မိူဝ်ႈဝၼ်းထိ 07/08/2012 ၶၢဝ်ႇတႆးလွတ်ႈလႅဝ်း (Taifreedom) လႆႈတွင်ႈထၢမ် ႁူဝ်ပဝ်ႈလူင် RCSS/SSA ၸွမ်သိုၵ်း ၸဝ်ႈယွတ်ႈသိုၵ်း လွင်ႈပၼ်ႁႃၼႂ်းၵႄႈတပ်ႉသိုၵ်းဝႃႉ UWSA လႄႈ တပ်ႉသိုၵ်းၸိုင်ႈတႆး RCSS/SSA ဢၼ်မီးလွင်ႈ ဢမ်ႇၶဝ်ႈၸႂ်ၵၼ်သေၾၢႆႇဝႃႉၵုမ်းဝႆႉသိုၵ်းတႆး 14 ၵေႃႉ လႄႈသူင်ႇႁႅင်း သိုၵ်းၶဵင်ႈတေႃႇသိုၵ်းတႆး ၼႂ်းပိုၼ်ႉတီႈ ၵိင်ႇၸႄႈဝဵင်းပုင်ႇပႃႇၶႅမ် ၸႄႈတွၼ်ႈမိူင်းသၢတ်ႇ ၸိုင်ႈတႆး ပွတ်းဢွၵ်ႇၶူင်း တႄႇဝၼ်းထိ 30/07/12 မႃး ။

ထၢမ် - လွင်ႈပၼ်ႁႃသိုၵ်းဝႃႉ UWSA လႄႈ RCSS/SSA မီးပၼ်ႁႃၵၼ်မႃးယူႇၶိူဝ်းၶိူဝ်းယႂ်းယႂ်းၼႆႉ လွင်ႈမၼ်းပဵၼ်ႁိုဝ်ဝႆႉၶႃႈ။

တွပ်ႇ - ပၼ်ႁႃၸၢဝ်းၶိူဝ်းၵေႃႈဢမ်ႇၸႂ်ႈ၊ ပၼ်ႁႃႁိမ်ၵၢၼ်ၵႃႉၶၢႆၵၼ် မိူၼ်မိူဝ်ႈပၢၼ် MTA ၵေႃႈ ဢမ်ႇမီး၊ ဢၼ်ပဵၼ်မႃးၼႆႉ ယွၼ်ႉပိူဝ်ႈ ၵူၼ်းလူင်ဝႃႉ ၾၢႆႇတပ်ႉၸုမ်း 171 ဝူၺ်ႇသႅဝ်ႇၵၢင်း ဢမ်ႇထတ်းသၢင်ၶၢဝ်ႇပႃႈတႂ်ႈလီလီ သမ်ႉမီးမႃႇၼသိုၵ်း၊ ၶဝ်ထၢင်ႇဝႃႈ ပေႃးဢဝ်သိုၵ်းၵႄႈလိတ်ႈၼႆ မၼ်းတေႁၢႆတေယဝ်ႉ၊ ဢဝ်သိုၵ်းလွၵ်ႇပိူၼ်ႈ ထၢင်ႇပိူၼ်ႈတေၵူဝ်၊ တီႈတႄႉမၼ်း ဢဝ်သိုၵ်း ၵႄႈလိတ်ႈ ဢဝ်သိုၵ်းလွၵ်ႇၵၼ်ၼၼ်ႉ မၼ်းဢမ်ႇၵႄႈလိတ်ႈ ပၼ်ႁႃသင်လႆႈ၊ ယိုင်ႈၶႅၼ်းထႅင်ႈပၼ်ႁႃၵူၺ်းၼႆ ၼၼ်ႉ ၸုမ်းဝႃႉၶဝ် ဢမ်ႇဝူၼ်ႉထိုင်ႁိုဝ်? ဢမ်ႇၼၼ်ဢမ်ႇႁူႉႁိုဝ်၊ ပေႃးဢဝ် သိုၵ်းတေႃႇသိုၵ်းမင်ၵၼ် ၽႂ်ၵေႃႈဢမ်ႇၽႂ်ယူႇ ယဝ်ႉ၊ ၵူၺ်းဢၼ်တေတုမ်ႉတိူဝ်ႉၼႆႉ ပဵၼ်ၵူၼ်းမိူင်းလႄႈ ၵူၼ်းသိုၵ်းဢွၼ်ႇ၊ ဢမ်ႇႁူႉသင်သေ တေၼႃႇတေတၢႆယွၼ်ႉ ၼၼ်ႉၵူၺ်းယဝ်ႉ၊

