ဝၼ်းထိ 17/08/12 မိူဝ်ႈၼႆႉ ဢိင်ၼိူဝ်ပဵၼ်ဝၼ်းဢၼ် ၸွမ်ၸိုင်ႈတဵင်းၸဵင်ႇ ပိုၼ်ၽၢဝ်ႇပူင်ၵႂၢမ်း 2 ၶေႃႈ- 1.ႁွင်ႉ မွၵ်ႇၸုမ်းယိပ်းၵွင်ႈၵၢင်ႇၶဝ်မႃးဢုပ်ႇဢူဝ်းလွင်ႈငမ်းယဵၼ်၊ 2.ႁွင်ႉမွၵ်ႇၵူၼ်းၸိူဝ်းၵႂႃႇတူၵ်းပႃႇၽိူင်းမိူင်းပိူၼ်ႈပွၵ်ႈမႃး ၶိုၼ်းဝၢၼ်ႈၵဝ်ႇမိူင်းလင် ၶွပ်ႈၶူပ်ႇၼိုင်ႈပီတဵမ်လႄႈ မီးလၢႆၵေႃႉလၢႆၾၢႆႇမွၵ်ႇလၢတ်ႈထတ်းသၢင်ၼင်ႇၼႆ။

ၼေႃႇၸီႇၽူဝ်းလႃႇၸဵင်ႇ ၽူႈၼမ်းၼႂ်းႁူမ်ႈတုမ်ၸိူဝ်ႉၸၢတ်ႈယၢင်းၽိူၵ်ႇ (KNU) လၢတ်ႈဝႃႈ- ၸွမ်ၸိုင်ႈတဵင်းၸဵင်ႇ ႁွင်ႉမွၵ်ႇ လွင်ႈငမ်းယဵၼ်မႃးလႆႈတဵမ်ပီယဝ်ႉသေတႃႉၵေႃႈ ၶၢဝ်းတၢင်း လွင်ႈငမ်းယဵၼ်ၼႆႉမိူၼ်တိုၵ်ႉတႄႇၵူၺ်း၊ ဢၼ်ထုၵ်ႇလႆႈသိုပ်ႇ ႁဵတ်းသၢင်ႈၵႂႃႇထႅင်ႈယင်း တိုၵ်ႉၵိုတ်းထႅင်ႈတင်းၼမ်။

ၸဝ်ႈယွတ်ႈသိုၵ်း ႁူဝ်ႈပဝ်ႈၶွင်ႊသီႊဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA လၢတ်ႈဝႃႈ- ၸွမ်ၸိုင်ႈတဵင်းၸဵင်ႇ ပိုၼ်ၽၢဝ်ႇမႃးတဵမ်ပီယဝ်ႉၵေႃႈ

ဢၼ်ႁဝ်းလႆႈတူၵ်းလူင်း ၵၼ်မႃးတႄႉယင်းပႆႇတဵမ်ပီ၊ တင်ႈတႄႇႁဝ်းလႆႈဢုပ်ႇဢူဝ်းၵၼ် ပူၼ်ႉမႃးမိူဝ်ႈ 19/11/11 မႃးတေႃႇထိုင်မိူဝ်ႈလဵဝ်ၼႆႉ ၶေႃႈလႆႈၸႂ်ၵၼ်ၼၼ်ႉ ယင်းပႆႇလႆႈႁဵတ်းဢွၵ်ႇၼမ်ႉဢွၵ်ႇတူဝ်လႆႈမီးတင်းၼမ်။ ၼွၵ်ႈသေ ဢၼ်လႆႈပိုတ်ႇလုမ်းၵပ်းသၢၼ်၊ RCSS လႆႈလူင်းပိုၼ်ႉတီႈ ဢုပ်ႇဢူဝ်းၵူၼ်းမိူင်းၸိူဝ်းၼၼ်ႉ ဢၼ်ႁဵတ်း ဢွၵ်ႇၼမ်ႉဢွၵ်ႇတူဝ်လႆႈပႆႇမီးသင်၊ ယွၼ်ႉဝႃႈ လူင်ပွင်ၸိုင်ႈလၢတ်ႈပိူင်ၼိုင်ႈ၊ တပ်ႉသိုၵ်းႁဵတ်းပိူင်ၼိုင်ႈ။

