ၸုမ်းပဢူဝ်း PNLO ဢုပ်ႇဢူဝ်းလွင်ႈငမ်းယဵၼ်တင်း ၸုမ်းလူင်ပွင်ၸိုင်ႈတဵင်းၸဵင်ႇပူၼ်ႉမႃးဢမ်ႇႁိုင်ၼႆႉ ၼႂ်းဝၼ်းလဵဝ်ၵူၺ်း သွင်ၾၢႆႇလႆႈဢုပ်ႇၵၼ်ၸၼ်ႉၸႄႈမိူင်း တင်းၸၼ်ႉၸိုင်ႈမိူင်းႁူမ်ႈတုမ်သေ လႆႈၸႂ်လူင်းလၢႆးမိုဝ်း ၵၼ်တင်း 2 ၸၼ်ႉ။

ၼႂ်းဝၼ်းထိ 25/08/12 ၸုမ်းပူတ်းပွႆႇၸိူဝ်ႉၸၢတ်ႈပဢူဝ်း ဢုပ်ႇဢူဝ်းလွင်ႈငမ်းယဵၼ် ၵၼ်တင်းလူင်ပွင် ၸိုင်ႈ တဵင်းၸဵင်ႇ၊ ၸုမ်းၵေႃႇသၢင်ႈလွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် တီႈတူၼ်ႈတီးၼၼ်ႉ မီးၵၢၼ်ဢုပ်ႇဢူဝ်းၵၼ် ၸၼ်ႉၸႄႈမိူင်း လႄႈ ၸၼ်ႉၸိုင်ႈမိူင်းႁူမ်ႈတုမ်ၼင်ႇၵၼ်။ ၸၼ်ႉၸႄႈမိူင်း တူၵ်းလူင်းၵၼ် 5 ၶေႃႈ၊ ၸၼ်ႉၸိုင်ႈမိူင်းႁူမ်ႈတုမ် တူၵ်းလူင်းၵၼ် 8 ၶေႃႈ-ၼႆယဝ်ႉ။

ၶေႃႈလႆႈၸႂ်ၸၼ်ႉၸႄႈမိူင်း 5 ၶေႃႈၼၼ်ႉ 1.တေၵိုတ်းယိုဝ်းၵၼ် တင်ႈတႄႇဝၼ်းထိ 25/08/12 ၼႆႉၵႂႃႇ၊ 2.တေယူႇသဝ်းၼႂ်း ၼႃႈလိၼ် ဢၼ်တႅပ်းတတ်းဝႆႉလူင်ႈၼႃႈဢွၼ်တၢင်း၊ 3.ၼွၵ်ႈသေၼႂ်းၼႃႈလိၼ် ဢၼ်တတ်းမၵ်းဝႆႉ၊ တေဢမ်ႇလႆႈပႃးၵွင်ႈ ၵႂႃႇတၢင်ႇတီႈ၊ 4.တင်ႈလုမ်းၵပ်းသၢၼ် လႆႈတီႈတူၼ်ႈတီး၊ သီႇသႅင်ႇ၊ မွၵ်ႇမႆႇလူၺ်ႈဢမ်ႇပႃးၵွင်ႈပႃးၵၢင်ႇ။ (သထုင်ႇဢမ်ႇ လၢတ်ႈပႃး၊ ပေႃးလၢတ်ႈ ၸၢင်ႈပဵၼ်ၸၼ်ႉ ၸိုင်ႈမိူင်းႁူမ်ႈတုမ်၊ ၵွပ်ႈဢမ်ႇၵဵဝ်ႇမိူင်းတႆး)။ 5.တေၸတ်းတင်ႈၸုမ်းပိူဝ်ႈတႃႇဢုပ်ႇ ဢူဝ်းၵၼ် ၸၼ်ႉၸိုင်ႈမိူင်းႁူမ်ႈတုမ်- ၸိူဝ်းၼႆႉ။

ၶေႃႈလႆႈၸႂ်ၸၼ်ႉၸိုင်ႈမိူင်းႁူမ်ႈတုမ် 8 ၶေႃႈ- 1.တေသိုပ်ႇဢုပ်ႇဢူဝ်းၵႂႃႇ ၼင်ႇႁိုဝ်ၵၢၼ်ၵိုတ်းယိုဝ်းၵၼ် မၼ်ႈၵႅၼ်ႇလိူဝ်ၵဝ်ႇ၊ 2.တေၵပ်းသၢၼ်ၵၼ်ၵဵဝ်ႇၵပ်းဢၼ်တတ်းမၵ်းဝႆႉ ပိူင်ယူႇသဝ်း၊ ပိူင်တိတ်းတေႃႇ ၵပ်းသိုပ်ႇၼႂ်းဝူင်ႈၵၢင်သွင်ၾၢႆႇ။ 3.ပိူဝ်ႈတႃႇ တေတင်ႈလုမ်းၵပ်းသၢၼ်ၼႆႉ ယူႇတီႈၸုမ်းၵေႃႇသၢင်ႈ လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ်တေၸွႆႈထႅမ်ပၼ်။ 4.တေ သိုပ်ႇၵပ်းသၢၼ်ၵၼ်ပိူဝ်ႈတႃႇ တမ်းဝၢင်း တီႈယူႇသိုၵ်း PNLO/PNLA ။ 5.တေၵပ်းသၢၼ်ၵၼ် ၵဵဝ်ႇၵပ်းလွင်ႈႁူမ်ႈမိုဝ်းၵၼ် တိုၵ်းတေႃး ယႃႈမဝ်းၵမ်။ 6.တေၵပ်းသၢၼ်ၵၼ်ၵဵဝ်ႇၵပ်းလွင်ႈၵၢၼ်သိုဝ်ႇ (Media) ။ 7.တေၵပ်းသၢၼ်ၵၼ်ၵဵဝ်ႇၵပ်း လွင်ႈၶဝ်ႈ ၼမ်ႉ တၢင်းၵိၼ်၊ လွင်ႈၶူဝ်းၼုင်ႈတၢင်းဝႆလႄႈလွင်ႈတီႈယူႇတၼ်းသဝ်းၶွင်ၵူၼ်းသိုၵ်း။ 8.တေၵပ်းသၢၼ်ၵၼ်ၵဵဝ်ႇၵပ်း လွင်ႈႁူမ်ႇလူမ်ႈၵူၼ်းမိူင်းလႄႈ ၵၢၼ်ၽုၵ်ႇသွမ်ႈၶၼ်ႈပိုၼ်ႉထၢၼ် ၸိူဝ်းၼႆႉ။

ၽွင်းၸုမ်းပဢူဝ်း PNLO ဢုပ်ႇဢူဝ်းၵၼ်တင်းဢူးဢွင်ႇမိၼ်း ၵႅမ်ႁူဝ်ပဝ်ႈၸုမ်းၵေႃႇသၢင်ႈလွင်ႈငမ်းယဵၼ် ၸၼ်ႉၸိုင်ႈမိူင်း ႁူမ်ႈတုမ် လႄႈၸုမ်းၵေႃႇသၢင်ႈလွင်ႈငမ်းယဵၼ်ၸၼ်ႉၸႄႈမိူင်း