ဝၢႆးတၢင်းၵၢၼ်မၢၼ်ႈပၢၵ်ႈပႅတ်ႈ၊ ဢမ်ႇမွပ်ႈပၼ်ၸၢႆးဢွင်ႇ မျၢတ်ႈ ၵေႃႉထုၵ်ႇၵုမ်းၶင်တီႈၵဵင်းတုင်ယဝ်ႉ ၶႄႇပွႆႇၽွင်း တၢင်ၶႄႇ မႃးၸွပ်ႇထၢမ်ထႅင်ႈ လွင်ႈၶႄႇၺႃးၶႃႈတၢႆ 13 ၵေႃႉ လႆႈထုၵ်ႇၶႃႈတၢႆၼႂ်းမႄႈ ၼမ်ႉၶွင်။

ဝၼ်းထိ 07/08/12 (မိူဝ်ႈဝႃး) ၽွင်းတၢင်လူင်မိူင်းၶႄႇ တင်းၽူႈၵွၼ်းတပ်ႉပလိၵ်ႈ ၼႃႈလိၼ်ၽွင်းငမ်း တူဝ်ၵဝ်ႇသိပ်းသွင် ပၼ်ၼႃး၊ ဢွၼ်ႁူဝ်ၵူၼ်း 6 ၵေႃႉ လုၵ်ႉၼေႇပျီႇတေႃႇ မႃးႁွတ်ႈၽႅဝ်မႃး ၵဵင်းတုင်၊ မႃးၸွပ်ႇထၢမ်ၸၢႆးဢွင်ႇမျၢတ်ႈ (ၵႅမ်ၸၢႆးၼေႃႇၶမ်း) တင်းၸၢႆးထုၼ်းၵလႃး မိူဝ်ႈဝႃးတင်းဝၼ်း၊ ၵူၺ်းၵႃႈ မိူဝ်ႈၼႆႉတႄႉ လႆႈငိၼ်းဝႃႈၽွင်းတၢင်လူင် လုၵ်ႉတၢင်းတႃႈၶီႈလဵၵ်းသေၶၢမ်ႈၵႂႃႇတၢင်း ၾင်ႇမိူင်းလၢဝ်း ၶိုၼ်း၊ မိူဝ်ႈၼႆႉၵေႃႈ ယင်းငိၼ်းဝႃႈၽူႈၵွၼ်းၾၢႆႇပလိၵ်ႈၼၼ်ႉ ဢွၼ်ႁူဝ်ၵူၼ်း 3 ၵေႃႉသေ တေၸွပ်ႇထၢမ် ၸၢႆးဢွင်ႇမျၢတ်ႈထႅင်ႈ- ၽူႈၸမ်ၸႂ်တူင်ႇဝူင်းၾၢႆႇႁူမ်ႇလူမ်ႈသိုၵ်း(ၸယၽ) လၢတ်ႈၼႄၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ။

မိူဝ်ႈဝၢင်းၶိူင်ႈၼၼ်ႉ ၸဝ်ႈၼႃႈတီႈမၢၼ်ႈထၢႆႇၶႅပ်းႁၢင်ႈဝႆႉ၊ ၶႄႇဢဝ်ၶႅပ်းႁၢင်ႈၼၼ်ႉ မႃးၼႄၸၢႆးဢွင်ႇမျၢတ်ႈ သေ ထၢမ်ဝႃႈ- ၼႂ်းၵူၼ်း 15 ၵေႃႉၸိူဝ်းၼႆႉ ၸွင်ႇပႃးၵေႃႉဢၼ်ၶႃႈၶႄႇ 13 ၵေႃႉ ၸိူဝ်းၼၼ်ႉတၢႆ။ ၸၢႆးဢွင်ႇ မျၢတ်ႈတွပ်ႇဝႃႈ ဢမ်ႇပႃးသေ ၵေႃႉ၊ ၵူၼ်းဢၼ်ၶႃႈတၢႆၼၼ်ႉမီးၼႂ်းထိူၼ်ႇ၊ ၶဝ်ဢမ်ႇမႃးၶဝ်ႈဝၢင်းၶိူင်ႈ။ ၶႄႇသိုပ်ႇထၢမ်ဝႃႈ- ၵူၼ်းဢၼ်ၶႃႈတၢႆၼၼ်ႉပဵၼ်ၽႂ် ၼႆၵေႃႈမၼ်းၸၢႆးဢမ်ႇတွပ်ႇ၊ ၵူၺ်းထၢမ်ၶိုၼ်းၶႄႇဝႃႈ ႁိူဝ်းၶႄႇဢၼ်ၶိုၼ်ႈလူင်းၵႂႃႇမႃးၸွမ်းၼမ်ႉၶွင် တင်ႈတႄႇပီ 2009-2011 ၼႆႉ ၸုမ်းႁဝ်းတိႁိူဝ်းၶႄႇလၢႆ လမ်း၊ ယႃႈမႃႉလၢႆမဵတ်ႉ၊ ယႃႈဢႆႊသ်လၢႆၵီႊလူဝ်ႊ၊ ယႃႈၶၢဝ်လၢႆၵီႊလူဝ်ႊ၊ မိူဝ်ႈလႂ်ဝၼ်းလႂ် ၸိူဝ်းၼႆႉလႄႈ ႁဵတ်းႁႂ်ႈၶႄႇၶဝ်ၸႂ်လမ်ၵႂႃႇၽွင်ႈ- ၵူၼ်းၸမ်ၸႂ်ၼႃႈႁိူၼ်းမၼ်းၸၢႆးၵေႃႉၼိုင်ႈလၢတ်ႈၼႄၼင်ႇၼႆ။

