ၽွင်းတႅၼ်းၵူၼ်းမိူင်းပႃႇတီႇသိူဝ်ၽိူၵ်ႇ တုၵ်းယွၼ်းလွင်ႈ တေႃႈလွတ်ႇၵႅတ်ႉသ် တင်းၼမ်ႉမၼ်း လတ်းၽၢၼ်ႇ မိူင်းတႆး၊ ႁႂ်ႈပဵၼ်ငိုၼ်းၶဝ်ႈၸႄႈမိူင်းတႆး 5% ၊ လွင်ႈၼႆႉ သၽႃးႁပ်ႉဢဝ်ပဵၼ်ႁူဝ်ၶေႃႈ ဢုပ်ႇဢူဝ်း ပိူဝ်ႈတႃႇ ၶဵၼ်ႇတႅမ်ႈပႃးၼႂ်းမၢႆမီႈ။

ပူၼ်ႉမႃးမိူဝ်ႈဝၼ်းထိ 26/09/12 (မိူဝ်ႈဝႃး)ၼႆႉ မီးၵၢၼ်ပိုတ်ႇၶိုၼ်း ပၢင်ၵုမ်သၽႃးၸႄႈမိူင်း ပွၵ်ႈၵမ်း ထိ 4 တီႈဝဵင်းတူၼ်ႈတီး၊ ၸိုင်ႈတႆးပွတ်းၸၢၼ်း။ ယူႇတီႈၼၢင်းၶမ်းဢေး ၽွင်းတႅၼ်းၵူၼ်းမိူင်း ၼမ်ႉတူႈ (ပႃႇတီႇ သိူဝ်ၽိူၵ်ႇ SNDP) လႆႈတၢင်ႇယွၼ်း လွင်ႈငိုၼ်းၶဝ်ႈလူင်ပွင်ၸိုင်ႈၼေႇပျီႇတေႃႇ တင်းသဵင်ႈ၊ ဢၼ်လႆႈမႃး တီႈၶၢႆၵႅတ်ႉသ်/ၼမ်ႉမၼ်းတေႃႇၶႄႇ ႁႂ်ႈလႆႈၽႄမႅင်ႇ ၸႄႈမိူင်းတႆး၊ ႁႂ်ႈပဵၼ်ငိုၼ်းၶဝ်ႈလူင်ပွင်ၸိုင်ႈမိူင်းတႆး 5% - ၼႆယဝ်ႉ။

ၼၢင်းၶမ်းဢေး ဢိင်ဢၢင်ႈၼႄလွင်ႈတၢင်းဝႃႈ- မိူဝ်ႈႁုပ်ႈယိုတ်းတီႈလိၼ် ပိူဝ်ႈတႃႇဝၢင်းတေႃႈ ၵႅတ်ႉသ်/ၼမ်ႉမၼ်းလတ်း ၽၢၼ်ႇပိုၼ်ႉတီႈ ၼႂ်းၸိုင်ႈတႆးပွတ်းႁွင်ႇၼၼ်ႉ ၵူၼ်းမိူင်းလုသုမ်းတီႈ လိၼ်ႁႆႈ/ သူၼ်/ၼႃးတင်းၼမ် လူၺ်ႈဢမ်ႇလႆႈၵႃႈသၢႆႈ တႅၼ်းတဵမ်ထူၼ်ႈ၊ ၵွပ်ႈထုၵ်ႇၸဝ်ႈၼႃႈတီႈ ၶဝ်ႁၵ်းတွၼ်ၵိၼ်။ ၼွၵ်ႈသေၼၼ်ႉ ဢၼ်သိုၵ်းမၢၼ်ႈၵႂႃႇပေႉၵိၼ်လူလၢႆၵူၼ်း ဝၢၼ်ႈၵေႃႈ မီးတင်း ၼမ်၊ ၵူၼ်းဝၢၼ်ႈၵူၼ်းမိူင်း လႆႈလုသုမ်းလၢႆၾၢႆႇ၊ ၵွပ်ႈၼၼ် ယူႇတီႈလူင်ပွင်ၸိုင်ႈၼေႇပျီႇတေႃႇသေ ႁႂ်ႈလႆႈၽႄမႅင်ႇလူင်ပွင်ၸိုင်ႈမိူင်းတႆး 5% - ၼႆယဝ်ႉ။

လွင်ႈသိုၵ်းမၢၼ်ႈၵႂႃႇပူၼ်ႉပႅၼ်သုၼ်ႇလႆႈၵူၼ်း ၼႂ်းၸႄႈဝဵင်းၼမ်ႉတူႈၼၼ်ႉ ဢမ်ႇတူၵ်းလူင်းမႃး။ လွင်ႈတၢင်ႇ ယွၼ်းငိုၼ်း 5% ၼၼ်ႉၵေႃႈ ဢွၼ်တၢင်းႁူဝ်ပဝ်ႈသၽႃး ၶႂ်ႈတဵၵ်းႁႂ်ႈႁပ်ႉပဵၼ်ၶေႃႈထၢမ် တွပ်ႇၵၼ်ၵူၺ်း။ ၵူၺ်းၵႃႈ ၼၢင်းၶမ်းဢေးဢမ်ႇ ယွမ်းလႃးလႃးလႄႈ ပၢင်ၵုမ်သၽႃးလႆႈတႅပ်းတတ်း ႁပ်ႉပဵၼ်ႁူဝ်ၶေႃႈဢၼ်ၼိုင်ႈ သေ တေဢဝ်ဢုပ်ႇဢူဝ်းၵၼ် ပိူဝ်ႈတႃႇၶဵၼ်ႇ တႅမ်ႈပဵၼ်မႃးမၢႆမီႈ။ လွင်ႈၼႆႉ လႆႈတၢင်ႇလၢတ်ႈမိူဝ်ႈဝႃး၊ တေဢဝ်ဢုပ်ႇၵၼ်မိူဝ်ႈၼႆႉ (27/09/12)- ၼႆယူႇ။

လွင်ႈတၢင်းဢၼ် ၶႂ်ႈႁႂ်ႈပဵၼ်ၵၢၼ်ထၢမ်တွပ်ႇ၊ ဢမ်ႇၶႂ်ႈပၼ်ၸႄႈမိူင်းတႆး 5% ၼၼ်ႉ ၵွပ်ႈဝႃႈၼႂ်းမၢႆမီႈ ဢမ်ႇမီးဝႆႉလွင်ႈတေ ဢဝ်တႃလႆႈငိုၼ်း ဢၼ်လုၵ်ႉတီႈၶၢႆၵႅတ်ႉသ်/ၼမ်ႉမၼ်း ၽႄမႅင်ႇၸႄႈမိူင်း- ၼႆယဝ်ႉ။