ၽူႈတႅၼ်းၸၢဝ်းၶိူဝ်းတင်းလၢႆၸတ်းပၢင်ၵုမ်လူင်တီႈၼႂ်း ၵဵင်းမႆႇ၊ မီးၸုမ်းၸၢဝ်းၶိူဝ်းၼွၵ်ႈမိူင်း/ၼႂ်းမိူင်း ဢိၵ်ႇၸုမ်း ယိပ်းၵွင်ႈၵၢင်ႇၸၢဝ်းၶိူဝ်းၶဝ်ႈႁူမ်ႈ လႆႈၸႂ်တႅပ်းတတ်း ၽႅၼ်ၵၢၼ်လွင်ႈငမ်းယဵၼ် 3 ၶၼ်ႈတွၼ်ႈ၊ ၽႅၼ်တၢင်း ငမ်းယဵၼ် 6 ၶေႃႈ။

ပူၼ်ႉမႃးမိူဝ်ႈဝၼ်းထိ 14-16/09/12 (ၶၢဝ်းတၢင်း 3 ဝၼ်း) ပၢင်ၵုမ်လူင်ၸၢဝ်းၶိူဝ်း (Conference) ဢၼ်ၸတ်းၼႂ်းၵဵင်းမႆႇ ၸိုင်ႈထႆးၼၼ်ႉ မီးၽူႈတၢင်တူဝ်ၸႄႈမိူင်းၶၢင်၊ မိူင်းတႆး၊ ယၢင်းၽိူၵ်ႇ၊ ယၢင်းလႅင်၊ ၶျၢင်း၊ မွၼ်း၊ ရၶႅင်ႇ၊ ၸုမ်းၸၢဝ်းၶိူဝ်း ၼႂ်းမိူင်း/ ၼွၵ်ႈမိူင်း ဢိၵ်ႇၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းလၢႆလၢႆၸုမ်း ဢိၵ်ႇၸိူဝ်းပိုင်ႈဢိင်ယူႇသဝ်းပွတ်း လႅၼ်လိၼ်ထႆးပႃးၸဵမ်တူဝ်တႅၼ်းၸုမ်း ၸၢဝ်းၶိူဝ်းၼွၵ်ႈမိူင်းၼႂ်းမိူင်း ၼႂ်းၸိုင်ႈမိူင်းႁူမ်ႈတုမ်မၢၼ်ႈ  7 ၸႄႈမိူင်းၶဝ်ႈႁူမ်ႈ 130 ပၢႆ။ ပၢင်ၵုမ်လူင် ႁူမ်ႈၵၼ် လႆႈၸႂ်တႅပ်းတတ်း ၽႅၼ်ၵၢၼ်လွင်ႈငမ်းယဵၼ် 3 ၶၼ်ႈတွၼ်ႈ လႄႈၽႅၼ်တၢင်းငမ်းယဵၼ် 6 ၶေႃႈ။ ၼွၵ်ႈသေၼၼ်ႉ ဝၢႆးပၢင်ၵုမ်လူင်ယဝ်ႉ မီးၵၢၼ်ဢွၵ်ႇလိၵ်ႈပိုၼ်ၽၢဝ်ႇ ၵဵဝ်ႇၵပ်ၶေႃႈလႆႈၸႂ် 8 ၶေႃႈၸွမ်းထႅင်ႈ။

ၽႅၼ်ၵၢၼ်လွင်ႈငမ်းယဵၼ် 3 ၶၼ်ႈတွၼ်ႈ-
1.ၵိုတ်းယိုဝ်း၊ 2.ႁဵတ်းဢွၵ်ႇၼမ်ႉဢွၵ်ႇတူဝ် (ၽေႃႇၼမ်ႉၽေႃႇတူဝ်) လွင်ႈလႆႈၸႂ်ၵၼ်၊ 3.ဢုပ်ႇဢူဝ်းၵၢၼ်မိူင်း။