ၵွပ်ႈၼၼ် ဝၢႆးဢဝ်လွင်ႈငမ်းယဵၼ်မႃးၼႆႉ ႁဝ်းလႆႈယိုဝ်းၵၼ်မွၵ်ႈ 30 ပွၵ်ႈယဝ်ႉ။ တင်းၶၢင်/ယၢင်း/ ယၢင်းလႅင် တင်း SSPP/SSA ၵေႃႈယင်းတိုၵ်ႉတိုၵ်းၵၼ်ယူႇ၊ မိူၼ်ၼင်ႇၵိင်ႇၸႄႈဝဵင်းႁူဝ်မိူင်း-မိူင်းထႃးၼၼ်ႉ တေပဵၼ်ပိုၼ်ႉတီႈၼႃႈလိၼ် တႃႇႁဝ်းပိုတ်ႇလုမ်းသေၽွင်းငမ်းၵေႃႈ ဢမ်ႇပဵၼ်မႃး၊ ဢၼ်ဝႃႈတေႁူမ်ႈမိုဝ်းၵၼ်ၽဵဝ်ႈမူၺ်ႉယႃႈမဝ်းၵမ် ၵေႃႈယင်းပႆႇပဵၼ်၊ လိူဝ်သေၼၼ်ႉ ႁၢမ်ႈဝႃႈ ဢၼ်ၼႆႉၵေႃႈႁဵတ်းဢမ်ႇလႆႈ၊ ဢၼ်ၼၼ်ႉၵေႃႈႁဵတ်းဢမ်ႇလႆႈ ၸိူဝ်းၼႆႉၵေႃႈမီးတင်းၼမ်။

ယွၼ်ႉၼၼ်လႄႈ ပေႃးႁဝ်းႁူပ်ႉၵၼ်ထႅင်ႈၵမ်းၼိုင်ႈ ဢၼ်ထုၵ်ႇလႆႈဢုပ်ႇၵၼ်မီး 3 ၶေႃႈ- 1.ထုၵ်ႇလႆႈလိုမ်ႉၶိုၼ်းၶေႃႈလႆႈ ၸႂ်ၵၼ် ဢၼ်လႆႈလူင်းလၢႆးမိုဝ်းမႃး၊ ယွၼ်ႉသင်တေႃႇထိုင်မိူဝ်ႈလဵဝ် ပႆႇႁဵတ်းဢွၵ်ႇၼမ်ႉဢွၵ်ႇတူဝ်လႆႈ။ 2.ၵဵဝ်ႇၵပ်းယႃႈမဝ်းၵမ်၊ ၵူၼ်းတိတ်းယႃႈမဝ်းၵမ်၊ ၵူၼ်းၵႃႉယႃႈ၊ ၵူၼ်းႁဵတ်းယႃႈၸိူဝ်းၼႆႉၼမ်တႄႉတႄႉ တေႁဵတ်းႁိုဝ်ၵႄႈလိတ်ႈ။ 3.ၵဵဝ်ႇၵပ်းလွင်ႈ ဢုပ်ႇဢူဝ်းၵၢၼ်မိူင်း၊ လူင်ပွင်ၸိုင်ႈတေတူဝ်ႈတၼ်းမိူဝ်ႈလႂ်၊ တၢင်းၸုမ်းယိပ်းၵွင်ႈႁဝ်းၸိူဝ်းၼႆႉၵေႃႈ တေတူဝ်ႈတၼ်းမိူဝ်ႈလႂ်၊ ပေႃးဢုပ်ႇဢူဝ်းၵေႃႈၶႂ်ႈႁႂ်ႈၵူၼ်းမိူင်းလႆႈၶဝ်ႈပႃး မီးသုၼ်ႇႁူမ်ႈၸွမ်း- ၼႆယဝ်ႉ။

