သိုဝ်ႇထႆး ၽူႈၸတ်းၵၢၼ် (ASTV) ဢိင်ဢၢင်ႈတီႈသိုဝ်ႇၶႄႇ (ၵျူင်းသိၼ်းဝၢင်ႇ) ဢွၵ်ႇၶၢဝ်ႇဝႃႈ - မိူဝ်ႈဝၼ်းထိ 20/09/12 ၸၢႆးၼေႃႇၶမ်း ႁူဝ်ၼႃႈၸုမ်းယိပ်းၵွင်ႈၵၢင်ႇ ၼႂ်းမႄႈၼမ်ႉၶွင် (တူင်ႉၼိုင် ပွတ်းတွၼ်ႈသၢမ်ၸဵင်ႇၶမ်း) ဢၼ်ထုၵ်ႇတၢင်း ၵၢၼ်လၢဝ်း တိၺွပ်းလႆႈ ပူၼ်ႉမႃးမိူဝ်ႈဝၼ်းထိ 25/04/12 ၼႂ်းၸႄႈတွၼ်ႈၿေႃႇၵႅဝ်ႈ မိူင်းလၢဝ်းသေ သိုပ်ႇသူင်ႇမွပ်ႈပၼ် တၢင်းၵၢၼ်ၶႄႇၼၼ်ႉ ၺႃးဢဝ်ၶိုၼ်ႈလုမ်းတြႃးၶႄႇ တီႈဝဵင်းၶုၼ်းမိင် ၸႄႈတွၼ်ႈယုၼ်ၼၼ်၊ ၼႂ်းၶေႃႈႁႃ/တၢင်းၽိတ်း ဝၢင်းၽႅၼ်တင်ႈၸႂ်ၶႃႈႁႅမ်တၢႆၵူၼ်း၊ ၵႃႉယႃႈမဝ်းၵမ်၊ လၵ်ႉပႃးတူဝ် (တိၺွပ်းၵုမ်းတူဝ်ၵူၼ်းသေႁႂ်ႈ ဢဝ်ငိုၼ်းတွင်းထုတ်ႇဢဝ်) လႄႈ ၸူၼ်ႁိူဝ်းၶႄႇ။

ၵၢၼ်ထတ်းသၢင်ဢမု/ၶၻီး တီႈလုမ်းတြႃးၼၼ်ႉ တင်ႈတႄႇယၢမ်း 09:00 မူင်းၵႂႃႇ။ ၸဝ်ႈၼႃႈတီႈ ၾၢႆႇထတ်းသၢင်မီးၾၢႆႇ မၢႆမီႈၶႄႇ 7 ၵေႃႉ၊ မီးတူဝ်တႅၼ်းၼႃႈႁိူၼ်းၵူၼ်းတၢႆၵႂႃႇလႄႈ လုသုမ်းၶူဝ်းၶွင် 10 ပၢႆၶဝ်ႈႁူမ်ႈ၊ ပႃးၸဵမ်ၽူႈတၢင်ၼႃႈ လႄႈလၢမ်ႈ (ၵူၼ်းပိၼ်ႇၽႃသႃ) ၸၢႆးၼေႃႇၶမ်း ၶဝ်ႈႁူမ်ႈ 6 ၵေႃႉ။ ၵူၺ်းၵႃႈ ပေႃးဝႃႈလုမ်းတြႃး/ၾၢႆႇမၢႆမီႈလူဢၢၼ်ႇၼႄၶေႃႈႁႃ/တၢင်းၽိတ်း တင်းမူတ်းယဝ်ႉၵေႃႈ ၸၢႆးၼေႃႇၶမ်းတွပ်ႇထဵင် ၵူႈၶေႃႈၵၢဝ်ႇႁႃ၊ ဝႃႈဢမ်ႇလႆႈၵဵဝ်ႇၶွင်ႈ။

(ၸွမ်းၼင်ႇ “ၶၢဝ်ႇပၢင်လူင်” လႆႈဢွၵ်ႇၵႂႃႇဢွၼ်ၼႃႈၼႆႉ လၢတ်ႈဝႃႈ- ၸုမ်းၼေႃႇၶမ်း ဢၼ်လႆႈၶိုၼ်ႈ လုမ်းတြႃး ပွၵ်ႈၼႆႉ မီးတင်းမူတ်း 6 ၵေႃႉ၊ ၼႂ်းၼႆႉပႃး ၸၢႆးၼေႃႇၶမ်း၊ သၢင်ႇၶမ်း၊ ၸၢႆးဢွင်ႇမျၢတ်ႈ၊ ယီႈလၢႆႈ၊ ၸၢႆးထုၼ်းၵလႃး….. ၸိူဝ်းၼႆႉ။)

