ၵူၼ်းၵေႃႉၼိုင်ႈၾၢင်ႁၢင်ႈၼႃႈတႃမိူၼ်ၸၢဝ်းၶႄႇဢႅဝ်ႇႁႃထၢႆႇ ႁၢင်ႈၼႂ်း ပုင်ႇပႃႇၶႅမ် ၸႄႈဝဵင်းမိူင်းတူၼ်၊ မီးသိုၵ်းဝႃႉၸွမ်းဢဝ် ႁူမ်ႇလူမ်ႈၵႅမ်တူဝ်တင်းၼမ်။

ဝၼ်းထိ 09-10/09/12 မီးၵူၼ်းၵေႃႉၼိုင်ႈ ၾၢင်ႁၢင်ႈၼႃႈတႃဢွၵ်ႇႁၢင်ႈၸၢဝ်းၶႄႇ ယိပ်းၵွင်ႈထၢႆႇႁုပ်ႈ တၢင်းယၢဝ်းမွၵ်ႈႁိမ်းသွၵ်ႇ ဢႅဝ်ႇႁႃထၢႆႇႁၢင်ႈၼႂ်းဝဵင်းပုင်ႇပႃႇၶႅမ်လၢႆလၢႆတီႈ၊ ၼိူဝ်လွႆၵွင်းမူး (ၸေႇၻီႇ) ဢၼ်မီးၾၢႆႇႁွင်ႇပုင်ႇပႃႇၶႅမ်ၵေႃႈၵႂႃႇထၢႆႇ၊ မီးသိုၵ်းဝႃႉ လူတ်ႉၵႃးၾူဝ်ႊဝီႊလ် 2 လမ်း၊ ႁႅင်းၵူၼ်းမွၵ်ႈ 10 ၵေႃႉ ၸွမ်းဢဝ်ႁူမ်ႇလူမ်ႈပၼ်၊ ႁူမ်ႇလူမ်ႈၸမ်တူဝ် ဢၼ်ၵႂႃႇထၢႆႇႁၢင်ႈတီႈလႂ် ၵေႃႈၸွမ်းယိပ်းပၼ်ၵွင်ႈထၢႆႇ ၸွမ်းၸွႆႈပၼ်လွင်ႈငၢႆႈလူမ်မီး 3 ၵေႃႉ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၵမ်ႈၽွင်ႈဝႃႈ- လႅပ်ႈပဵၼ်ၵူၼ်းတၢင်းမိူင်းၶႄႇမႃးဢဝ်ၶၢဝ်ႇ၊ ဢမ်ႇၼၼ်ၵေႃႈၸုမ်းသိုၵ်း ဝႃႉၶဝ်ၵဵပ်းၶေႃႈမုလ်းသေ ပိူင်ပိူင်- ဝႃႈၼႆ။

ၵူၼ်းပွတ်းပုင်ႇပႃႇၶႅမ်ၵေႃႉၼိုင်ႈလၢတ်ႈဝႃႈ- တီႈလွႆၵွင်းမူးၼႆႉ မိူဝ်ႈလဵဝ်သိုၵ်းမၢၼ်ႈဢမ်ႇမီးယဝ်ႉ၊ သိုၵ်းမၢၼ်ႈ ထွၼ်ဢွၵ်ႇပၼ်ယဝ်ႉ- ဝႃႈၼႆ။

တီႈလွႆၵွင်းမူးၼႆႉ ဢွၼ်ၼႃႈ /ၽွင်းပွႆးသၢင်ႇလွင်းပုင်ႇပႃႇၶႅမ် (17-22/03/12)ၼၼ်ႉ တပ်ႉသိုၵ်းၸိုင်ႈတႆး RCSS/SSA ၵႂႃႇပၵ်းယူႇ။ ၵူၼ်းမိူင်းသမ်ႉဝႃႈတီႈလွႆထၢတ်ႈၼႆႉပဵၼ်တီႈ ထွတ်ႈတီႈမျၢတ်ႈ၊ ပဵၼ်တီႈၵူၼ်း ဝၢၼ်ႈ ၵႂႃႇတၢၼ်းၵႂႃႇဝႆႈၽြႃး၊ ၵႂႃႇသွၼ်းၼမ်ႉၽြႃး။ လိူၼ် 6 မူၼ်းၼႆႉၵေႃႈ ပိူၼ်ႈတေၶိုၼ်ႈသွၼ်းၼမ်ႉၽြႃး။ ၵွပ်ႈၼႆ သိုၵ်းတႆးသမ်ႉမႃးပၵ်းယူႇတီႈၼႆႈၼႆႉ ဢမ်ႇပေႃးသၢင်ႇထုၵ်ႇ၊ ထုၵ်ႇလီ ၶိုၼ်းထွၼ်သိုၵ်းၼႆသေ သိုၵ်းတႆးၵေႃႈ ငိူင်ႉထွၼ်ပၼ်။ ၵူၺ်းၵႃႈ ပေႃးဝႃႈသိုၵ်းတႆးငိူင်ႉဢွၵ်ႇၵေႃႈသိုၵ်းမၢၼ်ႈၵႂႃႇပုတ်ႈပၵ်း ၸွမ်းၵမ်းလဵဝ်။