ၶုၼ်တူႇရဵင်ႇ (သုရိၼ်း) ၵႅမ်ၽူႈၼမ်းၼႂ်းၸုမ်းပူတ်းပွႆႇၸိူဝ်ႉၸၢတ်ႈပဢူဝ်း (PNLO) လၢတ်ႈဝႃႈ- ၸွမ်ၸိုင်ႈတႄႉဝႃႈ ဢၼ် မီးပၼ်ႁႃယူႇၼႆႉ ပဵၼ်ယွၼ်ႉၵၢၼ်ပူၵ်းပွင်ၶိုၼ်ႈယႂ်ႇပီႈၼွင်ႉမိူင်းလွႆၶဝ် ယင်းပႆႇၽဵင်ႇပဵင်းၵၼ်တင်းပီႈၼွင်ႉ ၼႃႈလိၼ်ပဵင်း(မၢၼ်ႈ)ၶဝ်၊ သင်ဝႃႈပီႈၼွင်ႉမိူင်းလွႆၶဝ်မီးၵၢၼ်ပူၵ်းပွင်ၶိုၼ်ႈယႂ်ႇ မီးသဵၼ်ႈတႃႈသၢႆတၢင်း၊ ၶူဝ်၊ လွင်ႈတိတ်းတေႃႇၵပ်းသိုပ်ႇ ၽဵင်ႇပဵင်းၵၼ်တင်း ပီႈၼွင်ႉၼႃႈလိၼ်ပဵင်းၶဝ်ၸိုင် ၵဵဝ်ႇၵပ်းလူၺ်ႈလွၵ်းပဝ်ႇ ၼႂ်းၵႄႈၵၢင်ၸၢဝ်းမၢၼ်ႈလႄႈၸၢဝ်းၶိူဝ်းၸိူဝ်း ဢမ်ႇၸႂ်ႈမၢၼ်ႈတေႁၢႆၵႂႃႇ။ ၸွမ်ၸိုင်ႈလၢတ်ႈၸိူင်ႉၼႆ ၶႃႈႁဝ်းႁၼ်ဝႃႈ မၼ်းၽိတ်း။

ၶႃႈႁဝ်းၶႂ်ႈလၢတ်ႈဝႃႈ မၼ်းၸိုဝ်ႈၸႂ်ႈၽွင်ႈၼိုင်ႈၵူၺ်း၊ ၵွပ်ႈဝႃႈ ဢၼ်ႁဝ်းၸၢဝ်းၶိူဝ်းၶႂ်ႈလႆႈထိၼိုင်ႈၼႆႉ ပဵၼ်လွင်ႈသုၼ်ႇလႆႈ ၸၢဝ်းၶိူဝ်း၊ သုၼ်ႇလႆႈၵၢၼ်မိူင်းၸိူဝ်းၼႆႉ၊ ဢမ်ႇၸႂ်ႈသဵၼ်ႈတႃႈသၢႆတၢင်းၶဝ်၊ ၶူဝ်ၶဝ်။ ယွၼ်ႉၼၼ် ပေႃးၸွမ်ၸိုင်ႈယူႇၾၢႆႇႁဝ်း သေဝူၼ်ႉတူၺ်း၊ ႁဝ်းၶႂ်ႈလႆႈသင်ၼႆၵေႃႈၶိုင်ပွင်ပၼ်ၼႆၸိုင် လွင်ႈငမ်းယဵၼ်မၼ်းၵိုမ်းၼႆႉ တႃႇတေဢမ်ႇပဵၼ်လႆႈဢမ်ႇမီး။

