ၵူၼ်းၼုမ်ႇသႅၼ်းႁုၼ်ႈတႆးၼႂ်းၵဵင်းမႆႇ ၵေႃႇတင်ႈမူႇၸုမ်း ၽိတ်းႁူဝ်ၵၼ် တီႈၵၢတ်ႇလူင်ၵဵင်းမႆႇ၊ ၺႃးၸဝ်ႈ ၼႃႈတီႈထႆး တိၺွပ်းပၼ်တူတ်ႈတၢမ်ႇၸွမ်းမၢႆမီႈဝၢၼ်ႈမိူင်း။

မိူဝ်ႈဝၼ်းထိ 04/09/12 ယၢမ်း 01:00 မူင်း ၸဝ်ႈၼႃႈတီႈပလိၵ်ႈထႆး ႁဵတ်းပၢင်သပ်းလႅင်းၸႅင်ႈၶၢဝ်ႇ ၵဵဝ်ႇၵပ်းလွင်ႈတိၺွပ်း ၵူၼ်းၼုမ်ႇသႅၼ်းႁုၼ်ႈတႆး ၼႂ်းၵဵင်းမႆႇ ယွၼ်ႉသုမ်ႁူဝ်ၵၼ်တင်ႈၸုမ်းၵေႃႇၵၢၼ် ႁၢႆႉမိူၵ်ႈ။ ၵူၼ်းၼုမ်ႇၸိူဝ်းၼၼ်ႉ 1.ၸၢႆးၼွင်ႉ လုင်းသု ဢႃႇယု 21 ပီ၊ 2.ၸၢႆးဝိလိၼ်ႇတႃႉ လုင်းသု ဢႃႇယု 20 ပီ၊ 3.ၸၢႆးဝၼ်း ဢႃႇယု 18 ၊ 4.ၸၢႆးတႅင် ဢႃႇယု 20 ၊ 5.ၸၢႆးဝွၼ်း ဢႃႇယု 20 ၊ 6.ၸၢႆးလိူၼ် ဢႃႇယု 19 ၊ 7.ၸၢႆးသူမ်ၸိတ်ႇ ဢႃႇယု 25 ၊ 8.ၸၢႆးမူၼ်း ဢႃႇယု 18 ၊ 9.ၸၢႆးလၢဝ် ဢႃႇယု 18 လႄႈ 10.ၸၢႆးလႅင် ဢႃႇယု 18 ၸိူဝ်းၼႆႉ။ တိလႆႈပႃးၶိူင်ႈမႆႉၶိူင်ႈမိုဝ်းၸိူဝ်းၶဝ် ၵၢင်ႇၵွၼ် 4 မႄႈ၊ သၼပ်းမိုဝ်း (လဵၵ်းသုပ်းမိုဝ်း) 3 ဢၼ်၊ ၸိူၵ်ႈလဵၵ်း 1 သဵၼ်ႈ၊ မၢၵ်ႇလုၵ်ႈႁိၼ် တင်းမၢၵ်ႇလုၵ်ႈၵႅဝ်ႈ (မၢၵ်ႇသႅင်) မွၵ်ႈ 40 လုၵ်ႈ၊ မိတ်ႈ 3 မၢၵ်ႈ၊ မႆႉပွတ်း 1 ဢၼ်၊ ၶိူင်ႈၾူၼ်ႊမိုဝ်းထိုဝ် 5 ၶိူင်ႈ။

ၵဵဝ်ႇၵပ်းလွင်ႈၼႆႉ ၸဝ်ႈၼႃႈတီႈထႆးၸွပ်ႇႁူႉဝႃႈ- ပူၼ်ႉမႃးမိူဝ်ႈဝၼ်းထိ 02/09/12 မွၵ်ႈယၢမ်း 19:00 မူင်း၊ မူႇၸုမ်းၶဝ်ၵူၼ်း ၼုမ်ႇသႅၼ်းႁုၼ်ႈဢၼ်ၸၢႆးတႅင်ဢွၼ်ႁူဝ် ပႃးမိတ်ႈပႃးၶွၼ်ႉ/ၵၢင်ႇၵွၼ် ၵႂႃႇႁဵတ်းႁၢႆႉ ၽိတ်းမေႃးပေႃႉႁူဝ်ၵၼ်တင်းၵူၼ်းတႆး ႁဵတ်းလုၵ်ႈလဵင်ႉၶၢႆၶူဝ်းၶွင်ပိူၼ်ႈ တီႈၵၢတ်ႇတူၼ်ႈလမ်းယႆး (ၵၢတ်ႇလူင်)ၵဵင်းမႆႇ။ ႁဵတ်းႁႂ်ႈပေႃႈၵႃႉမႄႈၵႃႉ၊ ၵူၼ်းဢႅဝ်ႇလၢဝ်း လႄႈၵူၼ်းၸၢႆႇၵၢတ်ႇၶဝ် တႅၵ်ႇတိုၼ်ႇတူၵ်း ၸႂ်ဢွၼ်ၵၼ်လႅၼ်ႈပၢႆႈ၊ ႁၢၼ်ႉၶၢႆၶူဝ်းၶွင်တင်းၶူဝ်းၶွင်ၼႂ်းႁၢၼ်ႉလုသုမ်းတင်းၼမ်၊ ၵမ်ႈၽွင်ႈၺႃးၶီႈသူမ်ႈ တိူဝ်ႉဝၢတ်ႇၸဵပ်းၸွမ်းၵေႃႈမီး။ လွင်ႈတၢင်းဢၼ်လႆႈၽိတ်းၵၼ်ၼၼ်ႉ ယွၼ်ႉမႃးဢႅဝ်ႇၵၢတ်ႇသေယဵပ်ႇ ၺႃးတိၼ်ၵၼ်။ ပၢင်ၽိတ်းၵၼ်ပွၵ်ႈၼႆႉ ၸၢႆးတႅင် ၺႃးမိတ်ႈၾၼ်းတီႈၵွင်းလင်လႄႈတီႈၵွၵ်းႁူဝ်- ၼႆယဝ်ႉ။

