ႁိူဝ်းတၢင်ႇၵူၼ်းၶၢမ်ႈမႄႈၼမ်ႉၶွင်လမ်းၼိုင်ႈ ဢၼ်လႅၼ်ႈ ၾင်ႇမိူင်းတႆး ၼႃႈလိၼ်မိူင်းလႃးၵႂႃႇမႃးမိူင်းၶႄႇ ထူပ်းၽေး ပိၼ်ႈၼႂ်းၼမ်ႉၶွင်၊ မႄႈၼမ်ႉၶႅၼ်ႈမိူင်းတႆး-မိူင်းၶႄႇ၊ လုၵ်ႈႁဵၼ်းလႄႈၵူၼ်းလူင်လွင်ႈႁၢႆၸွမ်း ၼမ်ႉသၢဝ်းပၢႆ။

ပူၼ်ႉမႃးမိူဝ်ႈဝၼ်းထိ 02/09/12 (မိူဝ်ႈသိုၼ်း) ယၢမ်းၵၢင်ဝၼ်း ႁိူဝ်းတေႃႉတၢင်ႇၵူၼ်းၶၢမ်ႈမႄႈၼမ်ႉၶွင် ဢၼ်လႅၼ်ႈလုၵ်ႉ ၾင်ႇမိူင်းတႆးတႃႈႁိူဝ်းမလိ (ဢိူင်ႇၽႃလူင်ၽႃလႅင်) ၶၢမ်ႈၵႂႃႇၾင်ႇမိူင်းၶႄႇတႃႈႁိူဝ်း ၵႂၼ်းလူၺ် (တေႃႇၼႃႈမိူင်းၵႂၼ်းလူၺ်)ထူပ်းၽေးပိၼ်ႈ/ၸူမ်ၼႂ်းမႄႈၼမ်ႉၶွင်၊ ႁဵတ်းႁႂ်ႈလုၵ်ႈဢွၼ်ႇတင်း ၵူၼ်းလူင်ၸိူဝ်း ဢွၵ်ႇတၢင်းၶီႇႁိူဝ်းလွင်ႈႁၢႆၸွမ်းၼမ်ႉတင်း မူတ်း 22 ၵေႃႉ၊ ပဵၼ်လုၵ်ႈဢွၼ်ႇ/လုၵ်ႈႁဵၼ်း 14 ၵေႃႉ (ၵမ်ႈၼမ်ပဵၼ်လုၵ်ႈဢွၼ်ႇၸၢဝ်းဢႃးၶႃႇ)လႄႈၵူၼ်းလူင် 8 ၵေႃႉ- ၼႆယဝ်ႉ။

ၸဝ်ႈၼႃႈတီႈၸုမ်းမိူင်းလႃးၵေႃႉၼိုင်ႈလၢတ်ႈဝႃႈ- လုၵ်ႈဢွၼ်ႇၵမ်ႈၼမ်ပဵၼ်လုၵ်ႈႁဵၼ်းၸိူဝ်းလုၵ်ႉၾင်ႇမိူင်းတႆးၶဝ်ႈၵႂႃႇႁဵၼ်း လိၵ်ႈၶႄႇၼႂ်းမိူင်းၶႄႇ၊ မိူဝ်ႈလဵဝ် မႅၼ်ႈၽွင်းႁူင်းႁဵၼ်းတိုၵ်ႉပိုတ်ႇမႂ်ႇ။ ၶဝ်ၵႂႃႇႁဵၼ်းၼိုင်ႈပွၵ်ႈ ၶၢဝ်းတၢင်းၼိုင်ႈဝူင်ႈ၊ ဝၼ်းဢႃး တိတ်ႉၵႂႃႇ ဝၼ်းသုၵ်းပွၵ်ႈႁိူၼ်း။ လွင်ႈတၢင်းႁိူဝ်းပိၼ်ႈၼႆႉ ယွၼ်ႉတၢင်ႇၼမ် တၢင်ႇၼၵ်း၊ သမ်ႉပဵၼ်ၶၢဝ်းၾူၼ် ၼမ်ႉၼွင်း၊ ၼႃႈတေၵိူတ်ႇလိူင်ႈဝၼ်းၼၼ်ႉ ႁိူဝ်းလမ်းၼၼ်ႉလႅၼ်ႈၵႂႃႇမႃး ယဝ်ႉလၢႆၵမ်း၊ ပိူင်ၼိုင်ႈၵေႃႈ ပဵၼ်ဝၼ်းဢႃးတိတ်ႉလႄႈၵူၼ်း ၶၢမ်ႈၵႂႃႇမႃးၼမ်၊ ၵမ်းဢၼ်ႁိူဝ်းပိၼ်ႈၼႆႉ ၵူၼ်းၶီႇမီး 30 ၵေႃႉ၊ ၸွႆႈလႆႈ 8 ၵေႃႉ- ဝႃႈၼႆ။

ၵဵဝ်ႇၵပ်းလွင်ႈၼႆႉ ၶၢဝ်ႇၶႄႇသျိၼ်းႁႂႃၵေႃႈရၢႆးငၢၼ်းဝႃႈ- ႁိူဝ်းလမ်းၼႆႉ တၢင်ႇၵူၼ်း 25 ၵေႃႉ၊ ဝၢႆးႁိူဝ်းပိၼ်ႈ ယဝ်ႉ လွင်ႈလႆ ႁၢႆၵႂႃႇၸွမ်းၼမ်ႉ 17 ၵေႃႉ ၵမ်ႈၼမ်ပဵၼ်လုၵ်ႈဢွၼ်ႇ၊ ၸွႆႈလႆႈမႃးၶိုၼ်း 8 ၵေႃႉ။ ဢွၼ်ၼႃႈ တေပဵၼ်ၼႆႉ လုၵ်ႉတီႈၾင်ႇ မိူင်းတႆး တႃႈႁိူဝ်းဝၢၼ်ႈမလိ ဢွၵ်ႇမုင်ႈၼႃႈၸူးတႃႈႁိူဝ်းၵႂၼ်းလူၺ် ၾင်ႇမိူင်းၶႄႇ- ၼႆယဝ်ႉ။