ၵွပ်ႈဢမ်ႇထတ်း ထွင်ၶၢဝ်ႇလီလီလႄႈ မိူဝ်ႈပီႊ 2005 ပဵၼ်ပၢင်တိုၵ်းၵၼ် တီႈလွႆတႆးလႅင်းၼၼ်ႉၵေႃႈ ၵူၼ်းလႆႈပဵၼ် တုၵ်ႉၶိတလႄႈတၢႆၵႂႃႇၼၼ်ႉ လီမွင်ၸႂ်ၸွမ်းတႄႉတႄႉ? မိူဝ်ႈၼၼ်ႉယွၼ်ႉဝႃႉၶဝ် ၼႄးဝႃႈ SSA ႁႅမ်တၢႆ ဢၢႆႈလႅင်း ဢၼ် တင်ႈႁူင်းယႃႈၽိၼ်ႇ (ႁေးလူဝ်းဢိၼ်း) တီႈၶၢင်ႉပႃၼၼ်ႉလႄႈ ပဵၼ်မႃးၵူၺ်း၊ သင်ဢုပ်ႇၵၼ်ၵေႃႈ မၼ်းယဝ်ႉၵႂႃႇယဝ်ႉ၊

ဝၼ်းထီႉ 23/3/2012 ပူၼ်ႉမႃႈၼၼ်ႉၵေႃႈ သိုၵ်းဝႃႉတိဢဝ်ၵူၼ်း၊ ၵွင်ႈလႄႈ ၸၢၵ်ႈလၢတ်ႈသိုၵ်းတႆး RCSS/SSA ၵႂႃႇ ထႅင်ႈတီႈ ထမ်ႈဝူဝ်း ၵိဝ်ႇၵေႃႇ၊ ဝၼ်းထီႉ 16-17/06/2012 သမ်ႉ ဢဝ်ဢဵၼ်ႁႅင်းသိုၵ်း 300 ပၢႆမႃးယႃႉႁူဝ်ႉ သူၼ်ၵူၼ်းမိူင်း တီႈႁိမ်းလွႆၵေႃႇဝၼ်းထႅင်ႈ၊ ထိုင်မႃးဝၼ်းထီႉ 30-31/7/2012 ဢဝ်ဢဵၼ်ႁႅင်းသိုၵ်း 150 ပၢႆ မႃးတိဢဝ်ၵူၼ်းသိုၵ်း SSA တပ်ႉၸုမ်း 727 တီႈပုင်ႇၽႃ ပုင်ႇတွင်းၵႂႃႇထႅင်ႈ 14 ၵေႃႉ ၵွင်ႈ 14 လဝ်း ၸၢၵ်ႈ 4 လုၵ်ႈ တေႃႇယၢမ်းၼႆႉ ယင်းပႆႇပွႆႇမႃး၊ ၸဝ်ႈႁၢၼ် တိုၼ်းၶိူဝ်း ပွႆႇၵူၼ်းၵႂႃႇဢုပ်ႇၵေႃႈဝႃႈ ဢမ်ႇႁပ်ႉဢုပ်ႇ လၢႆးႁဵတ်းၸိူင်ႉၼႆၼႆႉမိူၼ်တင်းပိုၼ်ၽၢဝ်ႇသိုၵ်းတေႃႇၵၼ် ယဝ်ႉ။

ထၢမ် - ပေႃးၼၼ် ၸဝ်ႈႁဝ်းသမ်ႉ တေၵႄႈလိတ်ႈပၼ်ႁႃၵၼ်ၸိူင်ႉႁိုဝ်ၶႃႈ?