ဢိင်ၼိူဝ်ၸၢႆးတႅင်ဢမ်ႇႁၢၼ်ႉၸႂ်သေ ထိုင်မႃးပွတ်းႁူဝ်ၶမ်ႈဝၼ်းထိ 03/09/12 ဢွၼ်မူႇၾုင်ၸုမ်းမၼ်း ၸၢႆး ၵူၼ်းမွၵ်ႈႁိမ်း 30 ၵေႃႉ မႃးၽိတ်းၽႅၵ်ႇတႅၼ်ႇႁူဝ်ၵၼ်တင်းၵူၼ်းတႆး ၸိူဝ်းႁဵတ်းလုၵ်ႈလဵင်ႉပိူၼ်ႈၼႂ်း ၵၢတ်ႇလူင်ထႅင်ႈ။ မီးၵၢၼ်လိုပ်ႈလမ်း ဢဝ်မိတ်ႈတႅင်းၾၼ်းၵၼ်၊ ဢဝ်ၶွၼ်ႉပေႃႉထုပ်ႉၵၼ်၊ ဢဝ်မၢၵ်ႇၵၢင်ႇ ၵွၼ် ပိုတ်းၵၼ်ၸိူဝ်းၼႆႉသေ တိူဝ်ႉၺႃးၸွမ်းႁၢၼ်ႉၶၢႆ ၶူဝ်းၶွင်လၢႆလၢႆႁၢၼ်ႉၸိူဝ်းၼႆႉလႄႈ ႁဵတ်းႁႂ်ႈပေႃႈၵႃႉ မႄၵႃႉ/ ၵူၼ်းၶၢႆၶူဝ်းၶွင်၊ ၵူၼ်းၶဝ်ႈဢႅဝ်ႇၵၢတ်ႇၸၢႆႇၵၢတ်ႇၶဝ် ဢွၼ်ၵၼ် တူၵ်းၸႂ်လႂ်တိုၼ်ႇလႅၼ်ႈပၢႆႈပႅပ်ႉ မႅပ်းၵၼ်၊ ၸဝ်ႈႁၢၼ်ႉၶဝ်သုမ်းၸွမ်းတင်းၼမ်။ ပေႃးၸဝ်ႈၼႃႈတီႈထႆးၵႂႃႇထိုင်ၵေႃႈ ဢွၼ်ၵၼ် လႅၼ်ႈပၢႆႈ ပႅတ်ႈၵေႃႉႁူး ၵေႃႉတၢင်း- ၼႆယဝ်ႉ။


ၵူၺ်းၵႃႈ ၸဝ်ႈၼႃႈတီႈထႆးၵူတ်ႇၸွပ်ႇတူၺ်းၼႂ်းၶိူင်ႈၵွင်ႈထၢႆႇႁၢင်ႈတူင်ႉၵမ်းသိုဝ်ႈႁိမ်းႁွမ်းၼၼ်ႉ လႆႈႁူႉ ႁၼ်ဝႃႈ ၽႂ်ပဵၼ်ၽႂ်၊ ယူႇသဝ်းတီႈလႂ်ၸိူဝ်းၼႆႉလႄႈ ၸဝ်ႈၼႃႈတီႈၶွၼ်ႈႁႅင်းၵၼ်သေၵႂႃႇၸွမ်းတိၺွပ်း ၸိူဝ်းၶဝ် လႆႈတီႈႁွင်ႈၶၢတ်ႈတီႈၼိုင်ႈ ၼိူဝ်သဵၼ်ႈတၢင်းသိတ်ႇထိဝူင်း၊ ၵိဝ်ႇ 3 ၊ ဢိူင်ႇၸၢင်ႉမွႆႈ ဝဵင်းၵဵင်းမႆႇ ၵမ်းလဵဝ် 10 ၵေႃႉ၊ ၸိူဝ်းၵိုတ်းထႅင်ႈ 10 ပၢႆၼၼ်ႉ ယင်းတိုၵ်ႉတိတ်းတၢမ်ယူႇ။ ယူႇတီႈၸဝ်ႈၼႃႈတီႈထႆး လႆႈႁွင်ႉမွၵ်ႇၵူၼ်း ၼႂ်းၵၢတ်ႇ ၸိူဝ်းၺႃးၸၢၵ်ႇၸွမ်းမႃးတူၺ်းၼၼ်ႉ ၸိူဝ်းၶဝ်လၢတ်ႈဝႃႈ ဢၼ်ၵႂႃႇႁဵတ်း ႁၢႆႉၼႂ်းၵၢတ်ႇပဵၼ်ၵူၼ်းၼုမ်ႇ ၸိူဝ်းၼႆႉတႄႉ။ လွင်ႈၼႆႉ တၢင်းၵၢၼ်ထႆးတေပၼ်တူတ်ႈ တၢမ်ႇၸွမ်းၼင်ႇ ၶၼ်ႈတွၼ်ႈမၢႆမီႈ- ၼႂ်းသိုဝ်ႇထႆး ဢွၵ်ႇၵႂႃႇၼင်ႇၼႆ။