ၸၢႆးလဵၵ်ႉ ၽူႈၶၢၼ်ပၢၵ်ႇပႃႇတီႇႁူဝ်သိူဝ် SNLD လၢတ်ႈဝႃႈ- ပၼ်ႁႃၵၢၼ်မိူင်းၼႆႉ ထုၵ်ႇလႆႈဢဝ်လၢႆး ၵၢၼ်မိူင်းၵႄႈလိတ်ႈ၊ ပေႃးဢမ်ႇဢဝ်လၢႆးၵၢၼ်မိူင်းၵႄႈလိတ်ႈၸိုင် ၶၵ်ႉၵၢၼ်လွင်ႈငမ်းယဵၼ်ၼႆႉ ႁဵတ်းၵႂႃႇထႅင်ႈ 10-15 ပီၵေႃႈတေမိူၼ်ၵဝ်ႇၵဝ်ႇ ၵူၺ်း၊ ဢၼ်ၸၢဝ်းၶိူဝ်းၶႂ်ႈလႆႈၼႅၼ်ႇၼႆႉ ဢမ်ႇၸႂ်ႈလွင်ႈၽၢတ်ႇဢွၵ်ႇ၊ ပဵၼ်လွင်ႈ ၽဵင်ႇပဵင်းၵၼ်လႄႈ သုၼ်ႇလႆႈတႅပ်းတတ်း င်းၶေႃ။ ၵဵဝ်ႇၵပ်းလွင်ႈၼႆႉ လူင်ပွင်ၸိုင်ႈ ထုၵ်ႇလႆႈၸွႆႈသပ်းလႅင်းပၼ် ၵူၼ်းမိူင်းမၢၼ်ႈတင်းသဵင်ႈလႄႈ တပ်ႉသိုၵ်းတင်ႈ တႄႇဢဝ်ၾၢႆႇၼိူဝ်တေႃႇထိုင်ၾၢႆႇတႂ်ႈ ႁႂ်ႈၶဝ်ပေႃးပွင်ႇၸႂ်၊ ပေႃးၼၼ်ၸင်ႇ တေလႆႈမႃးလွင်ႈငမ်းယဵၼ်ႁင်းၵူၺ်း။

ၼၢႆႁူင်သႃ ၽူႈၼမ်းၼႂ်းပႃႇတီႇမွၼ်းလႄႈ ၶွင်ႊသီႊႁူမ်ႈတုမ်ၵူႈၸၢဝ်းၶိူဝ်း UNFC လၢတ်ႈဝႃႈ-ပဵၵ်ႉသမ်ႉဝႃႈ ပိုၼ်ၽၢဝ်ႇမႃး လွင်ႈငမ်းယဵၼ်ၶွပ်ႈတဵမ်ပီယဝ်ႉၵေႃႈ တေႃႇထိုင်မိူဝ်ႈလဵဝ် ယင်းတိုၵ်ႉ ယိုဝ်းၵၼ်ယူႇ၊ မိူင်းၶၢင်လႄႈသင်၊ ၸုမ်းတႆး RCSS/SSA , SSPP/SSA ၵေႃႈယင်းတိုၵ်ႉယိုဝ်း ၵၼ်ယူႇ၊ ၵွပ်ႈၼၼ် လွင်ႈၵိုတ်းယိုဝ်းၼႆႉယဝ်ႉတူဝ်ႈၵႂႃႇယဝ်ႉၼႆပႆႇဝႃႈလႆႈ။ မိူၼ်ၼင်ႇ တၢင်းလူင်ပွင်ၸိုင်ႈလၢတ်ႈဝႃႈ- ႁႂ်ႈတင်ႈပႃႇတီႇသေၶဝ်ႈၼႂ်း ၵၢၼ်လိူၵ်ႈတင်ႈ၊ ပေႃးဝႃႈ လႆႈႁပ်ႉလိူၵ်ႈယဝ်ႉၼႆ ၶႂ်ႈလၢတ်ႈသင် ၼႂ်းသၽႃးၵေႃႈလၢတ်ႈ၊ ၶႂ်ႈမူၼ်ႉမႄးမၢႆမီႈ ၸိုင်ႈမိူင်းၸိူင်ႉႁိုဝ်ၵေႃႈမူၼ်ႉမႄး။ ၸိူဝ်းၼႆႉမၼ်းဢမ်ႇၸႂ်ႈလွင်ႈ ဢုပ်ႇဢူဝ်းဢၼ် ၽဵင်ႇပဵင်းၵၼ်၊ မိူၼ်ၵၼ်တင်း တိုတ်ႉႁဝ်းၶဝ်ႈၵႂႃႇၼႂ်းၶွပ်ႇတူင်ႇၶဝ်သေမႃးၵမ်ၵိၼ်း ႁဝ်းၵူၺ်း၊ ပိူင်ၼိုင်ႈၵေႃႈမိူၼ်ၵၼ်တင်း ၸႂ်ႉႁဝ်းဝၢင်းၶိူင်ႈ ၵွင်ႈၵၢင်ႇၵူၺ်း၊ ပေႃးႁဵတ်း လၢႆးၼႆႉၵႂႃႇတိၵ်းတိၵ်း ၶၵ်ႉၵၢၼ်လွင်ႈငမ်းယဵၼ် ၼႆႉ သၢႆငၢႆမၼ်းဢမ်ႇပေႃးလီ။