တွပ်ႇ - မိူဝ်ႈလဵဝ်ၼႆႉ တိုၵ်ႉပဵၼ်ပၼ်ႁႃၵၼ် ၼႂ်းၼႃႈတီႈၵူၺ်းလႄႈ ႁႂ်ႈၼႃႈတီႈတေႃႇၼႃႈတီႈ ဢုပ်ႇၵၼ်ဢွၼ်တၢင်း ၵွပ်ႈတပ်ႉၸုမ်း 727 ၶွင် RCSS/SSA လႄႈ 171 ၶွင် UWSA လုၵ်ႈတပ်ႉၶဝ်ၵေႃႈ ႁူႉၸၵ်းၵၼ်ဝႆႉ ၶဝ်ၵေႃႈၶဝ်ႈဢွၵ်ႇၵၼ်ယူႇ၊ ယုမ်ႇယမ်ဝႃႈတေဢမ်ႇၸႂ်ႈပၼ်ႁႃယႂ်ႇ၊ သင်ဝႃႈ ၼႃႈတီႈ ဢမ်ႇႄၵႈလိတ်ႈၵၼ်လႆႈ ၶၢဝ်ႇတၢင်ႇၶိုၼ်ႈငဝ်ႈၸိုင်ႈၼၼ်ႉ တေလႆႈၼင်ႈပၢင်ၵုမ် ထၢမ်ၵၢင်ၸႂ်ၵၼ်ထုၵ်ႇလီႁဵတ်းႁိုဝ် တေဢဝ်ၵၢင်ၸႂ်လုၵ်ႈတပ်ႉလႄႈ ၽူႈဢွၼ်ႁူဝ်ၵမ်ႈၼမ်တႅပ်း တတ်းဝႃႈ။

ထၢမ် - ငိၼ်းဝႃႈ ဢၼ် RCSS/SSA ယွၼ်းမိူင်းတေႃႉ မိူင်းထႃးၼၼ်ႉ ၸုမ်းဝႃႉ UWSA ၶဝ် ဢမ်ႇလႆႈၸႂ်လႄႈ ၶဝ်ၸင်ႇ သၢင်ႈပၼ်ႁႃမႃး ၶိူဝ်းၶိူဝ်းယႂ်းယႂ်း ၸွင်ႇၸႂ်ႈၶႃႈႁိုဝ်?

တွပ်ႇ - ဢၼ် RCSS/SSA ယွၼ်းမိူင်းတေႃႉ မိူင်းထႃးၼၼ်ႉ တီႈတႄႉမၼ်း မၢၼ်ႈၵေႃႈ ယင်းပႆႇပၼ်ႁဝ်း၊ ၸုမ်းဝႃႉ UWSA ၵေႃႈ ၶဝ်ဢမ်ႇမီးဢႃႇၼႃႇ ဢမ်ႇမီးသုၼ်ႇမႃး ႁေႉႁၢမ်ႈလႆႈ၊ ဢၼ် မီးဢႃႇၼႃႇၵုမ်းၵမ် ၸိုင်ႈမိူင်းပဵၼ်လူင်ပွင်ၸိုင်ႈတဵင်းၸဵင်ႇ ၵူၺ်း၊ ယွၼ်ႉႁဝ်းၵိုတ်းယိုဝ်း ၵၼ်ယဝ်ႉလႄႈ ႁဝ်းၵေႃႈလူဝ်ႇၼႃႈတီႈပူၵ်းပွင်၊ မိူင်းထႃး၊ ႁူဝ်မိူင်း ပဵၼ်ၼႃႈတီႈၵဝ်ႇႁဝ်းမႃး ပၢၼ်သိုပ်ႇပၢၼ် မိူဝ်ႈလဵဝ်ႁဝ်းယွၼ်းၼႃႈတီႈလႆႈယဝ်ႉၵေႃႈ ႁဝ်းယင်းဢမ်ႇမီးၽႅၼ်ဝႃႈ တေလိုပ်ႈၶဝ်ဢွၵ်ႇ၊ ႁဵတ်းႁိုဝ်ၵေႃႈ ႁဝ်းပဵၼ်ၵူၼ်းမိူင်းလဵဝ်ၵၼ်လႄႈတေယူႇႁူမ်ႈၵၼ် ဝူၼ်ႉၼင်ႇၼႆဝႆႉယူႇ။

