ၸၢႆးဢွင်ႇမျၢတ်ႈ ၵေႃႉၺႃးမၢပ်ႇၽၢမ်းဝႃႈၵဵဝ်ႇၶွင်ႈ ၵူၼ်းတၢႆ 13 ၵေႃႉၼႂ်းမႄႈၼမ်ႉၶွင်၊ ဢၼ်ၺႃးၵုမ်းၶင် တီႈၵဵင်းတုင် သေ မၢၼ်ႈသူင်ႇပၼ်ၶႄႇဢဝ်မိူဝ်းမိူင်းၶႄႇပႆႇပွၵ်ႈၶိုၼ်း၊ ႁဵတ်းႁႂ်ႈလုၵ်ႈလၢင်းမေးၼၢင်း တၢင်းလင်မႆႈၸႂ်။

ဢၼ်မၢၼ်ႈမွပ်ႈၸၢႆးဢွင်ႇမျၢတ်ႈပၼ်ၶႄႇၼႆႉ ၸဝ်ႈၼႃႈတီႈမၢၼ်ႈၸွမ်းသူင်ႇထိုင်ၶူဝ်တႃႈပိင်း (ၼမ်ႉလူၺ်) ၵူၺ်း၊ ပေႃးပူၼ်ႉ တႃႈပိင်းယဝ်ႉၵေႃႈ ၸဝ်ႈၼႃႈတီႈၶႄႇၶဝ်သႂ်ႇသေႃးမိုဝ်း မတ်ႉမိုဝ်းပေႈပိၵ်ႇ၊ သႂ်ႇထၢင်ႇ လဵၵ်း၊ သႂ်ႇထူးလဵၵ်းတီႈတိၼ်သေ ဢဝ်ထူင် ၸၢၼ်ႈသုပ်းႁူဝ်သေယွင်ႈတၢင်ႇၵႃးမိူဝ်းမိူင်းၶႄႇ။ မိူဝ်ႈလဵဝ် လႆႈငိၼ်းၶၢဝ်ႇဝႃႈ ဢဝ်ထႃႁူဝ်လွမ်ႈသေသႂ်ႇၶွၵ်ႈဝႆႉၸွမ်းၸၢႆးၼေႃႇ ၶမ်း။ မိူဝ်ႈတေသူင်ႇၵႂႃႇမိူင်းၶႄႇၼၼ်ႉ လၢတ်ႈဝႃႈ တေပွၵ်ႈမႃးၶိုၼ်းဝၼ်းထိ 05/09/12 ၊ ၵူၺ်းၵႃႈ ႁၢၼ်ႉတေႃႇမိူဝ်ႈလဵဝ်ၵေႃႈ ပႆႇပွၵ်ႈမႃး၊ မိူဝ်ႈလဵဝ် တေပဵၼ်ႁိုဝ်ၵႂႃႇၵေႃႈဢမ်ႇႁူႉ၊ လွင်ႈၼႆႉ ႁဵတ်းႁႂ်ႈလုၵ်ႈလၢင်းၼၢင်းမေးတၢင်းလင်မႆႈၸႂ်ၸွမ်းတႄႉတႄႉ- ၵူၼ်းၸမ်ၸႂ်ၸၢႆးၼေႃႇၶမ်းၵေႃႉၼိုင်ႈလၢတ်ႈ ၼင်ႇၼႆ။

ၵဵဝ်ႇၵပ်းလွင်ႈၼႆႉ ပူၼ်ႉမႃးမိူဝ်ႈဝၼ်းထိ 28/08/12 ယူႇတီႈၸဝ်ႈၼႃႈတီႈမၢၼ်ႈ ၵႅမ်ၽူႈၵွၼ်းပလိၵ်ႈၵျေႃႇ ထုၼ်း မွပ်ႈၸၢႆး ဢွင်ႇမျၢတ်ႈ (ၵႅမ်ၸၢႆးၼေႃႇၶမ်း)ပၼ် ၸဝ်ႈၼႃႈတီႈၶႄႇ လဵဝ်ယႂႄႉၵျိၼ်း ၽူႈၵွၼ်းႁွင်ႈ ၵၢၼ်ၾၢႆႇ တိုၵ်းတေႃးယႃႈမဝ်းၵမ်သေ ဢဝ်ၸၢႆးဢွင်ႇမျၢတ်ႈဢွၵ်ႇၶွၵ်ႈတီႈၵဵင်းတုင် ၵႂႃႇတၢင်းမိူင်းလႃး (ၼႃႈလိၼ် ၶိုၵ်ႉတွၼ်းမၢႆ 4)၊ ပူၼ်ႉၶဝ်ႈၵႂႃႇတၢင်းမိူင်းသိပ်းသွင် ပၼ်းၼႃး၊ သိုပ်ႇၵႂႃႇဝဵင်းၶုၼ်းမိင် ၸိုင်ႈမိူင်း ၶႄႇ။ မိူဝ်ႈၼၼ်ႉ လႆႈငိၼ်းဝႃႈပလိၵ်ႈၸၼ်ႉသုင် ၾၢႆႇၽဵဝ်ႈယႃႈမဝ်းၵမ် တီႈၵဵင်းတုင် ၵႂႃႇၸွမ်း 2 ၵေႃႉ။

