ဢိင်ၼိူဝ်ၸုမ်းယိပ်းၵွင်ႈၵၢင်ႇၸုမ်းၼိုင်ႈ ၵဵပ်းၵိၼ်ငိုၼ်း ၵူၼ်းမိူင်းပွတ်းလွႆၶႄႇ ၸႄႈဝဵင်းလၢႆးၶႃႈ ၼပ်ႉႁူဝ် လၢၼ်ႉ သေ ၵူၼ်းမိူင်းပွင်ႉၶၢင်းယူႇယၢပ်ႇ။

မိူဝ်ႈဝၼ်းထိ 03/09/12 ပူၼ်ႉမႃး ၸုမ်းယိပ်းၵွင်ႈၵၢင်ႇၸုမ်းၼိုင်ႈ ဢၼ်တူင်ႉၼိုင်ပွတ်းလွႆၶႄႇ ၵဵပ်းၵိၼ် ငိုၼ်းၵူၼ်းမိူင်းၼႂ်း ဢိူင်ႇပုင်ႇတႂ်ႈ၊ ဢိူင်ႇၼႃးမၢင်း၊ ဢိူင်ႇႁၢတ်ႇလီႈတင်းဢိူင်ႇၼမ်ႉတူၵ်း ၸႄႈဝဵင်းလၢႆးၶႃႈ။ ဢိူင်ႇပုင်ႇတႂ်ႈတူၵ်းငိုၼ်း 1,675,000 ၊ ဢိူင်ႇၼႃးမၢင်း 1,575,000 ၊ ဢိူင်ႇႁၢတ်ႇလီႈ 990,000 ပျႃး၊ ဢိူင်ႇ ၼမ်ႉတူၵ်းတႄႉပႆႇလႆႈႁူႉ။ ၸုမ်းယိပ်းၵွင်ႈၵၢင်ႇၸုမ်းၼႆႉ ၵဵပ်းငိုၼ်းၼိူဝ်ၵူၼ်းဝၢၼ်ႈၼႂ်း 4 ဢိူင်ႇၸိူဝ်းၼႆႉ 3 လိူၼ် 1 ပွၵ်ႈ- ၼႆယဝ်ႉ။

ၵူၼ်းမိူင်းၼႂ်းပိုၼ်ႉတီႈၵေႃႉၼိုင်ႈလၢတ်ႈဝႃႈ- ၵွပ်ႈၸုမ်းပီႇတုၸိတ်ႉပဢူဝ်းဢၼ်ပၵ်းသဝ်းတီႈလွႆၶႄႇ ၸႄႈဝဵင်း လၢႆးၶႃႈ၊ ၵဵပ်းၵိၼ်ငိုၼ်းတီႈၵူၼ်းဝၢၼ်ႈ 3-4 ဢိူင်ႇၸိူဝ်းၼႆႉ 3 လိူၼ်လႂ် 1 ပွၵ်ႈလႄႈ ႁဵတ်းႁႂ်ႈ ၵူၼ်းမိူင်း ၶၢၼ်ၸႂ်လူင်လၢင်၊ ဢမ်ႇလိူဝ် လႆႈလႄႈၵႃႈလႆႈၵဵပ်းငိုၼ်းၵၼ်သေၵႂႃႇသႂ်ႇပၼ်။ ပေႃးၵဵပ်းယွၼ်း မႃးၵေႃႈ ႁဝ်းၶႃႈၵူၼ်းဝၢၼ်ႈလႆႈၸႅၵ်ႇၼႃႈႁိူၼ်းၸၼ်ႉၵူၼ်း မၢၵ်ႈမီး (ၵၢၼ်လူင်)၊ ၵူၼ်းၶႅၼ်းၸႂ် (ၵၢၼ်ႁၢတ်ႈ)၊ ၵူၼ်းပေႃးၵိၼ်ပေႃးထၢမ်း (ၵၢၼ်ဢွၼ်ႇ)သေသႂ်ႇပၼ်။ ၵၢၼ်လူင် 15,000 ပျႃး၊ ၵၢၼ်ႁၢတ်ႈ 13,000 ပျႃး၊ ၵၢၼ်ဢွၼ်ႇ 7,000 ပျႃး။ လင်ႁိူၼ်းၸိူဝ်းဢၼ်ႁဵတ်းဝႆႉသေဢမ်ႇမီးၵူၼ်းယူႇၼၼ်ႉ ၼိုင်ႈပီလႂ် 60,000 ပျႃး။ ၵဵပ်းၵိၼ်ငိုၼ်းၼိူဝ်ႁဝ်းၶႃႈၵူၼ်းမိူင်းမႃးႁိုင်ၼႅၼ်ႇယဝ်ႉ။