ၶေႃႈၵႂၢမ်းဢၼ်ၵၢဝ်ႇႁႃ/ၸိၼႄး သႂ်ႇတၢင်းၽိတ်းလၢတ်ႈဝႃႈ- ပူၼ်ႉမႃးမိူဝ်ႈဝၼ်းထိ 05/10/12 ၸၢႆးၼေႃႇၶမ်း ဝၢင်းၽႅၼ်သေ ၸိသင်ႇႁႂ်ႈၵႅမ်ထိ 1 (သၢင်ႇၶမ်း)၊ ၸၢႆးဢွင်ႇမျၢတ်ႈ (ၶႄႇယႅၵ်ႈဢွၵ်ႇ ထတ်းသၢင်ဢမု) ဢွၼ်ႁူဝ်ၸုမ်းၸိူဝ်းၶီႇႁိူဝ်းဝႆးလႄႈ ဝုၵ်းၶိုၼ်ႈၸူၼ်ႁိူဝ်း “ယူႉသိင်း” လႄႈ “ဝႃၽိင်” ၊ တိၺွပ်းၵူၼ်းၸွမ်းႁိူဝ်းဝႆႉယဝ်ႉ ဢဝ်ယႃႈမဝ်းၵမ်ဢၼ်ႁၢင်ႈႁႅၼ်းဝႆႉၵႂႃႇဝၢင်း သႂ်ႇၼိူဝ်ႁိူဝ်း၊ ဝၢႆးၼၼ်ႉ ၸၢႆးဢွင်ႇမျၢတ်ႈလႄႈတၢင်ႇၵေႃႉ ၸူၼ်ႁိမ်ဢဝ်ၶူဝ်းၶွင်ငိုၼ်းတွင်း ၼႂ်းႁိူဝ်း။ မိူဝ်ႈႁိူဝ်းတင်း 2 လမ်း လႅၼ်ႈၶဝ်ႈထိုင်ၼႃႈၼမ်ႉထႆးၼၼ်ႉ ၸၢႆးဢွင်ႇမျၢတ်ႈလႄႈၵူၼ်းပႃႈတႂ်ႈ (ၽူႈၺႃးတိၺွပ်း)ထႅင်ႈ 2 ၵေႃႉ ၵေႃႈဢဝ်ၵွင်ႈယိုဝ်း ပႅတ်ႈၵူၼ်းၸွမ်းႁိူဝ်း 13 ၵေႃႉ။ ဝၢႆးၼၼ်ႉ ၸွမ်းၼင်ႇလႆႈၼတ်ႉ/ၶိၼ်း ၵၼ်ဝႆႉ ၵႅမ်ၵေႃႉထိ 2 (ယီႈလၢႆႈ) ၵေႃႉဢၼ်တိုၵ်ႉ ပႂ်ႉယူႇတီႈ ၾင်ႇၼမ်ႉၶွင် ၸွမ်းၵၼ်တင်းသိုၵ်းထႆး လႆႈယိုဝ်းၵွင်ႈသႂ်ႇလမ်းႁိူဝ်း၊ သိုပ်ႇၼၼ်ႉဝုၵ်းၶိုၼ်ႈၼိူဝ်ႁိူဝ်းသေ ဢဝ်တူဝ် တၢႆၵူၼ်းၸွမ်းႁိူဝ်းၶႄႇ ထိုမ်ႈလူင်းၼႂ်းမႄႈၼမ်ႉၶွင်- ၼႆယဝ်ႉ။

