ၽွင်းႁၢင်လိူၼ်ပူၼ်ႉ ၵူၼ်းဝၢၼ်ႈလၢႆလၢႆၵေႃႉ ၼႂ်းၸိုင်ႈတႆးပွတ်းႁွင်ႇ ထုၵ်ႇသိုၵ်းမၢၼ်ႈတိၺွပ်းၸိၼႄးဝႃႈ ၵဵဝ်ႇၶွင်ႈသိုၵ်းတႆးသေ ၺႃးပေႃႉထုပ်ႉၶႃတူဝ်ၶႃၸႂ်၊ ႁၢၼ်ႉတေႃႇ မိူဝ်ႈလဵဝ်ပႆႇပွႆႇပၼ်။

တင်ႈတႄႇဝၼ်းထိ 23-31/08/12 မႃး သိုၵ်းမၢၼ်ႈတိၺွပ်းပေႃႉထုပ်ႉၵူၼ်းဝၢၼ်ႈ ၼႂ်းၸႄႈဝဵင်းၼမ်ႉတူႈ တီႈဢေႇ သုတ်းဢမ်ႇယွမ်း 6 ၵေႃႉသေ ပေႃႉထုပ်ႉၶႃတူဝ်ၶႃၸႂ်ႁၢဝ်ႈႁႅင်း။ ၼႂ်း 6 ၵေႃႉၼၼ်ႉ ပႃးဢၢႆႈတဵင်း တင်းဢၢႆႈလႃႉ ၵူၼ်းဝၢၼ်ႈၼႃးၵေး ဢိူင်ႇပၢင်ၶိင်၊ သွင်ၶႃထုၵ်ႇတိမိူဝ်ႈဝၼ်းထိ 30/08/12 ၊ သိုၵ်းမၢၼ်ႈ တိယဝ်ႉၸိၼႄးဝႃႈ ၵဵဝ်ႇၶွင်ႈသိုၵ်းတႆးၼႆသေပေႃႉထုပ်ႉႁၢဝ်ႈႁႅင်း- ၼႆယဝ်ႉ။

ၵူၼ်းဝၢၼ်ႈၼႂ်းပိုၼ်ႉတီႈဢၼ်ႁၼ်ၸွမ်းလွင်ႈၼႆႉၵေႃႉၼိုင်ႈလၢတ်ႈ ဝႃႈ- သိုၵ်းမၢၼ်ႈထဵတ်ႈထၢမ်ပေႃႉထုပ်ႉ ဢၢႆႈတဵင်းတင်း ဢၢႆႈလႃႉၼႃႈၶႅင်ႈပေႃးႁၵ်း၊ မၢၵ်ႇတႃၵေႃႈမႅၼ်းဢွၵ်ႇ။ ၼွၵ်ႈသေၼၼ်ႉ ႁၼ်သိုၵ်းမၢၼ်ႈ ဢဝ်သွင် ၶႃထိုမ်ႈၶိုၼ်ႈၼိူဝ်လူတ်ႉၵႃးတူင်း ၾိူင်းၶဝ်ထႅင်ႈ သမ်ႉပေႃးဢမ်ႇတူင်ႉသေဢိတ်း၊ လႅပ်ႈဢမ်ႇလွတ်ႈတၢႆယဝ်ႉ။ ၵူၺ်းၵႃႈ ပေႃႈမႄႈပီႈၼွင်ႉၶဝ်တႄႉမုင်ႈမွင်းဝႃႈ သင်ၸိူဝ်ႉဝႃႈဢမ်ႇမီးပၢင်တိုၵ်းထႅင်ႈၸိုင် လုၵ်ႈလၢင်းၶဝ်ၸၢင်ႈပူၼ်ႉ လွတ်ႈၽေးသေလႆႈပွၵ်ႈႁိူၼ်းၶိုၼ်းယူႇ- ဝႃႈၼႆ။

သိုၵ်းမၢၼ်ႈၸုမ်းဢၼ်ႁွၼ်ႈထဝ်ႇၶိုၼ်ႈၼိူဝ်လွင်ႈတႂ်ႈ ႁႃတိၺွပ်းထဵတ်ႈထၢမ်ပေႃႉထုပ်ႉၵူၼ်းဝၢၼ်ႈၸုမ်းၼႆႉ မီးၵူၼ်းမေႃလၢတ်ႈ ၵႂၢမ်းတႆး ၵႂၢမ်းၶႄႇ ၵႂၢမ်းပလွင်ႈလီလီၼမ်ဝႆႉ၊ ဢမ်ႇလႅပ်ႈၸႂ်ႈသိုၵ်းမၢၼ်ႈၵူၺ်း၊ လႅပ်ႈပႃး ပီႇတုၸိတ်ႉ၊ ပေႃးပဵၼ်ၵူၼ်းဝၢၼ်ႈၵေႃႉ ဢၼ်ၸိူဝ်းၶဝ်ထၢင်ႇထိူမ်ဝႃႈ ၵဵဝ်ႇၵပ်းသိုၵ်းတႆးၼၼ်ႉ ဢဝ်မိတ်ႈထိူဝ် ၸွမ်းတူဝ်ၸွမ်းၶိင်းပိူၼ်ႈၵေႃႈမီး- ၵူၼ်းဝၢၼ်ႈၶဝ်လၢတ်ႈၼင်ႇ ၼႆ။

ပိုၼ်ႉတီႈဝၢၼ်ႈဢိူင်ႇၸိူဝ်းသိုၵ်းမၢၼ်ႈၸုမ်းၼႆႉ ဢွၵ်ႇငႃးသိုၵ်းတူင်ႉၼိုင်ႁွၼ်ႈထဝ်ႇယၢမ်းလဵဝ် ပဵၼ်ပွတ်းဝၢၼ်ႈ ၼႃးၵေး၊ ဝၢၼ်ႈပဵင်း လူင်၊ ဝၢၼ်ႈၼမ်ႉႁႅတ်ႈ၊ ဝၢၼ်ႈၼႃးပုင်ႇ၊ ဝၢၼ်ႈပုင်ႇ ၼႂ်းၸႄႈဝဵင်းၼမ်ႉတူႈၸိူဝ်းၼႆႉ။