သိုၵ်းဝႃႉၼႄးဝႃႈသိုၵ်းတႆးတိုဝ်တၼ်ပူၼ်ႉပႅၼ်ၼႃႈလိၼ်၊ ၾၢင်ႉဢမ်ႇထွမ်ႇ ၸင်ႇတိၺွပ်းသိုၵ်းတႆး 19 ၵေႃႉ။ ၸဝ်ႈယွတ်ႈသိုၵ်းတုမ်ႉတွပ်ႇဝႃႈ ဢမ်ႇၸႂ်ႈၼႃႈလိၼ်ၽႂ်လႄႈ ဢမ်ႇဝူၼ်ႉဝႃႈ သိုၵ်းဝႃႉတေႁဵတ်းလႆႈ ၼိူဝ်ၵၼ်။ ၽူႈထတ်း သၢင်ဝႃႈပၼ်ႁႃဝႃႉ-တႆးၶဵင်ႈၵၼ်ပဵၼ်ယွၼ်ႉဝိူၺ်ႉသႅဝ်ႇၵင်း။

မိူဝ်ႈဝၼ်းထိ 16/08/12 ပူၼ်ႉမႃး၊ ဝႅပ်ႉသၢႆႉၶၢဝ်ႇၶႄႇ (http://blog.sina.com.cn/burma) ဢွၵ်ႇၶၢဝ်ႇ ၵဵဝ်ႇလူၺ်ႈ လွင်ႈသိုၵ်း ဝႃႉ (တပ်ႉသိုၵ်းမိူင်းဝႃႉၽွမ်ႉႁူမ်ႈ UWSA) ၼႃႈလိၼ်သိုၵ်း 171 တိၺွပ်းၵုမ်းတူဝ် သိုၵ်းတႆး (တပ်ႉသိုၵ်း ၸိုင်ႈတႆး RCSS/SSA) သေဢွၵ်ႇပႃး ႁၢင်ႈထၢႆႇ။ မီးၶေႃႈၵႂၢမ်းၸိၼႄးဝႃႈ - မိူဝ်ႈဝၼ်းထိ 24/07/12 တပ်ႉသိုၵ်းၸိုင်ႈတႆး RCSS/SSA ပွတ်းၸၢၼ်း ဢၼ်ၸဝ်ႈယွတ်ႈသိုၵ်းဢွၼ်ႁူဝ် တင်ႈၸႂ်လူမ်လၢမ်ပူၼ်ႉပႅၼ်ၶဝ်ႈၵႂႃႇၼႂ်းၼႃႈလိၼ်ၶွင် တပ်ႉသိုၵ်းဝႃႉ 171 ႁိမ်းလႅၼ်လိၼ် ထႆး ၼႂ်းၸႄႈဝဵင်းမိူင်းတူၼ်၊ ၵႂႃႇပၵ်းတပ်ႉပၵ်းႁႅင်းသိုၵ်းဝႆႉ၊ ၾၢင်ႁၢင်ႈဢၼ်သိုၵ်းတႆးတူင်ႉၼိုင်ၼၼ်ႉ မိူၼ်တေႁၢင်ႈႁႅၼ်း လေႃႇတိုၵ်းသိုၵ်းဝႃႉ၊ ဢၢၼ်းၶႂ်ႈတိုၵ်းႁုပ်ႈယိုတ်းဢဝ်ၼႃႈလိၼ်ၸိူဝ်းၼႆႉ။

