ၸုမ်းပဢူဝ်းတေဢုပ်ႇလွင်ႈငမ်းယဵၼ်ၵၼ်တင်းလူင်ပွင် ၸိုင်ႈတဵင်းၸဵင်ႇ တီႈတူၼ်ႈတီး ၸိုင်ႈတႆးပွတ်း ၸၢၼ်း၊ တေပႃးတူဝ်တႅၼ်းလူင်ပွင်ၸိုင်ႈမိူင်းတႆး၊ မၢင်ၽဝ်ႇၸၢင်ႈ တူၵ်းလူင်းၵၼ်လႆႈၶေႃႈလႆႈၸႂ်ႁူဝ်တီး။

ဝၼ်းထိ 25/08/12 (မိူဝ်ႈၽုၵ်ႈ) ၸုမ်းပူတ်းပွႆႇၸိူဝ်ႉၸၢတ်ႈပဢူဝ်း (PNLO) ဢၼ်ၶုၼ်ဢူၵ်ႉၵႃႇပဵၼ် ႁူဝ်ပဝ်ႈ တေၸၢင်ႈဢုပ်ႇ ဢူဝ်းလွင်ႈငမ်းယဵၼ်တင်း တူဝ်တႅၼ်းၸုမ်းလူင်ပွင်ၸိုင်ႈတဵင်းၸဵင်ႇ တီႈတူၼ်ႈ တီး။ ၼႂ်းတူဝ်တႅၼ်းလူင်ပွင်ၸိုင်ႈၼၼ်ႉ တေပႃးၸုမ်းၵေႃႇသၢင်ႈလွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈ တုမ် UPWC ဢူးဢွင်ႇမိၼ်း (ၽွင်းလူင်ၾၢႆႇတေႃႉသူင်ႇလူတ်ႉၾႆး)၊ တေပႃးထႅင်ႈတူဝ်တႅၼ်းလူင်ပွင်ၸိုင်ႈ မိူင်းတႆး- ၼႆယဝ်ႉ။

ပိူဝ်ႈတႃႇဢုပ်ႇဢူဝ်းၵၼ်ပွၵ်ႈၼႆႉ မိူဝ်ႈဝႃးဝၼ်းထိ 23/08/12 ၶုၼ်မိၼ်ႉထုၼ်းဢွၼ်ႁူဝ် ပႃးၸဵမ်ၶုၼ် သုရိၼ်း (တူႇရဵင်ႇ) ႁူမ်ႈၸုမ်းၸိူဝ်းၵူၼ်း 8 ၵေႃႉ ဢွၵ်ႇၶၢဝ်းတၢင်းလုၵ်ႉတၢင်းလႅၼ်လိၼ်မိူင်းထႆး ႁွတ်ႈ ၽႅဝ်လိုဝ်ႈႁႅမ်း တီႈမႄႈသၢႆ။ မိူဝ်ႈၼႆႉ ဝၼ်းထိ 24/08/12 ဢွၵ်ႇၶၢဝ်းတၢင်းလုၵ်ႉတႃႈၶီႈလဵၵ်းၵႂႃႇတူၼ်ႈတီး-ၼႆယဝ်ႉ။

ၶုၼ်မိၼ်ႉထုၼ်းလၢတ်ႈဝႃႈ- ဢၼ်ၵႂႃႇပွၵ်ႈၵမ်းၼႆႉ ဢိင်ၼိူဝ်ဢၼ်လႆႈၵႂႃႇလဵပ်ႈႁဵၼ်းပွၵ်ႈၵမ်းပူၼ်ႉ ၶၢဝ်းတၢင်း 10 ဝၼ်းသေ ပွၵ်ႈမႃး။ ၵႂႃႇႁူပ်ႉဢုပ်ႇၵၼ်ထႅင်ႈၵမ်းၼႆႉ ယုမ်ႇယမ်ဝႃႈၸၢင်ႈလူင်းလၢႆးမိုဝ်းလႆႈ ၶၵ်ႉတွၼ်ႈႁူဝ်တီးယူႇ၊ ၵွပ်ႈဝႃႈ တေတၢင်ႇ ယွၼ်းၶိုၼ်း ၶေႃႈလႆႈၸႂ်တူၵ်းလူင်း 6 ၶေႃႈ ဢၼ်လႆႈတၢင်ႇ ယိုၼ်ႈသေ ဢူးဢွင်ႇမိၼ်း လႆႈၸႂ်တူၵ်းလူင်းၵႂႃႇၽွင်းႁူပ်ႉဢုပ်ႇ ၵၼ် ပူၼ်ႉမႃးမိူဝ်ႈဝၼ်းထိ 27/06/12 တီႈဝဵင်းလူင်မိူင်းၵွၵ်ႇ ၸိုင်ႈထႆး။