ထၢမ် - ဢၼ် RCSS/SSA တင်းလူင်ပွင်ၸိုင်ႈ တဵင်းၸဵင်ႇ ဢုပ်ႇဢူဝ်းၵၼ် တီႈၵဵင်းတုင် မိူဝ်ႈဝၼ်းထိ 19/5/2012 တေႁူမ်ႈၵၼ် ၽဵဝ်ႈယႃႈမဝ်းၵမ်ၼႆၼၼ်ႉ လွင်ႈၼႆႉၵေႃႈ ဝူၺ်ႇသႅဝ်ႇၵင်း ဢမ်ႇပေႃးၸႂ်၊ ၾၢႆႇၼိုင်ႈၵေႃႈ ၵူဝ်ႁူမ်ႈၵၼ်တင်း မၢၼ်ႈသေတိုၵ်းၶဝ်ၼႆႉ ၸွင်ႇပဵၼ်လႆႈၶႃႈႁိုဝ်?

တွပ်ႇ - ပဵၼ်တၢင်းဝူၼ်ႉၾၢႆႇလဵဝ် ၵူဝ်သေဝိရိယၵူၺ်း၊ တီႈတႄႉမၼ်း UWSA တီႈပၢင်သၢင်း ၵေႃႈ ႁပ်ႉႁွင်း ပေႃႇလသီႇ တဵင်းၸဵင်ႇသေ ၽဝ်ယႃႈမႃးယူႇလၢႆပွၵ်ႈယဝ်ႉ၊ သင်ဝႃႈၶဝ်ဝူၼ်ႉၵႂၢင်ႈႁၼ်ၵႆၸိုင် ႁူမ်ႈမိုဝ်းၵၼ်ၽဵဝ်ႈၼႄၵမ်ႇၽႃႇ၊ ၸွႆႈထႅမ် လူင်ပွင်ၸိုင်ႈ တဵင်းၸဵင်ႇ ႁႂ်ႈယႃႈမဝ်းၵမ်ႁၢႆၼႆၸိုင် ဢၼ်ဝူၺ်ႇသႅဝ်ႇၵင်းလႄႈၵူၼ်းလူင်ၼႂ်း UWSA ၶဝ် မီးမၢႆတိၵမ်ႇၽႃႇဝႆႉ ၼၼ်ႉ ယင်းတေၸၢင်ႈ လူတ်းယွၼ်ႇလူင်း၊ ၸုမ်း UNODC ၶဝ်မိူဝ်းႁူမ်ႈပၢင်သၢင်းၽဵဝ်ႈယႃႈမဝ်းၵမ်ၵေႃႈမီးမႃးယူႇ၊ ယွၼ်ႉၼၼ်လႄႈၶဝ်ၸၢင်ႈလူဝ်ၵူဝ်ႁဵတ်းသင်။