ယွၼ်ႉၼႆလႄႈ၊ ၾၢႆႇတပ်ႉသိုၵ်းဝႃႉၸင်ႇပွႆႇၵူၼ်းၵႂႃႇဢုပ်ႇဢူဝ်း ၵူၼ်းသိုၵ်းတႆးလၢႆပွၵ်ႈ၊ တုၵ်းယွၼ်းပိူဝ်ႈတႃႇ ထွၼ်ပၼ်၊ ၵူၺ်းၵႃႈ ၾၢႆႇသိုၵ်းတႆးသမ်ႉတိုဝ်တၼ်သေသိုပ်ႇပၵ်းတပ်ႉလႄႈတူင်ႉၼိုင်ၵႂႃႇမႃးယူႇၼႂ်းပိုၼ်ႉ တီႈၼၼ်ႉ။ ဢၼ်ၾၢႆႇသိုၵ်းဝႃႉလၢတ်ႈၵႂႃႇၵေႃႈ မိူၼ်သိုၵ်းတႆးဢမ်ႇထွမ်ႇဢမ်ႇငိၼ်း၊ ႁဵတ်းၼၼ်သေ ဝၼ်းထိ 30/07/12 ၸုမ်းသိုၵ်းဝႃႉၸင်ႇၸတ်းႁႅင်းသိုၵ်း ဢၼ်ၼမ်လိူဝ်သိုၵ်းတႆးလၢႆပုၼ်ႈၵႂႃႇဝႅတ်ႉလွမ်ႉ တဵၵ်းႁႂ်ႈသိုၵ်းတႆးထွၼ်ဢွၵ်ႇၼွၵ်ႈပိုၼ်ႉ တီႈ။ ၾၢႆႇၽူႈၵွၼ်းသိုၵ်းတႆး လႆႈႁူႉသေၸင်ႇၽွမ်ႉတေယွမ်းထွႆ ထွၼ်ပၼ်၊ ၵူၺ်းၵႃႈ သမ်ႉဢမ်ႇယွမ်းထွႆထွၼ်ပၼ်တႄႉ၊ ၸႅၵ်ႇပဵၼ်လၢႆၸုမ်းသေ မူၵ်းသိူင်ႇတူဝ်ယူႇဝႆႉ ၸွမ်းထိူၼ်ႇၸွမ်းပႃႇ၊ ၾၢႆႇသိုၵ်းဝႃႉၸင်ႇၸတ်းသိုၵ်းဢွၵ်ႇလိုပ်ႈလမ်းၵႅတ်ႇႁႄႉသေ တိၺွပ်းလႆႈသိုၵ်းတႆး
တီႈၼိုင်ႈ 6 ၵေႃႉ၊ တီႈၼိုင်ႈ 9 ၵေႃႉ၊ ထႅင်ႈတီႈၼိုင်ႈ 4 ၵေႃႉ၊ ႁူမ်ႈတင်းမူတ်း 19 ၵေႃႉ ၵွင်ႈ 18 လဝ်း-ဝႃႈၼႆ။

သိုဝ်ႇၶၢဝ်ႇၶႄႇလၢတ်ႈထႅင်ႈဝႃႈ- ၾၢႆႇတပ်ႉသိုၵ်းၸိုင်ႈတႆးၶဝ်ၼႆႉ ၶႂ်ႈပူၼ်ႉပႅၼ်ႁိမ်ပိုၼ်ႉတီႈၼႃႈလိၼ်သိုၵ်း ၸၢဝ်းၶိူဝ်းတၢင်ႇမူႇ တၢင်ႇၸုမ်း၊ ၸတ်းႁႅင်းသိုၵ်းၶဝ်ႈမိူင်းတႆးၸွမ်းဝၢၼ်ႈၼွၵ်ႈၼႃးပၢင်ႇ၊ ၼႄၾၢင်ႁၢင်ႈၶႂ်ႈ သုၵ်ႉယုင်ႈဢူၼ်ၵဝ်း၊ တင်ႈၸႂ် ၶႂ်ႈၶႂၢၵ်ႈ ၼႃႈလိၼ်လူးၵွၼ်ႇ။ ၾၢႆႇၼိုင်ႈ မိူဝ်ႈၸဝ်ႈယွတ်ႈသိုၵ်းၵႂႃႇဢုပ်ႇ မၢၼ်ႈတူၵ်းလူင်းၵိုတ်းသိုၵ်းသေ တုၵ်းယွၼ်းႁူမ်ႈမိုဝ်းၵၼ် ၽဵဝ်ႈမူၺ်ႉယႃႈမဝ်းၵမ်ၼၼ်ႉ ဢမ်ႇမီးၼမ်ႉၸႂ် ပိူဝ်ႈတႃႇဢုပ်ႇဢူဝ်းပၼ်ႁႃ ၵၢၼ်မိူင်း၊ တီႈတႄႉမၼ်း ယွတ်ႈသိုၵ်းၵေႃႈၵဵဝ်ႇၶွင်ႈ ၸွမ်းယႃႈမဝ်းၵမ်ယူႇ၊ မီးလွင်ႈၵႃႉၶၢႆတေႃႉသူင်ႇဢဝ် ႁူမ်ႇလူမ်ႈယႃႈမဝ်းၵမ် ၸိူဝ်းၼႆႉ၊ ၵူၺ်းၵႃႈ ဢမ်ႇႁူႉႁဵတ်းႁိုဝ်ယွတ်ႈသိုၵ်း ယင်းလႆႈသူး/ရၢင်းဝလ်းၽဵဝ်ႈယႃႈ မဝ်းၵမ် ဢၼ်မၢင်ၸိုင်ႈမိူင်း မွပ်ႈပၼ်ယူႇ၊ လွင်ႈၼႆႉ ႁဵတ်းႁႂ်ႈလၢႆၾၢႆႇ မီးလွင်ႈထၢင်ႇထိူမ်ၼိူဝ် ၸုမ်းၽဵဝ်ႈ မူၺ်ႉယႃႈမဝ်းၵမ်ၸိုင်ႈမိူင်းဢၼ်ပၼ်သူး ၼၼ်ႉယူႇ။

လိူဝ်သေၼၼ်ႉ ၶၢဝ်ႇၶႄႇယင်းလၢတ်ႈထႅင်ႈဝႃႈ- ၼႂ်းၼႃႈလိၼ်ၵုမ်းၵမ်ၶွင်ဝႃႉ 171 ၼႆႉ တႄႇတႃႈၶီႈလဵၵ်း၊ မိူင်းၵၢၼ်း၊ ဝၢၼ်ႈႁုင်ႈ၊ မိူင်းသၢတ်ႇ၊ ႁူဝ်ပၢင်ႇ-ႁူဝ်ယွတ်ႈ၊ ႁူၺ်ႈဢေႃႈ၊ မိူင်းၵျွတ်ႈ၊ ၶၢင်ႉပႃၸိူဝ်းၼႆႉ။ မီးလွင်ႈပူၵ်းပွင်ပၼ်ၽဝၵူၼ်းမိူင်း၊ ၸွမ်းႁူၺ်ႈၸွမ်းလွႆၵေႃႈမီးသူၼ်ယၢင်တင်၊ သူၼ်ၼဵင်ႈ၊ သူၼ်မၢၵ်ႇမႆႉ၊ သူၼ်မႆႉသၵ်းပေႃးသုတ်းသၢႆႁူသၢႆတႃ။ ၵူၺ်းၵႃႈ ပေႃးတူၺ်းၼႂ်းပိုၼ်ႉတီႈတွၼ်ႈလိၼ်သိုၵ်းတႆးတူင်ႉ ၼိုင်တႄႉ မီးသိုၵ်းဢိတ်းဢွတ်းလႄႈမီးလွင်ႈၽုၵ်ႇသွမ်ႈႁၢင်ႇႁီႈႁၢင်ႇ ႁၢႆးၵူၺ်း၊ ၵွပ်ႈၼၼ် ၵူၼ်းမိူင်းၶဝ် သမ်ႉတေယူႇၵိၼ် ၸိူင်ႉႁိုဝ်။ ၶူင်းၵၢၼ်ၽုၵ်ႇသွမ်ႈပၼ်ၵူၼ်းမိူင်းၵေႃႈဢမ်ႇမီးသင်-ဝႃႈၼႆ။

