉၼိုင်။ ၵွပ်ႈပဵၼ်ၼႃႈလိၼ် ယုင်ႈယၢင်ႈ ဢမ်ႇလႆႈၶၢဝ်ႇၵၼ်သေလႆႈပဵၼ် ပၢင်တိုၵ်းၵၼ်ၵူၺ်း၊ ဢမ်ႇၸႂ်ႈပၼ်ႁႃယႂ်ႇ၊ ၸုမ်းပဢူဝ်း PNLO တင်း RCSS/SSA ၵေႃႈဢမ်ႇမီးပၼ်ႁႃသင်ၵၼ်၊ တီႈငဝ်ႈ ငုၼ်း  PNLO ၵေႃႈတင်းႁဝ်းယူႇသဝ်းၸွမ်းၵၼ်ယူႇ- ဝႃႈၼႆ။