ၼႂ်းဝူင်ႈပူၼ်ႉၼႆႉ သိုၵ်းမၢၼ်ႈႁၢင်ႈသိုၵ်းၶိုၼ်ႈလေႃႇတိုၵ်း တပ်ႉပၢင်သဝ်းသိုၵ်းတႆးပွတ်းတူင်ႇလၢဝ်း သွင်ၾၢႆႇ ပဵၼ်ပၢင်တိုၵ်းႁၢဝ်ႈႁႅင်း မီးလွင်ႈလုသုမ်းၼင်ႇၵၼ်။ တပ်ႉပၢင်သဝ်းသိုၵ်းတႆးၼႂ်းပွတ်းၸၢၼ်း/ ပွတ်းဢွၵ်ႇ ၸိူဝ်းၼႆႉၵေႃႈ သိုၵ်းမၢၼ်ႈၶိုၼ်ႈယိုဝ်း။

ပူၼ်ႉမႃးမိူဝ်ႈဝၼ်းထိ 07/09/12 သိုၵ်းမၢၼ်ႈတပ်ႉပိဝ်ႇႁႃၼွင်ဝူဝ်း လုၵ်ႉတၢင်းၼွင်ဝူဝ်း ၶိုၼ်ႈၵႂႃႇယိုဝ်း တပ်ႉပၢင်သဝ်း တပ်ႉသိုၵ်းၸိုင်ႈတႆး RCSS/SSA ပွတ်းတူင်ႇလၢဝ်း (ၸႄႈဝဵင်းမိူင်းၵိုင်)။ သွင်ၾၢႆႇပဵၼ် ပၢင်တိုၵ်းၵၼ်ႁၢဝ်ႈႁႅင်း ႁိုင်မွၵ်ႈပွတ်း ဝၼ်းပၢႆ၊ သိုၵ်းမၢၼ်ႈတၢႆ 10 ပၢႆ၊ ဝၢတ်ႇၸဵပ်းမွၵ်ႈ 30 ။ သိုၵ်းတႆးႁုပ်ႈ ယိုတ်း လႆႈၵွင်ႈၸၢၵ်ႈ 1 လဝ်း၊ မၢၵ်ႇၵွင်ႈၸၢၵ်ႈ 600 ပၢႆ၊ ၵွင်ႈ MA ယၢဝ်း 1 လဝ်း လႄႈၶူဝ်းၶွင်ၶိူင်ႈၸႂ်ႉသိုၵ်း ဢိၵ်ႇမၢၵ်ႇမိုဝ်ႈၸိုၼ်းယၢမ်းထႅင်ႈတင်းၼမ်။ ၾၢႆႇတပ်ႉတႆးၵေႃႈ လႆႈႁူႉ ဝႃႈမီးလွင်ႈလုသုမ်းၽွင်ႈ။ ပၢင်တိုၵ်း ၼႆႉ သိုၵ်းမၢၼ်ႈပဵၼ်ၾၢႆႇႁၢင်ႈသိုၵ်းမႃး ၶိုၼ်ႈလေႃႇယိုဝ်းသိုၵ်းတႆးဢွၼ်တၢင်း- ၼႆယဝ်ႉ။

ၽူႈမီးၸၼ်ႉၼႂ်း RCSS/SSA ၵေႃႉၼိုင်ႈလၢတ်ႈဝႃႈ- မိူဝ်ႈပႆႇၵိုတ်းယိုဝ်းၵၼ်ၼၼ်ႉ ၾၢႆႇတပ်ႉသိုၵ်းတႆးဢမ်ႇ လႆႈႁဵတ်းတပ်ႉ ပၵ်းယူႇပဵၼ်တီႈ၊ ဝၢႆးၵိုတ်းသိုၵ်းၵၼ်မႃး ပိူဝ်ႈတႃႇႁႂ်ႈၵူၼ်းသိုၵ်းမီးတီႈယူႇတီႈသဝ်းၼၼ်ႉ ပိုၼ်ႉတီႈၼႃႈလိၼ်ၵူႈတီႈ ဢၼ် သိုၵ်းတႆးယၢမ်ႈတူင်ႉၼိုင်ယူႇသဝ်းမႃးၸိူဝ်းၼၼ်ႉ သိုၵ်းတႆးၵေႃႈၵႃႈလႆႈ ႁဵတ်းတပ်ႉယူႇ၊ ၵွပ်ႈဝႃႈၵိုတ်းယိုဝ်းယဝ်ႉ ပေႃးဢမ်ႇ ႁဵတ်းတပ်ႉယူႇၵေႃႈဢမ်ႇၸၢင်ႈၵႂႃႇယူႇတီႈလႂ်။ ၵူၺ်းၵႃႈ ပေႃးႁဵတ်းတပ်ႉယူႇ သိုၵ်းမၢၼ်ႈသမ်ႉၸွမ်းမႃးယိုဝ်းႁဝ်းတိၵ်းတိၵ်း၊ ဢၼ်သိုၵ်းမၢၼ်ႈမႃးယိုဝ်းႁဝ်းတိၵ်း တိၵ်းၼႆႉ ၾၢႆႇတပ်ႉမၢၼ်ႈတိုၼ်းတင်ႈၸႂ်ၶႂ်ႈယႃႉလွင်ႈငမ်းယဵၼ်။ ပေႃးထတ်းတူၺ်းၸိုင် တပ်ႉပၢင်သဝ်းၶွင် RCSS/SSA ၵူႈတီႈ ဢၼ်ႁဵတ်းမႂ်ႇဝၢႆးဢဝ်လွင်ႈငမ်းယဵၼ်ၼႆႉ သိုၵ်းမၢၼ်ႈလႅပ်ႈတေၶိုၼ်ႈလေႃႇယိုဝ်းၵူႈ တီႈ- ဝႃႈၼႆ။