ၵဵဝ်ႇၵပ်းလွင်ႈၼႆႉ ၵူၼ်းၸမ်ၸႂ်ၼႃႈႁိူၼ်းၸၢႆးဢွင်ႇမျၢတ်ႈလႄႈ ၽူႈၸမ်ၸႂ်ပိဝ်ႇႁႃႇတႃႈၶီႈလဵၵ်းၵေႃႉ ၼိုင်ႈၵေႃႈ လၢတ်ႈဝႃႈ- ၸၢႆးဢွင်ႇမျၢတ်ႈၼႆႉ တွပ်ႇလၢတ်ႈတီႈၽူႈၵွၼ်းတပ်ႉပလိၵ်ႈ ၼႃႈလိၼ်ၽွင်း ငမ်းတူဝ်ၵဝ်ႇသိပ်းသွင်ပၼ်းၼႃးတၢင်းၵႂၢမ်းတႆး လိုဝ်ႉၵူၺ်း၊ ၶႄႇထၢမ်ဝႃႈ ပဵၼ်ၵေႃႉလႂ် ပဵၼ်ၽႂ်ၶႃႈ 13 ၵေႃႉၼၼ်ႉၼႆၵေႃႈ မၼ်းၸၢႆး ဢမ်ႇတွပ်ႇၵမ်းသိုဝ်ႈသေ တွပ်ႇဝႃႈ ႁိူဝ်းၶႄႇၼၼ်ႉ တၢင်ႇယႃႈမႃးလၢႆလၢၼ်ႉ မဵတ်ႉ၊ ယႃႈဢႆႊသ်လၢႆၵီႊလူဝ်ႊ ၸဵမ်ၸိူဝ်းၼႆႉၵူၺ်း၊ လွင်ႈဢၼ်ၶႄႇၺႃးၶႃႈတၢႆ 13 ၵေႃႉၼၼ်ႉ ဢမ်ႇလႆႈႁူႉၸွမ်း- ဝႃႈၼႆ။

ၵပ်းၵၢႆႇလွင်ႈၼႆႉ ၸဝ်ႈၼႃႈတီႈမၢၼ်ႈၶဝ်ၵေႃႈဢမ်ႇၶဝ်ႈၸိမ်သင်ၸွမ်း ၼႂ်းၵႄႈမၼ်း၊ လႅပ်ႈတေၶၢၼ်ႉႁၼ် ၸဝ်ႈၼႃႈတီႈ ၶႄႇၶဝ် ၵႆႉမႃးထဵတ်ႈထၢမ်ၸၢႆးဢွင်ႇမျၢတ်ႈၵေႃႈတေပႃး၊ ၵွပ်ႈဝႃႈ ၸၢႆးဢွင်ႇမျၢတ်ႈၼႆႉ ပဵၼ်ၵူၼ်းၵေႃႉဢၼ်ဢွၼ်ႁူဝ်ၵူၼ်း 15 ၵေႃႉမႃးဝၢင်းၶိူင်ႈၵွင်ႈၵၢင်ႇပၼ်သိုၵ်းမၢၼ်ႈ- ဝႃႈၼႆ။

တင်ႈတႄႇႁၢင်လိူၼ်ၵျူႊလၢႆႊ (2012)မႃးတေႃႇထိုင်ယၢမ်းလဵဝ် ၸဝ်ႈၼႃႈတီႈမၢၼ်ႈၶဝ်ၵေႃႈ ဢမ်ႇပေႃး ပေႃႉထုပ်ႉ ၸၢႆးဢွင်ႇ မျၢတ်ႈႁႅင်းယဝ်ႉ၊ ၵုမ်းၶင်မၼ်းၸၢႆးဝႆႉတီႈလုမ်းၾၢႆႇႁူမ်ႇလူမ်ႈသိုၵ်း (ၸယၽ) တီႈၵဵင်းတုင်သေ ပၼ်လုၵ်ႈလၢင်းမေး ၼၢင်းမၼ်းၶဝ်ႈႁူပ်ႉထူပ်း လႆႈယူႇ- ၵူၼ်းၸႂ်ၸမ်ၼႃႈႁိူၼ်းမၼ်း ၸၢႆးၵေႃႉၼိုင်ႈလၢတ်ႈၼႄ ၼင်ႇၼႆ။