ၵဵဝ်ႇၵပ်းလွင်ႈၶႄႇဢွၵ်ႇၶၢဝ်ႇၼႆႉ မိူဝ်ႈဝႃးဝၼ်းထိ 22/08/12 ၸဝ်ႈယွတ်ႈသိုၵ်း ႁူဝ်ပဝ်ႈ RCSS/SSA လႆႈလၢတ်ႈတွပ်ႇၼႂ်း ၶၢဝ်ႇတႆးလွတ်ႈလႅဝ်းဝႃႈ- ပိူင်ပဵၼ်ဢၼ်တႄႉမၼ်း ဢမ်ႇၸႂ်ႈမိူၼ်ၼင်ႇၶၢဝ်ႇၶႄႇဝႃႈ။ တီႈတႄႉမၼ်း မိူဝ်ႈဢွၼ်တၢင်း တပ်ႉသိုၵ်းဝႃႉ UWSA လႄႈတပ်ႉသိုၵ်းတႆး SSA တပ်ႉၸုမ်း 727 ၵႆႉၶဝ်ႈ ဢွၵ်ႇႁႃၵၼ်တႃႇသေႇ။ ၾၢႆႇသိုၵ်းတႆးၵေႃႈဢမ်ႇဝႆႉ ၸုမ်းသိုၵ်းဝႃႉပဵၼ်ၽူႈၶဵၼ်၊ မီးသင်ၵေႃႈယုမ်ႇယမ်ၵၼ် ဢုပ်ႇၵၼ်လႆႈ၊ ဢမ်ႇထၢင်ႇဝႃႈၶဝ်တေႁဵတ်းလႆႈၸိူင်ႉၼႆ။ ဢၼ်ဝႃႈ သိုၵ်းတႆးၶႂၢၵ်ႈၼႃႈလိၼ်ၶဝ်ၼၼ်ႉၵေႃႈ တီႈတႄႉမၼ်း ဢမ်ႇၸႂ်ႈၼႃႈလိၼ်ၽႂ်၊ ပဵၼ်ၼႃႈလိၼ်တူင်ႉၼိုင်ၵႂႃႇမႃးလႆႈၼင်ႇ ၵၼ်။

ၵဵဝ်ႇလူၺ်ႈလွင်ႈ ဢၼ်ဝႃႈသိုၵ်းတႆးဢမ်ႇမီးၶူင်းၵၢၼ်ပူၵ်းပွင်ပၼ်ၵူၼ်းမိူင်းသင်ၼၼ်ႉၵေႃႈ ၵွပ်ႈၵႃႈပူၼ်ႉ မႃးႁဝ်း ဢမ်ႇၸႂ်ႈ ၸုမ်းၵိုတ်းသိုၵ်း၊ တိုၵ်ႉၵိုတ်းယိုဝ်းၵၼ်တင်းလူင်ပွင်ၸိုင်ႈမႃးယင်းပႆႇတဵမ်ၼိုင်ႈပီ၊ ဢၼ်ႁဝ်းတိုၵ်းတေႃး တေႃႇသူႈမႃးၼႆႉ ယိူင်းဢၢၼ်းပိူဝ်ႈတႃႇၵူၼ်းမိူင်း၊ ပေႃးၵူၼ်းမိူင်းဢမ်ႇၵမ်ႉထႅမ် ဢမ်ႇၸွႆႈလိူဝ်ၵေႃႈဢမ်ႇတင်ႈတူဝ် ၸုၵ်းမၼ်ႈမႃးလႆႈ၊ ၵၢၼ်ပူၵ်းပွင်ပၼ်ၵူၼ်းမိူင်းဢၼ်ဝႃႈၼၼ်ႉ ၵူၼ်းမိူင်းမုင်ႈမွင်းပိူဝ်ႈတႃႇလႆႈ သုၼ်ႇလႆႈၽဵင်ႇပဵင်း လႄႈလွင်ႈထၢင်ႇႁၢင်ႈလွတ်ႈလႅဝ်း၊ ဢမ်ႇၸႂ်ႈယိူင်း ဢၢၼ်းတႃႇၽုၵ်ႇယၢင်တင် ႁဵတ်းႁႆႈႁဵတ်းသူၼ် ပဵၼ်လုၵ်ႈၸၢင်ႈၵိၼ်ၵႂႃႇဝၼ်းဝၼ်းၵူၺ်း။