လႃႇၼၼ် ၵႅမ်ၽူႈၼမ်းၼႂ်းၸုမ်းၶၢင် KIO လႄႈၽူႈမီးသုၼ်ႇၶၢၼ်ပၢၵ်ႇလၢတ်ႈဝႃႈ- မိူဝ်ႈလဵဝ်ၼႆႉ ၵၢင်ၸႂ်ၸၢဝ်းၶိူဝ်းၶဝ်မီး ၸိူင်ႉႁိုဝ်ၼႆၶဝ်ဢမ်ႇဝူၼ်ႉထိုင်၊ လူင်ပွင်ၸိုင်ႈၼႆႉ မၼ်းၶႂ်ႈၵႂႃႇသဵၼ်ႈတၢင်းလႂ်ၵေႃႈၶႂ်ႈ ၸၼ်ႁဝ်းၵႂႃႇၸွမ်းတိၵ်းတိၵ်း၊ ယွၼ်ႉပိူဝ်ႈ ႁဵတ်းမႃးၸိူင်ႉၼၼ်လႄႈၵၢၼ်ဢုပ်ႇဢူဝ်းလွင်ႈငမ်းယဵၼ် ၵႃႈပူၼ်ႉမႃး ဢမ်ႇပေႃးပဵၼ်ၵၢၼ်ၵႃႈႁိုဝ်၊ လူင်ပွင်ၸိုင်ႈၼႆႉ ၾၢႆႇၼိုင်ႈဝႃႈလွင်ႈငမ်းယဵၼ်ယူႇၵေႃႈ ထႅင်ႈၾၢႆႇၼိုင်ႈ တပ်ႉသိုၵ်းသမ်ႉႁၢင်ႈသိုၵ်းသေတိုၵ်းယူႇတိၵ်းတိၵ်း၊ ဢၼ်ၼႆႉ မၼ်းပဵၼ်ၵၢၼ်ဝၢင်းၽႅၼ်ပဵၼ်ပၵ်းပိူင်သေႁဵတ်း (ၶႂ်ႈဝႃႈၾၢႆႇၼိုင်ႈဢုပ်ႇလွင်ႈငမ်းယဵၼ်၊ ၾၢႆႇၼိုင်ႈတိုၵ်းတိၵ်းတိၵ်း၊ မိူၼ်တင်းမီးၽႅၼ်ၵၢၼ်သေႁဵတ်း)။ လၢႆးၼႆႉ မၼ်းၸၢင်ႈပဵၼ်ၶိူင်ႈၵိတ်ႇၶႂၢင် သဵၼ်ႈတၢင်းလွင်ႈငမ်းယဵၼ်၊ ယွၼ်ႉၼၼ် လႄႈႁဝ်းၶႃႈၶႂ်ႈႁႂ်ႈၶဝ်ၸဝ်ႈၶိုၼ်းမႄး လိုမ်ႉၶိုၼ်းၶၵ်ႉၵၢၼ် လွင်ႈငမ်းယဵၼ်ဢၼ်ၶဝ်ႈၸဝ်ႈႁဵတ်းယူႇၼၼ်ႉ။