ၸၢႆးဢွင်ႇမျၢတ်ႈၼႆႉ ၸိုဝ်ႈတႄႉႁွင်ႉဝႃႈၸဵၼ်းႁူင်၊ ဢႃႇယု 42 ပီ၊ ၵူၼ်းဝၢၼ်ႈၼမ်ႉၶိုမ်း ဢိူင်ႇမိူင်းလဵၼ်း ၵိင်ႇၸႄႈဝဵင်းတႃႈ လိူဝ်ႇ ၸႄႈတွၼ်ႈတႃႈၶီႈလဵၵ်း ၸိုင်ႈတႆးပွတ်းဢွၵ်ႇ။ ယၢမ်ႈႁပ်ႉၵိုတ်းၵၢၼ်သိုၵ်းၼႂ်း တပ်ႉသိုၵ်း မိူင်းတႆး MTA ဢၼ်ၸဝ်ႈ ၶုၼ်သႃႇဢွၼ်ႁူဝ်၊ ဝၢႆး MTA ဝၢင်းၶိူင်ႈၵွင်ႈၵၢင်ႇၵႂႃႇမိူဝ်ႈႁူဝ်ပီ 1996 ယဝ်ႉ မႃးပဵၼ်ႁူဝ်ၼႃႈထိ 2 ၶွင်ၸုမ်းပီႇတုၸိတ်ႉ ၸၢႆးၼေႃႇၶမ်း၊ ပီ 1996 ၸၢႆးၼေႃႇၶမ်း ဢွၵ်ႇၵႂႃႇတူင်ႉ ၼိုင် ၵုမ်းပွတ်းသၢမ်ၸဵင်ႇၶမ်းၵေႃႈ ၵႂႃႇႁူမ်ႈတူင်ႉၼိုင်ၸွမ်းၵၼ်၊ တေႃႇပေႃးထိုင်ၸၢႆးၼေႃႇၶမ်း ထုၵ်ႇတိ ၺွပ်းမိူဝ်ႈ ၼႂ်းလိူၼ်ဢေႊပရိူဝ်ႊလ်သေ တႅပ်းတတ်းဢွၼ်ႁူဝ်ၵူၼ်း 15 ၵေႃႉ ၶဝ်ႈဝၢင်းၶိူင်ႈၵွင်ႈၵၢင်ႇပၼ် မၢၼ်ႈ တီႈတႃႈၶီႈလဵၵ်း။

ၵႃႈပူၼ်ႉမႃး လွင်ႈၶႃႈၵူၼ်းၸွမ်းႁိူဝ်းၶႄႇ 13 ၵေႃႉၼႆႉ ၸၢႆးဢွင်ႇမျၢတ်ႈတွပ်ႇထဵင်မႃးတႃႇသေႇဝႃႈ ဢမ်ႇလႆႈ ၵဵဝ်ႇၶွင်ႈ၊ ဢမ်ႇလႆႈ ႁူႉၸွမ်းသင်၊ ၵူၺ်းၵႃႈ ၵမ်ႈၽွင်ႈသမ်ႉဝႃႈ ပဵၼ်တူဝ်ၸၢႆးဢွင်ႇမျၢတ်ႈလူင်းမိုဝ်းႁဵတ်း ၵမ်းသိုဝ်ႈ၊ ဢမ်ႇၸႂ်ႈၸၢႆးၼေႃႇၶမ်းႁဵတ်း။ ၸိူင်ႉႁိုဝ်ၵေႃႈယဝ်ႉ ၸၢႆးၼေႃႇၶမ်း ၵေႃႉၺႃးတိၼႂ်းမိူင်းလၢဝ်း ပွတ်းႁွင်ႇသေ ဝၢႆးလူင်ပွင်ၸိုင်ႈလၢဝ်းဢဝ်မွပ်ႈပၼ်လူင်ပွင် ၸိုင်ႈၶႄႇယဝ်ႉ သိုဝ်ႇၶႄႇတင်းသိုဝ်ႇထႆးႁၢႆး ငၢၼ်းဝႃႈ မၼ်းၸၢႆး ယွမ်းႁပ်ႉဝႃႈ ပဵၼ်ၼမ်ႉမိုဝ်းမၼ်းၸၢႆး ဢၼ်ၶႃႈၶႄႇ 13 ၵေႃႉ ၼႂ်းမႄႈၼမ်ႉၶွင် မိူဝ်ႈဝၼ်းထိ 05/11/11 ။