ၽႅၼ်တၢင်းငမ်းယဵၼ် 6 ၶေႃႈ-
1.ၸတ်းပၢင်ၵုမ် ဢၼ်မီးၽူႈတႅၼ်းၾၢႆႇၸုမ်းယိပ်းၵွင်ႈၵၢင်ႇ၊ ၾၢႆႇပႃႇတီႇၵၢၼ်မိူင်း လႄႈၾၢႆႇမူႇၸုမ်းၵူၼ်းမိူင်း (CSO) ၊ ပႃးၸဵမ်ၸုမ်းၼၢင်းယိင်း၊ ၸုမ်းၵူၼ်းၼုမ်ႇသေ ဢုပ်ႇဢူဝ်းလႆႈၸႂ်ၶွပ်ႇပိူင်ၵၢၼ်ဢုပ်ႇဢူဝ်း လွင်ႈၵၢၼ်မိူင်း။ (ၵၢၼ်ဢုပ်ႇဢူဝ်း လွင်ႈၵၢၼ်မိူင်း တေလႆႈမီးၶွပ်ႇပိူင်)။

2.(ၵ)တေလႆႈၸတ်းပၢင်ၵုမ်ဝူင်ႈၵၢင် လူင်ပွင်ၸိုင်ႈ တင်းၸုမ်းယိပ်းၵွင်ႈၵၢင်ႇၸၢဝ်းၶိူဝ်း၊ ဢုပ်ႇဢူဝ်းတႅပ်းတတ်းၶွပ်ႇပိူင်ၵၢၼ် ဢုပ်ႇဢူဝ်းတၢင်းၵၢၼ်မိူင်း။ (ၶ)ပၢင်ၵုမ်ၼၼ်ႉ တေလႆႈၸတ်းဢွင်ႈတီႈဢၼ်တင်းသွင်ၾၢႆႇ လႆႈၸႂ်ၵၼ်။ (င) တေလႆႈၸတ်း တင်ႈၸုမ်းၵူႈၸိုင်ႈမိူင်း ဢၼ်ဢမ်ႇၸွမ်းၾၢႆႇလႂ် မႃးပၵ်းတႃပႂ်ႉတူၺ်း လွင်ႈၵၢၼ်ဢုပ်ႇဢူဝ်း လႄႈ လွင်ႈႁဵတ်းသၢင်ႈဢွၵ်ႇၼမ်ႉ ဢွၵ်ႇတူဝ်ၶေႃႈလႆႈၸႂ်ၵၼ်။ ၼွၵ်ႈသေၼၼ်ႉ ၶေႃႈလႆႈၸႂ်ၵၼ်ၵူႈၶၵ်ႉတွၼ်ႈၼၼ်ႉ တေလႆႈႁူမ်ႈၵၼ်ပိုၼ်ၽၢဝ်ႇ။

3.ဝၢႆးသေတူၵ်းလူင်းလွင်ႈၶွပ်ႇပိူင် ၵၢၼ်ဢုပ်ႇဢူဝ်းတၢင်းၵၢၼ်မိူင်း ၼႂ်းၵႄႈၵၢင်လူင်ပွင်ၸိုင်ႈလႄႈ ၸုမ်းယိပ်းၵွင်ႈၵၢင်ႇၸၢဝ်း ၶိူဝ်းယဝ်ႉ  တေၸတ်းပၢင်ၵုမ်ၵူၼ်းမိူင်း ၸွမ်းၸၢဝ်းၶိူဝ်း လႄႈၸွမ်းၸႄႈမိူင်း/တိူင်းၶဝ်။

4.တေၸတ်းပၢင်ၵုမ်လူင်ပတ်းပိုၼ်ႉၸိုင်ႈမိူင်း ဢၼ်မီးၽူႈတႅၼ်းၸုမ်းယိပ်းၵွင်ႈၵၢင်ႇ၊ ပႃႇတီႇၵၢၼ်မိူင်းလႄႈ မူႇၸုမ်းၵူၼ်း မိူင်း (CSO) ဢိၵ်ႇတင်း ၸဝ်ႈပၢႆးႁူႉပၢႆးမေႃၶဝ်။

