ၼႂ်းတိုဝ်ႉတၢင်းၵႂႃႇႁပ်ႉသူး (ရၢင်းဝလ်း) တီႈၸိုင်ႈမိူင်း ဢမႄႊရိၵၼ်ႊၼၼ်ႉ ၸဝ်ႈၶုၼ်ထုၼ်းဢူး တေမွၵ်ႇ လၢတ်ႈၵႂၢမ်း ပိူင်လူင်မၼ်းသုၼ်ႇလႆႈသုၼ်ႇပဵၼ်ၸၢဝ်းၶိူဝ်း။

မိူဝ်ႈပၢင်ပွႆးၶုၵ်းထူပ်းဝၼ်းၵိူတ်ႇ ဢၼ်ၸတ်းလူင်ႈၼႃႈ ပူၼ်ႉမႃးမိူဝ်ႈဝၼ်းထိ 09/09/12 ၼၼ်ႉ ဢိင်ၼိူဝ် တိုဝ်ႉတၢင်းတေ ဢွၵ်ႇၶၢဝ်းတၢင်းၵႂႃႇတီႈၸိုင်ႈမိူင်း ဢမႄႊရိၵၼ်ႊ၊ ပိူဝ်ႈတႃႇၵႂႃႇႁပ်ႉသူး/ရၢင်းဝလ်း (2012 Democracy Award Honorary) ဢၼ်ၸုမ်း (National Endowment for Democracy- NED) ႁဵတ်းၸဝ်ႈ တႃႇၼမွပ်ႈပၼ်သေ ၸဝ်ႈၶုၼ် ထုၼ်းဢူးမွၵ်ႇလၢတ်ႈၵႂၢမ်းဝႃႈ တေၵႂႃႇၸွမ်းသဵၼ်ႈတၢင်းလိၵ်ႈ ႁူမ်ႈမၢႆပၢင်လူင်။

“ပိူဝ်ႈတႃႇၸၢဝ်းၶိူဝ်းတေလႆႈလီလႆႈပဵၼ် မီးသုၼ်ႇလႆႈၽဵင်ႇပဵင်းၼၼ်ႉ တိုၼ်းတေႁဵတ်းသၢင်ႈၵႂႃႇ၊ ဢၼ်ႁဝ်းမုင်ႈမွင်းၶႂ်ႈလႆႈ ၼၼ်ႉ ပဵၼ်ၸိုင်ႈမိူင်းႁူမ်ႈတုမ်ၸိုၼ်ႈၸၢင်ႇ။ ပိူဝ်ႈတႃႇမီးသုၼ်ႇလႆႈၽဵင်ႇပဵင်း၊ သုၼ်ႇလႆႈပူၵ်းပွင်တူဝ်ၵဝ်ႇ၊ သုၼ်ႇလႆႈတႅပ်း တတ်းႁင်းၶေႃၼၼ်ႉ ႁဝ်းၶႃႈတေႁဵတ်းၵႂႃႇၸွမ်းလိၵ်ႈႁူမ်ႈ မၢႆပၢင်လူင် ဢၼ်လႆႈ လူင်းလၢႆးမိုဝ်းၵၼ်ဝႆႉ။ ပိူင်လူင်မၼ်းၶႂ်ႈႁႂ်ႈ လူင်ပွင်ၸိုင်ႈယုမ်ႇယမ်ႁဝ်းၶႃႈ၊ ဢၼ်ႁဝ်းၶႃႈႁဵတ်းသၢင်ႈယူႇ ပဵၼ်ၵၢၼ်မိူင်း၊ ဢမ်ႇၸႂ်ႈၵၢၼ်မၢၵ်ႈမီး”- ဝႃႈၼႆ။

တူဝ်ၵဝ်ႇတူၵ်းၶွၵ်ႈတိုၵ်ႉလွတ်ႈပူၼ်ႉဢွၵ်ႇမႃးလႆႈ 4-5 လိူၼ်ၵူၺ်း၊ မႃးပၼ်ပုၼ်ႈၽွၼ်းၵၼ် ပိူဝ်ႈတႃႇၸွႆႈ ႁူမ်ႈသၢင်ႈၼႂ်းလွင်ႈ ငမ်းယဵၼ် ဢိၵ်ႇ ပၼ်ႁႃၼႂ်းမိူင်းရၶႅင်ႇၸိူဝ်းၼႆႉ ၵွပ်ႈဝႃႈမုင်ႈမွင်းပိူဝ်ႈတႃႇၸၢဝ်းၶိူဝ်း လႆႈလီလႆႈပဵၼ်လႄႈ ႁဝ်းၶႃႈၸင်ႇယွမ်း ႁပ်ႉႁဵတ်းၸွမ်း။ ၵူၺ်းၵႃႈ သင်ၸိူဝ်ႉဝႃႈဝႃႇတၵၢၼ်မိူင်း/ ယိူင်း ဢၢၼ်း ၵၢၼ်မိူင်းဢမ်ႇမိူၼ်ၵၼ်ၸိုင် ၵႃႈတၵ်းလႆႈႁဵတ်းၸွမ်း သဵၼ်ႈတၢင်းၽႂ်မၼ်း၊ မိူဝ်ႈလဵဝ် မုင်ႈမွင်း ပိူဝ်ႈတႃႇႁႂ်ႈလီသေ တေၶတ်းၸႂ်ႁဵတ်းသၢင်ႈၵႂႃႇ-မၼ်းၸဝ်ႈသိုပ်ႇလၢတ်ႈထႅင်ႈၼင်ႇ ၼႆ။