ဢၼ် RCSS/SSA ႁူမ်ႈလူင်ပွင်ၸိုင်ႈ တဵင်းၸဵင်ႇ ၽဵဝ်ႈယႃႈမဝ်းၵမ်ၼႆႉ ယွၼ်ႉႁၼ်ဝႃႈလူင်ပွင်ၸိုင်ႈတဵင်းၸဵင်ႇ ပိုၼ်ၽၢဝ်ႇဝႆႉ ဝႃႈ ပီႊ2014 ၼႆႉ တေႁႂ်ႈယႃႈမဝ်းၵမ်မူတ်းႁၢႆ ၊ ၾၢႆႇၼိုင်ႈႁဝ်းၵေႃႈ မီးပေႃႇလသီႇၽဵဝ်ႈမူၺ်ႉယႃႈမဝ်းၵမ်ဝႆႉယူႇလႄႈ ၼင်ႇႁိုဝ် ယႃႈမဝ်းၵမ်တေႁၢႆၵႂႃႇၼႂ်းမိူင်းႁူမ်ႈတုမ် ဝႆးဝႆးၼၼ်ႉ ႁဝ်းႁၼ်ဝႃႈလူဝ်ႇၸွႆႈလူင်ပွင်ၸိုင်ႈယူႇႁႅင်းၼိုင်ႈ၊ ၵွပ်ႈႁၼ်ဝႃႈလုၵ်ႈ ဢွၼ်ႇမိူင်းတႆးတိတ်းယႃႈမဝ်းၵမ်ၼမ်မႃး၊ ၼႂ်းၶၢဝ်းတၢင်းမိူဝ်းၼႃႈ လုၵ်ႈဢွၼ်ႇၸိူဝ်း ဢၼ်တေပဵၼ်ႁႅင်းၵႂႃႇၶၢဝ်းၼႃႈ ၼၼ်ႉၵူဝ်ဢမ်ႇမီး ႁၼ်ၼင်ႇၼႆလႄႈ ၸင်ႇႁူမ်ႈလူင်ပွင်ၸိုင်ႈၵူၺ်း၊ ႁဝ်းဢမ်ႇမီးၽႅၼ်ၼင်ႇဢၼ်ပိူၼ်ႈဝူၼ်ႉဝႃႈ တေႁူမ်ႈ မၢၼ်ႈသေတိုၵ်း UWSA ၊ ႁဝ်းပိုၼ်ၽၢဝ်ႇဝႆႉဝႃႈ တေယိူင်းဢၢၼ်းဢဝ် ၵၢၼ်ပူၵ်းပွင်သေၽဵဝ်ႈယႃႈၼႆၼၼ်ႉၵေႃႈ ပိုၼ်ၽၢဝ်ႇဝႆႉယူႇ။

ထၢမ် - ၸုမ်း UWSA ဝူၺ်ႇသႅဝ်ႇၵင်းၶဝ်ၼႆႉ မီးမၢႆတိၵမ်ႇၽႃႇဝႆႉလႄႈ ၶဝ် ၵူဝ်ၶႃႈႁိုဝ်? ႁၼ်ၸိူင်ႉႁိုဝ်ၶႃႈ?

