လူင်ပွင်ၸိုင်ႈပၼ်တိုဝ်ႉတၢင်းၶႃႈႁၢပ်ႇၵၢၼ်ၶုၼ်သိုဝ်ႉ/ ၽွၼ်ႇသိမ်ႊမိုဝ်းထိုဝ်လႆႈ၊ ၵူၼ်းၼုမ်ႇၼႂ်း မိူင်းဢွၼ်ၵၼ် သူင်မႃးၸႂ်ႉၶိူင်ႈၾူၼ်ႊမိုဝ်းထိုဝ်၊ ဢိၼ်ႊတိူဝ်ႊၼႅတ်ႊ ၵၼ်ၼမ်၊ ၵွပ်ႈတိတ်းတေႃႇၵၼ်ငၢႆႈ။

ၶႃႈႁၢပ်ႇၵၢၼ်ၶုၼ်ပွတ်းလႃႈသဵဝ်ႈ-ၵျွၵ်ႉမႄးၵေႃႉၼိုင်ႈလၢတ်ႈဝႃႈ- ပေႃးသိုဝ်ႉသိမ်ႊ (Sim Card) မိုဝ်းထိုဝ် 1 ဢၼ်လႆႈၸၢႆႇ ငိုၼ်း 2 သႅၼ်ႁႃႈ (250,000 ပျႃး)၊ ပေႃးဢမ်ႇပွင်ပဵၼ်လႆႈၵမ်းသိုဝ်ႈၵေႃႈၵႂႃႇတမ်းငိုၼ်း 4 မိုၼ်ႇႁႃႈ (45,000) သေ ၽွၼ်ႇ ၵႂႃႇၼိုင်ႈလိူၼ်ၼိုင်ႈမိုၼ်ႇ (10,000) ၶၢဝ်းတၢင်း 14 လိူၼ်ၵေႃႈလႆႈ။

ဢၼ်လူင်ပွင်ၸိုင်ႈတမ်းဝၢင်းပၼ်မိူဝ်ႈလဵဝ် ပဵၼ်သိမ်ႊ WCDMA, GSM ၵွပ်ႈၼၼ် ၶႃႈႁၢပ်ႇၵၢၼ်ၶုၼ်တင်း ၵူၼ်းဝၢၼ်ႈ ၵူၼ်းသူၼ် ၵူၼ်းၼုမ်ႇၶဝ်ဢွၼ်ၵၼ်ၸႂ်ႉၾူၼ်ႊမိုဝ်းထိုဝ်မႃးၼမ်လိူဝ်ၵဝ်ႇတႄႉတႄႉ။ မိူၼ်ၼင်ႇဝဵင်းလူင် တႃႈၵုင်ႈ၊ ဝဵင်းလိူဝ်ႇ (မၼ်းတလေး)ၸိူဝ်းၼႆႉ လႆႈဢိၼ်ႊတိူဝ်ႊၼႅတ်ႊ 3G ၶႅမ်ႉလီ၊ ၵူၺ်းၵႃႈ ပေႃးထိုင်ၵႂႃႇပွတ်း တၢင်ႇၸႄႈဝဵင်းတႄႉ ယဵၼ်းပဵၼ် GPRS သေ ႁႅင်း 3G လူတ်းယွမ်းၵႂႃႇ- ဝႃႈၼႆ။

ၵဵဝ်ႇၵပ်းလွင်ႈၼႆႉ လုၵ်ႈႁဵၼ်းၸၼ်ႉၸွမ်လႃႈသဵဝ်ႈၵေႃႉၼိုင်ႈလၢတ်ႈဝႃႈ- မိူဝ်ႈလဵဝ် ၼႂ်းတႆးၵေႃႉတႆး သေႈႁဝ်း ၵူႈၵေႃႉၼႆႉ ၶႂ်ႈဝႃႈယိပ်းမိုဝ်းထိုဝ်ၵၼ်ၵူႈၵေႃႉယဝ်ႉ၊ ၵွပ်ႈဝႃႈပေႃးၸႂ်ႉမိုဝ်းထိုဝ်တိတ်းတေႃႇၵၼ် ငၢႆႈ။ မိူၼ်ၼင်ႇႁိူၼ်း ႁိမ်းႁွမ်းႁဝ်းၶႃႈ 7-8-9 လင်ၼႆႉ ၶႂ်ႈဝႃႈမီးၾူၼ်ႊမိုဝ်းထိုဝ်ၵၼ်ၵူႈႁိူၼ်း။ ၸိူဝ်းၸႂ်ႉၾူၼ်ႊႁိူၼ်းၵေႃႈယွၼ်း ဢိၼ်ႊတိူဝ်ႊၼႅတ်ႊငၢႆႈ၊ ၸိူဝ်းယိပ်းမိုဝ်း ထိုဝ်ၵေႃႈၵႂႃႇ သိုဝ်ႉၸႂ်ႉ ဢိၼ်ႊတိူဝ်ႊၼႅတ်ႈလႆႈငၢႆႈယူႇ၊ ၵူၺ်းၵႃႈ ဢွၼ်တၢင်း သုတ်းလႆႈၸၢႆႇငိုၼ်းပၼ် 11,000 ပျႃး။

ယၢမ်းလဵဝ် ပေႃးပဵၼ်ၾူၼ်ႊၵဝ်ႇ (ၸႂ်ႉမၢႆၼပ်ႉၵဝ်ႇ GSM) ၵႃႈၸႂ်ႉဢိၼ်ႊတိူဝ်ႊၼႅတ်ႊ 1 မိၼိတ်ႉ 2 ပျႃး၊ ပေႃးပဵၼ်ၾူၼ်ႊမႂ်ႇ (ၸႂ်ႉမၢႆၼပ်ႉမႂ်ႇ WCDMA) 1 မိၼိတ်ႉ 4 ပျႃး၊ ပေႃးထူဝ်းၸူးၵၼ် 1 ၵမ်း 1 မိၼိတ်ႉလႆႈၸၢႆႇ 5 ၶၼ်။ ၾူၼ်ႊ 1 ၶိူင်ႈ သႅၼ်းတႅမ်ႇသုတ်းၵႃႈၶၼ်မွၵ်ႈ 33,000 ပျႃး၊ ပေႃးၸႂ်ႉၶိူင်ႈၾူၼ်ႊသႅၼ်းလီ၊ မီးလုၵ်ႈလဵၼ်ႈမၼ်းၼမ်ၸိူဝ်းၼႆႉတႄႉ 1 ၶိူင်ႈၼပ်ႉသႅၼ်မၼ်းယူႇ- ၶႃႈႁၢပ်ႇၵၢၼ်ၶုၼ်ပွတ်းၵျွၵ်ႉမႄးသိုပ်ႇလၢတ်ႈ ၼင်ႇၼႆ။