“ၵဵဝ်ႇလူၺ်ႈဢၼ်ဝႃႈၸုမ်းတၢင်း SSA ၵဵဝ်ႇၶွင်ႈယႃႈမဝ်းၵမ်ၼၼ်ႉ ပေႃးတေလၢတ်ႈဢဝ်တႅမ်ႈဢဝ်တႄႉ ၽႂ်ၵေႃႈ ႁဵတ်းလႆႈ၊ ၵူၺ်းၵႃႈဢၼ်ပဵၼ်တႄႉမၼ်း ၽႂ်ၵဵဝ်ႇၶွင်ႈဢမ်ႇၵဵဝ်ႇၶွင်ႈပိူၼ်ႈႁူႉလီယူႇ၊ မိူင်းထႆးၵႆႉတိ လႆႈယႃႈယူႇ ၶိူဝ်းယႂ်းၼၼ်ႉ ပဵၼ်ၶွင်ၽႂ်၊ လုၵ်ႉတီႈလႂ်မႃးၽႂ်ၽႂ်ၵေႃႈႁူႉၵၼ်ယူႇ- ၸဝ်ႈယွတ်ႈသိုၵ်းလၢတ်ႈ ၼင်ႇၼႆ။

ၵဵဝ်ႇၵပ်းလွင်ႈသိုၵ်းဝႃႉလႄႈသိုၵ်းတႆး မီးလွင်ႈၶဵင်ႈၶတ်းၵၼ်ၼႆႉ ၵူၼ်းတူင်ႇဝူင်းၵႂၢင်ႈၼႂ်းၸႄႈဝဵင်းမိူင်း တူၼ်ၵေႃႉၼိုင်ႈၵေႃႈ လၢတ်ႈဝႃႈ- လႆႈဢၢၼ်ႇၶၢဝ်ႇႁၼ်ႁၢင်ႈထၢႆႇပိူင်ပဵၼ်လွင်ႈၼႆႉ ႁဵတ်းႁႂ်ႈၸႂ်ဢမ်ႇလီ၊ ၸၢဝ်းၶိူဝ်းႁဝ်း ယူႇၼႂ်းၸိုင်ႈမိူင်းလဵဝ်ၵၼ် ဢမ်ႇထုၵ်ႇလီမီးပၼ်ႁႃၵၼ်ၸိူင်ႉၼႆ၊ ဢၼ်ဝႃႈၼႃႈလိၼ်ၵဝ် ၼႃႈလိၼ်မႂ်းၼၼ်ႉၵေႃႈ ဢမ်ႇလီဝႃႈ၊ ၼႂ်းမိူင်းၸိုင်ႈတႆးၼႆႉ ၵူႈၸၢဝ်းၶိူဝ်းဢမ်ႇဝႃႈၸၢဝ်းၶိူဝ်းဝႃႉ၊ တႆး၊ ပဢူဝ်း၊ ပလွင်ႈ ၵူႈၸၢဝ်းၶိူဝ်းမီးသုၼ်ႇလႆႈၵႂႃႇမႃးယူႇသဝ်းလႆႈၵူႈတီႈ၊ ဢမ်ႇၸႂ်ႈဝႃႈမီးၼႃႈ လိၼ်ၵဝ်ၼႃႈလိၼ်မႂ်း - ဝႃႈၼႆ။

ၾၢႆႇၼိုင်ႈ လူႈလဵပ်ႈႁဵၼ်းၵေႃႉမိုတ်ႈၵိုဝ်းၼႂ်းၵႄႈၵၢင်တႆး-ဝႃႉၸဝ်ႈၼိုင်ႈၵေႃႈလၢတ်ႈဝႃႈ- လွင်ႈဢၼ် ပဵၼ်မႃးပၼ်ႁႃ ဝႃႉ-တႆးၼႆႉ ထၢင်ႇတေဢမ်ႇၸႂ်ႈသိုၵ်းဝႃႉၸၼ်ႉပႃႈတႂ်ႈၶဝ်ႁဵတ်းပဵၼ်၊ ၶဝ်ၸၢင်ႈလႆႈႁပ်ႉ ၵႂၢမ်းသင်ႇၽူႈၼမ်းပႃႈၼိူဝ် မၢင်ၵေႃႉ၊ လွင်ႈၼႆႉ ၽူႈယႂ်ႇၵူၼ်းလူင်ၼႂ်းဝႃႉငဝ်ႈငုၼ်းပၢင်သၢင်းလၢႆၵေႃႉၵေႃႈ ဢမ်ႇႁၼ်လီၸွမ်း။ ထႅင်ႈၾၢႆႇၼိုင်ႈ ငိၼ်းဝႃႈဢၼ်ပဵၼ်ပၼ်ႁႃ မႃးၼႆႉ ယူႇတီႈဝိူၺ်ႉသႅဝ်ႇၵင်းႁဵတ်းပဵၼ် ၵူၺ်း။ ၼွၵ်ႈသေၼၼ်ႉ ငိၼ်းဝႃႈမိူဝ်ႈလဵဝ် ဝိူၺ်ႉသႅဝ်ႇၵင်းၶိုၼ်ႈမႃးမီးဢႃႇၼႃႇၼမ် ၼႂ်းတပ်ႉသိုၵ်းဝႃႉ၊ တိုတ်ႉတၢႆးဢဝ်ၵူၼ်းၸမ်ၸႂ်မၼ်းၶိုၼ်ႈပဵၼ်ယႂ်ႇ တိၵ်းတိၵ်း၊ လွင်ႈၼႆႉၵေႃႈ ႁဵတ်းႁႂ်ႈၵူၼ်းၼႂ်းတပ်ႉသိုၵ်း ဝႃႉၸိူဝ်းၵဝ်ႇၵႄႇ ၵူၼ်းၸႃႇတိတႄႉတႄႉဢမ်ႇပေႃးၶႂ်ႈ ႁၢၼ်ႉၸႂ်ၼင်ႇၵဝ်ႇ- ဝႃႈၼႆ။

ပူၼ်ႉမႃးမိူဝ်ႈဝၼ်းထိ 30/07/12 သိုၵ်းဝႃႉၵႂႃႇတိၺွပ်းသိုၵ်းတႆး တီႈလွႆပုင်ႇၽႃပုင်ႇတွင်း ၽွင်းတိုၵ်ႉ ႁဵတ်းတပ်ႉမႂ်ႇ ၼႂ်းၸႄႈ ဝဵင်းမိူင်းတူၼ်၊ ဢၼ်တေႃႇၼႃႈၵၼ်တင်းလွႆသၼ်ၸု ငဝ်ႈငုၼ်းတပ်ႉၸုမ်း 727 ႁိမ်းလႅၼ်လိၼ်ထႆး၊ တေႃႇၼႃႈၸႄႈဝဵင်း မိူင်းၾၢင်။ ၵဵဝ်ႇလူၺ်ႈလွင်ႈၼႆႉ သိုၵ်းဝႃႉၸိၼႄးဝႃႈ သိုၵ်းတႆး ပူၼ်ႉပႅၼ်ၶႂၢၵ်ႈၼႃႈလိၼ်ၶွင်ဝႃႉ။ ၵူၺ်းၵႃႈၾၢႆႇသိုၵ်းတႆး တွပ်ႇလၢတ်ႈၼႄလွင်ႈတၢင်းဝႃႈ ပိူဝ်ႈတႃႇဢဝ် ႁူမ်ႇလူမ်ႈၵူၼ်းပၢႆႈၽေးၵႂႃႇႁဵတ်းၵၢၼ် ၽုၵ်ႇသွမ်ႈ၊ ၵွပ်ႈဝႃႈဝၢႆး RCSS/SSA ၵိုတ်းယိုဝ်းၵၼ်တင်းလူင်ပွင် ၸိုင်ႈမၢၼ်ႈမႃးၼႆႉ တၢင်းၸဝ်ႈတႃႇၼ ၸုမ်း NGO ၸိူဝ်းၸွႆႈထႅမ်ငိုၼ်းတွင်းၵူၼ်းပၢႆႈၽေးလူတ်း ယွမ်းလူင်းၼမ်၊ ႁဵတ်းႁႂ်ႈပဵၼ်ႁၢပ်ႇလူင်တေႃႇတပ်ႉသိုၵ်း - ၼႆယဝ်ႉ။