ၵူၼ်းၼုမ်ႇၸၢႆးသွင်ၵေႃႉ  ၼႂ်းၸႄႈဝဵင်းၼမ်ႉတူႈ ၸိုင်ႈတႆးပွတ်းႁွင်ႇ၊ ၺႃးသိုၵ်းမၢၼ်ႈဢဝ်ၵွင်ႈ ဢွၼ်ႇ/ ၵွင်ႈလူင်ယိုဝ်းသႂ်ႇ လႄႈတိၺွပ်းပေႃႉထုပ်ႉ၊ ၵေႃႉၼိုင်ႈ လႆႈၶဝ်ႈႁူင်းယႃၼမ်ႉတူႈ-ပၢင်ႁႆး။ ၼွၵ်ႈၼၼ်ႉ ၵူၼ်းသူင်ႇတၢင်း တင်းသိုၵ်းမၢၼ်ႈ ၺႃးမၢၵ်ႇပွမ်းတႅၵ်ႇ တၢႆထင်တီႈ။

မိူဝ်ႈဝၼ်းထိ 24/09/12 သိုၵ်းမၢၼ်ႈၶမယ 324  တင်းတပ်ႉလႃႈသဵဝ်ႈၵမ်ႈၽွင်ႈႁူမ်ႈၵၼ်သေ ဢွၵ်ႇငႃး သိုၵ်းၵႂႃႇႁွၼ်ႈထဝ်ႇ သွၵ်ႈတဝ်ၼႂ်းဢိူင်ႇသၢႆးၶၢဝ် ၸႄႈဝဵင်းၼမ်ႉတူႈ ၸိုင်ႈတႆးပွတ်းႁွင်ႇ။ ယၢမ်းၵၢင်ၼႂ် 08:00 မူင်း သိုၵ်းမၢၼ်ႈၽႅဝ်ၵႂႃႇတီႈဝၢၼ်ႈ ပၢင်ႇဝူဝ်းသေ တိၺွပ်းဢဝ်ၵူၼ်းဝၢၼ်ႈၵမ်ႈၽွင်ႈ ၸႂ်ႉသူင်ႇ တၢင်းဢွၵ်ႇဝၢၼ်ႈၵႂႃႇ မွၵ်ႈယၢမ်း 10 မူင်း။ မိူဝ်ႈၵႂႃႇၽႅဝ်ႁိမ်းဝၢၼ်ႈ ပၢင်ႇမေႃႈၶၢင်ၼၼ်ႉ သိုၵ်းမၢၼ်ႈ ၵေႃႈဝႄႉၵိုတ်းလိုဝ်ႈတီႈႁိမ်း သူၼ်ၶဝ်ႈၵၢပ်ႇ ပႃႈမု-လုင်းသၢင်ႇဢွင်ႇ။ ၽွင်းၼၼ်ႉ မၢၵ်ႇပွမ်းၼႂ်းမိုဝ်း သိုၵ်းမၢၼ်ႈၵေႃႉၼိုင်ႈသမ်ႉတူၵ်းတႅၵ်ႇ၊ ႁဵတ်းႁႂ်ႈၵူၼ်းသူင်ႇတၢင်း ၸိုဝ်ႈၸၢႆးပီး (ဢမ်ႇၼၼ်) လုင်းၸၢႆးမႆႉႁုင်း-ပၢင်ႇဝူဝ်း) ဢႃႇယု 53 ပီ တင်းသိုၵ်းမၢၼ်ႈၵေႃႉၼၼ်ႉ တၢႆထင်တီႈၸွမ်းၵၼ်- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၵူၼ်းဝၢၼ်ႈသၢႆးၶၢဝ်ဢၼ်ႁွတ်ႈၼမ်ႉတူႈ ၵေႃႉၼိုင်ႈလၢတ်ႈဝႃႈ- မိူဝ်ႈသိုၵ်းမၢၼ်ႈဝႄႉ ၵိုတ်းလိုဝ်ႈတီႈသူၼ် ၶဝ်ႈၵၢပ်ႇသေ ဢဝ်မၢၵ်ႇပွမ်းၶဝ်တူၵ်းတႅၵ်ႇၼၼ်ႉ  ၵူၼ်းဝၢၼ်ႈလုၵ်ႈဢွၼ်ႇၸၢႆး သွင်ၵေႃႉပီႈၼွင်ႉ ဢၼ်ႁဵတ်းသူၼ်ၶဝ်ႈၵၢပ်ႇ ယူႇႁိမ်းႁွမ်းၼၼ်ႉသမ်ႉ တူၵ်းၸႂ်သဵင်မၢၵ်ႇတႅၵ်ႇသေ လႅၼ်ႈပၢႆႈ။ ၾၢႆႇသိုၵ်းမၢၼ်ႈၵေႃႈ ၵိူဝ်းဝႃႈပဵၼ်ၵူၼ်းထိူၼ်ႇယိုဝ်းၶဝ်၊ သမ်ႉႁၼ်လုၵ်ႈဢွၼ်ႇၸၢႆး 2 ၵေႃႉပီႈၼွင်ႉၼၼ်ႉလႅၼ်ႈပၢႆႈလႄႈ လၢၵ်ႈၵွင်ႈဢွၼ်ႇၵွင်ႈလူင်ယိုဝ်းႁၢတ်ႇသႂ်ႇၵူၺ်းပႆႇပေႃး၊ တိၺွပ်းၶႃ ပီႈၼွင်ႉသေဢဝ်ၵႂႃႇတီႈၵွင်းတပ်ႉၶဝ်၊ ထိုင်မႃးမိူဝ်ႈဝႃးၵၢင်ၶမ်ႈ (26/09/12) ၸင်ႇပွႆႇပွၵ်ႈၶိုၼ်းႁိူၼ်း- ဝႃႈၼႆ။