5.ၸတ်းပၢင်ၵုမ်လူင်ၸိုင်ႈမိူင်းႁူမ်ႈတုမ် ဢၼ်ဢိင်ၼိူဝ်ၼမ်ႉၸႂ်ပၢင်လူင်ပဵၼ်ပိုၼ်ႉထၢၼ်သေ မီးၽူႈတႅၼ်း 3 ၾၢႆႇ ၸုမ်းယိပ်းၵွင်ႈၵၢင်ႇ၊ ၾၢႆႇၻီႊမွၵ်းၶရေႊသီႊ လႄႈ လူင်ပွင်ၸိုင်ႈ  ၼမ်/ဢေႇၽဵင်ႇပဵင်းၵၼ်။ ႁူမ်ႈၵၼ်လူင်းလၢႆးမိုဝ်းၶေႃႈ တူၵ်းလူင်း ၸိုင်ႈမိူင်းႁူမ်ႈတုမ်။

6.ၶၢဝ်းယၢမ်းပိူဝ်ႈတႃႇၶၵ်ႉၵၢၼ်လွင်ႈငမ်းယဵၼ်ၼၼ်ႉ တေလႆႈဢုပ်ႇဢူဝ်းလႄႈလႆႈၸႂ်ၵၼ်ဝႆႉဢွၼ်တၢင်း၊ သွင်ၾၢႆႇတေလႆႈ ဢုပ်ႇဢူဝ်းၵၼ်သေႁူမ်ႈၵၼ်တႅပ်းတတ်း- ၼႆယဝ်ႉ။

ဝၢႆးပၢင်ၵုမ်လူင်ယဝ်ႉ မီးလိၵ်ႈပိုၼ်ၽၢဝ်ႇဢွၵ်ႇမႃး ၶေႃႈလႆႈၸႂ် 8 ၶေႃႈ-
(1)ၼင်ႇႁိုဝ်ၸၢဝ်းၶိူဝ်းတေမီးတီႈၶွၼ်ႈတုမ်ၵၼ်သေၸုၵ်းမၼ်ႈၵႂႃႇလႆႈၼၼ်ႉ တေတမ်းဝၢင်းလၵ်းၵၢၼ်ၵႂႃႇ။
(2)မူႇၸုမ်းၸၢဝ်းၶိူဝ်းၸိူဝ်းယိပ်းၵွင်ႈၵၢင်ႇတင်းလၢႆ ဢဝ်လွင်ႈငမ်းယဵၼ်ၶၼ်ႈတွၼ်ႈႁူဝ်တီး၊ ပိူင်လူင်မၼ်း လႆႈၸႂ်လူင်းလၢႆး မိုဝ်းၵိုတ်းယိုဝ်းယဝ်ႉ ႁႂ်ႈလႆႈဢုပ်ႇဢူဝ်းၵၢၼ်မိူင်း ၸၼ်ႉၸိုင်ႈမိူင်းႁူမ်ႈတုမ်။
(3)ပိူဝ်ႈတႃႇသၢင်ႈ လွင်ႈၽွမ်ႉႁူမ်ႈၸၢဝ်းၶိူဝ်း၊ ၼင်ႇႁိုဝ်ၸၢဝ်းၶိူဝ်းတင်းလၢႆတေဢမ်ႇတႅၵ်ႇၵၼ်ၼၼ်ႉ ပႃးၸဵမ်ၸၢဝ်းၶိူဝ်းမၢၼ်ႈ မီးပုၼ်ႈၽွၼ်းၼင်ႇၵၼ်။
(4)ၵၢၼ်ငၢၼ်းလွင်ႈငမ်းယဵၼ်ၼႆႉ ၵူၼ်းမိူင်းၵူႈၵေႃႉ ဢမ်ႇဝႃႈၸၢႆး/ယိင်း ႁႂ်ႈလႆႈၶဝ်ႈပႃးႁဵတ်းသၢင်ႈၶိုင်ပွင်ၵႂႃႇ။
(5)ၼင်ႇႁိုဝ်တေၵေႃႇသၢင်ႈလႆႈ လွင်ႈယုမ်ႇယမ်ၵၼ်လႄႈ ၵိုတ်းယိုဝ်းၵၼ်လႆႈပတ်းပိုၼ်ႉတင်းမိူင်းၼၼ်ႉ လူင်ပွင်ၸိုင်ႈထုၵ်ႇ လီယူႇတီႈၸၼ်ႉၸိုင်ႈမိူင်းသေပိုၼ်ၽၢဝ်ႇ။
(6)ၼႂ်းၸႄႈမိူင်းၶၢင်ၼၼ်ႉ ပဵၼ်ပၢင်တိုၵ်းသိုၵ်းသိူဝ်သေ ၵူၼ်းဝၢၼ်ႈၵူၼ်းမိူင်းလႆႈပၢႆႈၽေးသိုၵ်း 9 မိုၼ်ႇပၢႆ။ ၼႂ်းၸႄႈမိူင်း ရၶႅင်ႇၵေႃႈ ယွၼ်ႉပိူဝ်ႈၼႂ်းၸၢဝ်းၶိူဝ်းၵူၼ်း 2 ၶိူဝ်း မီးပၼ်ႁႃၵၼ်သေႁဵတ်းႁႂ်ႈၵူၼ်းမိူင်း လုတၢႆတင်းၼမ်၊ လႆႈပိုၼ်ႉပႅတ်ႈႁိူၼ်း ယေးၸဝ်ႈၵဝ်ႇသေၵႂႃႇယူႇၼႂ်းပၢင်သဝ်းၵူၼ်း ပၢႆႈၽေးၸိူဝ်းၼႆႉ ပဵၼ်လွင်ႈလီမႆႈၸႂ်ၸွမ်း။ ၵွပ်ႈၼၼ် လူင်ပွင်ၸိုင်ႈထုၵ်ႇလီ ၵႄႈလိတ်ႈပၼ်ဝႆးဝႆး။