ၸမ်ႇၵျိၼ်ႉပဝ် (ၸူဝ်ႇၸမ်း) ႁူဝ်ပဝ်ႈပႃႇတီႇၸိူဝ်ႉၶိူဝ်းၶျၢင်း ဢၼ်ပဵၼ်ပႃးၽွင်းတႅၼ်းၼႂ်းသၽႃးလၢတ်ႈဝႃႈ- ပူၼ်ႉမႃးဢမ်ႇ ႁိုင်ဢမ်ႇၼၢၼ်းၼႆႉ ၵဝ်ၶႃႈႁဝ်းလႆႈဢၢၼ်ႇၼႂ်းၽိုၼ်ၶၢဝ်ႇ၊ ၸွမ်ၸိုင်ႈၶႂ်ႈၵႂႃႇၸွမ်းလွင်ႈငမ်းယဵၼ် 3 ၶၵ်ႉတွၼ်ႈ၊ ၶၵ်ႉတွၼ်ႈ ၸႄႈမိူင်း၊ ၶၵ်ႉတွၼ်ႈၸိုင်ႈမိူင်းႁူမ်ႈတုမ်၊ ၶၵ်ႉတွၼ်ႈသၽႃးၸိုင်ႈမိူင်းႁူမ်ႈတုမ်။ ၵူၺ်းၵႃႈ ဢၼ်ၶႃႈႁဝ်းၶႂ်ႈၼႄႉၼမ်းၼႆႉ ၸူဝ်ႈပႆႇထိုင်ၶၵ်ႉတွၼ်ႈ 3 ၽသႃးၸိုင်ႈမိူင်းႁူမ်ႈတုမ်ၼႆႉ လီလႆႈၸတ်းပၢင်သွၼ် (ဝိူၵ်ႊသျွပ်ႊ) လူင် ဢၼ်ၵူႈၾၢႆႇၾၢႆႇၶဝ်ႈ ႁူမ်ႈပႃးသေပိုတ်ႇဢူၵ်းပိုတ်ႇၸႂ်လၢတ်ႈတေႃႇၵၼ် တူၵ်းလူင်းၵၼ်။

ဢၼ်လႆႈယိုၼ်ႈမိုဝ်းလွင်ႈငမ်းယဵၼ်ၼႆႉ ဢမ်ႇၸႂ်ႈပၢၼ်မိူဝ်ႈလဵဝ်ၼႆႉၵူၺ်း၊ လူင်ပွင်ၸိုင်ႈၵူႈသိုပ်ႇသိုပ်ႇၵေႃႈ ႁဵတ်းမႃးၼင်ႇၵဝ်ႇ၊ လၢႆးမၼ်းဢမ်ႇမိူၼ်ၵၼ်ၵူၺ်း။ ၵူၺ်းၵႃႈ ဢၼ်မိူၼ်ၵၼ်ၼႆႉ မိူဝ်ႈၵူႈပွၵ်ႈၶဝ်ဢဝ်ဢွၵ်းဢေႃ လဵၼ်ႈၵၼ်၊ ပၢၼ်မိူဝ်ႈလဵဝ်ၼႆႉ ၶဝ်သမ်ႉၶႂ်ႈဢဝ်ဢွၵ်းဢေႃႁဝ်းသေမႃးႁိမ်ဢဝ်မၢၵ်ႇႁူဝ်ၸႂ်ႁဝ်း၊ ၵူၺ်းၵႃႈ ပေႃးဝႃႈၶႂ်ႈလႆႈလွင်ႈငမ်းယဵၼ်ယိုၼ်းယၢဝ်းၸိုင် ၶဝ်ထုၵ်ႇလႆႈဢဝ်မၢၵ်ႇႁူဝ်ၸႂ်ၶဝ်သေမႃးလႅၵ်ႈဢဝ်ၵၼ်တင်း မၢၵ်ႇႁူဝ်ၸႂ်ႁဝ်း၊ ပေႃးၼၼ်ၸင်ႇပဵၼ်မႃးလွင်ႈငမ်းယဵၼ်ဢၼ် ယိုၼ်းယၢဝ်း- ၼႆယဝ်ႉ။