ပူၼ်ႉမႃးမိူဝ်ႈဝၼ်းထိ 05/09/12 ယၢမ်းၵၢင်ၼႂ် 06:30 မူင်း သိုၵ်းမၢၼ်ႈၶမယ 360 မိူင်းပဵင်း၊ သၢႆသိုၵ်း 1 ႁႅင်းသိုၵ်း 65 ၵေႃႉ ၸဝ်ႈႁၢၼ်ၸူဝ်းတေႇယဢွၼ်ႁူဝ် ႁၢင်ႈသိုၵ်းၵႂႃႇယိုဝ်းတပ်ႉပၢင်သဝ်းသိုၵ်းတႆး RCSS/SSA ၼႂ်းထိူၼ်ႇပွတ်းမိူင်းပူးလူင် ၸႄႈဝဵင်းမိူင်းပဵင်း ၸိုင်ႈတႆးပွတ်းဢွၵ်ႇ။ သွင်ၾၢႆႇပဵၼ်ပၢင်တိုၵ်း ၵၼ်ႁိုင်မွၵ်ႈ 15 မိၼိတ်ႉ၊ သိုၵ်းမၢၼ်ႈပဵၼ်ၾၢႆႇၶိုၼ်ႈယိုဝ်း တပ်ႉတႆး ဢွၼ်တၢင်းသေၶိုၼ်းထွၼ်ထွႆလူင်း။ လႆႈႁူႉဝႃႈ ၾၢႆႇသိုၵ်းမၢၼ်ႈတၢႆ 2 ၵေႃႉ၊ ဝၢတ်ႇၸဵပ်း 3 ၵေႃႉ။ ထိုင်မႃးဝၼ်းထိ 07/09/12 ၵေႃႈ တီႈမိူင်းပူး လူင်ၼႆႉ သွင်ၾၢႆႇတိုၵ်ႉသိုပ်ႇပဵၼ်ပၢင်တိုၵ်းၵၼ်ယူႇ -ၼႆယဝ်ႉ။

ၼႂ်းဝူင်ႈပူၼ်ႉမႃးၼႆႉၵူၺ်းၼင်ႇၵဝ်ႇ၊ မိူဝ်ႈဝၼ်းထိ 08/09/12 ၵၢင်ၼႂ်ယၢမ်း 10:00 မူင်း သိုၵ်းမၢၼ်ႈဢွၵ်ႇ ငႃးသိုၵ်းၵႂႃႇ ယိုဝ်းသိုၵ်းတႆး RCSS/SSA ၸိူဝ်းတူင်ႉၼိုင်ၵႂႃႇမႃးၼႂ်းထိူၼ်ႇ ပွတ်းဝၢၼ်ႈမႆႉၼိဝ်ႉ ၸႄႈဝဵင်း မွၵ်ႇမႆႇ ၸႄႈတွၼ်ႈလၢင်းၶိူဝ်း။ ၼွၵ်ႈသေၼၼ်ႉ ၼႂ်းၸႄႈဝဵင်းသႅၼ်ဝီ ၸိုင်ႈတႆးပွတ်းႁွင်ႇၵေႃႈ လႆႈငိၼ်း ဝႃႈမီးပၢင်တိုၵ်း ၼင်ႇၵဝ်ႇ၊ ၵူၺ်းၵႃႈ ပႆႇလႆႈႁူႉ ႁူဝ်ယွႆႈလွင်ႈတႅတ်ႈတေႃး။