တွပ်ႇ - ဢၼ်ၸုမ်း ဝူၺ်ႇသႅဝ်ႇၵင်းၶဝ် မီးမၢႆတိၵမ်ႇၽႃႇၼၼ်ႉမီးမႃးႁိုင်ယဝ်ႉ၊ မၼ်းပဵၼ်လွင်ႈၵမ်ႇၽႃႇႁဝ်းၵေႃႈဢမ်ႇႁူႉ ၸွမ်းတႄႉတႄႉ၊ သင်ဝႃႈႁဝ်းၽွမ်ႉၵၼ်ၸိုင်ပၼ်ႁႃၵၢၼ်မိူင်း၊ ပၼ်ႁႃယႃႈမဝ်းၵမ် ပၼ်ႁႃဢၼ်ၵမ်ႇၽႃႇ ဢွၵ်ႇမၢႆတိၶဝ်ၸိူဝ်း ၼၼ်ႉ မၼ်းၵေႃႈၸၢင်ႈၵႄႈလႆႈယူႇ။ သင်ဝႃႈ ဢမ်ႇၵႄႈလႆႈ ပၼ်ႁႃၵၢၼ်မိူင်းၸိုင်ပၼ်ႁႃယႃႈမဝ်းၵမ်လႄႈ ပၼ်ႁႃဢွၵ်ႇမၢႆ တိၸိူဝ်းၼၼ်ႉ မၼ်းၵေႃႈယိုင်ႈၶႅၼ်းတေယႂ်ႇၵႂၢင်ႈမႃး၊ ပၼ်ႁႃယႃႈမဝ်းၵမ်ၼႆႉမၼ်းၸၢင်ႈၶုတ်းႁၢၵ်ႈၶုတ်းႁူဝ်မၼ်းၵႂႃႇ ၸူဝ်ႈလုၵ်ႈပၢၼ်လၢၼ်ယဝ်ႉ။

ထၢမ် - ၵမ်ႈၽွင်ႈဝႃႈ ၶၢဝ်းယၢမ်းၼႆႉလူဝ်ႇႁႃငိုၼ်း ပေႃးမီးငိုၼ်းႁဵတ်းသင်ၵေႃႈလႆႈ၊ ပေႃးမီးငိုၼ်း ၸင်ႇမီးဢဵၼ်ႁႅင်းၸိူဝ်းၼႆႉ ႁၼ်ၸိူင်ႉႁိုဝ်ၶႃႈ?

တွပ်ႇ - ပၢႆးဝူၼ်ႉၵူၼ်းၵၢၼ်မိူင်းလႄႈၵူၼ်းၵႃႉမၼ်းဢမ်ႇမိူၼ်ၵၼ်၊ ပၢႆးဝူၼ်ႉၵူၼ်းၵၢၼ်မိူင်း ဢဝ်ၸိုဝ်ႈသဵင်မႃးဢွၼ်တၢင်း၊ ဢဝ်ၸိူဝ်ႉၸၢတ်ႈတၢင်ႇႁူဝ်ဝႆႉ၊ ဢဝ်ၽႅၼ်ႇလိၼ်ပဵၼ်တီႈပိုင်ႈၵွၼ်ႇ ၸင်ႇတေမၼ်ႈၵိုမ်းလႆႈ၊ ပေႃးဢဝ်ငိုၼ်းတၢင်ႇႁူဝ်ဢဝ်ၸိူဝ်ႉ ၸၢတ်ႈ ပဵၼ်ၶႃႈၸႂ်ႉ ဢဝ်ၽႅၼ်ႇလိၼ် ပဵၼ်ယုၵ်းယၵ်းၼႆၸိုင် မီးငိုၼ်းၼမ်ၵႃႈႁိုဝ်ၵေႃႈ ဢဝ်ၸႂ်ႉႁဵတ်းသင်ဢမ်ႇလႆႈ၊ ဢမ်ႇမီး ဢႃႇမၶၢမ်ႇသင်။ မီးငိုၼ်းယူႇၼႂ်းထမ်ႈ ၵႂႃႇလႂ်ၵေႃႈဢမ်ႇလႆႈၼၼ်ႉ မၼ်းဢမ်ႇမီးလွင်ႈသင်၊ ပေႃးၵူၼ်းမိူင်းမီးတၢင်းႁူႉ ပၢႆးဝူၼ်ႉ ၵၢၼ်မိူင်း ၽႂ်ဢမ်ႇထၢင်ႇယႂ်ႇၵူၼ်းမီးငိုၼ်းဢၼ်ဢမ်ႇထုၵ်ႇမႅၼ်ႈတြႃး၊ ပိူၼ်ႈၵူၺ်းၵူဝ်သေ ပၢႆႈယၢၼ်ၵႆၼၼ်ႉယဝ်ႉ။