ၼွၵ်ႈသေၼၼ်ႉ ၾၢႆႇမၢႆမီႈၶႄႇယင်းၸိၸမ်ႈပႃးဝႃႈ- ၼႂ်းလိူၼ်ဢေႊၿရိူဝ်ႊလ် ပီ 2011 ၸုမ်းယိပ်းၵွင်ႈ ဢၼ်ၸၢႆးၼေႃႇၶမ်း ဢွၼ်ႁူဝ် ယင်းလႆႈဝုၵ်း ၸူၼ်ႁိူဝ်း “ၵျိူင်ႉသိၼ်း1” လႄႈႁိူဝ်းၶႄႇတၢင်ႇလမ်း ထႅင်ႈႁူမ်ႈ 3 လမ်း၊ ႁူမ်ႈတင်းတိၺွပ်းၵုမ်းတူဝ် ၵူၼ်းၸွမ်းႁိူဝ်းဝႆႉသေ တဵၵ်းၸႂ်ႉႁႂ်ႈဢဝ်ငိုၼ်းထုတ်ႇ ဢဝ် 25 လၢၼ်ႉဝၢတ်ႇ (ငိုၼ်းထႆး)၊ ဝၢႆးမႃးႁိူဝ်း 3 လမ်းလႄႈၵူၼ်းၸွမ်း ႁိူဝ်းလႆႈႁပ်ႉတၢင်းၸွႆႈလိူဝ် တီႈတၢင်းၵၢၼ်မၢၼ်ႈ။ ၸိူဝ်းၶဝ်ယိုၼ်ယၼ်ဝႃႈ ၸၢႆးၼေႃႇၶမ်းတင်းၸုမ်းၸိူဝ်း 5 ၵေႃႉ မီးတၢင်း ၽိတ်းလွင်ႈတင်ႈၸႂ်ၶႃႈႁႅမ်ၵူၼ်း၊ ၵႃႉယႃႈမဝ်းၵမ်၊ လၵ်ႉပႃးတူဝ် လႄႈၸူၼ်ႁိူဝ်း၊ ၵိုင်ႇလီၺႃးတူတ်ႈ တၢမ်ႇ- ဝႃႈၼႆ။

ၼႂ်းလုမ်းတြႃးၶႄႇၼၼ်ႉ ၸၢႆးၼေႃႇၶမ်းယွမ်းႁပ်ႉဝႃႈ တူဝ်ၵဝ်ႇပဵၼ်ႁူဝ်ၼႃႈၸုမ်းယိပ်းၵွင်ႈၵၢင်ႇၼႂ်း မႄႈၼမ်ႉၶွင်တႄႉ၊ ၵူၺ်းၵႃႈ မၼ်းၸၢႆးတွပ်ႇထဵင်ၵူႈၶေႃႈၵၢဝ်ႇႁႃဝႃႈ- ဢမ်ႇမီးသူၼ်ႇၵဵဝ်ႇၶွင်ႈၸွမ်း လွင်ႈၶႃႈႁႅမ်ၵူၼ်းၸွမ်းႁိူဝ်းၶႄႇ 13 ၵေႃႉ ၼိူဝ်ႁိူဝ်း 2 လမ်း မိူဝ်ႈဝၼ်းထိ 05/10/11 ။ မၼ်းၸၢႆး လၢတ်ႈဝႃႈ- “ဢွင်ႇမျၢတ်ႈလႄႈတၢင်ႇၵေႃႉ ပဵၼ်ၵူၼ်းၶႃႈႁႅမ်ၵူၼ်းၸွမ်းႁိူဝ်းၶႄႇ၊ ပိူင်ပဵၼ်ၵူႈၸိူဝ်ႉၵူႈ လွင်ႈၼၼ်ႉ ၵဝ်ၶႃႈလႆႈႁူႉတၢင်းၾူၼ်ႊ/ထူဝ်းရသပ်း ဝၢႆးၼၼ်ႉမိူဝ်ႈဝၼ်းထိ 7-8/10/11”- ဝႃႈၼႆ။

ၸိူင်ႉႁိုဝ်ၵေႃႈယဝ်ႉ ဝၢႆးၼၼ်ႉၵႅမ်ၵေႃႉထိ 1 (သၢင်ႇၶမ်း) ယိုၼ်ယၼ်လၢတ်ႈၼႂ်းလုမ်းတြႃးဝႃႈ- ၸၢႆးၼေႃႇၶမ်း ပဵၼ်ၵေႃႉဝၢင်း ၽႅၼ်လွင်ႈၶႃႈႁႅမ်ၵူၼ်းၸွမ်းႁိူဝ်းၶႄႇ 13 ၵေႃႉ။ လၢတ်ႈဝႃႈ- “ႁိူဝ်းၶႄႇ ဢမ်ႇယွမ်းၸၢႆႇၵႃႈ ဢဝ်ႁူမ်ႇလူမ်ႈ၊ ၼွၵ်ႈသေၼၼ်ႉ ယင်းဢွၼ်သိုၵ်းမၢၼ်ႈမႃးဝႅတ်ႉလွမ်ႉၽဵဝ်ႈမူၺ်ႉ ၸုမ်းႁဝ်း၊ ႁဵတ်းႁႂ်ႈၸုမ်းၸိူဝ်း ႁဝ်းလႆႈလုသုမ်းတင်းၼမ်၊ ၼေႃႇၶမ်းၸင်ႇ ဢမ်ႇႁၢၼ်ႉၸႂ်သေ ၶႂ်ႈၶိုၼ်းတွပ်ႇတႅၼ်းၵူၼ်းၸွမ်းႁိူဝ်းၶႄႇ။ မိူဝ်ႈၼႃႈတေလူင်းမိုဝ်းႁဵတ်းၼၼ်ႉ ၼေႃႇၶမ်းသင်ႇႁႂ်ႈၸုမ်း ၸိူဝ်းႁဝ်းတိၺွပ်းလႄႈၶႃႈတၢႆၵူၼ်းၸွမ်း ႁိူဝ်းၶႄႇ။ ၵူၼ်းၸိူဝ်းႁဵတ်းပွၵ်ႈၼႆႉ ၸၢႆးဢွင်ႇမျၢတ်ႈႁပ်ႉ ၼႃႈတီႈပုၼ်ႈၽွၼ်းၸူၼ် ႁိူဝ်း၊ ၵႅမ်မၢႆ 2 ယီႈလၢႆႈ ႁပ်ႉပုၼ်ႈၽွၼ်း ၾၢႆႇၶၢဝ်ႇငၢဝ်းလႄႈ တိတ်းတေႃႇ သိုၵ်းထႆး- ဝႃႈၼႆ။