လိူဝ်သေၼၼ်ႉ ယင်းၵဵပ်းထႅင်ႈတႃႇၵူၼ်းသိုၵ်းၸႂ်ႉ၊ ၵႃႈၼမ်ႉမၼ်းၸၢၵ်ႈၾႆး၊ ငိုၼ်းတႃႇႁဵတ်းၼႃးသိုၵ်း၊ ငိုၼ်းၸူၵ်းငိုၼ်းၸၢႆႇ ၸိူဝ်းၼႆႉ၊ ငိုၼ်းဢၼ်ၶဝ်ၸမ်ပဵၼ်ၸႂ်ႉသွႆၼၼ်ႉ မႃးတဵၵ်းမိပ်ႇၵဵပ်းၵိၼ်ၼိူဝ်ႁဝ်းၵူၼ်း ဝၢၼ်ႈတိၵ်းတိၵ်း။ တီႈတႄႉမၼ်းၶဝ်ပဵၼ် ပီႇတုၸိတ်ႉယဝ်ႉ၊ ယူႇပႃႈတႂ်ႈလူင်ပွင်ၸိုင်ႈမၢၼ်ႈၵုမ်းၵမ်၊ လူင်ပွင်ၸိုင်ႈမၢၼ်ႈၵေႃႈၸွႆႈထႅမ်ပၼ်ၶဝ်ယူႇ၊ ၵွပ်ႈသင်ၶဝ်တိုၵ်ႉမႃး ၵဵပ်းၼိူဝ်ၵူၼ်းဝၢၼ်ႈယူႇ- ၵူၼ်းဝၢၼ်ႈ ၼႂ်းပိုၼ်ႉတီႈသိုပ်ႇလၢတ်ႈ ၼင်ႇၼႆ။

ၼွၵ်ႈသေၼၼ်ႉ ၵူၼ်းဝၢၼ်ႈဢိူင်ႇၶဝ် ယင်းလႆႈငိၼ်းထႅင်ႈဝႃႈ ၸုမ်းယိပ်းၵွင်ႈၵၢင်ႇၸုမ်းၼႆႉ ၵႂႃႇမၢႆဢဝ် ပိုၼ်ႉတီႈၼႃႈလိၼ် ပွတ်းတူၵ်းတဵင်း (ၼမ်ႉတဵင်း)ထႅင်ႈ 10 တီႈ ပိူဝ်ႈတႃႇၶုတ်းထၢၼ်ႇႁိၼ်။ ဢိင်ၼိူဝ် ယၢမ်ႈတဵၵ်းၶၢၼ်း ယွၼ်းငိုၼ်းၵူၺ်းပႆႇပေႃး၊ ယၢမ်ႈႁဵတ်းမိူၵ်ႈမႂ်ႈႁုၵ်းႁၢႆႉၼိူဝ်ၵူၼ်းဝၢၼ်ႈထႅင်ႈလႄႈ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း ပွတ်းတွၼ်ႈၼၼ်ႉ ယိၼ်းၵူဝ်ႁႄၸုမ်း ယိပ်းၵွင်ႈၸုမ်းၼႆႉတႄႉတႄႉ။ ၵူၼ်းမိူင်းပွတ်းတွၼ်ႈဝၢၼ်ႈဢိူင်ႇၼႆႉ ၶႂ်ႈယူႇလူမ်ၸႂ်မိူၼ်ၵူၼ်းဝၢၼ်ႈ တၢင်ႇဝၢၼ်ႈတၢင်ႇဢိူင်ႇ လႄႈ ၶႂ်ႈႁႂ်ႈလၢႆလၢႆၾၢႆႇတူၺ်းထိုင်လူလွမ် ၸွႆႈဝူၼ်ႉပၼ် ၸူဝ်ႈပၢၼ်ၶဝ်ႈၽွင်ႈ၊ ယႃႈပွႆႇၽႃႈပႅတ်ႈႁဝ်းၶႃႈ သေၵမ်းၼႆ -လႅင်ႇၶၢဝ်ႇ ၵေႃႉ ၸႂ်ႉၸိုဝ်ႈ “ၸၢႆးလၢၵ်ႈလူၵ်ႈ” ပၢင်လူင်ပွင်ႇလၢတ်ႈမႃးၼင်ႇၼႆ။