ၵူၼ်းၼုမ်ႇၼႂ်းၸႄႈဝဵင်းၼမ်ႉၶမ်းၵိၼ်ယႃႈ တၢင်းယၢမ်ႈ လုၼမ်၊ ပႃးၸဵမ်လုၵ်ႈႁဵၼ်း၊ ၵူၼ်းႁဵတ်းယႃႈပဵၼ်ၸုမ်း ပီႇတုၸိတ်ႉ၊ ၾၢႆႇၸဝ်ႈၼႃႈတီႈမၢၼ်ႈဢမ်ႇဝႃႈသင်။

မိူဝ်ႈလဵဝ် ၵူၼ်းၼုမ်ႇၼႂ်းၼမ်ႉၶမ်းၼႆႉ ပေႃးဝႃႈမီးငိုၼ်းတွင်းၼႆ ၵႂႃႇဢႅဝ်ႇႁွၼ်ႈထဝ်ႇႁႃသိုဝ်ႉၵိၼ်ယႃႈ၊ တၢင်းယၢမ်ႈလုႁႅင်း ၼႅၼ်ႇ၊ လုၵ်ႈႁဵၼ်းမၢင်ၵေႃႉပၢႆႈႁူင်းႁဵၼ်းသေ ၵႂႃႇသိုဝ်ႉၵိၼ်ယႃႈၾိၼ်ႇယႃႈမႃႉၵေႃႈမီး၊ ပေႃႈမႄႈလုၵ်ႈဢွၼ်ႇၵမ်ႈၼမ် ဢွၼ်ၵၼ်မႆႈၸႂ်ၸွမ်းလုၵ်ႈလၢင်း၊ ပွတ်းၼမ်ႉၶမ်းၼႆႉယႃႈမႃႉၵိၼ်ၼမ်ထိၼိုင်ႈ၊ ယႃႈၾိၼ်ႇၽိူၵ်ႇၵိၼ်ၼမ် ထိ 2 ။

တီႈပွၵ်ႉမၢၼ်ႈၼႃး ၸႄႈဝဵင်းၼမ်ႉၶမ်းၼႆႉ ၶၢႆယႃႈၾိၼ်ႇၽိူၵ်ႇယႃႈမႃႉတင်းၼမ်တင်းလၢႆ၊ ပေႃးဝႃႈၵၢင်ၼႂ် 9 မူင်း ပေႃးမီး ၵူၼ်းၵႂႃႇပႂ်ႉသိုဝ်ႉၵၼ်ယဝ်ႉ၊ တီႈၶၢႆယႃႈမႃႉယႃႈၽိူၵ်ႇၸိူဝ်းၼႆႉ ဢမ်ႇၵႆတပ်ႉပလိၵ်ႈသင်ၵေႃႈ ၸဝ်ႈၼႃႈတီႈ ၶဝ်ဢမ်ႇတၵ်း သဵင်သင်။ ဢၼ်ႁဵတ်းယႃႈမႃႉၵေႃႈ ပဵၼ်ပီႇတုၸိတ်ႉၸုမ်းၼိုင်ႈဢၼ်ယူႇၼႂ်းၸႄႈဝဵင်းၼမ်ႉၶမ်းၵူၺ်း- ဝႃႈၼႆ။

ၼွၵ်ႈသေၼၼ်ႉ တၢင်းပွတ်းမၢၼ်ႈဝဵင်းလူင်ၵေႃႈ ၵူၼ်းသူႇၵူၼ်းၵိၼ်ယႃႈမႃႉၼမ်ၼႅၼ်ႇ၊ မီးႁိူၼ်းၶၢႆယႃႈမႃႉယႃႈၽိူၵ်ႇ ယၢၼ် ႁူင်းပလိၵ်ႈမၢၼ်ႈဝဵင်းလူင်မွၵ်ႈ 300 မီႊတိူဝ်ႊ (Meter)ၵူၺ်း ၶဝ်ႁူႉႁၼ်ယူႇၵေႃႈယင်းဢမ်ႇၵႂႃႇတိၺွပ်း။ တီႈႁိူၼ်းၼႆႉ ၵူၼ်းဢွၵ်ႇတၢင်းၵႂႃႇမႃး၊ ၵူၼ်းၵႃႉဝူဝ်းၵႃႉၵႂၢႆးၶဝ်၊ ၵူၼ်းၵႃႉၶၢႆၶူဝ်းၵုၼ်ႇၶဝ်ၸိူဝ်းၼႆႉ ယင်းၵႆႉမႃးလိုဝ်ႈ ဝႄႉသိုဝ်ႉၵိၼ်လူးၵွၼ်ႇ- ၼႆယဝ်ႉ။

ၾၢႆႇၼိုင်ႈၵေႃႈ ပွတ်းၸႄႈဝဵင်းၵူတ်ႉၶၢႆ၊ သႅၼ်ဝီ၊ လႃႈသဵဝ်ႈတင်း ထုင်ႉမိူင်းယေႃၸိူဝ်းၼႆႉ မိူဝ်ႈလဵဝ်ၵူၼ်းဝၢၼ်ႈၵူၼ်းသူၼ်ၶဝ် ၵႂႃႇၵိၼ်ၸၢင်ႈႁဵတ်းသူၼ်ယႃႈၵၼ်ယဝ်ႉ- ၼႆယူႇ။