ဝၢႆးဝၼ်း ယီႈလၢႆႈ လၢတ်ႈၼႂ်းလုမ်းတြႃး ပဵၼ်ၵေႃႉလိုၼ်းသုတ်း။  ယွမ်းႁပ်ႉဝႃႈ ၸၢႆးၼေႃႇၶမ်း ပဵၼ်ၵေႃႉသင်ႇႁႂ်ႈတူဝ်ၵဝ်ႇလႄႈ ၸုမ်းၸိူဝ်းလုၵ်ႈၼွင်ႉ ၶႃႈႁႅမ်တၢႆ လုၵ်ႈႁိူဝ်းၶႄႇ။ “ၵူႈၸိူဝ်ႉၵူႈလွင်ႈ ၼႂ်းၸုမ်းႁဝ်းၼႆႉ တေႁဵတ်းသင်ၵေႃႈႁႂ်ႈၼေႃႇၶမ်းႁၼ်လီ ၵွၼ်ႇ ၸင်ႇလူင်းမိုဝ်းႁဵတ်းလႆႈ”။ မၼ်းၸၢႆးလၢတ်ႈၼႄပႃးဝႃႈ- မိူဝ်ႈဝၼ်းထိ 27/09/11 ၸၢႆးၼေႃႇၶမ်း သင်ႇႁႂ်ႈတူဝ်ၵဝ်ႇပႂ်ႉ ပၵ်းတႃ တူၺ်းႁိူဝ်းၶႄႇ၊ တူဝ်ၵဝ်ႇလႄႈၸုမ်းၸိူဝ်း ပဵၼ်ၵူၼ်းတတ်းမၵ်းဢွင်ႈတီႈၼႂ်းၵၢၼ်လူင်းမိုဝ်း၊ ထိုင်မႃးဝၼ်းထိ 03/10/11 ၸုမ်းၼေႃႇၶမ်းလႆႈတိတ်းတေႃႇ သိုၵ်းထႆး၊ သိုၵ်းထႆးၵေႃႈ တူၵ်းလူင်းႁူမ်ႈ မိုဝ်းၸွမ်း- ဝႃႈၼႆ။

ၵဵဝ်ႇၵပ်းလွင်ႈဢမု/ၶၻီးၼႆႉ တေမီးၵၢၼ်ထတ်းသၢင်ၶၢဝ်းတၢင်း 3 ဝၼ်း၊ မိူဝ်ႈဢွၼ်တၢင်းၼႆႉ ၸၢႆးၼေႃႇၶမ်း လၢတ်ႈယွမ်း ႁပ်ႉတီႈၸဝ်ႈၼႃႈတီႈပလိၵ်ႈၶႄႇလႄႈ သိုဝ်ႇၶႄႇဝႃႈ- ပဵၼ်ၵူၼ်းၸိသင်ႇ ၸူၼ်ႁိူဝ်းလႄႈၶႃႈႁႅမ်ၵူၼ်း၊ ၵူၺ်းၵႃႈ ၽိူဝ်ႇထိုင်မႃး ၼႂ်းလုမ်းတြႃး(မိူဝ်ႈၼႆႉ 20/09/12) သမ်ႉပိၼ်ႈ ၵႂၢမ်းပႅတ်ႈ (လၢတ်ႈၵႂၢမ်းၼႃႈမိုဝ်း ပဵၼ်လင်မိုဝ်း)- ၼႆယဝ်ႉ။