လွင်ႈတၢင်းဢၼ်မၢၼ်ႈသူင်ႇပၼ်ၶႄႇၼႆႉ မိူဝ်ႈမီးတီႈၵဵင်းတုင်ၼၼ်ႉ ၵွပ်ႈၶႄႇၸွမ်းၶဝ်ႈယဵမ်ႈၸႂ်း တုၵ်းယွၼ်းတိၵ်းတိၵ်းလႄႈ ယူႇတီႈလူင်ပွင်ၸိုင်ႈမၢၼ်ႈ လႆႈတူၵ်းလူင်းဝႃႈ ပိူဝ်ႈတႃႇပဵၼ်လၵ်းထၢၼ် တၢင်တူဝ်လူင်ပွင်ၸိုင်ႈ မၢၼ်ႈ (State witness) ၵဵဝ်ႇၵပ်းလွင်ႈပဵၼ်ပၼ်ႁႃပွတ်းတွၼ်ႈသၢမ်ၸဵင်ႇၶမ်း ၼႆသေဢဝ်ၸၢႆးဢွင်ႇမျၢတ်ႈ သူင်ႇၵႂႃႇတီႈဝဵင်းၶုၼ်းမိင်။ ၽူႈၵွၼ်းၾၢႆႇႁူမ်ႇ လူမ်ႈသိုၵ်း (ၸယၽ) တီႈၼေႇပျီႇတေႃႇ လၢတ်ႈဝႃႈတေၵႂႃႇႁဵတ်း ၽူႈႁူႉႁၼ်(သၢၵ်ႈသေႇ)ပၼ်လူင်ပွင်ၸိုင်ႈမၢၼ်ႈၵူၺ်း၊ ဢမ်ႇၸႂ်ႈမွပ်ႈပၼ်ၶႄႇ၊ တေဢဝ်ၵႂႃႇ 5 ဝၼ်းၵူၺ်း ၶိုၼ်းပွၵ်ႈမႃး- ဝႃႈၼႆ။

ဢိင်ၼိူဝ်မၼ်းၸၢႆး ပဵၼ်ၵူၼ်းဝၢင်းၶိူင်ႈၵွင်ႈၵၢင်ႇပၼ်ၸုမ်းသိုၵ်းမၢၼ်ႈ၊ ဢမ်ႇၸႂ်ႈၵူၼ်းဢၼ်ထုၵ်ႇတိလႆႈ ၼႃႈသိုၵ်းသေ မၢၼ်ႈထုၵ်ႇလီမွပ်ႈပၼ်ၶႄႇပဵၼ်တၢင်းၵၢၼ်၊ ဢွၵ်ႇၶၢဝ်ႇ၊ ဢွၵ်ႇထီႊဝီႊ (TV) မိူၼ်ၼင်ႇလၢဝ်း မွပ်ႈၸၢႆးၼေႃႇၶမ်းပၼ်ၶႄႇ။ ဢၼ်မၢၼ်ႈသူင်ႇပၼ်ၶႄႇလပ်ႉလပ်ႉၼႆႉ ထိ 1 ယွၼ်ႉၸွမ်ၸိုင်ႈဢမ်ႇမီး ဢႃႇၼႃႇတႅပ်းတတ်း၊ ထိ 2 ယွၼ်ႉၵူၼ်းပႃႈတႂ်ႈ ႁပ်ႉၵိၼ်ငိုၼ်းယဵတ်ႈမွၼ်တီႈၶႄႇ- ၵမ်ႈၽွင်ႈထတ်း သၢင်ၼင်ႇၼႆ။