ၵူၼ်းဝၢၼ်ႈသၢႆးၶၢဝ်သိုပ်ႇလၢတ်ႈဝႃႈ- ၵေႃႉပဵၼ်ၼွင်ႉတႄႉ ၸၢၵ်ႇမၢၵ်ႇလူင်ဢမ်ႇပေႃးတိူဝ်ႉၺႃးႁႅင်း၊ ၵူၺ်းၵႃႈ ၺႃးသိုၵ်းမၢၼ်ႈ ပေႃႉထုပ်ႉၸဵပ်းလိူဝ်ႁႅင်းဝႆႉ၊ လႅပ်ႈၸမ်ႉမၢၼ်ႉတၢင်းၼႂ်း။ ၵေႃႉပဵၼ်ပီႈဢၢႆႈ ၼၼ်ႉ ဝၢတ်ႇၸဵပ်း လိူဝ်ႁႅင်းဝႆႉ၊ ၸၢၵ်ႇမၢၵ်ႇလူင် တိူဝ်ႉၺႃးတီႈၵႅမ်ႈ/တီႈၵွင်းလင် ၵၢင်ၼႂ်မိူဝ်ႈၼႆႉ (27/09/12) ဢဝ်သူင်ႇၵႂႃႇတီႈ ႁူင်းယႃလူင် ၼမ်ႉတူႈ-ပၢင်ႁႆးယဝ်ႉ- ဝႃႈၼႆ။

ၵဵဝ်ႇၵပ်းလွင်ႈၼႆႉ ၾၢႆႇပၢႆးယူႇလီၵေႃႉၼိုင်ႈၵေႃႈလၢတ်ႈဝႃႈ- ၵေႃႉပဵၼ်ၼွင်ႉၼၼ်ႉ လႆႈမိူဝ်းယူတ်းယႃ ပၼ်တီႈႁိူၼ်း၊ ၵေႃႉပဵၼ် ပီႈဢၢႆႈတႄႉ သူင်ႇၵႂႃႇတီႈႁူင်းယႃလူင်ၼမ်ႉတူႈ-ပၢင်ႁႆးယဝ်ႉ။ ၵူၺ်းၵႃႈ ဢၼ်လိူဝ်ႁႅင်းၼၼ်ႉ ပဵၼ်လွင်ႈလုင်းၸၢႆးၵေႃႉဢၼ်တၢႆၵႂႃႇ ၽွင်းသိုၵ်းမၢၼ်ႈတိၺွပ်းၵႂႃႇသူင်ႇတၢင်း။ မၼ်းၸၢႆးၼႆႉမီးလုၵ်ႈလၢင်း 6 ၵေႃႉ၊ မေးၼၢင်းမၼ်းၵေႃႈဢမ်ႇႁဵတ်းၵၢၼ် လႆႈ။ လုၵ်ႈဢွၼ်ႇမၼ်း 2 ၵေႃႉ၊ ၵေႃႉၼိုင်ႈ 8 ၶူပ်ႇ ၵေႃႉၼိုင်ႈ 10 ၶူပ်ႇ  တိုၵ်ႉၶဝ်ႈႁူင်းႁဵၼ်းၸၼ်ႉငဝ်ႈၵူၺ်း၊ လွင်ႈၼႆႉ ၽႂ်တေ တူၺ်းထိုင်ၸွႆႈထႅမ်ၵႂႃႇတၢင်းၼႃႈ။ သိုၵ်းမၢၼ်ႈၶဝ် လၢတ်ႈဝႃႈ- တေမႃးၸွႆႈထႅမ်ၵႃႈၸတ်းပၢင်ၸႃႉ၊ ၵႃႈႁႅၼ်းပၢင်သွမ်းၼႆသေ တႃႉ တေႃႇထိုင်မိူဝ်ႈလဵဝ် ဢမ်ႇမႃးၸွႆႈထႅမ်သင်။ ပၢင်သွမ်းလုင်းၸၢႆးၼႆႉ တေဢၢၼ်းႁႅၼ်းၼႂ်းဝၼ်းဢႃးတိတ်ႉ/လိူၼ် 10 မူၼ်း တေမႃးၼႆႉ၊ ၶူဝ်းလူႇၶူဝ်းတၢၼ်းၵေႃႈ ၵူၼ်းဝၢၼ်ႈၵူၼ်းသူၼ်ၶဝ် လႆႈႁူမ်ႈၵၼ်ႁၢင်ႈႁႅၼ်းဝႆႉ- ဝႃႈၼႆ။