သိုပ်ႇလၢတ်ႈဝႃႈ- မိူဝ်ႈၵႂႃႇၵမ်းဢွၼ်တၢင်းၼၼ်ႉ ပိူဝ်ႈတႃႇႁူပ်ႉၵၼ်တင်းတူင်ႇဝူင်းၵူၼ်းမိူင်းလႄႈသင်၊ ပိူဝ်ႈတႃႇ ၵႂႃႇလမ်ႁူဝ် (ၵႃရဝ)ဝတ်ႉမုၼ်ၸဝ်ႈပဢူဝ်းၼႂ်းဝဵင်းတူၼ်ႈတီးၸိူဝ်းၼႆႉလႄႈသင်၊ ပိူဝ်ႈတႃႇလႆႈ ၵိၼ်ၶဝ်ႈႁူမ်ႈမူႇၵၼ်ၸိူဝ်းၼႆႉ ၸုမ်းဢွင်ႇ ၶမ်းထီႇ PNO ၶဝ်ၵေႃႈၸွႆႈထႅမ်ၵူႈလွင်ႈလွင်ႈ။ ၾၢႆႇၼိုင်ႈၵေႃႈ ၸၢဝ်းပဢူဝ်းပွတ်းမေႃႇလမႅင်ႇ (မိူင်းမွၼ်း)၊ ပဢူဝ်းတၢင်းမိူင်း ယၢင်းတင်းပဢူဝ်းမိူင်းတႆးၼႆႉ ၵႂၢမ်းလၢတ်ႈ လိၵ်ႈလၢႆးၵေႃႈဢမ်ႇပေႃးပႅၵ်ႇပိူင်ႈၵၼ်၊ လၢတ်ႈတႅမ်ႈပွင်ႇၵၼ်လႄႈ လွင်ႈၸိူဝ်း ၼႆႉပဵၼ်တိုဝ်ႉတၢင်းလီပိူဝ်ႈ တႃႇၸၢဝ်းၶိူဝ်းပဢူဝ်းၽွမ်ႉႁူမ်ႈၵၼ်-ဝႃႈၼႆ။

လႅင်ႇၶၢဝ်ႇထႅင်ႈၾၢႆႇၼိုင်ႈလၢတ်ႈဝႃႈ- ၸုမ်းပဢူဝ်းၵႂႃႇဢုပ်ႇလွင်ႈငမ်းယဵၼ်ပွၵ်ႈၵမ်းၼႆႉ လႆႈငိၼ်းဝႃႈတေ တၢင်ႇလၢတ်ႈတုၵ်း ယွၼ်းပႃးႁႂ်ႈလႆႈၶဝ်ႈၵႂႃႇပၵ်းတပ်ႉတီႈၵွင်ၼဵင်ႈ (ၼႂ်းၾင်ႇမိူင်းတႆး) ဢၼ်တေႃႇၼႃႈမိူင်း ထႆး ဝၢၼ်ႈရၵ်ႉထႆး ၸႄႈဝဵင်း မႄႈႁွင်ႈသွၼ်။ ႁႂ်ႈလႆႈပိုတ်ႇလုမ်းၵပ်းသၢၼ်တီႈသထုင်ႇလႄႈတီႈတူၼ်ႈတီး၊ သမ်ႉႁႂ်ႈလႆႈ တူင်ႉၼိုင်ပႃးၼႂ်းၾင်ႇမိူင်းတႆး ၸွမ်းလႅၼ်လိၼ်မိူင်းယၢင်းလႅင်- ဝႃႈၼႆ။

ၶေႃႈတၢင်ႇယိုၼ်ႈၸုမ်း PNLO ဢၼ်ဢူးဢွင်ႇမိၼ်းတူၵ်းလူင်းၵႂႃႇၼၼ်ႉ မီး 6 ၶေႃႈ- 1.ၵိုတ်းသိုၵ်းၵၼ်၊ 2.ပိုတ်ႇလုမ်းၵပ်း သၢၼ်တီႈဢၼ်သၢင်ႇထုၵ်ႇ၊ 3.ပေႃးဢမ်ႇပႃးၶိူင်ႈၵွင်ႈၵၢင်ႇၸိုင် ႁႂ်ႈၸုမ်း PNLO ၵႂႃႇမႃးၶဝ်ႈဢွၵ်ႇလႆႈ ထၢင်ႇႁၢင်ႈလွတ်ႈလႅဝ်း၊ 4.ႁႂ်ႈလႆႈႁူပ်ႉထူပ်းဢုပ်ႇဢူဝ်းၸုမ်းႁဵတ်းၵၢၼ်မိူင်းၼႂ်းမိူင်း လႆႈထၢင်ႇႁၢင်ႈလွတ်ႈလႅဝ်း၊ 5.ပိူဝ်ႈတႃႇႁူမ်ႈမိုဝ်းၵၼ်ၽဵဝ်ႈမူၺ်ႉ ယႃႈမဝ်းၵမ်၊ ၵွပ်ႈဝႃႈၼႂ်းၵူၼ်းၼုမ်ႇပဢူဝ်း တိတ်းယႃႈၼမ်။ 6.ႁႂ်ႈၾၢႆႇသိုဝ်ႇ လႆႈဢွၵ်ႇၶၢဝ်ႇထၢင်ႇႁၢင်ႈလွတ်ႈလႅဝ်း ၵဵဝ်ႇၵပ်း လွင်ႈဢုပ်ႇဢူဝ်းၵၢၼ်မိူင်း ၵၢၼ်သိုၵ်း-ၸိူဝ်းၼႆႉ။