(7)ပိူဝ်ႈတႃႇသၢင်ႈလွင်ႈငမ်းယဵၼ် ဢၼ်မီးလွင်ႈၽဵင်ႇပဵင်းၼၼ်ႉ ထုၵ်ႇလီႁဵတ်းၼႄၼႂ်းၵၢၼ်တူဝ်ထူပ်းမိုဝ်းၵႂႃႇ-
(ၵ)ၸၢဝ်းၶိူဝ်းတင်းလၢႆႁပ်ႉႁွင်းမၵ်းမၼ်ႈ ၽႅၼ်ၵၢၼ်လွင်ႈငမ်းယဵၼ် 3 ၶၼ်ႈတွၼ်ႈၶွင်ၸၢဝ်းၶိူဝ်း။
(ၶ)မၵ်းမၼ်ႈၽႅၼ်တၢင်းငမ်းယဵၼ် 6 ၶေႃႈ ပိူဝ်ႈတႃႇႁဵတ်းသၢင်ႈၵၢၼ်ငၢၼ်း ႁႂ်ႈၼႄၼမ်ႉၼႄတူဝ်လႆႈ။
(င)ဝၢင်းၽႅၼ်ပိူဝ်ႈတႃႇႁဵတ်းပၢင်ဢုပ်ႇဢူဝ်းသပ်းလႅင်း ၵဵဝ်ႇၵပ်းလွင်ႈပိုၼ်ႉထၢၼ် ၵၢၼ်ၵေႃႇတင်ႈၸိုင်ႈမိူင်း ႁူမ်ႈတုမ်ၸိုၼ်ႈၸၢင်ႇ။

(8)ၶၵ်ႉၵၢၼ်ၵေႃႇသၢင်ႈလွင်ႈငမ်းယဵၼ်ၼႆႉ ၸုမ်းၸၢဝ်းၶိူဝ်းယိပ်းၵွင်ႈၵၢင်ႇတင်းလၢႆ တင်းလူင်ပွင်ၸိုင်ႈတိုၵ်ႉမီးလွင်ႈဢုပ်ႇ ဢူဝ်းၵၼ်ၵူၺ်း၊ ပႆႇထိုင်ၶၵ်ႉၵၢၼ်ဢုပ်ႇဢူဝ်းၵၢၼ်မိူင်း- ၼႆယဝ်ႉ။