ၵဵဝ်ႇၵပ်းလွင်ႈပၢင်တိုၵ်းၼႆႉ ၽူႈၶၢၼ်ပၢၵ်ႇ RCSS/SSA ၸဝ်ႈႁၢၼ်လၢဝ်သႅင် လၢတ်ႈဝႃႈ- သိုၵ်းမၢၼ်ႈတေ ဢွၵ်ႇငႃးသိုၵ်း ၶဝ်ႈတူင်ႉၼိုင်ၼႂ်းထိူၼ်ႇၸိူဝ်းၼႆႉ ထုၵ်ႇလီပွင်ႇလၢတ်ႈႁဝ်း၊ ပေႃးဢမ်ႇပွင်ႇလၢတ်ႈ ႁဝ်းပဵၼ်ၵူၼ်း ယိပ်းၵွင်ႈၼင်ႇၵၼ် ဢမ်ႇၸႂ်ႈယိပ်းၶဝ်ႈမုၼ်းၶဝ်ႈပွင်းလႄႈ ပေႃးမႃးၸူးၵေႃႈၵႃႈလႆႈယိုဝ်း။ ၵွပ်ႈၼၼ် ပၢင်တိုၵ်းပွတ်းသႃးတေႃး တူင်ႇလၢဝ်းၵေႃႈလီ၊ ပွတ်းမိူင်းပဵင်းၵေႃႈလီ၊ မိူဝ်ႈလဵဝ်ၼႆႉ ႁဝ်းတူၵ်း လူင်းၵိုတ်းယိုဝ်း ၵၼ်ဝႆႉၵူၺ်း၊ ပေႃးဝႃႈသိုၵ်းမၢၼ်ႈဢမ်ႇႁဵတ်းၸွမ်းၶေႃႈလႆႈၸႂ် တူၵ်းလူင်းသေ ႁၢင်ႈသိုၵ်း မႃးယိုဝ်းႁဝ်းတိၵ်းတိၵ်း ၵေႃႈ တေၸၢင်ႈယိုဝ်းၵၼ်တိၵ်းတိၵ်း၊ ၵွပ်ႈၼၼ် ၵူၼ်းယိပ်းၵွင်ႈတေႃႇ ၵူၼ်းယိပ်း ၵွင်ႈၼင်ႇၵၼ်ၼႆႉ ပေႃးမႃးၸူး ၵေႃႈၵႃႈလႆႈယိုဝ်း- ဝႃႈၼႆ။

ပူၼ်ႉမႃးၽွင်းႁၢင်လိူင်ၵျူႊလၢႆႊ (2012)ၵေႃႈ သိုၵ်းမၢၼ်ႈတင်း သိုၵ်းတႆးပဵၼ်ပၢင်တိုၵ်းၵၼ် ပွတ်းလွႆယေး ၼႂ်းၸႄႈဝဵင်း ၼမ်ႉၸၢင်ႁၢဝ်ႈႁႅင်း ယွၼ်ႉသိုၵ်းမၢၼ်ႈၶိုၼ်ႈလေႃႇတိုၵ်း တပ်ႉပၢင်သဝ်းသိုၵ်းတႆး ဢၼ်ပၵ်း တီႈ လွႆယေးဢွၼ်တၢင်း။ ၽွင်းယၢမ်းလဵဝ်ၵၼ်ၼၼ်ႉ သိုၵ်းမၢၼ်ႈယိုဝ်းပႃးတပ်ႉပၢင်သဝ်းသိုၵ်းတႆးႁိမ်း ၼွင်လိူဝ်ႇ ၸႄႈဝဵင်းမိူင်းပၼ်ႇ။ ပၢင်တိုၵ်းတီႈ လွႆယေးၽွင်းၼၼ်ႉ တီႈဢေႇသုတ်းဢမ်ႇယွမ်း 3 ပၢင်၊ တီႈၼွင်လိူဝ်ႇ 1 ပၢင် (ႁူမ်ႈမွၵ်ႈ 27 ပွၵ်ႈ)။ ၵွပ်ႈၼၼ် ဝၢႆးဢုပ်ႇဢူဝ်း တူၵ်းလူင်းၵိုတ်းယိုဝ်းၵၼ် ဢဝ်လွင်ႈ ငမ်းယဵၼ်ၵၼ်တင်ႈတႄႇ ႁၢင်ပီ 2012 မႃးၼႆႉ ပၢင်တိုၵ်းဝူင်ႈၵၢင် RCSS/SSA လွႆတႆးလႅင်း တင်းသိုၵ်း မၢၼ်ႈ ၵိူတ်ႇၶိုၼ်ႈဢမ်ႇယွမ်း 30 ပွၵ်ႈ။