ၵပ်းၵၢႆႇလွင်ႈၼႆႉ ၼၢင်းၶမ်းဢေး ၽွင်းတႅၼ်းပႃႇတီႇသိူဝ်ၽိူၵ်ႇ၊ ဢၼ်ႁွတ်ႈတီႈဝဵင်းတူၼ်ႈတီး ၶဝ်ႈပၢင်ၵုမ်သၽႃးလၢတ်ႈဝႃႈ- ၾၢႆႇၼိုင်ႈၵေႃႈ ၵွပ်ႈဢမ်ႇမီးတီႈၼမ်ႉတူႈလႄႈ လွင်ႈလုၵ်ႈဢွၼ်ႇၼႆႉ ဢမ်ႇလႆႈႁူႉၸွမ်း၊ ၾၢႆႇၼိုင်ႈၵေႃႈ ၵွပ်ႈမႃးၶိုၼ်ႈပၢင်ၵုမ် သၽႃးဝႆႉလႄႈ ၵူၼ်းမိူင်းၵေႃႈဢမ်ႇလၢတ်ႈ သင်မႃး- ဝႃႈၼႆ။

ၼႂ်းၸႄႈဝဵင်းၼမ်ႉတူႈၼႆႉ သိုၵ်းမၢၼ်ႈၸိသင်ႇတီႈၵူၼ်းဝၢၼ်ႈၵူၼ်းမိူင်း ပွတ်းမိူင်းယဵၼ်ဝႆႉဝႃႈ- တေဢမ်ႇလႆႈ ပၼ်သိုၵ်း ထိူၼ်ႇၶဝ်ႈဝၢၼ်ႈ၊ သိုၵ်းမၢၼ်ႈၶႂ်ႈဝႃႈပဵၼ် တပ်ႉသိုၵ်းပူတ်းပွႆႇၸိူဝ်ႉၸၢတ်ႈ ပလွင်ႈ (TNLA) တင်း တပ်ႉသိုၵ်းၸိုင်ႈတႆး SSA ။ တေဢမ်ႇလႆႈၵမ်ႉၸွႆႈၶဝ်ႈၼမ်ႉတၢင်းၵိၼ်- ၵူၼ်းဝၢၼ်ႈၺႃးသိုၵ်းမၢၼ်ႈႁၢမ်ႈ ဝႆႉၼင်ႇၼႆ။

ၾၢႆႇၼိုင်ႈတၢင်းၼိုင်ႈ၊ လုၵ်ႈၸုမ်းသိူဝ်ၽိူၵ်ႇပွတ်းမိူင်းၵိုင် ၵေႃႉၼိုင်ႈၵေႃႈလၢတ်ႈဝႃႈ- မိူဝ်ႈလဵဝ်ပွတ်း ႁဝ်းၼႆႉ ယင်းၶႂ်ႈႁႅင်းလိူဝ် ပွတ်းၼမ်ႉတူႈလူးၵွၼ်ႇ။ မိူဝ်ႈတူၵ်းလူင်းၵိုတ်းယိုဝ်းၵၼ် ဢဝ်လွင်ႈငမ်း ယဵၼ်ၼၼ်ႉ ၾၢႆႇသိုၵ်းမၢၼ်ႈဝႃႈတေထွၼ်ပၼ်၊ ၵူၺ်းၵႃႈ ဝၢႆးမႃးဢမ်ႇထွၼ်ၵူၺ်းပႆႇပေႃး၊ ငိၼ်းၶၢဝ်ႇ သိုၵ်းတႆးၵႂႃႇမႃးတူင်ႉၼိုင်တၢင်းလႂ်ၵေႃႈ သိုၵ်းမၢၼ်ႈႁၢင်ႈသိုၵ်းလိုပ်ႈလမ်းတိၵ်းတိၵ်း၊ သိုၵ်းမၢၼ်ႈၶဝ် လႅၵ်ႈလၢႆႈပေႃႇလသီႇ လၢႆးတိုၵ်းၶဝ်ႁိုဝ်ဢမ်ႇႁူႉ၊ ႁဵတ်းႁႂ်ႈပႃႇတီႇႁဝ်း ပေႃးဢမ်ႇၶႂ်ႈႁတ်းတူင်ႉၼိုင်၊ ၵွပ်ႈၵူဝ်ၺႃးၸိၼႄးဝႃႈၵဵဝ်ႇၶွင်ႈ သိုၵ်းတႆးၼႆသေ ဢဝ်မၢႆမီႈမတ်ႉတႃ 17/1 ဝႃႈလူၺ်ႈလွင်ႈတိတ်း တေႃႇၸုမ်းၼွၵ်ႈမၢႆမီႈဢဝ် လိူင်ႈၵၼ်- ဝႃႈၼႆ။